2009-01-27

Laskorainek ezin izan zuen Allerrurekin eta 0-1 galdu zuen azken minutuetan jasotako gol baten erruz

Laskorainek galdu egin zuen joan den larunbatean Lezoko Allerruren aurka jokatutako derbia. Horitxoek maila txukuneko partida jokatu zuten baina ez zuten ate aurrean asmatzen jakin eta ihesi joan ziren hiru puntuak Usalbaldikan azken minutuetan jasotako gol baten erruz.

Derbia txapelketako lehen jardunaldian Lezon jokatutakoaren oso antzekoa suertatu zen. Ikastolakoak nagusi izan ziren jokoan, taktikoki erraz menderatu zutelarik talde lezotarra eta nagusitasun hau gol aukeretan islatzen ere ederki asmatu zuten. Arazoa ate aurrean punteria zeharo kamutsa azaldu zutela izan zen, gol aukera guztiak erratu baitzituzten gol bat bera ere egin gabe. Harritzekoa oso, lehen itzulian txapelketako talderik goleatzaileena izan bait da usabaldarra.

Barkatzen duenak larrutik ordaindu ohi duela esaten da arrazoiz eta hogeitamazortzi minututan Laskorainen gola noiz etorriko itxaroten egon eta gero, ez zen beste ezer aipagarririk gertatu, berdinketarekin konformatu beharko zela zirudienean, amaierarako bi minuturen faltan, lezotarrak izan ziren gola sartu zutenak. Kolpeari adorez erantzungo zioten tolosarrek azken ahaleginean eta gertu ibiliko ziren puntua berreskuratzetik Saldiasen bi zutoinkadarekin baina alfer alferrik.

Aurreko jardunaldian golegileen zerrenda nabarmentzen bagenuen, aste honetan protagonista argiak atezainak izan genituen, nola lezotarra hola Laskoraindarra. 0-1eko azken emaitzak beste zerbait pentsarazi dezakeen arren, neurketako minutu dezentetan eraso jokoa defentsa lanari gailendu zitzaion partida irekiaz eta bi atezainek bikain erantzun zuten. Endika tolosarrak geldiketa dotoreak egin zituen Lezotarren kanpoko jaurtiketetan eta kontraren batean edo bestean, eta jasotako golean ez zuen inolako aukerarik izan atezain gazteak.

Porrot honekin Laskorain sailkapeneko erdiko postuetan katiatuta gelditu dela esan behar da, orain bederatzigarren dago, eta datorren asteburuan Sestaora bidaiatu beharko du Ancla liderra bisitatzera. Plaza paregabea taldeak bederatzigarren postu hori baino gehiago merezi duela aldarrikatzeko.

Usabaldik burumakur irten ziren Javi delegatua, Alonso entrenatzailea eta Endika, Telleria, Telletxea, Barriola, Saldias –haserako bostekoa-, Gil, Murgi, Amatriain, Zubillaga eta Domentxe jokalariak.
Eski

2009-01-19

Laskorainek 8-6 irabazi zion Elorriokori eta zortzigarren amaitu du lehenengo itzulia

Grand Slameko tenis partida baten bosgarren setaren emaitza gogorarazten duen 8-6 batekin irabazi zion Laskorainek Elorriokori joan den larunbatean. Azken emaitzak ezezik markagailuaren bilakaerak ere areto futbol partida baino gehiago tenis partida baten itxura izan zuen, tolosarrak bost aldiz aurreratu eta beste hainbat berdinketa izan bait genuen (1-1, 2-2, 4-4, 5-5 eta 6-6); eta honela ez da batere harritzekoa Usabalgo zalegoak une askotan New Yorkeko Queenseko Flushing Meadowsen zegoela sentitu izana, John McEnroe (Laskorain) eta Jimmy Connorsen (Elorrioko) arteko neurketa ikusgarri haietako batean.

Aipaturiko markagailuaren gorabehera hauetatik erraz ondorioztatu daitekeen moduan, bi taldeak bikain ibili ziren sakearekin, eraso jokoan, baina negargarri errestoan, defentsa lanean. Norgehiagoka beraz oso irekia eta gol aukera askokoa suertatu zen, gustagarria ikuslearentzat, baina bi taldeen arteko kalitate mailan dagoen aldeari erreparatuz gero, orekatuegia joan zen etxekoen kalterako eta ekidin beharreko nerbioak pasa zituzten laskoraindarrek hiru puntuak poltsikoratzeko.

Azpimarragarriena noski golegileen zerrenda izan zen. Ikastolakoentzat Gilek, Amatriainek, Otxoak, Saldiasek eta Telletxeak gol bana egin zuten eta Barack “Yes We Can” Telleriak hiru. Protagonista nagusiak azken hiru horitxo hauek izan genituen. Telleriaren hat-tricka oinarrizkoa izan zen taldea partidan mantentzeko eta azken bi minutuetan Saldiasek eta Telletxeak sartutako bi golek partida erabaki zuten. 7-6 eta 8-6, “game, set and match” Laskorainentzat.

Garaipen berri honekin Laskorainek 23 puntu pilatu ditu lehenengo itzuliaren amaieran eta zortzigarren dago kokatuta sailkapenaren gune epelean. Txapelketaren bigarren erdirako helburuak gauzak hobeto egin eta bi datu horiek gainditzea izan beharko luke ezbairik gabe. Horretarako batez ere taldearen trinkotasuna landu beharko da gogotik, defentsa jokoa alegia, arerioek samurregi zulatzen bait dute horitxoen atea.

Amaitu aurretik aipatu Laskorain Kirol Elkartearentzat asteburu borobila izan zela azken hau, lehen taldeaz gain, Javi eta Saldiasek zuzentzen duten filialak ere irabazi egin baitzuen eta baita Pradosen neskek eta Sanchezen jubenilek ere. Azken hauek Laubururen aurkako derbian.

Bihotz taupada gehiegirekin amaitu zuten larunbatean Usabalen Javi delegatuak, Alonso entrenatzaileak eta Endika, Amatriain, Saldias, Gil, Murgi –haserako bostekoa-, Telleria, Telletxea, Barriola, Zubillaga, Otxoa eta Domentxe jokalariek. Baja izan ziren Zabala eta Lander.
Eski

2009-01-12

Laskorainek 4 eta 1 galdu zuen Izkepot taldearen aurka

Denboraldiko irteera zailenarekin eman zion hasiera Laskorainek 2009 urte berriari, zailena diogu, izan ere Nazional B mailako oilar nagusienetarikoa den Laudioko Izkepot ahaltsuari egin behar izan bait zioten aurre Alonsoren mutilek joan den asteburuan.

Emaitzaren zabaltasunak kantxa gainean isladaturiko zirraren kontrakoa adierazten du, bi taldeetako jokalariek aparteko berdintasuna eskeini bait zuten jokaturiko 40 minutuetan zehar.

Tamalez, neurketaren amaieran tolosarrek ateratako ondorioak aski ezagunak dira jokalarien kontzientzian, “betiko leloa” edota “betiko lepotik burua” bezelako adierazpenek ongi baino hobeto azaltzen bait dute ikastolakoen nahigabea bueltako bidaian.

Arerioaren mailak ez zituen gureak kokildu eta arabarrek lehenengo minutuan 1-0 aurre hartu bazuten ere, lotsarik gabe eta harrotasunez jokatu zuen taldeak emaitza horrekin amaitu zelarik lehenengo zatia.

Bigarren erdian, Alonso entrenatzaileak lerroak aurrera bota zituen presio etengabean aritzeko aginduarekin eta gol aukera argi bezain ugariak sortzen hasi ziren etxeko atezainaren aurrean. Baina beste astebetez errepikatu zen filmearen gidoia eta estatistikaren lege guztiak apurtuaz, sutetik osorik eta erre gabe atera ziren arabarrak.

Atezainak batzutan, zutoinak zein hutsegite argiek besteetan, horitxoak bere onetik ateratzea lortzeaz gain, arerioa indartu zuten futbolean horrenbeste barkatzeak dakarren ondorio ezagunari esker. Markagailua berdintzeko azken saiakera batean, Gilen jaurtiketa batek ateko langa dardarka utzi zuen golak egina zirudienean, eta hurrengo jokaldian etxekoek 2-0-ekoa erdietsi zuten amaierarako 3 minutu faltan.

Alonso entrenatzaileak atezain jokalaria atera zuen hondarreko minutuetan, 4-1-eko azken emaitzaz itxi zelarik norgehiagoka. Telleria izango zen laskoraindarren golaren arduraduna.

Jokoan nabaritu ez bazen ere, lehiaketan izan zen gainditua taldea eta datorren astean Elorrioko arrokatsuak bisitatuko du Usabalgo polikiroldegia. Garaipena lortzea garrantzitsua suertatuko litzateke lehenengo itzuliari amaiera ahalik eta hobekien emateko.

Larunbatean Laudion Javi delegatua, Alonso entrenatzailea, Endika, Telleria, Telletxea, Murgi, Gil, Barriola, Saldias, Ekhi, Amatriain, Joniko eta Domentxe izan ziren.
Amatriain