2008-12-22

Laskorainek 13-2 menderatu zuen Astraburuko taldea

Gabonetan Nazional B mailak izango duen hiru asteetako geldialdiari esker, lasaitasuna eta konfidantza hartzeko beta eskeini zitzaion Laskoraini joan den larunbatean Astraburuko talde bizkaitarraren aurka eskuraturiko garaipen argi bezain garrantzitsuaren ondorio legez.

Bilbotarrak, sailkapeneko postu erosoetan itsatsita aurkitzen dira eta joko dinamiko zein alaiean oinarritzen dute beraien eskemaren mamia. Tolosarrek bestalde, informazio guzti horren berri izaki, behar adinako konzentrazio eta seriotasunez hartu zuten erronka eta oraingoan ez zuten Usabalgo zalegoaren aurrean hutsik egin. Arerioaren saiakera gehiengoak ezereztatu eta kontraeraso bortitzean jokaturiko norgehiagoka eder bati esker hiru puntuak etxean gelditu bait ziren.

Lehen zatiak itxitako 6-2-ko emaitza da Alonsoren mutilek betetako erakustaldiaren adibiderik onena, Telleria, Barriola (4) eta Gilek egindako golei esker partidua maldan behera ipini bait zen 20 minutu bikainen ostean. Bigarren erdian, bilbotarrek gainera erortzeko erabakia hartu zuten horitxoek gehien laket duten moduan planteatu zelarik neurketaren azken txanpa. Murgi, Saldias(2), Amatriain, Ekhi(2) eta Gilek 13-2-ko azken zenbaketa ezarri zuten elektronikoaren segundu guztiak agortu zirenean, aipamen guztiak merezi eta erabateko gardentasuna azaltzen duen garaipen zabal bat borobilduaz.

Aipatzeke ezin utzi Barriola puxika margolariak egindako lau golak, edozeinek ez bait du “hat-trick”-aren muga gainditzeko ahalmena erakusten gaur egungo areto futbol modernoan. Endika atezain gazteak burututako norgehiagoka bikaina ere azpimarratu nahi da kronika honetan, bere lurraldea segurtasunez gordetzeaz gain, irteera aparta eman bait zion taldearen jokoari eskuz eginiko ateko sakeetan.

Etxeko azken bi partiduetan erakutsitako mailak, baikortasunerako lekua eskeitzen du eta oporraldi luze baten ondoren, min hartutako jokalariak berreskuratu eta datorren urte berriari gogoz ekiteko irrikitan dira Javi delegatua, Alonso entrenatzailea, Endika, Telletxea, Telleria, Murgi, Ekhi, Gil, Barriola, Saldias, Amatriain eta Urko jokalariak.

Filialari dagokionez 0-8 irabazi zuen Plaza Berri taldearen aurka, Saldias eta Javiren aginduetara dauden mutilek, txantxak alde batera utzi eta dagoeneko beste martxa bat sartu dutela dirudi.
Amatri

2008-12-15

Laskorainek 5 eta 4 galdu zuen Orion eta sailkapeneko goiko postuetatik urrundu da

5-4 galdu zuen Laskorainek pasa den larunbatean Orioko Karelan. Baleko partida osatu eta azken segunduraino borrokatu arren, amaieran 3 puntuak etxekoen alde erori ziren eta horitxoek esku hutsik itzuli behar izan zuten Tolosara.

Neurketa erakargarria suertatu zen zalegoarentzat, maila onekoa. Oriotarrek, sailkapeneko azken postu gorriek bultzatuta, beterano guztiak berreskuratu dituzte eta berriro ere, betiko lepotik burua, talde gogorra osatzen dute, oso langilea eta fisikoki ahaltsua.

Areto futbolean ohikoa den moduan, larunbateko neurketako lehen zatia ere bi taldeek arerioari neurria hartzeko erabili zuten, atzekaldean sendo ipiniaz defentsak aurkariaren jokua aztertu bitartean. Tolosarren huts bat profitatuaz, oriotarrek ireki zuten markagailua penaltiz eta ondoren Barriolak egin zuen banakoa atsedenaren aurretik, urtea joan urtea etorri Orion golarekin mantentzen duen hitzorduari eutsiaz.

Bigarren zatian aldiz Alonsoren mutilak garaipenaren bila kantxaratu ziren, jokoaren ekimenaren bila lotsagabe eta ateko eta alboko sakeak goian presionatu zituzten. Markagailuan birritan lortu zuten aurreratzea, Telletxea rockero zaharraren eta Saldias pitxitxiaren eskutik, 1-2 eta 2-3, baina bietan oriotarren erantzun azkarrarekin topatu ziren, berdinketa golak aurreratu eta minutu eskasera iritsi baitziren. Partida horitxoen aldera ez erortzearen kakoa hementxe kokatu daiteke.

Hirunakoarekin gainera, oriotarrek izango ziren 5-3 aurreratuko zirenak, errebote bidez sartutako bi golei eskerrak, baina zer axola du, eta azken uneraino borrokatuagatik, ez atezain jokalariaren estratejiak ez Barack Telleriaren laugarrenak, ezertxok ere ez zuen porrota saihestuko. Horitxoek gogoan dituzte oraindik amaierarako lau segunduren faltan izandako berdinketa aukera garbia eta piskat lehenxeago kanpora jaurtitako hamar metrotakoa.

Larunbat honetan, Santo Tomas bezperan, Usabalen Astraburukoren aurka urtea agurtu eta gero, ederki etorriko zaie gabonetako geldialdia ikastolakoei; jomuga doikuntza edo berrazterketa baten bitartez motibazioaren bateriak berriro ere berkargatzeko premia baitago.

Probintziaren bizkar hezur den Oria ibaiaren alderantzizko ibilbidea kopetilun eta burumakur egin zuten Javi delegatuak, Alonso entrenatzaileak eta Domentxe, Amatriain, Saldias, Telletxea, Gil -haserako bostekoa-, Telleria, Barriola, Murgi, Led eta Endika jokalariek.
Eski

2008-12-09

Laskorainek 6-1 menderatu zuen Iturriondo taldea

Azken asteetako emaitzek lagundu ez izanaren ondorioa dela eta, txapelketako oilar indartsuenetariko baten bisita jasotzeko orduan, bi aukeraketa egin ditzake talde batek tamainako arerio bat aurrean topatzen duenean. Ikusmuga lausotu batean aurkariaren oinetan uztarpetua izan, edota sinismenaren bitartez zezena adarretatik heldu eta konplexurik gabe etsaiaren aurrean oldartu.

Horitxoek oraingoan, bigarren hautapenaren alde egin eta Iturriondo boteretsuaren gainetik pasa ziren amorruz beteriko zapalgailu baten moduan, elektronikoak amaieran erakutsitako 6-1-eko azken emaitza motza ere gelditu litekeelarik. Alonso entrenatzaileak norgehiagoka guztiz bikaina planteatu zuen paperaren gainean eta laukote, defentsa eta eraso aldatzaileen lepotik, merezitako etekina atera zion neurketari.

0-1 galtzen hasi ziren ikastolakoak errebotezko kontraeraso batean bizkaitarrek egin bait zuten estraineko gola. Taldea hala ere, eroso zegoen kantxa gainean eta berehala iritsiko zen berdinketaren gola Otxoa gaztearen oinetatik 1-1-eko emaitzak aldagelaratu zituelarik bi taldeak lehen zatiaren amaieran. Bigarren erdia hasi bezain pronto Gilek aurreratu zituen etxekoak eta jarraiean Otxoak beste behin, eta Saldiasek hirutan eginiko sareratzeei esker 6-1-eko azken markagailua eskuratu zuten ikastolakoek.

Taldekide guztiek beteriko lan bikainari esker, balioz beteriko hiru puntuek taldearen animoak jasotzeaz gain, jokalari askoren goraipamena ekarri du, Telletxea eta Lander garrantzitsuen bajak gutxi nabarmendu bait ziren norgegiagoka osoan zehar. Ikastolakoen nagusitasuna ukaezina izan zen autobusetik hirugarren postuan jeitsi zen talde puska baten aurrean.

Saldiasek lorturiko hat-trick-a bezain pozgarria da Domentxe atezainak burututako partidua, atepean eskeinitako segurtasunak eta jokaldi erabakigarrietan eginiko bere gelditu ikusgarriek, antza denez, Donostiako “Bataplán” dantzalekuko fokuak piztu zirenaren murmurioa zabaldu zuten harmailetan.

Datorren astean Oriora egin beharko dute bisita horitxoek beste derbi gipuzkoar bati aurre egiteko helburuarekin, bigarren garaipena erreskan lortzeak, mahai gainean benetako golpe bat ematea suposatuko luke ligako lehen postuetara hurbiltzeko borroka oztopatu honetan.

Abenduko hilabeteak eskeinitako zubia pozarren hasi zuten larunbat goizean Usabalen garaile irtendako Javi delegatuak, Alonso entrenatzaileak, Domentxe, Amatriain, Barriola, Saldias, Otxoa, Murgi, Ekhi, Gil, Zabala, Telleria eta Endika jokalariek.
Amatri

2008-12-01

Laskorainek 4 eta 5 galdu zuen Elgoibarko Kenci taldearen aurka

Aurtengo Nazional B mailak eskeiniko dituen derbi gipuzkoar anitzetako beste bat ikusi ahal izan zuen joan den Larunbatean Usabalgo polikiroldegira gerturaturiko zalegoak, baina laskoraindarren filmeak orain artean eta gehiegi errepikatzen ari den gidoi berdinarekin jarraitzen du azken asteetako amaiera berbera errespetatuaz beste atal berri batean.

Dagoeneko jardunaldi ugari pasa dira eta tolosarren zoriak ez du aldatzeko arrastorik agertu oraindik, egoera onartu eta Alonso entrenatzaileak bere aginduetara duen tresneriarekin 180º-tako itzulipurdi bat lehen bait lehen ematea beste erremediorik ez zaio geratuko taldeari sailkapeneko ohorezko postuetara ahalik eta azkarren hurbildu nahi izatekotan. Epe motzerako helburuak finkatu eta puntuak berehala eskuratzea ezinbestekoa bait da denboraldiko sasoi garrantzitsu honetan.

Arerioa horitxoen antzeko maila ematen ari den Elgoibarko Kenci taldea izan zen, esperientzi haundiko jokalariez osatua, baina beste talde askoren moduan, puntu ahul dexente agertu zituena 40 minutuetan zehar. Etxekoek dena den, makina bat hutsune erakutsi zituzten denbora tarte horretan eta bisitariek ederki atera zuten etekina eskeinitako gakodun jokaldi guztien lepotik.

Modu horretan beraz, ikastolakoen aldeko 4-3-ko emaitzarekin aldagelaratu ziren bi taldeak lehen zatiaren bukaeran Ekhi, Joniko, Murgi eta Telleriak eginiko golei esker. Bitartean eta ohikoa izaten ari den moduan, kolore eta zapore guztietako aukera garbiak hutsegin ziren Elgoibarko atezainaren aurrean.

Bigarren erdian berriz, Alonsoren mutilek ez zuten golik egin eta Kencikoek aldiz, azken minutuetan elektronikoa biratu zuten 4-5-eko behin-betiko markagailua eskuratuaz.

Zorte txarrari, konzentrazio eta sinismen falta gehitzen bazaizkio, orokorrean porrota jasotzen da. Horrela laburbildu daitezke tolosarren larunbateko eta aurtengo norgehiagoken gehiengoa. Pulamentuzko gol bakar bat jaso gabe eta sinistu ezineko aukerak hutseginda kopetilun amaitu zutelarik partidua taldekide guztiek.

Datorren astean Iturriondo liderra jasoko dute horitxoek, garaipen batek konfidantza eta indarra emango dituelakoan daude, Javi delegatua, Alonso entrenatzailea, Domentxe, Telleria, Saldias, Murgi, Ekhi, Telletxea, Zabala, Amatriain, Gil, Joniko eta Endika jokalariak.

Bestelakoa da filialak hartu duen joera. Oraingoan, Errexil Taberna menderatu zuen 4 eta 2, Elola (2) eta Igartuaren (2) golei esker. Garaipen arratxa honen ondorioz, goiko postuetan kokatzen ari dira azkenaldian Andonik zuzentzen dituen mutilak.
Amatriain

2008-11-24

7-4 galduta esku hutsik itzuli zen Laskorain Portugaletetik

Aspaldiko neurketarik eskasena jokatu zuen Laskorainek joan den larunbatean Portugaleten eta aitzakiarik onartzen ez duen porrota pairatu zuen Jarrilleroseko beteranoen aurka. Defentsa lanean izandako arazoen erakusle da 7-4-ko azken emaitza mingarria.

Sailkapeneko goiko postuei eusteko puntu premian, ikastolakoak partidaren bila kantxaratu ziren eta arriskuak bereganatuaz goran presionatu zuten. Helburua baloiaren jabetza eskuratzea zen eta eraso posizionalean partidari erritmo altua ematea, horrexek baitzirudien garaipenerako biderik aproposena kalitatez aberats baina fisikoki behartsu agertzen zen Jarrillerosen aurka. Ustel irten ziren ordea.

Egia da presinaren ondorioz horitxoek izan zutela baloia denbora gehienean baina alfer alferrik izan zen, bi arrazoigatik. Batetik, baloiaren jabetza uste baino garestiago ordaindu behar izan zuten, portugaletekoak, eskarmentu handiko jokalariak izaki, komeni baino gehiagotan izan baitziren gai horitxoen presina gainditzeko eta gol aukera garbi garbiak sortzeko. Bestetik, baloia eskuratuta laskoraindarrek ez zuten eraso posizionalean behar bezela jokatzen asmatu, erditik saiatu baitziren behin eta berriz irtenbidea bandetatik zetorrenean eta berriro bizkaitarrek kontra argiak izan baitzituzten.

Partida amaieran Javi delegatuak ederki laburbiltzen zuen: “ustez erakargarria edo rentablea zirudien inbertsio batetarako (baloi jabetzarako) kostu bat ordainduaz (Jarrilerosekoen kontrak) apalankatu edo zorpetu egin gara eta erabat ustekabean maileguaren kostua inbertsioaren errentagarritasuna baino handiago izan da”. Horixe ba, bankarrota; ez dezala Zabala bankario berriak horrelako eragiketa asko egin bere lanpostu berrian.

Kontuak kontu, horitxoek erreakzio gaitasuna behintzat erakutsi zuten, hiru bider lortu baitzuten markagailua berdintzea atzetik ipini eta gero. 1-0-koaren ondoren Saldiasek egin zuen banakoa, 2-1-koaren ondoren Otxoak binakoa eta 4-2 ipini eta gero piskanaka piskanaka goruntz datorren Zubillagak eta Telletxea rockero zaharrak ekarri zuten launakoa. Baina hortxe gelditu zen dena eta azken minutuetako atezain jokalari estratejiak onura beharrean kalte gehiago ekarri zuen.

Aipatu bukatzeko, bajen madarikazioak beste jardunaldi batez ere indarrean dirauela. Barriolak, Murgik eta Amatriainek ez zuten Portugaletera badaiatu eta berragertzen ari zen Lander berriro lesionatu zen kantxaratu eta lau minutu eskasetara. Animo eta babesa guztioi, bukatuko da ditxozozko arratxa hau.

Kopetilun itzuli ziren Tolosara Javi delegatua, Alonso entrenatzailea, Eski material arduraduna eta Uribe, Zabala, Saldias, Telletxea, Otxoa –haserako bostekoa-, Telleria, Camio, Gil, Zubillaga eta Domentxe jokalariak.

Laskorainen bigarren taldeak txapelketako oilarretako bat den Donibane Pari Berri pasaitarrari 1 eta 3 irabazi zion Yustos, Elola eta Igartuaren golei esker eta hemendik aurrera asmo haundiagoko helburua izango du.
Eski

2008-11-17

Derbi ikusgarri batean Laskorainek 5-5 berdindu zuen Gipuzsalaren aurka

Derbi harrigarria ikusi ahal izan genuen pasa den larunbatean Usabalen. Osagaiak primerakoa edo labeldunak ziren: Nazional B mailako bi talde gipuzkoarrik onenak aurrez aurre, areto futbolaren bi ikerlari sutsu aulkitxoetan, iazko neurketaren ajea oraindik behar bezala irentsi gabe dutela erakusten zuten arpegiak harmailetan... Inork gutxik uste zuen ordea osagai hauekin berrogei minutuetan sukaldatutako platera hain bitxia eta gustagarria irtengo zenik, bigarren zati hasieran etxekoak 0-5 galtzen ipiniko zirenik eta ondoren partida 5-5 amaituko zenik. Gogoratu Vujadin Boskov: futbola, futbola da.

Neurketak bi fase oso desberdin izan zituen eta Watson doktoreak Sherlock Holmes-en laguntzarik gabe ere asmatuko lituzke: 0-5-erarte lehendabizikoa, zibilizatua edo buruarekin jokatutakoa, eta 0-5-tik 5-5-erakoa bigarrengoa, basatia edo bihotzarekin jokatutakoa.

Fase zibilizatuan bi taldeek buruarekin jokatu nahi izan zuten, aldageletako pizarran ikusitakoari jarraituaz eta arriskuak ongi neurtuaz. Ezaugarri nagusiena astigarragakoen 2-2 presinak horitxoei sortutako gehiegizko arazoak izan ziren. Etxekoek kanpotarren presina atzerago espero zuten eta ustekabean -estrainekoz denboraldi honetan- baloi jabetzarik gabe aurkitu ziren, ekimenarik gabe jokoan eta urduri ipini. Honela, atsedenaldian 0-1 aldagelaratu ondoren, bigarren zatiaren hasieran ume akats mordo bat pilatu zituzten eta gipuzsalakoek 0-5 aurreratzea lortu zuten.

Baina neurketari fase basatia edo bihotzarekin jokatutakoa gelditzen zitzaion oraindik, amaiera bitarteko 15 minutu zirraragarri. 0-5-eko unerik kritikoenean fase aldaketa eragin zuena Barack Hussein Telleria beltxarga izan zen, kasta eta teknika depuratua uztartuaz berak sartu baitzituen etxekoen lehendabiziko bi golak. Gol hauek azken asteotan hainbesteko isla mediatikoa izan duen leloa ekarri zuen horitxoen bihotzera, "YES WE CAN" oihu iparramerrikarra eta partida erabat aldatu zen. Hirugarren gola kasta eta teknika depuratuaz ere zertxobait badakien Barriolak egin zuen eta laugarrena eta bosgarrena aurreko bien patriarka edo aitalehenak, Telletxea rockero zaharrak. Seigarrena ez zen ez urruti ibili.

Aho zapore eztiko puntu banaketa honek laskoraindarrak zazpigarren uzten ditu sailkapenean, liderra zazpi puntutara dagoelarik eta bigarrengoa hirura. Nolahala, txapelketa hasi besterik ez denean egin, 22 jardunaldi falta direnean, kontu hauek ez dute esanahi handiegirik. Garrantzitsuagoa izango da talde horitxoarentzat eritetxean dituen jokalariak lehenbailehen berreskuratzea. Dagoeneko baja ziren Lander eta Murgiri, larunbatean Barriola gehitu zitzaien eskuin txonkatilaren bihurdura batekin.

Lehendabizi KO eta ondoren OK Javi delegatua, Alonso entrenatzailea, Eski material arduraduna eta Endika, Amatriain, Telletxea, Barriola, Saldias -haserako bostekoa-, Telleria, Zabala, Gil eta Zubillaga jokalariak ibili ziren.

Filiala, berriz, 5 eta 1 gailendu zitzaion Bilkoin Legorreta taldeari Elola (2), Legarra (2) eta Aitor Garcian golei esker eta pixkana taula erdiko postuetara begira jartzen ari da.
Eski

2008-11-10

Laskorainek 4 eta 1 galdu zuen Sasikoa taldearen aurka

Pasa den asteetan aipatu bezela, Azaroko hilabete honek froga gogorrak ezarriko dizkio Laskorain areto futbol taldeari eta joan den astean Goierriren kontra lehen oztopoa gainditu ondoren, Igandean Sasikoaren aurka esku hutsik itzuli behar izan zuten Alonsoren mutilek norgehiagoka serio eta zuzen bat jokatu izan arren.

Jakina da Sasikoa boteretsua aurtengo txapelketa irabazteko hautagai nagusienetarikoa dela, esperientzi haundiko taldea, Nazional A mailan aritutakoa eta jokalari bikainez hornitu dena. Datu zirraragarri hauek bestalde, tolosarren motibaziorako eragingarri bat izaten dira orokorrean eta oraingoa ere zezena adarretatik heltzeko asmoarekin bidaiatu zuen taldeak. Ez alferrik beraz, elastika horia jantzi, ukabilak estutu eta intentzio betean kantxaratu ziren jokalariak neurketa garrantzitsu honi aurre egiteko prest. Ikastolakoek planteaturiko hasiera benetan bikaina izan zen, defentsa serio eta erosoa, presio bortitza etxekoen ateko sakeetan eta gol aukera zenbaezinak sortuaz behin eta berriz aurkariaren ate inguruan.

Neurketaren kontrola goitik behera beregatu izanagatik, bizkaitarrak izan ziren 1-0-ekoa egingo zutenak zorte apur batekin eta errebotez sareratutako jokaldi baten ostean. Horitxoek berdin jarraitu zuten eta Zabala gazteak soberan merezitako berdinketa ezarri zuen elektronikoan 1-1-ekoa ezarriaz. Atsedenaldiaren aurretik Sasikoak 2-1-ekoa egin zuen falta jaurtiketa bati esker eta emaitza horrekin aldagelaratu ziren jokalariak.

Bigarren erdian laskoraindarrek gehiago arriskatu behar izan zuten, ondorio legez gol aukera anitzak sortzen jarraituaz, baina 3-1-ekoa etxekoen aldean erori zen beste behingoz. Azken uneetan Alonso entrenatzaileak atezain jokalaria kantxaratu zuen eta neurketa amaitzeko segundu gutxi batzuren faltan 4-1-eko azken gola lortu zuten bizkaitarrek.

Arerioaren maila altua izan daiteke zergatietako bat, baina Laskorainek norgehiagoka hau galdu izanaren errudun nagusiak ate aurrean huts egindako gol aukera garbi eta ugariak dira inungo ezbairik gabe. Aurtengoan eta orain arte azken metroetan erakutsitako zehaztasun falta kezkagarria izaten hasi da dagoeneko, eta Igandean garbi azaldu bezala, Sasikoaren tamainako taldeek ez dute barkazioetarako aukerarik lagatzen.

Javi delegatua, Alonso entrenatzeilea, Endika, Amatriain, Telletxea, Saldias, Gil, Lander, Ekhi, Zabala, Joniko, Telleria eta Domentxe izan ziren Durangon.

Filialak, ezin izan zion arratxari eutsi eta 3 eta 2-ko emaitza estu bategatik galdu zuen Lezoko Allerru Jaizkibelen aurka.
Amatriain

2008-11-03

Laskorainek 5 eta 4 kostata irabazi zuen UZ S. Coop. urretxuarraren aurkako derbia

Derbi bizi eta orekatua ikusi ahal izan zuten pasa den larunbatean Usabalera hurbildutako zaletuek. Laskorainek sailkapeneko azken postuetan dabilen UZ S. Coop. urretxuarraren bisita jaso zuen eta aurrez amestu baino arazo gehiagorekin izan bazen ere hiru puntuak Tolosan gelditu ziren. Gorabeherez josiriko berrogei minuturen ostean 5 eta 4-koa izan zen azken emaitza.

Partida oso bihurria suertatu zen horitxoentzat. Sailkapeneko mamuak uxatu nahian edo, urretxuarrak lanerako eta sufrimenturako prest etorri ziren Usabalera, konzentrazioz gainezka, eta ahalegin fisiko eskuzabala burutuaz oso neurketa serioa jokatu zuten. Taktikoki, jokoaren ekimena laskoraindarrei utzi eta atzekaldean kokatu ziren, kontraerasora min egiteko eta baloi geldituko estratejiari zukua ateratzeko asmo eta itxaropen argiarekin.

Orain arteko jardunalditan ohikoa bihurtu den moduan Alonsoren mutilek ez zioten muzin egin partidaren ekimena hartzeari eta larunbaten ere baloiaren jabetza beraiena izan zen. Egia esateko partida ederki ulertu zuten eta eraso posizionalean pazientziaz aritu ziren urretxuarren defentsa zonalaren aurka. 3-1 eta 2-2 kokapenak txandakatuaz gol aukera dezente sortu zituzten gainera, baina ikastolakoak ate aurreko punteria kamustuta dabiltza aurtengoan.

Nola lehen zatian hola bigarrenean bi taldeek bakoitzaren rolari inongo aldaketarik gabe eutsi zioten eta partidak ere berean iraun zuen berrogei minututan zehar. Ikastolakoen aldeko markagailu batek dena aldatu izango zuen seguruenik baina ez zen horrelakorik gertatu. Estraineko gola urretxuarren alde erori zen kornerreko estratejian eta Telletxeak bi golekin etxekoak aurreratu bazituen ere, hurrengo jokaldian eta berriro korner baten bidez urretxuarrek binakoa sartu zuten.

Atsedenaren ondoren ere urretxuarrak izan ziren 2 eta 3 aurreratu zirenak kontra bat aprobetxatuaz eta Gil TDI-ren hirunakoaren ondoren beste kontra batean 3 eta 4 ere berriro aurreratu ziren. Minutuak aurrera partidak gero eta zailagoa zirudien laskoraindarrentzat, baina baloi jabetzak eta eraso posizionaleko pazientziak azkenean ekarri zuen fruturik. Barriolak egin zuen launakoa eta hanka orpoko arazoak zaintzeko zinta ikusgarri batekin jokatu zuen Telletxeak sinatu zuen azken 5 eta 4-koa hat-tricka osatuaz. Rockero zaharrak ez dira ez berehala desagertzen.

Murgiren lesioarekin batera, txonkatila bihurritu zuen, partidako albiste txarrena neurketaren hondarrean amaierarako lau segunduren faltan etorri zen. Barriola eta urretxuar baten arteko hikamika batek -ez zen beste munduko ezer izan, futbolean astero gertatu ohi den jokaldi horietako bat besterik ez- sekulako zalaparta sortu zuen, aulkitxoetako jokalari guztiak kantxaratu zirelarik eztabaida eta bultzakada artean murgilduaz. Norbaiti tokatu behar eta Barriola eta Alonso entrenatzailea expulsatuak izan ziren urretxuar jokalari batekin batera.

Tamalgarriena zera da, laugarren kokatu eta gero Laskorainek datorren bi jardunalditan sailkapeneko bigarrenaren eta hirugarrenaren aurka jokatu beharko duela eta partida garrantzitsu horiei baja dezenterekin egin beharko diela aurre. Larunbatean Usabalen Javi delegatua, Alonso entrenatzailea eta Endika, Barriola, Saldias, Gil, Amatriain -haserako bostekoa-, Telleria, Telletxea, Murgi, Zabala, Zubillaga eta Urko jokalariak irten ziren garaile.
Eski

2008-10-27

Laskorainek 3 eta 4 irabazi zuen Tecuni Bilboren aurkako norgehiagoka

Berebiziko garrantzidun emaitza eskuratu zuen Laskorainek joan den Igande goizean Bilboko San Ignacio polikiroldegian jokaturiko neurketatik garaile irtetearen ondorioz. Aurkariak, zilarrezko mailan aritzen den Tecuni taldearen filialak hain zuzen ere, ilusio betea diren jokalari gazte, iaio eta biziez josi ditu aurtengo bere lerroak. Ezaugarri positibo hauek dena den, txanponaren beste aldea izkutatu nahi izaten dute sarritan eta oraingoan, bizkaitarren esperientzi falta laskoraindarren mesedegarri bilakatu zen.

Emaitzaren estutasunak, norgehiagokak izandako nondik norakoarekin talka egiten du, goitik behera eta erabateko gardentasunez nagusitu bait ziren Alonsoren mutilak partida osoan zehar. Sareratzeak dira hala ere azken finean puntuak pilatzeko bide bakarra eta larregi sufritu behar izan zuten ikastolakoek hiru puntuak poltsikoratzeko. 0-1-ekoa Telleria zilarrezko beltxargaren eskutik etorri zen horitxoek ordurarte egindako hamaikagarren golaukeraren ondoren. Taldeak kokapen egokia agertu zuen ordurarte, baina baloiak ate barruan sartu nahi ez izanak eta lehen zatian defentsan izandako desdoikuntza bakar batek 1-1-ekoarekin aldagelaratu zituen jokalariak.

Bigarren erdian, tolosarren monologoak bere horretan jarraitu zuen eta aukera sinestezinak popatik bota ostean, Zabalak aurreratu zituen gureak 1-2-ko estu eta motz bat ezarriaz elektronikoan. Arerioaren taupadek ozenki pilpiratzen zuten oraindik eta futbolaren munduan barkazioek matxinadaren erantzuna berehala jasotzen dutenez, bi jokaldi inozoetan 3-2 aurreratu ziren etxekoak 4 minuturen faltan. Alonso entrenatzaileak atezain jokalariaren taktika ipini zuen jarraiean eta Zabala eta Telletxeak markagailuari buelta eman zioten, 3-4, partidua amaitzeko minutu bat besterik gelditzen ez zenean.

Eskuratutako garaipenak, erreskan erdietsitako hirugarrena zenbatzen du eta goraka begira jartzen ditu ikastolako mutilak. Datorren astean Goierri taldeak bisitatuko du Usabalgo polikiroldegia, Azaroko hilabete gogorrak izango dituen posta gogaikarrietako lehenengoa izango delarik beste derbi gipuzkoar berri hau.

Igandean Bilbon, Javi delegatua, Alonso entrenatzailea, Endika, Amatriain, Telletxea, Saldias, Ekhi, Lander, Murgi, Zabala, Telleria eta Barriola izan ziren garaipenaren protagonistak.

Filialari dagokionez, 9-1 garaitu zuen Tecnun taldea, Elola (5), Igartua, Maka, Barrio eta Jonikoren golei esker.
Amatriain

2008-10-24

5. Jardunaldia: Tecuni Bilbo - Laskorain. Aurrekoa

Hilabete pasatxo darama txapelketak martxan eta igande honetan izango du lehenengoz Laskorainek autobusean bidaiatu beharra, Bilboko San Ignazioko polikiroldegiari urtero legez zor dion bisita egiteko hain zuzen ere.

Urtero diogu, bertako anfitrioia den Tecuni Bilbo, Laskorainen moduan, kategoriko talde beteranoetariko bat delako. Baina oraingoan, kantxak eta taldeak duten solera ez da jokalariengan isladatuko, jubenil ohiez eta gaztetxoz osatuta bait dago.

Ditugun erreferentziak ez dira egun sailkapenean duten postuarekin bat etortzen. Baloia zaintzeaz gain, joku alaia egiten saiatzen den taldea dugu eta hori beti da eskertzekoa zalegoarentzat.

Ikastolakoak berriz, atezain bakarrarekin joango dira Mikel bi astez entrenatu ez eta oraindik sasoiko ez dagoelako. Joseba eta Jon ere baja dira igande goizez 11:30-tatik aurrera jokatuko den partidarako.

Deialdia, Usabalen igandean goizeko bederatziak laurden gutxiagotan da eta bertara, Jorge eta Javirekin batera, Amatriain, Barriola, Camio, Murgi, Sadias, Telleria, Telletxea, Uribe, Zabala eta Zubillaga azaltzekoak dira.

Gogoratu, larunbat gauean, erlojuak ordubete atzeratu behar direla !!!

2008-10-20

Laskorainek 7 eta 2 hartu zuen mendean Ortziri bizkaitarra

Goiz parte erosoa igaro zuen Laskorainek pasa den igandean Usabalen. Txapelketa hasiera honetan arazo dezente pairatzen ari den Ortziri talde bizkaitarraren bisita jaso zuten horitxoek eta motorra gehiegi estutu gabe erraz nagusitu ziren 7 eta 2.

Neurketak ez zuen mami lodiegirik izan. Konparaketa bat egitera ausartzekotan neurketa Enyaren melodia bat bezain armoniatsua eta lasaigarria suertatu zen, krisi garai hauetako estresa borrokatzeko sendagai paregabea eta zalegoak ederki eskertu zuen.

Epaileek hasiera adierazi eta minutu batetara sartu zuen Saldias pitxitxiak etxekoen estrainekoa eta Landerren bigarrengorako hamabost minutu itxaron behar izan baziren ere inortxok ez zuen zalantzan ipini etxekoen nagusitasuna eta garaipena. Atsedenaren aurretik Barriolak sartu zuen gainera hirugarrena, jeinu guztiek duten rebeldia ttantta horrekin.

Bigarren erdian Otxoa ibartarra izan zen Laskorainen laugarrena sareratu zuena Ortzirikoen lehenengoaren aurretik. Bisitarien bizi seinale apal honen ostean ordea ikastolakoek minuturik onenak jokatu zituzten, Alonso entrenatzailearen pizarra gogoan merituzko jokaldi ederrak burutu zituztelarik. Ondorioz, udazkenean San Frantzisko pasealekuko platanondoetatik ostoak erortzen diren bezelaxe erori ziren golak, grabitatearen lege futbolistikoaren eraginez eta Telletxearen, Murgiren eta Telleriaren hanketatik. Klase handiko golak hirurak gainera. Amaierako 7 eta 2-koa azken minutuan sartuko zuten bizkaitarrek.

Esan bezela tolosarren artean zazpi golegile izan genituen gol banarekin, aipagarria benetan, eta beraien artean bat azpimarratzekotan Murgirekin gelditu behar. Laskoraineko mirakusak partida aparta borobildu zuen eta bere jokoan hazitzen ari dela frogatu zuen areto futboleko erraldoi bat bihurtu daitekeelarik oso laister.

Gola sartu ez zutenen artean ere izan zen protagonistarik. Azken jardunaldietan baino minutu gehiagoz gozatu zuen Amatriain taldeko birikak ere partida bikaina burutu zuen, joko dinamikoa erakutsiaz aginte dohainarekin batera taldea kokatzeko orduan.

Bi garaipen erreskan eskuratuta Laskorain zazpi punturekin seigarren kokatu da jada sailkapenean, baina hau hasi besterik ez da egin 26 jardunaldi gelditzen baitira aurretik, Bilboko San Ignacion hurrengoa.

Usabalen Javi delegatuarekin eta Alonso entrenatzailearekin batera, Endika, Amatriain, Telletxea, Saldias, Barriola -haserako bostekoa-, Telleria, Kamio, Gil, Murgi, Otxoa eta Zabala jokalariak atera ziren garaile.
Eski

2008-10-17

4. Jardunaldia: Laskorain - Ortziri. Aurrekoa

Aurten estreinekoz, igande eguerdian jokatuko du Laskorainek orain arte punturik pilatu ez duen talde bakarraren aurka, Ortziri Comodon bilbotarren aurka hain zuzen.

Ohizko ordutegian ez jokatzeagatik eta arerioa mailako ahulenetakoa izanagatik ere- iaz bi partidak irabazi zitzaizkion-, konzentrazioz lepo irten beharko dute tolosarrak Usabalgo oholtzara eguerdiko 12:00-etatik aurrera ekingo zaion partidan.

Astea, entrenamenduei dagokienez, ondo joan da, gogo eta intentsitate onarekin. Hauen ondorioz, ordea, Ekhik eta Landerrek min hartuta utzi behar izan zuten asteazkeneko saioa, lehenengoari partidurako errekuperatzea ezinezkoa egingo zaiolarik. Lander, berriz, Jorgeren aginduetara izango da deialdia honela osatuz: Amatriain, Barriola, Camio, Gil, Murgi, Otxoa, Saldias, Sanz, Telleria, Telletxea, Uribe eta Zabala.

Beraz, igandean, denak Usabalera. Animatu!!!

2008-10-13

Laskorainek 3-5 irabazi zuen Andoainen jokatutako derbia

Ondo sufrituta eta azken unean izan bazen ere, berebiziko garrantzia zuen garaipena eskuratu zuen Laskorainek joan den larunbatean Nazional B mailan estraineko urtea duen Andoaingo Euskalduna talde gogorraren aurkako derbian.

Andoaindarren egungo gidaria eta ikastolakoen entrenatzaile ohia izandako Jacinto Díaz-ek gerlariz betetako talde bortitza pilatu du azken bi denboraldietan, joan den urtean etxean partidurik galdu gabe igoera lortzeaz gain, aurtengoan ere barrerik ekingo ez zaionaren mezua argi azaldu duelarik. Ideia garbiak eta tresneria arriskutsua azaldu zituen arerio baten etxean bereganatutako garaipen honek azken asteetako mamuak uxatzeko baliagarri bikaina izan behar luke Alonsoren mutilentzat.

Norgehiagoka berehala ipini zitzaien maldan gora tolosarrei, 1-0 aurreratu bait ziren etxekoak erasoko jokaldi bati bigarren zutoinean bukaera eman eta gero. Horitxoek bestalde, minutu gehienetan jokoaren ekimena eramanik, berehala egingo zuten berdinketa Telleria zilarrezko beltxargaren eskutik. Lehenengo zatiko aukera gehienek soineko horia eraman arren, andoaindarren labanak zorrozturik jarraitzen zuen, eta bi taldeetako atezainen lan onak 1-1-eko isladapenarekin eten zuten markagailua atsedenaldian.

Bigarren erdian, Alonsoren mutilen jokoa gehiago gailendu eta Zabala eta Telletxearen golak zirela medio, 1-3-ko emaitza igo zen elektronikora. Minutu luzeak ziren oraindik jokatu beharrekoak.

Jostaketa eta lehiaketaren arteko bereizketa ezagutzea ezinbestekoa da garaipenak eskuratzeko garaiean, heldutasuna izaten delarik lehiaketarako baliabiderik errentagarriena. Horitxoek arlo honetan kale egin eta 3-3-ko barkaezin bat oparitu zuten jostaketa minutu batzuren ondorioz.

Era berean, heldugabetasuna da orokorrean jostaketa irrikekin batera loturik doan ezaugarririk nagusiena. Orokorrean diogu, larunbatean Laskorainen atean maixuki aritu zen Endika atezainak teoria horren edukina popatik bota bait zuen, bere azken minutuetako gelditu ikusgarriek balioztatu zituztelarik Barriola eta Camioren ondorengo sareratzeak. “Lehiaketa” hitzaren esangura bere osotasunean ulertu zuen 19 urteko atezain laskoraindarrak, 3-5-eko azken emaitza berak bakarrik eta bere kabuz ahalbidetuaz.

Gogotik sufritutako garaipena Javi delegatua, Alonso entrenatzailea, Endika, Amatriain, Saldias, Barriola, Camio, Telletxea, Zabala, Murgi, Gil, Ekhi, Telleria eta Sanz jokalarientzat.
Amatriain

2008-10-10

3. Jardunaldia: Aurrekoa

Bigarren irteera eta bigarren derbia. Andoaingo Euskalduna bizilagunaren aurka neurtu beharko ditu indarrak Laskorainek oraingo honetan, bihar larunbata arratsaldeko zazpiak eta laurdenetatik aurrera.

Bi taldeen arteko lehiak ohikoak izan dira urteroko aurredenboraldietan- urrutira joan gabe, duela hilabete, 1-3 gailendu ziren andoaindarrak Usabalen-, baina oraingoan ligako partida ofiziala izango da, hots, hiru puntu garrantzitsu jokuan bien puntu premia kontutan hartuta.

Tolosarrak kementsu aritu dira astean zehar, egoerari lehen bai lehen itzulipurdia eman nahi diote, eta horretarako biharko partidan garaipenaren bila irtengo dira hasieratik.

Deialdian Ekhiren presentzia da berri nagusia, Jon lanarengatik joan ezin eta zerrendatik "erori" bai da. Bestalde, Mikel Sanz atezaina, besoan mina zuela utzi zuen azkeneko saioa eta azken ordurarte zalantza izango da. Deialdia: Amatriain, Barriola, Gil, Kamio, Murgi, Saldias, Sanz, Telleria, Telletxea, Uribe, Zabala eta Zubillaga.

2008-10-07

Laskorainek 4 eta 4 berdindu zuen Usabalen Ancla Dosanpor sestaotarraren aurka

Uztaila amaieran Euskal Futbol Federazioak bere web orrian denboraldi berriko egutegia zintzilikatu zuen unetik zekien Laskorainek lehen jardunaldi gogorrak egokitu zitzaizkiola, beraien artean antza ikaragarria duten hiru aurkari arrokatsu izango zituela kurtso berria agurtzeko. Inork susmatzen ez zuena ordea zera zen, ustegabeko etsai bat gehituko zitzaiola itsasontzi horitxoari, momentuz behintzat proatik eta bortitzegi datorren zortearen haize kapritxosoa.

Horrelaxe da. Orain arte Laskorainek jokatu dituen bi neurketak ikusi dituenak lasai esan dezake ikastolakoek joko onarekin ekin diotela txapelketari, taktikoki bere bi aurkariak ongi menperatu dituztela, iniziatiba eta baloi jabetzan erraz nagusitu direla eta ondorioz lau edo sei puntu behar lituzketela sailkapenean. Arrazoiz beteriko ondorioa da azken hau, baina faltsua tamalez, errealitatea oso bestelakoa bait da eta zaku horitxoan larunbatean Usabalen Ancla Sestaotarraren aurka eskuratutako puntu bakarra baitago.

Aurreratu moduan larunbatean nabarmena izan zen horitxoen nagusitasuna jokoari dagokionean, eztabaidarik ez dago horretan, baina area barruko jokaldietan isladatzen asmatu ez zenez nagusitasun hori alferrikakoa bilakatu zen bigarrengo astez eta markagailuaren gorabeherak beste lojika bat jarraitu zuen. Partida hasieran bizkaitarrek sartu zuten estraineko gola kontra batean, baina horitxoek aitaren batean eman zioten arraultzopilari itzulipurdia Saldias pitxitxiaren bi goli eskerrak. Tolosarrek aldea areagotzeko aukera franko gozatuagatik ere, bi minutuko superioridadea barne, 2 eta 1-koarekin aldagelaratu ziren atsedenaldira.

Berrasieran, partidak kontrolpean zirudienean, bizkaitarrek berdinketa lortu zuten kanpoko jaurtiketa baten bitartez eta beranduxeago, Telleriaren zutoinkada baten jarraipenean eta karanbola bat aprobetxatuaz 2 eta 3-koa ere sareratu zuten. Kolpea ikaragarria zen baina horitxoek bikain erreakzionatu zuten eta berriro ere estu hartu zituzten sestaotarrak ondorengo minutu luzez. Gil TDI-ri gol bat anulatuko zieten epaileek, abantaila legea existitzen dela ahaztuta edo, baina Lander Camiok hirunakoa ipiniko zuen gol ikusgarri batekin eta Saldiasek hat tricka sinatuko 4 eta 3-koarekin. Zailenak egina zirudien, baina atezain jokalariaren estratejiarekin bizkaitarrek launakoa sartuko zuten amaierarako 20 segunduren faltan eta Sanzen merituzko geldituak saihestuaz. Puntu banaketa finean.

Etxekoetan goraipatu nola ez Saldiasen hiru golak -lau egin ditu dagoeneko bi jardunalditan iazko Nazional Bko pitxitxi handiak- eta Camio eta Sanz aurtengo fitxaketen errendimendua. Landerrek partida ederra borobildu zuen jokaldi bikainak burutuaz eta 2 eta 3-koarekin bera izan zen erreakzioaren protagonista nagusi taldearen erantzunkizuna bere gain hartuaz. Sanzek aldiz partida txukuna burutu zuen orokorrean, hilabete dezenteko geldialdiaren ondoren baleko maila ari delarik ematen.

Kolpeak kolpe, eta bi jardunalditan bi gogor xamar jaso dira, taldeak ezin du inolaz ere konfiantza eta patxada galdu, tentsio eta antsietateari leku eginez. Merkatu finantzarioetan ezezik kirol lehiaketan ere altxor preziatua da konfiantza ez galtzea eta taldeak bi jardunalditan erakutsi duen solbentzia horretarako adinakoa da. Emaitza onen ondorioz etortzen direla konfiantza eta patxada? Egia galanta, baina alderantzizkoa ere, konfiantza eta patxadak ekartzen dituela emaitza onak alegia, ez da gezurra.

Usabalgo palkoa presiditu zuen Jone Urteaga ikastolako zuzendariarekin batera, Javi delegatua, Alonso entrenatzailea eta Sanz, Amatriain, Barriola, Saldias (3), Gil -haserako bostekoa-, Telletxea, Telleria, Camio (1), Murgi, Otxoa, Zabala eta Endika jokalariak izan ziren larunbatean Laskorainen ordezkari.
Eski

2008-09-29

Laskorainek 3-2 galdu zuen 2008-09 denboraldiko lehen partiduan

Duela bost aste hasitako aurredenboraldi lanpetsu eta gogorrari jarraipen egokia emateko aukerari ihes egiten laga zion Laskorain areto futbol taldeak larunbatean, Lezoko Bekoerrota polikiroldegian Aierru Algeposa aurkariaren kontra esku hutsik bueltatu izanaren ondorioz.

Egindako merezimenduei erreparatu ezkero, Alonsoren mutilek larregizko zigorra jasan zutela esan genezake, izan ere, makina bat abagune gardenen jabe izaki, tolosarrek norgehiagokaren kontrola eraman bait zuten behin eta berriz. Dena den, kirol honetan puntuak ez dira zirraren arabera banatzen eta etxekoek, izandako aukerei etekin bikaina ateratzen jakin zutela aitortu behar da.

Partida maldan gora ipini zen estraineko minutuetan, horitxoek 2-0-eko kezkagarri batekin oldartu behar izan bait zuten hasieran oparitutako bi golen ondorio legez. Tolosarrek ez zuten inungo momentutan amorerik eman eta arerioaren atea inguratzeko erabakia hartu zuten, ondorio legez hamaika aukera garbi sortuaz atezain lezotarraren aurrean. Baloiak ordea, birritan soilik sartu nahi izan zuen sare barruan eta 2-2-ko emaitzarekin aldagelaratu ziren bi taldeak. Saldias eta Telleria izan ziren golegileak.

Bigarren zatiko lehen minutuetan bi taldeen indarrak parekatu egin ziren, Aierruk zein Laskorainek markagailua desorekatzeko aukera nabarmenak garatu zituzten, baina txanpona Lezotarren aldean erori eta minutu baten faltan epaileak adierazitako hamar metrotako jaurtiketa bati esker puntuak Bekoerrota polikiroldegian geratu ziren.

Porrot honek ez luke taldeak aurredenboraldian hasitako bide ona zapuztu behar. Yustos, Domentxe eta Arribilaga baja suertatu diren arren, atezainaren posturako, Endika gaztea eta aski ezaguna den Mikel Sanz atxekitu zaizkio taldeari. Bestalde eta jokalari moduan, Lander Camio “hegal-pibota” izango du Alonso entrenatzaileak bere aginduetara. Bermazko betegarriak inungo zalantzarik gabe beraz, tolosarren lerroetan aurten arituko direnak.

Datorren astean Ancla Dosampor bizkaitarrak, hots, Nazional B mailako egungo liderrak, bisitatuko du Usabalgo polikiroldegia, aurtengo lehen 3 puntuak etxeko zalegoaren aurrean batzeko asmotan kantxaratuko dira Alonso entrenatzailea, Javi delegatua, Sanz, Telletxea, Saldias (1), Gil, Barriola, Murgi, Zabala, Camio, Telleria (1), Joniko, Endika eta Amatriain taldekideak.
Amatriain

2008-09-23

Laskorainek eraman zuen Andoaingo txapelketa

Ohitura bihurtzen ari da Laskorainek Andoaingo Euskalduna elkarteak antolatzen duen txapelketan garaipena lortzea, izan ere azken lau urteetatik hirutan gailendu da ikastolako taldea.

Aurreko asteko andoaindarren aurkako porrotaren (1-3) mendekua hartzeko aukerarik izan ez bazuen ere, Clinica Dental Aldaz lehenik (2-1), eta Inter UPV ondoren (finalean, 3-1) menperatuaz, kuadrangularra merezimendu osoz eraman zuela aitortu behar dugu.

Beste behin, Euskalduna elkarteari gonbidapenarengatik eskerrak eman eta bide hortatik jarrai dezaten animatzen diegu.

Bestalde, datorren asteburuan lehiaketa hasiko dute horitxoak. Lehenengo partida, Lezoko Bekoerrota kiroldegian izango da, larunbata arratsaldeko sei terdietatik aurrera.

Animo mutilak!!!

2008-09-12

Bihar aurkezpena

Azken orduko partidarik lotzen ez bada behintzat, bihar izango da Laskorain berria denboraldia hasi baino lehen Tolosan ikusteko aukera bakarra. Gainera, lehenengoa ezezik, Laskoraingo bi taldeak izango dira Andoaingo Euskalduna klubeko bi taldeen aurka arituko direnak.

Probintzial mailako partida arratsaldeko hiru terdietan hastekoa da eta Nazionalekoa, bostetan.

Datorren astean berriz, ikastolakoek bisita bueltatuko die andoaindarrei bertan urtero legez jokatu ohi den txapelketan parte hartuz, Inter UPV eta Clinica Dental Aldaz taldeekin batera. Final erdiak, ostiralean, eta hirugarren posturako lehia eta finala, larunbatean, beti bezela.

Lehengo astean jokatutako bi partidekin, hauexek osatuko dituzte aurredenboraldiko norgehiagokak, Iraileko azken asteburuan Lezon hastekoa den txapelketari begira. Gogoratu, Gipuzsalaren aurka 3-4 galdu eta Anoetan 1-9 irabazi zutela horitxoek. Bietan ere erritmo altua ezartzen saiatu ziren Jorgenak eta, gauza dexente hobetu behar diren arren, jokaldi politak ikusteko aukera ere izan zen.

2008-08-27

Abian da 2008/09-ko Laskorain

Pasa den astelehenean, Jorge Alonsoren gidaritzapean, hasi zituzten entrenamendu saioak Laskorain 2008/09 proiektua osatuko duten jokalariek. Beti bezela, hasiera honetan lan fisikoak aurre hartuko dio taktika zein teknikari, nahiz eta azken hauek ere bere heinean landuko dituzten.

Azken denboraldiko partaideetatik, Mikel Arribillaga baja izan da. "Futbolean azken aukera aprobetxatu nahi" eta Tolosa-n arituko da aurten Preferente mailan. Zorte on, Mikel.

Halaber, Eneko Yustosek eta Unai Domentxek lehen taldea utzi bai, baina entitatean jarraitzea adostu dute. Bigarren taldean eta atezainekin lanean arituko dira, urrenez urren.

Noski, jokalari hauek ordezkatuko dutenak etorri dira. Ibarrako Lauburu taldetik Lander Kamio eta Mikel Sanz bikotea eta, Endika Uribe, futbolean aritu den atezain gaztea.

Momentuz hauxe da aurreratu daitekeena, baina ondorengo egunetan aurredenboraldian jokatuko diren norgehiagokak jakinarazten saiatuko gara.

2008-06-18

Giro ezin hobea izan zuten Laskorainekoak Jiran

Aparteko giroa izan zen joan den larunbata hilak 7-an, urtero legez Laskorainek ospatzen duen Jiran. Eguraldia lagun eta pandereta eskuan, dozena terdi "horitxo"-k gipuzkoar kostako hainbat herri zeharkatu zituzten denboraldiari amaiera eta merezitako oporrei hasiera ematen dion ekitaldian.

Festa eta zalapartaren ondoren, datorren urtean pentsatzen hasiak dira jada taldeko arduradunak. Arrazoi ezberdinengatik jokalari batzuen baja ziurra da eta, era berean, sortatzen diren heinean, fitxaketen berri ere emango dizuegu.

Momentuz jakina den bakarra, taldea beste urte batez Jorgek zuzenduko duela.

Uztaila eta Abuztua bitartean argituko dira zein diren Laskorain osatuko duten partaideak eta datorren urterako helburua.

2008-06-03

2008-ko Jira Usabalgo polikiroldegitik irtengo da

Ekainak 7, larunbata, goizeko 10:15-etan Usabalgo polikiroldegian. Hori da laskoraindarrek egutegian gurutze haundi batez markatuta duten eguna, hortxe hasiko baita 2008-ko Jira.

Bidean, urteko pasadizoak koplatan errepasatzeaz gain, Loiolako Inaxiori Nazional B mailako hirugarren postua eskeini eta datorren urterako indarrak emateko eskatuko zaio.

Beti bezela, sorpresaren bat izanen da jokalari eta zalegoen artean espero diren 20-25 bat lagunentzat.

Animatu zaitezte.

2008-05-27

Dena prest aurtengo Jirarako

2007-2008 denboraldiak amaierara jo du eta dagoeneko ospakizunetan pentsatzen hasiak gaude Laskorain K.E. osatzen dugunok. Urtero legez, mutil eta nesken taldeek, Kostako Itzulian hartuko dugu parte datorren larunbata Ekainak 7-an ohiko bidea beteaz: Bidanitik barrena Loiolako Santutegira -hamaiketakoa-, segidan Getarira -poteoa-, ondoren Oriora -bazkaria- eta azkenik Zarautzera -bainu hartzea-, iluntze aldera Tolosara bueltatzeko.

Egunean zehar hainbat "ekitaldi" espero dira: Eskik babestutako txanpain (Tolosa)-sagardo (Astigarraga) dastaketa -"5-4" erara, hau da, 5 kopa txanpain eta 4 baso erdi sagardo-, pandereta erakustaldia -Andoniren eskutik-, autobuseko karaoke txapelketa -"dragoi bola"-ren letra ikasita ekarri, mesedez-, datorren urteko kontrato berritzeen sinaketak, etabar luze bat...

Familia horitxoa osatzen dugunok, egun berezi hori gurekin ospa dezazun gonbitea luzatzen dizugu eta zenbat izango garen ahalik eta lehen jakitearren, kontaktuko emailean(laskorainke@gmail.com) izen-ematea zabalduko dugu. Aski izango da izen-abizena ematea.

Autobusa nondik eta zein ordutan irtengo den jakin araziko dizuegu datorren egunetan.

2008-05-19

Laskorainek hirugarren postuan amaitu du denboraldia Urretxun 4-6 irabazi ondoren

Joan den astean Gipuzsalaren aurka lortutako garaipen haundiaren ostean, denboraldi bikain honi amaiera eman eta hirugarren postua zihurtatzeko helburuarekin mugitu zen Laskorain taldea Urretxura aurtengo azken oztopoa gainditzeko asmo betean.

Urretxuko U.Z. taldea, arerio gogor baten moduan azaldu da bere gotorlekuan urte osoan zehar eta tolosarren aurrean ez zuen bereganatutako eginkizuna bestelakotu. Horitxoak erdi lokarturik kantxaratu eta etxeko taldeak berehala jakinarazi zuen arratsaldeak txantxa gutxi onartuko zituena, izan ere 2-0 aurreratu bait ziren ordurarte eskeinitako merezimenduei erabateko justizia eginaz. Amatriainek aldea murriztuko zuen 2-1-ekoa sareratuaz, gol honek taldea apur bat esnarazi arren berriro ailegatu zen etxekoen 3-1-ekoa. Gil TDI-ak dena den 3-2-koa erdietsi zuen lehen zatiaren amaieran eta emaitza horrekin aldagelaratu ziren bi taldeak.

Bigarren erdian, horitxoen erritmoa guztiz nagusitzen hasi eta Saldiasek egin zuen berdinketa penaltiz. Norgehiagoka ikastolakoen alde zeihartzen hasia zen ordurako, Zabalak aurreratu zituen horiak 3-4 eta Urretxukoek berdinketaren gola eginagatik, Saldias izango zen beste bitan arerioaren atea zulatu eta 4-6-ko azken emaitza itxiko zuena.

Garaipen honi esker, hirugarren postuan amaitu dute ikastolakoek 63 puntu, brontzezko domina bat eta tarteka bere liburu sakratuan idazten diren urrezko orrialde pare bat gehiagorekin.

Ezin aipatzeke utzi Saldias kapitainak larunbatean egindako “hattrick”-aren ondoren Nazional B mailako pitxitxi legez amaitu duela 36 golekin, taldeak bide honetik jarraituko du bere kapitainak N.A.N-an azaltzen dituen urteak baino 4 gol gehiago sartzen baditu jokatzen duen denboraldi bakoitzean.

Bestalde, gogotik txalotu nahi da baita ere gazteek emandako etekina eta erakutsitako heldutasuna, unerik zailenei ere aurre egin eta gurdiaren zama gainean hartzeko ikararik gabe azaldu bait dira hilabete guzti hauetan zehar.

Datorren denboraldirako zenbait baja ziurrak izango dira baina taldeak egitura sendo bat mantendu ahal izango duela dirudi bederen, orain atsedena hartu, beharrezko hausnarketak egin eta burututako lanaz harro egotea dagokie larunbatean Urretxun izandako, Javi delegatua, Alonso entrenatzailea, Domentxe, Amatriain, Telletxea, Saldias, Ekhi, Barriola, Telleria, Murgi, Gil, Zabala eta Arribilagari.
Amatriain

2008-05-13

Zierbena txapeldun

Jaurdunaldi baten faltan, Zierbenak aurreikuspen guztiak bete ditu eta txapeldun berria bilakatu da. Doala hemendik gure zorionik beroena bigarren itzuli paregabea egin duten bizkaitarrentzat.

Bestalde, Meatzari eta Beti Arin taldeek maila galdu eta hauen lekua Astraburuko, Kenci eta Euskaldunak beteko dute. Ortziri Comodon taldea ordea, Zilarrezko mailan izan daitezkeen jeitsiera eta arrastreen zai geratuko da, mailari eusten dion jakiteko.

Azken jaurdunaldirako erabakitzeke geratzen den bakarra, podiumeko hirugarren tokia nork beteko duen jakitea da. Ohorezko postu hori bereganatzeko, Laskorainek nahikoa du bere partida irabaztea edo, txarrenean ere, Iturriondok berea ez irabaztea.

Halanola, ikastolakoak denboraldi itzela sinatuko lukete.

2008-05-12

Laskorainek 5 eta 4 gailendu zuen Gipuzsala Nogales bigarrena eta hirugarren darrai sailkapenean

Hiru puntuz gain etxekoen duintasuna eta kanpokoen ametsa jokoan zituen derbiak berebiziko ikusmina piztu zuen eta Jorge Ballesteros zeremonia zuzendari zuela Gipuzkoako areto futbolaren kremaren krema bildu zen larunbat arratsean Usabalera. Txapelketako hirugarrenaren eta bigarrenaren arteko neurketak derbiek izan ohi dutena izan zuen, emozioa eta intentsitatea soberan eta jokoa faltan eta garaipena -5 eta 4- izaera eta tenple gehiago erakutsi zuen Laskorainentzat suertatu zen.

Urduritasuna menderatu ezinda edo, lehen zatian batez ere joko traketsa erakutsi zuten bi taldeek; baloi jabetza motzak, akats eta etenaldi asko eta jarraipen gutxiegi jokoan. Oztopoak sahiesteko prestuago beharbada, joko mota hau horitxoentzat izan zen mesedegarri eta atsedenaldira 2 eta 0 iritsi ziren aurretik, Saldiasek penaltiz eta Zabalak kontraerasora sarturiko golei eskerrak.

Bigarrenaren hasieran, neurketak kontrolpean zirudienean etxekoentzat, astigarragatarren estraineko gola etorri zen, ikusgarria bezain txiripazkoa, eta zorte kolpe honek partiduan sartu zituen leporaino. Ondorenean, igoeraren ametsaren indarrarekin, estu hartu zituzten tolosarrak eta markagailuari itzulipurdia eman zioten merezimendu osoz, 2 eta 3.

Baina ikastolakoek ez zuten amore eman, eta berriro berdindu zuten neurketa Barriola aztiak kornerreko estratejian takoiez sartutako golari esker. Berdinketa nahikoa ez eta segidan, Gil TDIk, bere motor ahaltsuaren zaldi guztiak lanean ipini eta 4 eta 3-koa sinatu zuen jokaldi pertsonalean. Izaera kontua.

Azken minutuetan Gipuzsalakoek beraien azken ahalegina egingo zuten eta horitxoen huts bat aprobetxatuaz launakoa ipiniko, baina garaipena behar zutenez atezain jokalariaren estratejia erabiltzea erabaki zuten. Momentu erabakior horretan, tenple kontua zenean guztia, panderetak lapurtzeko adina tenple duen Saldiasek egin zuen garaipenaren bosgarrena, den golegile eta irabazle ase ezinari dagokion moduan.

Partida amaieran, ikastolakoen poza zapuztu nahian, batek baino gehiagok irabazten utzi ez izana leporatu zien laskoraindarrei. Salaketa honen egileek badute garaia kirolari eta lehiaketari merezi duen errespetua erakusteko eta badute garaia batez ere hamabost denboraldi luzez kanpoko laguntza bat bera ez eta lana, ilusioa eta duintasuna franko pilatu dituen eskudo horitxoari merezi duen errespetua erakusteko.

Txapelketako talde guztien aurka punturen bat eskuratuta, 60 punturekin -aspaldi ez zen zifra borobil honetara iristen taldea-, hirugarren darrai Laskorainek jardunaldi baten faltan eta dagoeneko denboraldi amaierako ospakizunetan hasi dira pentsatzen Javi delegatua, Alonso entrenatzailea eta Arribillaga, Amatriain, Telletxea, Barriola, Saldias –haserako bostekoa-, Telleria, Otxoa, Gil, Murgi, Zabala, Zubillaga eta Domentxe jokalariak.
Eski

2008-05-07

Esnesaltzailearen kontuak

Denboraldia amaierara iristen ari den honetan, sailkapenean helburu ezberdinekin dauden taldeak esnesaltzailearen kontuak egiten hasi dira jada.

Hala, txapelketa irabazteko hautagai nagusia den Zierbenak, aski izango du geratzen zaizkion bi partidetan (Meatzari eta Jarrilleros) lau puntu lortzea igoera bereganatzeko. Gainera igoerarako "play off"-erako aukera emango lukeen bigarren posturako, garaipen bakarrarekin nahikoa izango luke.

Eta hain zuzen ere bigarren postu horretan dago koxka. Izan ere, Errioxako taldeko txapeldunak aipatu "play off"-a jokatu beharko du nafar, kantabriar eta euskal taldeen arteko bigarren sailkatu onenaren aurka. Hau aukeratzeko kriterioa honakoa delarik: jokatutako partidak eta lortutako puntuen arteko koefizientea, hots, zatiketa.

Ondorioz, kontutan izanda nafar taldeko partaideak, Tafallak, gehienez 59 puntu lortzeko aukera duela 28 partidetan (2.107), hautagaia kantabriar eta euskaldunen arteko taldeetatik irtengo da.

Kantabriarrak aurreko asteburuan amaitu zuten txapelketa. Peñucas-ek irabazi eta igoera lortu du eta bigarren sailkatua Castrogres Flabiobriga izan da 28 partidetan 68 puntu lortu dituelarik, hots, 2.428 koefizientea.

Honek irakurketa bakarra du: euskal taldeko bigarren sailkatuak 30 partidetan gutxienez 73 puntu beharko dituela (2.433) eta oker ez bagaude, talde hori Gipuzsala izango da Zierbenak galdu eta egundoko ezhustekoa ematen ez badu behintzat.

Gipuzsalak, ordea, egun 68 puntu ditu eta bi partida faltan kantitate hortara iristeko modu bakarra bietan garaipena lortzea da.

Ba, "txapa" guzti honen arrazoietako bat, Gipuzsalak hainbeste desio duen igoerarako aukera hori izan nahi badu, datorren larunbatean Usabalgo oholtzan irabazi beharko duela adierazteko da.

Laskorainek, berriz, podium-eko hirugarren postua lortzeko, beste hainbeste egin beharko du Iturriondo bizkaitarra puntu bakar batera urbildu bait zaio.

Lerro hauetatik zalegoari deia luzatu nahi diogu, datorren larunbatean arratsaldeko lauretatik aurrera, Gipuzkoa mailan egun ikusi daitekeen areto futboleko partida interesgarrienetako bat jarraitzeko gerturatu dadin.

Gora Laskorain!!!

2008-05-05

Laskorainek 5-8 menderatu zuen Ortziri-Comodon taldea

Maiatzeko zubia erabat libratzeko aukerarik gabe eta talde bizkaitarrak ordutegiarekin dituen tira-birak direla eta, joan den igande goizean jokatu behar izan zuen Laskorainek aurtengo denboraldiko azken hirugarren jardunaldia bilboko Ortziri-Comodon taldearen aurka.

Helburu ezberdinetako bi talde izan ziren indarrak neurtzekotan kantxaratu zirenak. Batetik Alonsoren mutilak, ligako hirugarren postua ziurtatzeko dema bizian eta horretarako beharrezko izango den puntu kopurua biltzeko borrokan buru belarri murgilduak, bestetik Ortziri, jeitsiera marratzen duten postuen mugatik gertu dabilena eta Nazional B mailan bere iraupena arriskuan somatzen duen taldea. Txantxa gutxi onartzen zituen norgehiagoka beraz aurreikuspen guztien arabera.

Epaileek txilibitua jo bezain pronto nabaritu ahal izan zen horitxoek maneiaturiko erritmoa bere aurkariarena baino altuagoa zela, Zabala gazteak 0-1-ekoa ezarri zuen berehala eta bizkaitarrek berdinketa erdietsi arren, Otxoa eta Telletxeak 1-3-koa igo zituzten markagailura ikastolakoen lasaitasunerako. Tolosarrek itxura bikaina eta joko bizi bezain freskoa eskeini zituzten lehen zatian polikiroldegiko bero eta hezetasun mailak pairaezinak gertatu arren. Alonso entrenatzaileak bereziki zaindu du taldearen egoera fisikoa urte osoan zehar eta tankera horretako zenbait norgehiagokatan etekina ateratzen jakin du faktore horren lepotik.

Bigarren erdian aldiz, tentsio jaitsiera eta erlajazio nabarmen bat somatu ahal izan zen horitxoengan, dena den eta orokorrean, emaitza kontrolpean izan zuten gehienetan. Etxekoek atezain jokalariaren taktikaren erabilerari ekin zioten minutu luzeetan zehar, eta modu egokian gainera, profil argentinarra duen Arribilaga atezain “boludo”-aren atea zenbaitetan zulatzea lortu eta markagailuak erakusten duen 5-8-ko azken emaitza apainduaz. Tolosarren bigarren zatiko golak, Barriola (2), Telleria, Saldias eta Telletxearen eskutik heldu ziren.

3 puntu hauek, datorren astean Usabalen ospatuko den Gipuzsalaren aurkako derbi erakargarriari konfidantzaz aurre egiteko txerto moduan eragingo duten itxaropenarekin bueltatu ziren bilbotik Javi delegatua, Alonso entrenatzailea, Domentxe, Zabala, Amatriain, Barriola, Saldias, Telleria, Telletxea, Gil, Otxoa, Ekhi eta Arribilaga taldekideak.

Aipatu beharra dago, garaipen honekin, tolosarrek laugarren postua zihurtatu dutela dagoeneko eta Iturriondo bizkaitarrarekin izango dela brontzezko dominaren jabetza lortzeko zeharkako lehia.

Filialak, bestalde, liderra partida guztian zehar "soken aurka" izan arren, azken minutuan amore eman behar izan zuen 4 eta 5 galduaz. Golak Ekhik (2), Murgik eta Beñatek sartu zituzten.
Amatriain

2008-04-30

Atsedenik ez Maiatzaren lehenaren zubian

Laskorainek, Bilboko Abusu-La Peña auzoan, Igandez eta eguerdiko 12 terdietan, jokatuko du Ortziri Comodon taldearen aurka txapelketako 28. partida.

Bilbotarrak maila eusteko ahaleginetan dira buru belarri eta tolosarrak, aldiz, podium-a ziurtatzen duen hirugarren postuari ez diote ihes egiten utzi nahi. Erakargarritasuna badu hortaz bien arteko lehiak.

Bestalde, txapelketari begira, Zierbenak Lezon jokatuko du geratzen zaion partida zailenetako bat, zailena ez bada... Gipuzsalak, ordea, datorren astean izango du erronka Tolosan jokatuko baitu ikastolakoen aurka. Baina hortaz aritzeko izango degu astia datorren egunetan.

Filialak, liderrari lehenengo taldeko jokalariekin aurre egiten saiatuko da, maila eusteko ahaleginean puntuak urratu nahiean.

2008-04-29

Laskorainek 1-1 berdindu zuen Ancla-Dosampor taldearen aurka

Bestelako merezimenduak eginagatik eta markagailuaren estutasunak erakusten duen emaitza txiroaren ondorioz, puntu banaketarekin konformatu behar izan zuen Laskorainek joan den larunbatean sailkapeneko erdialdeko postuetan kokaturik dagoen Ancla-Dosampor taldearen aurka indarrak neurtu eta gero.

Usabalen gertatutako informatikaren festa dela eta, Ibarrako polikiroldegira mugitu behar izan zuten ikastolakoek aurtengo denboraldiko azken laugarren norgehiagokari ospakizuna emateko.

Egia esan, partiduaren minutu gehienek kolore horia eraman zuten gol aukerei eta baloiaren jabetzari dagokionean, bilbotarrek aldiz, kalitate mugatuko taldea izan arren, ezusteko bat baino gehiago eman dute aurtengo denboraldian, urriak baina ondo landuak dituzten baliabideei aparteko etekina ateratzen jakin bait dute urte osoan zehar. Joko zuzena, estrategia etengabea eta talde jarrera kontserbakorrak zazpigarren postu eroso eta errespetagarri batean kokatu ditu orainartean.

Norgehiagoka hasi bezain pronto aurreratu ziren etxekoak 1-0, Zabala gazteak area erdialdean erremataturiko jokaldi bati bukaera bikaina eman ondoren. Aipatu bezala, laskoraindarrek eraman zuten norgehiagokaren pisu guztia ondorengo minutuetan baina aldea areagotzearren egindako saiakeretan ez zuten zorterik izan.

1-0-ekoa estu bezain arriskutsua zen, eta horrela frogatu zuten bizkaitarrek, falta jaurtiketa batean eta 4 minuturen faltan berdinketaren gola egin bait zuten. Tolosarrek atezain jokalariaren bitartez egin zuten azken ahalegina, bukaera honetan, bi ateetan gertatu zirelarik abagune garbiak baina markagailua ez zen mugitu.

Berdindutako norgehiagoka honek, puntu banaketaz gain, tolosaldeako areto futbolaren Paul Newman den Egizabal maixuak aulkitxoan egindako etapa motz honen amaiera suposatzen du, Alonso entrenatzaileak bere lekua berreskuratuko bait du berriro datorren astean isuna bete ondoren.

Taldearen izenean, eskerrak eman nahi zaizkio kronika honetan Egizabal Kontxako “Pakito” izurdeari, igeriketa saioetan burubelarri murgildu den arren, areto futbolaren sekretuak ahaztu ez dituela erakutsi bait du, zuzendu dituen hiru partiduetan 7 puntu eskuratuaz.

Larunbatean Egizabal entrenatzailea, Javi delegatua, Domentxe, Amatriain, Zabala, Barriola, Murgi, Telletxea, Telleria, Ekhi, Gil eta Arribilaga izan ziren Ibarran.

Filialari dagokionez, 7-3 irabazi zuen mailari eusteko egiten ari den ahaleginean aurrera pauso bat emanaz.
Amatriain

2008-04-25

Etxeko partida Ibarran jokatuko du Laskorainek

Usabalgo polikiroldegia iharduera anitzetako egin zutela argi dago. Asteburu honetan bertara inguratzen denak ez du golak edo saskiratzeak ikusteko aukerarik izango (ez behintzat kantxa nagusian), bai ordea, Gipuzkoa Encounter ordenagailu festa dela eta, edonondik etorritako ehundaka "friki" bere ordenagailu etabarrekin.

Ondorioz, Laskorainek, arratsaldeko seiretatik aurrera, Ibarran jokatuko du Ancla Dosanpor talde sestaotarraren aurkako partida.

Lehenengo itzulian bi segunduren faltan hiru puntuak eskutik ihes egin eta bizkaitarren jokalari batzuen kiroltasun eskaseko keinuengatik edo, tolosarrak gogo biziz ekingo diote arerioari. Txapelketa amaierarako helburuari begira ere, segidan hirugarren garaipena lortu nahi dute.

Filialak, Aloña Mendi talde oñatiarrari zor dio bisita bihar arratsaldeko seiak laurden gutxitan bertako kiroldegian jokatuko den norgehiagokan.

2008-04-22

Laskorainek 2 eta 9 irabazi zion Gallartan Meatzari sailkapeneko azkenari

XIX. mendearen hondarrean -Bizkaiko industrializazio basatiaren sasoiean- eraikitako Gallartako Txikito frontoi zaharkitura egin zuen bisita Laskorainek pasa den larunbatean. Gallartako herria, Dolores Ibarruri, Manu Sarabia eta Asier Del Hornoren jaioterria izateaz gain, industrializazio garai haietan zituen burdin meatze oparoegatik da ezaguna eta garai haiek gogoratuaz hain zuzen Meatzari bezela bataiaturiko kirol elkartea zuten horitxoek anfitrioi.

Historia kontu hauek salbu, partidak ez zuen erakargarritasun handirik ikastolakoentzat. Meatzari taldea sailkapeneko putzuan dago dela jardunaldi mordoska bat eta zoritxarrez egun kirol arloan ez du eskeintzeko gehiegirik. Nolahala, beste jardunalditan bezalaxe hiru puntu zeuden jokoan larunbatean ere eta laskoraindarrek puntuak pilatzen jarraitu nahi zuten podiumeko postuei eusteko.

Partidak egia esan kolore bakarra izan zuen, tolosarren horitxoa. Hasieratik bertatik nagusi izan ziren nola jokoan hola markagailuan eta meatzariek zirrikitu txikiena ere ez zuten aurkitu punturik eskuratzeko. Atsedenaldiko 0 eta 5-koa esanguratsua da zeharo eta amaierako 2 eta 9-koa berdin.

Zerbait aipatzekotan golegile laskoraindarrak aipatu behar eta aurreko asteburuan bezala, horitxorik gazteenak izan ziren protagonista nagusi. Gil TDI-k hat tricka sinatu zuen, bigarren zutoinan kainaberarekin kokatzen iaioa dela erakutsiaz, Murgi mirakusak bi gol sinatu zituen, Bartzelonako sekia zirudienari amaiera ipiniaz eta Zabala Sport Wagonek bakarra egin zuen, baina garrantzitsuena, partidako estrainekoa.

Barriolak sartu zituen beste bi, golari dagokionean taldeko hirugarren mosketeroa bera dela aldarrikatuaz Saldias eta Telletxearen atzetik eta bederatzigarren golak berriz eztabaida piztu zuen. Barriolaren zentru baten ondoren etorri zen, defentsa bizkaitar bati jo ondoren, baina tartean Otxoa agertu zenez defentsa nahastuaz ibartarrak berak sartu zuela zioen amaieran. Futbolean telekinesia bidez sartutako historiako lehenengo gola ikusi ote genuen erantzuten zion batek baino gehiagok.

53 puntu, sailkapenean hirugarren, gustura itzuli ziren autobusean Tolosara erdipurdiko patata tortila jan eta gero Javi delegatua, Alonso eta Egizabal entrenatzaileak eta Domentxe, Giller, Barriola, Telletxea, Otxoa –haserako bostekoa-, Gil, Telleria, Amatriain, Murgi eta Arribillaga jokalariak. Saldias, Zubillaga eta Yustos baja izan ziren.

Bigarren taldea, burua ezin altxa darrai eta oraingoan jipoitua izan zen: 2 eta 8.
Eski

2008-04-18

Garaipenak bakarrik balio du

Txapelketa irabazteari uko egin ondoren, Laskorainek erronka berri bat du buruan: azken sei partiduetan sei garaipen lortzea. Helburu hortan, Meatzari talde bizkaitarra dute bigarren aurkaria bihar arratsaldeko zazpiretatik aurrera. Gallartakoak, bertako Txikito frontoian jokatzen dituzte partidak eta areto futbol kantxa baino "izotz hockey"-eko pista dirudi.

Halere, ez luke aitzakiarik behar, sailkapenean dagoen aldean erreparatzen badegu, eta hortaz, garaipenak bakarrik balio dio Laskoraini.

Jorgek, bigarrengo astez jarraian, armailetatik ikusiko ditu Unai D., Mikel, Gorka, Unai B., Joseba, Iñigo, Jon, Beñat, Iker, Giller eta Ekhi taldekideak. Sasoi hontan lehenengoz, Andoni kapitaina baja izango da konpromezu familiarrak direla eta.

Beste behin, eta aurrekoan bezalaxe, kirol elkartearekiko egiten duen guztia ezin eskertuko diogun Eski izango da aulkitxoan eseriko dena.

Usabalen, filialak Azpeitiko A.F. taldea mendean hartu nahi du, maila mantentzeko azkeneko trena izan daitekeena partidan.

2008-04-14

Laskorainek 5 eta 2 irabazi zion Oriokori dizdirarik gabeko derbi batean

Aurreko asteburuan Durangon txapela eskuratzeko lehiari agur esan eta gero, motibazioa bilatu beharrean da berriro Laskorain, beste jomuga batzu finkatu beharrean, burutu duten denboraldi ahaztezina azken jardunaldietan ez narrasteko.

Sekula samurra suertatzen ez den berplanteamentu honetarako oso garrantzitsua zen pasa den larunbatean berriro ere garaipenaren bidera itzultzea, hiru puntu gehiago pilatzea, eta honelaxe egin zuten horitxoek Orioko taldea 5 eta 2 gailenduta. Laskoraindarrek merezita duten baikortasunez egin behar die aurre azken bost partidei.

Usabalkoa ez zen derbi bikainegia izan, egia aitortzeko batere zirrararik eta dizdirarik gabeko derbia izan zen. Kostakoek talde arrokatsua osatzen dute, kalitateari eta joko taktikoari dagokionean batazbesteko maila baino baxuagokoa beharbada, baina konpromezuan, intentsitatean eta ahaleginean punta puntakoa. Ez dira alferrik azken bi denboraldietan gol gutxien jaso dituen taldea izan.

Guzti honen jabe horitxoak nagitsuegi kantxaratu ziren, bai baitzekiten disfrutatzeko baino sufritzeko eta lan egiteko izango zela neurketa eta hori ez zen motibazioa altxatzeko aproposena. Honela lehen zati hotz bat ikusi genuen. Barriolak sartutako golari oriotarrek banakoarekin erantzun zien berehala eta banakoak atsedenerarte iraun zuen, sentsazio gazigozoak sortuaz horitxoengan.

Bigarren erdiaren hasieran ordea Barriolak berriro hautsiko zuen berdinketa, pinballekoa zirudien gol batekin eta minutu batzu beranduago Telleriak partida erabakita utziko zuen horitxoen hirugarrena sinatzean area kanpoko jaurtiketa bati eskerrak. Minutu lasaiagoak izan ziren beraz bigarren zatikoak, horitxoen nagusitasuna islatu baitzuten baina ez ziren ez disfrutatzekoak izan.

Otxoa ibartarrak sartu zuen ondoren laugarrena kontraeraso batean eta Telleria beltxargak berriro bosgarrena. Horitxo gazteek aurten “pausu bat aurrera” eman dutela argi dago, denboraldi “amazing” bat ari direla osatzen inork ezin dezakeelarik uka. Telleria, Otxoa, Gil, Arribillaga, Murgi, Zabala, Zubillaga etabarrekin bermatua dirudi Laskorainen etorkizunak.

Azkenik beste datu bat ere azpimarratu behar, hiru puntu berri hauekin Laskorain dagoeneko 50 puntutara iritsi dela eta iazko errejistroa gainditu duela bost jardunaldiren faltan. Harro irten ziren beraz Usabaldik Javi delegatua, Egizabal eta Alonso entrenatzaileak (Egizabalek jubilaziotik bueltatu behar izan zuen Alonsoren santzioa tarteko) eta Arribillaga, Zabala, Amatriain, Barriola, Saldias –haserako bostekoa, Telleria, Telletxea, Gil, Murgi, Otxoa eta Domentxe jokalariak.

Probintzialeko taldeak, 6 eta 2 galdu ostean, ezin izan zuen emaitza positiborik ekarri Zaldibitik.
Eski.

2008-04-07

Laskorainek 7 eta 6 galdu zuen Durangon Sasikoa taldearen aurka

Eskura eduki arren eta gertu izanagatik ezin izan zuen punturik urratu Laskorainek Sasikoa taldeari joan den igandean eginiko bisita trabatuan. Gol ugari eta beste horrenbeste aukera eskeini zituen partidu ikusgarriak patu gordinegia gorde zuen tolosarrentzat oraingoan, izan ere, Alonsoren mutilek emaitzak isladatzen duena baino meritu gehiago egin bait zuten 40 minutuetan zehar.

Sobera ezaguna zen ikastolakoen partetik durangotarrek maneiaturiko potentziala, Nazional “A” mailan 2 urtetako ibilaldia izan duen Sasikoa taldeak, jokalari arriskutsu ugari bait ditu bere lerroetan, loak hartzeko betarik baimentzen ez duten horietakoak eta ederki azaldu zuten oraingo honetan ere. Kalitatez beteriko jokaldi sorta batek prestatu zuen horitxoen hilobia.

Lehen zatian gardentasunez nagusitu ziren laskoraindarrak, Telleria zilarrezko beltxargak 0-1-ekoa ezarri zuen, bizkaitarrek berdinketaren gola egitea erdietsi zuten jokaldi isolatu batean, baina Telletxeak eta Telleriak beste behin 1-3-koa sinatuko zuten aldageletarako bidea hartu aurretik. Emaitza ezezik, taldeak transmititutako zirrarak ere egokiak ziren ordurarte, tolosarrek joko serio bat erakutsi bait zuten lehen 20 minutuetan, gogor defentsan eta txukun erasoan.

Bigarren zatian bestalde, bizkaitarrek presioari ekin zioten behin eta berriz, Sasikoak egindako bi golek Gil TDI-aren erantzuna jaso zuten, beste bitan zulatu bait zuen Josebak bizkaitarren atea. 3-5-eko emaitzak itxura ona zuen baina minutu ugari ziren oraindik jokatu beharrekoak, durangotarrek dena den, norgehiagokaren zama hartu zuten, eta markagailua biratu zuten 6-5-ekoa ipiniaz. Atezain jokalariaren bitartez, Zabalak norgehiagoka berdindu zuen, baina bukaeran epaileek 10 metrotako jaurtiketa libre bat pitatu zuten ikastolakoen aurka, 7-6-koa erori zelarik etxekoen alde.

Norgehiagoka txarra jokatu ez arren, porrota jaso zuen Alonsoren taldeak eta geratzen diren azken 6 norgehiagoketan ahalik eta itxura onena ematea izan beharko du horitxoen helburua, horretarako norgehiagoka erakargarri dexente geratzen bait dira hemendik amaierararte. Lehen posta, datorren astean Orioko talde sendoaren aurka urrutiegira joateko beharrik gabe.

Igandean Durangon, Alonso entrenatzailea, Javi delegatua, Domentxe, Amatriain, Telletxea, Saldias, Zabala, Joniko, Ekhi, Gil, Telleria eta Arribilaga izan ziren.

Filialari dagokionez, berdinketarekin konformatu behar izan zuen aurtengo maila berriari eusteko izaten ari den lehian.
Amatriain.

2008-03-31

Laskorainen bigarren taldea derbian nagusi

Pasa den larunbatean Laskorainek (bigarren taldeak), hil ala biziko partidan, Denak Pizzak taldeari 3 eta 1 irabazi zion tolosarren arteko derbian. Golak, Beñat Telleria "beltxarga"-k (2) eta Murgik lortu zituzten.

Ikastolakoentzat ezin bestekoa zen garaipena lortzea arerioa hiru puntutara baitzuten. Etxekoak, aurkariak baino kalitate gehiagoko jokalari dexente dituzte eta, lehenengo zati orekatu baten ostean, hiru gol jarraian eginaz isladatu zuten. Txapela kentzeko modukoa Beñatek sartutako hirugarrena, talde osoak eginiko jokaldi bati amaiera ezin hobea emanaz.

Amaieran, ezhusteko bi jokaldi: bisitarien gola eta ondorio latzagoak izango dituen Arzelusen txartel gorria.

Denboraldia amaitzeko zazpi partidan faltan, sailkapeneko azken hirugarrena da Laskorain. Beraz, jeitsiera matematikotik salbu, baina egoera erosogo bat bilatu beharko luke Euskal Ligatik jeitsi daitezkeen taldeen "arrastrea" jasan eta maila galdu nahi ez badu.

2008-03-16

Laskorainek 5-5 berdindu zuen Zierbena liderraren etxean

Meritu eta balioz betetako puntu bat urratu zuen Laskorainek joan den larunbatean Zierbena lider boteretsuari bere jauregian lotsarik gabe jarki eta nortasunez beteriko norgehiagoka bat planteatu ostean.

Tolosarrena, ez zen sailkapeneko lehen postuan kokaturik dagoen talde baten aurka indarrak neurtzeko egoerarik erosoena, izan ere, Arribilaga, Joniko, Murgi, Yustos eta Zabala jokalariek ezin izan bait zuten Muskizera bidaiatu arrazoi ezberdinak zirela medio. Dena den, gainontzeko taldekideek eta Beñat Led filialeko kapitainak, deialdia erabateko bermatasunez betetzeaz gain, sinismenez eta ilusioz gainezka ekin zioten galtzeko gutxi eta irabazteko asko zuen partidu berezi honi.

Zierbenakoak aurreratu ziren kontraeraso bikain bati esker 1-0-ekoa ipiniaz, gol honek bestalde, katalizatzaile baten papera bete zuen ikastolakoen barrenean, izan ere eta denboraren poderioz, Alonsoren mutilen sendotasuna nagusitu bait zen defentsan, jokoan eta aukeretan. Zenbait abagune garbi hutsegin arren, Telletxea areto futbolaren katedratikoa arduratuko zen ondo merezitako berdinketa ezartzeaz, bi taldeak 1-1-eko emaitzarekin aldagelaratuaz.

Bigarren erdian eta zenbait minututan zehar, bizkaitarrek Domentxeren atea estutu zuten behin eta berriz, ondorio legez markagailuan 4-1-eko kezkagarri bat ezarri eta denboraren faktoreakin jokatzeko erabakia hartu zutelarik orduz gero. Horitxoek ordea erakusteko asko zuten oraindik eta Gilek aldea murriztu zuen 4-2-koaren gola baimenduaz. Hiru minuturen faltan atezain jokalaria kantxaratu zuen Alonso entrenatzaileak eta 4-5 aurreratzea erdietsi zuten laskoraindarrek Saldiasek behin eta Barriolak bitan eginiko golei esker. Aipatzeke ezin utzi Barriolak marraztutako puxika zoragarria, grabitatearen legea desafiatuaz inoiz jeitsi eta sareratuko ez zela zirudien baloiari emandako ferekak aho zabalik utzi bait zituen inguruko denak.

Zierbenakoek dena den, badituzte kalitatedun jokalari anitz eta beraientzat hil ala biziko norgehiagoka izaki, atezain jokalaria atera eta berdinketaren sareratzea egin zuten amaieran.

Galdurik egon, irabazita somatu eta azkenean berdindurik suertatu zen norgehiagoka gogorraren ostean, puntua baliotsu bezela batailatu eta ondo merezitako atsedenaldiari ekiteko garaia iritisi zaio taldeari. Aste Santuaren ondoren Sasikoa arriskutsuaren kantxa bisitatu beharko dute tolosarrek ligako azken txanpa erabakigarri honi hasiera emango dion norgehiagokan.

Larunbatean Muskizen, Alonso entrenatzailea, Javi delegatua, Domentxe, Barriola, Saldias, Telletxea, Gil, Amatriain, Ekhi, Telleria eta Led jokalariak izan ziren ikastolaren koloreak duintasunez defendatzearen arduradunak.

Filialak, aldiz, ezin izan zuen punturik urratu Billabonan 6 eta 2 galdu ostean.
Amatriain.

2008-03-14

Zierbena liderra neurtuko du Laskorainek

Hil ala biziko partida ezpairik gabe bi taldeek, Muskizen, larunbata arratsaldeko seiak eta laurdenetatik aurrera jokatuko dutena, etxekoak txapelketa irabazteko eta horitxoak horrexetarako azken aukeraren bila. Nola hala, presioa etxekoak izanik, ikastolakoek "galtzeko gutxi eta irabazteko dena" dutela kantxaratuko dira.

Gainera, odolkiak ordainetan eman nahi dizkie tolosarrak, joanekoan, Usabalen jendetza bildu zen partida batean, jipoitu ederra jaso bait zuen Laskorainek Zierbenaren eskutik. Oraingoan ez zaie hain xamurra suertatuko partida!!

Ikastolakoek baja ugari dituzte aste honetan: Mikel, Eneko, Giller, Jon eta Iñigo. Deialdia baina luzeago dirudien zerrenda honek aldiz, Beñat Led filialeko jokalariari mesede eta justizia egin dio, taldearekin bidaiatuko baitu bihar.

Jorgek deialdia honela osatu du azkenik: Unai Domentxe, Gorka, Unai Barriola, Iker, Andoni, Beñat Telleria, Joseba, Ekhi eta aipatu Beñat Led. Autobusa, arratsaldeko hirurak eta hamar inguru irtengo da Usabalgo polikiroldegitik.

Filialak, Billabonako Pub Shepperds Ekintza bizilagunari egingo dio bisita.

2008-03-10

Laskorainek 7 eta 5 irabazi zion Elorriokori eta hirugarren jarraitzen du

Futbolean lehiatu duenak ongi asko daki denboraldian zehar beti agertu ohi direla arratxak, onak eta txarrak, eta partidak gol bategatik edo bigatik irabazten hasten zenean, bategatik edo bigatik galtzen hasten zarenean bezalaxe, askotan emaitza berberarekin jardunaldi dezente pilatzen direla erreskan. Berehala moztu ezean emaitza arratxa hauek, burtsako tendentziak bezelakoak bilakatzen dira, batzutan gorakorrak besteetan beherakorrak, baina setatiak beti, arrazoingabeak beti eta batez ere apurtzeko oso zailak beti.

Honegatik, bi jardunalditan bi porrot pairatuta, 5-6 eta 5-4, joan den larunbateko partidak berebiziko garrantzia zuen Laskorainentzat hirugarren jarraitu nahi bazuen sailkapenean eta ikaragarri sufrituta izan bazen ere 7 eta 5 hartu zuen mendean Elorrioko talde bizkaitarra arratxa txarrari amaiera ipiniaz.

Neurketa oso gogorra suertatu zen, azken emaitzen eraginez edo, horitxoak behar bezelako arretarik gabe kantxaratu baitziren lehen zatian. Izan ere haserako lau minutuetan sailkapeneko behekaldean bizi diren bizkaitarrek bi gol sartu zituzten etxekoen hutsak aprobetxatuaz eta Telletxearen 1 eta 2-koaren ondoren 1 eta 4 ere ipini ziren, atsedenaldian garaipenak ia ezinezkoa zirudielarik ikastolakoentzat.

Alonso entrenatzaileak ordea bete betean asmatu zuen txertoarekin aldageletan eta birkantxaratzean beste Laskorain bat ikusteko parada izan genuen. Berehala etorri ziren Saldiasen 2 eta 4-koa eta Telleriaren 3 eta 4-koa (txalogarria mutil hau egiten ari den denboraldia) eta piskat beranduxeago egin zuen nola ez Saldias pitxitxiak berriro launakoa. Zailenak egina zirudienean kontra batean 4 eta 5 aurreratu ziren berriro elorriotarrak baina Telletxeak ez zuen hamar metrotatik barkatuko bi taldeak bosna adostuaz.

Azken minutuan eta berdinketa markagailuan, dela hamabost egun bezelaxe, Alonsok atezain jokalaria kantxaratu zuen garaipenaren bila eta oraingoan orduan izan ez zuten zortea lagun taktika honek ekarri zituen fruituak, hamalau segunduren faltan Gil TDI-k 6 eta 5-ekoa sartu baitzuen. Ondoren, beste gol bat ere egongo zen, bost segunduren faltan eta hamar metrotatik Saldiasek beste hat-trick bat sinatu baitzuen.

Garaipena eskafoidesa hautsita aste honetan kirofanotik pasa den eta denboraldiari agur esan dion Eneko Yustosi eskeini zion taldeak. Denek botako dugu faltan Sparrow kapitaina, nahiz eta klubaren ekonomiak arnas piskat hartuko duen, santzio fondoak aurten gehiago iraungo bait du. Animo Eneko.

Usabalen Javi delegatuarekin eta Alonso entrenatzailerakin batera, Domentxe, Zabala, Amatriain, Saldias, Zubillaga, Telletxea, Telleria, Murgi, Otxoa eta Gil jokalariak egon ziren. Baja ziren Arribillaga eta Barriola.

Filialak, Bar Buenetxea laugarren sailkatuaren aurrean amore eman behar izan zuen 3 eta 4 galdu ostean.
Eski.

2008-03-07

Garaipenaren bidera itzuli nahi du Laskorainek

Denboraldian lehenengoz bi partida jarraian galdu ondoren, tolosarrek Elorriokori patu arazi nahi dizkie "hautsitako platerak". Horretarako, bihar, Usabalen, ez ohizko ordutegian, arratsaldeko 4-etan hasiko baita partida, berrogei minutu konzentratuta osatu beharko dituzte aurreko asteetako ez hustekorik jaso nahi ez badute.

Elorrioko taldea jokalari beteranoz, indartsuz, osaturik dago eta atzean sendo jarrita itxoin ohi dio arerioari beraien arma nagusia baliatzeko, hots, kontraerasoa. Joanekoan, azken minutuan nagusitu ziren ikastolakoak 3 eta 4-ko emaitza estuarekin.

Jorgeren mutilak bestalde, astean zehar kili-kolo ibili dira entrenatzen. Mikel atezaina baja izango da ziurrenik eta Enekok, eskua eskaiolatuta, armailetatik animatuko du taldea. Gainera Ikerrek aste osoa entrenatu gabe pasa du, txonkatilari atsedena eman nahian, eta beste zenbait jokalarik lana medio edo gaixo, ez dituzte hiru egunak osatu.

Beraz, pilak karga-karga eginda azaldu beharko dira horitxoak puntuak etxean gera daitezen.

Filialak, igandean jokatuko du Usabalen, sailkapenean ongi kokatuta dagoen Bar Buenetxea lasartearraren aurka.

2008-03-03

Laskorainek 6 eta 5 galdu zuen Izkepot taldearen aurka

Arabako erresumara egin behar izan zuen bisita Laskorainek joan den larunbatean etxean oraindik porrotik ezagutzen ez zuen Izkepoten aurka indarrak neurtzeko beharrean. Azkenean esku hutsik bueltatu behar izan zuten Alonsoren mutilek hurbiletik somatu baina azkenean ospatu gabeko garaipen baten ondorio ilunaren erruz.

Norgehiagokaren hasiera parekatu bat ikusi ahal izan genuen Laudion, ate bakoitzean bina gol gertatu bait ziren lehen minutuetan, Barriolak eta Amatriainek lortu zituzten tolosarren sareraketak. Ondorengo minutuek ikastolakoen sinadura gardena eraman zuten ordea, Otxoa gaztea izan bait zen beste bi golen bitartez 2-4 itxaropentsu batekin aldagelaratzearen arduraduna.

Patuak bestalde, ez zuen laskoraindarrekin inungo kupidarik izan eta oso bestelakoa suertatu zen bigarren zati beltz batek zapuztu zuen taldeak aurretik beteriko lan guztia, izan ere eta atsedenaldia bukatu bezain pronto, arabarrek izugarrizko txikizioa gauzatu bait zuten Alonsoren mutilek defendatzen zituzten lerro guztietan.

Etxekoen jokalariek lan fina bete zuten azken 20 minutuetan eta presioa, intentsitatea eta kalitatedun jokaldi etengabeen ondorioz markagailua biratu zuten bigarren zatiko horitxoen gol bakarra egin zuen Zabalaren sareratzea alferrikakoa bihurtuaz.

Arlo guztietan nagusi agertu zen talde baten aurrean belaunikatu eta aitzakiarik merezi ez duen porrota aitortzea da joan den larunbateko partiduari buruz egin daitekeen argibiderik egokiena. Laudiotarrek gardentasunez azaldu zuten 21 jardunaldi eta gero etxean oraindaino norgehiagokarik galdu ez izanaren zergatia, izan ere bigarren erdian, jostailu baten moduan maneiatu bait zuten talde tolosarra.

Porrot honen ostean, hirugarren postuan darrai Laskorainek, baina Zierbena liderra eta Gipuzsala bigarren sailkatua urruti xamar kokatu dira azken bi jardunaldietan galdu izanaren ondorioz. Datorren astean Elorriokoren aurka gogotsu aritu eta denboraldiaren azken txanpa beharrezko seriotasun eta errekerimenduz beteko dutenaren zihurtasuna dago dena den Alonsoren mutilen aldagelan.

Larunbatean Laudion, Alonso entrenatzailea, Javi delegatua, Domentxe, Telletxea, Zabala, Saldias, Ekhi, Barriola, Amatriain, Otxoa, Telleria, Gil eta Arribilaga izan ziren.

Bestalde, Ayetek 9 eta 3 jipoitu zuen filiala, ahaztu beharreko asteburua borobilduaz.
Amatriain.

2008-02-29

Laudioko gotorlekura hiru puntuen bila

Helburu horrekin joango da bihar Laskorain, egun etxean galdu ez duen Izkepot arabarrari zor dion bisitan. Joanekoan majo kostata irabazi zioten tolosarrak azken minutuan Andonik sarturiko penalti bati esker eta orokorrean laudiotarren partidak emaitza estua izaten dute. Adibide gisa, denboraldian zehar bi gol edo gutxiagoz galdu dituztela bere partida guztiak.

Asteak, Enekoren bizpairu hilabeterako baja ekarri digu, eskuin eskumuturreko eskafoidesa hautsiak bere onera etortzeak behar duen denbora hain zuzen ere. Hemendik, taldekide guztien animoak heldu arazi nahi dizkiot eta laster batean osatu dadila.

Enekoren hutsunea, aspaldian gaixo izan den Amatriainek beteko du eta honi Domentxe, Arribi, Barriola, Telletxea, Saldias, Zabala, Gil, Zubillaga, Otxoa eta Telleria gehituko zaizkio.

Espedizioa, arratsaldeko hiru terdietan irtengo da Usabalgo polikiroldegitik, partida sei terdietan hasiko delarik.

Filialekoak, Ayeteko donostiar aski ezagunei, aurreko asteburuan liderrari irabaztea kasualitate hutsa izan etzela erakutsi nahi diete.

2008-02-25

Laskorainek 4 eta 5 galdu zuen Iturriondoren aurka baina hirugarren jarraitzen du sailkapenean

Futbolaren arpegirik ankerrena ezagutzeko zorigaitza izan zuen Laskorainek joan den larunbatean Usabalen. Txapelketako talderik onenen artean dagoen Iturriondoren aurka egundoko ahalegina burutu eta gero, hogeitabat segunduren faltan 4 eta 3 irabazten zuen partida galdu egin zuen amaieran eta esku hutsik eta buru makur aldagelaratu behar izan zuten jokalari horitxoek.

Sailkapeneko hirugarrenaren eta laugarrenaren arteko neurketak ez zuen hutsik egin eta oso polita suertatu zen Usabalera hurbilduriko zalego ugaritsuarentzat. Nor baino nor, maila tekniko eta taktiko altuko partida erakutsi zuten talde tolosarrak eta bilbotarrak eta emozioa ere gainezka izan zen azkenerarte.

Lehen erdian ikastolakoak gehiago izan ziren, boxeoan aritu balira behintzat puntutan nagusi izan zirela lasai esan daiteke erratzeko beldurrikan gabe, baloiaren jabetza horitxoena izan baitzen eta gol aukera argienak ere bai. Eta hau markagailuan atzetik joatea tokatu zitzaiela ia beti, partida hasi eta berehala 0 eta 1 ipini baitziren Iturriondokoak eta Saldiasen banakoaren ondoren 1 eta 2 berriro.

Atsedenaldia eta gero hogei minutu orekatuago ikusi ahal izan ziren. Bilbotarrek gora egin zuten bere jokoan eta aldea handiagotzeko pare bat aukera garbi izan zuten berkantxaratu eta segituan, baina Laskorainek gehien behar zuenean Barriola izan zen golegile Telletxearen pase zoragarri bat sareratuaz. Minutu luzez iraungo zuen binakako berdinketak jokoa parekatu zuen gainera.

Lau minuturuen faltan amaierarako eta gola edozein aldetara eror zitekenean, Saldias pitxitxi betigoseak sartu zuen 3 eta 2-koa. Une horretan etxekoentzat zailenak egina zirudien eta defentsa sendotuaz abantailari eustea gelditzen zen soilik. Baina hementxe egongo zen partidako gakoa, bizkaitarrek atezain jokalaria atera baitzuten min ikaragarria egin zielarik horitxoei.

Bi minuturen faltan hirunakoa egin zuten bilbotarrek atezain jokalariari eskerrak eta minutu baten faltan hamar metrotatik Telletxeak laskoraindarrak berriro aurretik ipini bazituen ere, bizkaitarrek berriro berdindu zuten partida 4 eta 4, hogei segunduren faltan eta atezain jokalari jokaldi berdinari eskerrak.

Puntu banaketak ez zituen ikastolakoen itxaropenak eta anbizioak asebetetzen eta txapeldun handien moduan, azken segundu horietan garaipenaren bila joatea erabaki zuten laskoraindarrek, bilbotarren arma bera erabiliaz alegia: atezain jokalaria. Azken jokaldi honetan, posizioa fortzatu eta baloi erdibitu bat probokatu zuten horitxoek, erabakiorra gertatuko zena etxekoei eroriz gero eta kanpokoei eroriz gero berdin; bada kanpokoen alde erori zen, partida amaiera adierazten zuten turutarekin batera sartu zutelarik 4 eta 5-ekoa. Ez zen erditik ateratzeko ere betarik gelditu.

Patuak oparitutako kolpea oso gogorra izan bada ere, perspektiba ezin gal dezake taldeak eta sailkapenean hirugarren jarraitzen duela jabetu behar du lehenbailehen, aurreko astean zuen postu berberan alegia eta liderrarengandik puntu bakar bat urrutiago. Denboraldiaren heren bat gelditzen da oraindik. Usabalen Javi delegatua, Alonso entrenatzailea eta Arribillaga, Zabala, Saldias, Barriola, Telletxea –haserako bostekoa-, Telleria, Gil, Murgi, Yustos, Zubillaga, Led eta Domentxe jokalariak izan ziren.

Bestalde, azpiko taldeak, 3-1 irabazi zion Zarautz K.E. kategoriko liderrari Igande goizez jokatutako partidan. Zarauztarren golari, Manexek, Unai Arcelusek eta Jon Otxoak eman zioten erreplika. Ea bide beretik jarraitzen duten!!
Eski.

2008-02-21

Txapelketarako asteburu erabakigarria

Txapelketaren bi heren beteko diren asteburu honetan, partida erabakigarriak jokatuko dituzte lehenengo lau sailkatuek. Astigarragan, Ceramicas Nogales liderrak eta bigarren sailkatuta dagoen Zierbena boteretsuak, beraien indarrak neurtuko dituzte nor baino nor lidertza jokoan dela.

Azken asteetan, bi taldeen web horrialdeetan "gerra mediatikoa" nagusitzen ari da, agerian azaltzen dutelarik nolako klubak diren...

Tolosan, berriz, hirugarren dagoen Laskorainek, Iturriondo laugarren sailkatuaren bisita jasoko du. Joanekoan, bizkaitarrak, partidurik galdu gabe, lidertzan zeuden eta ikastolakoek galtzea zer den erakutsi zieten. Beraz, mendeku gosez etorriko zaizkigu Usabalera, larunbatean arratsaldeko seiretatik aurrera ekingo zaion partidara.

Jorgek, taldekide guztiak izango ditu prest aspaldiko partez. Buruhauste bat baino gehiago emango dion deialdia egin beharko du oraingoan. Horitxoak, tartea zabaldu nahi dute sailkapenean eta, bide batez, txapelketari eutsi nahi die. Horretarako, Astigarragan ematen den emaitzari zeharka begira izango dira.

Azpiko taldeak, Zarautz K.E. liderra jasoko du. Partida zaila benetan beheko postuetatik irtetzen saiatzeko.

2008-02-18

Laskorainek 1-8 irabazi zuen Jarrillerosen aurka jokatutako norgehiagoka

Aurreikuspen eta hausnarketa guztiek kontrakorik iragartzen bazuten ere, aparteko nagusitasunez ebaztu zuen Laskorainek joan den larunbatean Portugaleteko Zubi-Alde polikiroldegiak planteatutako azterketa gogaikarria.

Egungoak baino garai hobeak ezagutu dituen Jarrilleros historikoak, ezusteko bat baino gehiago eman izan ditu beti bere gotorleku korazatuan, honen adibide gisa, aurtengo txapelketa poltsikoratzeko faborito nagusia den Zierbena haundiak duela 4 aste Portugaleten jasandako jipoia azaldu bait genezake.

Partida berehala ipini zen maldan gora horitxoentzat, bizkaitarren oinetatik irtendako kalitatedun konbinaketa batek Domentxeren atea zulatu bait zuen 1-0-ekoa ezarriaz elektronikoan. Norgehiagokaren itxurak eta jasotako lehen golak, banakako defentsatik, zonakako defentsarako aldaketa bat behartu zuen Alonso entrenatzailearen sisteman. Eraldakuntza honen ondorioz, ikastolakoek irrikatutako erosotasun defentsiboa eta izpiritu erasokorra aktibatu ziren berehala, izan ere, ondorengo minutuetan tolosarrak zapalgailu baten moduan pasa bait ziren bere aurkariaren gainetik. Telleria zilarrezko beltxargak, Gil TDI-ak birritan eta Telletxea areto futbolaren katedratikoak, 1-4-koarekin biratu zuten markagailua atsedenaldiaren aurretik.

Bizkaitarrek gogotsu eta lehiakor ekin zioten bigarren zatiari, baina Gilek aldea areagotu zuen gipuzkoarren mesedetan. Gol honek, Gilen arratsaldeko “hat-trick” partikularra suposatzeaz gain, arerioaren itxaropen guztiak zapuztu zituen. Jarrillerosekoek, nabarmenki jeitsi zituzten besoak eta tolosarren esku utzi zuten ekimen osoa. Telletxeak beste bi golei esker eta Barriola puxika margolariak, markagailua itxi zuten 1-8-ko azken emaitzarekin, Telletxeak ere, beste “hat-trick” bat lortu zuelarik.

Garaipen honekin, hirugarren postuan darraite Alonsoren mutilek, eta datorren astean Iturriondo laugarren sailkatuaren bisita jasoko dute Usabalgo polikiroldegian txinparta eta indarrez betea gertatzeko osagai guztiak dituen talka batean. Bere jarraitzaile hurbilenarekin behin-betikoa izan daitekeen aldea irekitzeko aukera paregabea izango dute beraz laskoraindarrek.

Larunbatean, Portugaletetik garaile, Alonso entrenatzailea, Javi delegatua, Domentxe, Telletxea, Saldias, Barriola, Otxoa, Ekhi, Gil, Telleria, Zabala eta Arribilaga jokalariak atera ziren.

Filiala bestalde, esku hutsik itzuli zen Lazkaotik bertako taldearen aurka 5-4 galdu ondoren.
Amatriain.

2008-02-15

Beste errebalida bat Portugaleten

Bihar, larunbata, arratsaldeko sei terdietatik aurrera, Laskorainek, ikastola garaiko azterketa final bat balitz bezela ekin beharko dio, eskarmentu eta esperientzi haundiko Jarrillerosen aurkako partidari.

Parean, lehenengo itzulian tolosarrak majo estutu zuen taldea aitzaki, autobusean igo orduko konzentrazioa eskatu die norgehiagoka armailetatik ikusi beharko duen Jorge Mourinho entrenatzaileak. Horretarako, estratejia jokaldiak errepasatzea pentsatu du.

Astean zehar gaixo egon den Gorka Amatriain, lanari ezin uko egin diezaion Iñigo Murgi eta lesioaren tunel ilunaren amaiera dakusan Eneko Yustos, baja izango dira. Hauek ordezkatuko dituzten ondorengo taldekideak eramango ditu, beraz, Jorgek: Arribillaga, Barriola, Domentxe, Gil, Otxoa, Saldias, Telleria, Telletxea, Zabala eta Zubillaga.

Nahi duenarentzat, espedizioa hiru terdietan aterako da Usabalgo polikiroldegitik (Tolosara itzulera gaueko hamarrak inguru).

Bestalde, azpiko taldeak, Solasten Lazkao goierritarraren aurka neurtuko ditu indarrak. Ea, hiru puntuekin itzultzen diren, bai nagusiak, baita probintzialekoak ere.

2008-02-11

Laskorainek 7 eta 4 irabazi zion Allerruri eta hirugarren jarraitzen du sailkapenean

Aurreko asteburuan Gernikan Beti Arinen aurka pairatu porrotarekin ihauterietako faktura garestia ordainduta, Laskorainek Lezoko Allerruren bisita jaso zuen pasa den larunbatean Usabalen. Estadistikei jaramon eginez gero, oso partida zaila zen horitxoentzat, aldez aurretik etxean sekula ez baitzuten garaitu talde lezotarra. Aurten ordea, Alonsoren mutilen maila altuko partida baten ondorioz, hiru puntuak Tolosan gelditu ziren.

Derbia uste bezain gogorra suertatu zen. Egia da, aurreko derbietako legez horitxoek areto futbol gehiago dutela frogatu zutela, lezotarrak baino hobeak direla eta honegatik bukatuko dutela beste behingoz sailkapenean aurrerago; baina hau bezain egia borobila da, lezotarren joko fisiko, zalapartatsu eta lehiakorrarekin katiatu egiten direla laskoraindarrak.

Norgehiagoka horitxoen kontrolarekin hasi zen espero bezela. Baloiaren jabetzan nagusi, iniziatiba eta jokua etxekoek ipini zuten lehen zati guztian zehar. Lezokoek estratejian eginiko estraineko golari bikain erantzun zioten gainera, Telletxeak lehendabizi eta Saldiasek ondoren berehala ipini baitzuten 2 eta 1-koa eta lehen golaren klon bat izan zen Lezotarren binakoak ez zuen zorionez ezertxo ere aldatuko neurketa.

Ikastolakoen nagusitasuna, erremediorik gabe islatuko zen markagailuan ere atsedenaren aurretik, Laskorainek dituen hiru golegile mosketeroek, Saldiasek, Telletxeak eta Barriolak gol bana sinatuko baitzuten. 5 eta 2 aldageletara, aurten bai azkenean, hiru puntuek seguru ziruditen.

Bigarren zatian ordea, eta lehen minutuetatik txiripaz irten ziren arren bizirik lezotarrak, gol aukera dezente erratu baitzituzten horitxoek, gauzak goitik behera aldatu ziren. Kontaktoan oinarritutako jokoari eskerrak, arbitroei eginiko protestek sortutako tentsioari eskerrak, piskana piskana horitxoen jokoa itzaltzen joan zen lezotarrena pizten zihoan bezalaxe. Bi gol egiteko gai ere izan ziren kanpokoak eta gezurra bazirudien ere, azken minutuetara partida erabat berdinduta iritsi zen.

Azken minutu erabakior horietan horitxoek erreakzionatu egin zuten berriro, erreakzioaren detonatzailea Lezotarren ahalegin ikaragarria alferrikako bihurtzen zuen Barriolaren 6 eta 4-koa izan zelarik. Hemendik aurrera partida berera itzuli zen, kolore horitxoa izan zuelarik berriro nagusi. Hiru minuturen faltan gainera Saldiasek zazpigarrena sartu zuen, hat-tricka osatuaz. Goraipatu Saldias pitxitxiak 18 partidatan 27 gol sartu dituela dagoeneko, eta hau bere hamabosgarren denboraldia dela aurtengoa goiko taldean. Txalotzekoa benetan kapitainarena.

40 punturekin jada Laskorainek hirugarren darrai sailkapenean eta datorren larunbatean Portugaletera bidaiatu beharko du Jarrillerosen aurka jokatzeko. Usabalen protagonista eta garaile Javi delegatua, Alonso entrenatzailea eta Arribillaga, Giller, Barriola, Telletxea, Saldias –haserako bostekoa-, Telleria, Gil, Otxoa, Murgi, Zubillaga eta Domentxe jokalariak izan ziren.

Filialak, berriz, lehenengo zatian bakarrik eutsi zion Zurt Taberna talde indartsuari eta azkenean 4-8 galdu zuen.
Eski

Beñat, Euskal Herriko selekzioarekin

Pasa den astean jokatu zen 21 urtez azpiko autonomien arteko txapelketan, Beñat Telleria laskoraindarrak hartu zuen parte Euskal Herriko selekzioarekin.

"Beltxarga", fin aritu zen sailkapeneko taldean, Melilla eta Murtziaren aurka jokatu partidetan. Lehenengoak 5-1 eta bigarrenak 5-4 menderatu zituzten, urrenez urren. Final aurrekoetan berriz, Andaluzia boteretsuaren aurka, belauna makurtzea besterik ez zitzaien geratu, azkeneko 7-2-ko emaitzak argi adierazten duen bezela.

Finala, Madril eta Andaluziako konbinatuak jokatu zuten eta, sailkapeneko taldean gertatu bezela, lehengoak gailendu ziren 4-1-eko emaitzarekin.

Golik sartu ez bazuen ere, minutu garrantzitsuak dastatzeko aukera izan zuen jokalari horitxoak, esperientzia polita eta aberasgarria ezpairik gabe.

Bestalde, lehenego B nazional mailako taldean, sailkapenean aldaketa txiki bat izan da. Elorrioko-Beti Arin partida, bostnako berdinketarekin amaitu bazen ere, kanpoko taldeko irregulartasun batek, etxekoen aldeko 6-0-eko azken emaitza ekarri du. Beraz, Elorriokok bi puntu gehiago ditu orain eta Beti Arinek, aldiz, puntu hura galdu du.

2008-02-08

Allerru lezotarra dator bisitari

Denboraldi hasiera bikaina zeraman Laskoraini, Lezoko Allerruk hirugarren jaurdunaldian porrota zer den erakutsi zion eta oraingoan tolosarrek odolkiak ordainetan emateko prest zelairatuko dira.

Horretarako, aurreko astean egin zituzten akatsak saiesten ahalegindu eta beraien betiko jokoa eginaz arerioa gainditzea espero dute. Bi taldeen arteko leihak oso berdintsuak suertatu ohi dira eta gainera horitxoak ezin izan dituzte behin ere tolosan lezotarrak mendean hartu.

Beraz, zalegoaren animoak eskertuko dituzten Amatriain, Arribillaga, Barriola, Domentxe, Gil, Murgi, Otxoa, Saldias, Telleria, Telletxea, Zabala eta Zubillaga deitu ditu Jorge Alonso entrenatzaileak.

Partida, bihar larunbata, arratsaldeko seiretan izango da Usabalgo Polikiroldegian. Aurretik, lauretan, filialak aurreko postuetan dabilen Zurt Taberna izango du aurkari.

Porrot mingarria Gernikan

Jakina da tolosarrek Iñauterietan mozorrotzeko duten abilezia, baina festetan ezezik, kantxan egiteko aukera ere izan zuten. Beti Arin talde zornotzarrak, talde on eta txar batek duen itxura ikusteko aukera izan zuen, lehen zatian jantzita zuen onaren mozorroa erantzi eta txarrarena jantzi zuenaren taldearena hain zuzen.

Sailkapeneko azken taldea zenari zor zion bisita ikastolako taldeak eta hasierak itxura ona zuen arren (0-1 zortzigarren segundurako eta 0-2 bigarren minuturako), bestelakoa suertatu zen amaieran 4 eta 3-ko azken emaitzarekin.

Holakoetan izan ohi denez, Iñauteriak medio, azkeneko taldea arerio eta aldeko emaitzarekin, bigarren zatian horitxoen erlaxazioa iritsi zen. Eta bai garesti patu ere.

Akatsak nagusitu ziren horitxoen artean, non nahi eta edonork egiten zituen. Konturatzerako berdinketa lortu zuen etxeko taldeak eta hori nahikoa ez bazen, hiru minuturen faltan aurretik jartzea ere.

Orduan, atezain jokalariaren errekurtsoa baliatzen saiatu ziren kanpokoak, baina ordurako alperrik zen. Ondorioa: azken sailkatuaren aurka porrota.

Batere fin ibili ez ziren Domentxe, Barriola, Gil, Saldias, Telletxea (2), Zubillaga (1), Telleria, Amatriain eta Arribillagarekin batera, etxerako bidaia luzea izan zuten Jorge Alonso entrenatzailea eta Javi delegatuak.

Azpiko taldeak ere, ezin izan zuen Makax gainditu. Azken emaitza 5-3.

2008-02-01

Iñauteriak eta Kirola

Iñauterietan buru belarri gabiltzan honetan ezin da ahaztu aste honetan ere 3 puntu balio duen partidua jokatu beharra dutela gure mutilek.
Ostegun gizeneko ajea pasatuta eta ostiral mehean zintzo zintzo etxean geratuta honako jokalariek osatuko dute Gernikara joango den deialdia: Unai Domentxe, Mikel, Iker, Andoni, Joseba, Gorka, Unai Barriola, Ekhi, Giller eta Beñat.
Jorge entrenatzaileak hiru baja izango ditu Beti Arinen aurkako partidurako: Eneko, Joniko eta Iñigo. Lehenengoa bere eskumuturreko lesioarekin bueltaka dabilelako oraindik eta azken biak lan egin beharra dutelako.
Ea ba gure mutilak 3 puntu poltsikoratuta itzultzen diren eta Iñauteriak gustora pasatzeko parada izaten dugun.
Bigarren taldeak ere etxetik kanpora jokatuko du bere partidua bigarren itzuliari hasiera emango dion 16.n jardunaldi honetan. Makax taldea izango du aurkari.

2008-01-31

Galdeketak, emaitzak eta Iñauteriak

Iritsi da azkenean ostegun gizena! Eta honekin batera parranda egiteko eta neskatxaren batengana hurbiltzeko aukerak handiak dira.

Gure taldeko hiru ehiztarien artean bakoitzak bere taktika erabiliko du, barraren alde batean, barraren beste aldean edota etxerako bidean.

Guzti hori kontutan izanda Blog-eko bisitarien ustez fruitu gehien emango dituen taktika txupitoa eskuan duela Sparrow kapitainak barraren babesean erabiltzen duena izango da.

Iñauteriek izango dute azken hitza. Ondo pasa!

2008-01-30

Laskorain-Euskadi sub´21-Ibarra triangeluarra

Gaur, arratsaldeko zazpiretatik aurrera, Usabalgo polikiroldegian Laskorainek, 21 urtez azpiko Euskadiko selekzioak eta Ibarrak adiskidantzazko triangeluar moduko partidu bat jokatuko dute. Ez da guztiz triangeluarra izango, hots, selekzioak tolosaldeako bi taldeen aurka jokatuko baitu, baina azken hauek beraien artean ez.

Partida, datorren astean Galdakaon ospatuko den 21 urtez azpiko autonomien arteko txapelketarako prestakuntza bezela prestatu dute bi klubeko ordezkariek eta Juanan Rodriguez eta Cesar Roca, euskal herriko konbinatuaren gidariek.

Gogoratu behar da, selekzioarekin Beñat Telleria laskoraindarra arituko dela (bizkarreko lesioak uzten badio, behintzat), eta arazo ezberdinengatik uko egin behar izan dieten Mikel Arribillaga atezaina (azterketak) eta Jon Otxoa (lana) ere entrenatzen izan direla. Argi dago, beraz, ikastolakoek kanterako lana zaintzen dutela.

Iñauteriak baldintzatuko duten bi aste hauetako saioetarako bixigarri bat da hortaz gaurko partida eta zaletuari zein jokalariei atsegin egingo zaienaren esperantzarekin gaude.