2009-02-16

Laskorainek 3-8 menderatu zuen Ortziri Comodon taldea

Kaldereroen gauean garaiz erretiratzeko eginkizunarekin eta ihauterien lehen posta behar bezela ospatu ezinik geratu ziren laskoraindarrak joan den astean izan ere Igande goizean Bilboko La Peña polikiroldegian jokatzea egokitu bait zitzaion taldeari.

Sailkapeneko azken hirugarren postuan kokaturik dagoen Ortziri Comodon bilbotarraren etxera eginiko bisitak era guztietako susmo eta mamuak zituen aztoratuak tolosarren buruetan, gune arriskutsutik aldentzeko ahaleginak egiten ari diren bizkaitarrek Nazional B mailako oilar bat baino gehiago makurrarazi dute aurtengoan eta norgehiagoka aurrera ateratzeko gogotik borrokatu behar izango zenaren pentsamoldearekin kantxaratu ziren Alonsoren mutilak.

Inoiz baino baja zerrenda luzeagoa suertatu zen horitxoen lerroetan, Domentxe, Ekhi, Telletxea, Zabala eta Jonikok ezin izan zuten gainontzekoen alboan lehiatu arrazoi ezberdinak zirela medio.

Unerik gogorrenetan erakutsi behar du talde batek batasunaren izpiritua, eta horretan bederen ederki aritu ziren ikastolakoak, lehen zatian atzean sendo jardunik eta kontraerasoan zein estrategian asmaturiko jokaldi batzuren ostean 0-5-eko partzialarekin aldagelaratu ziren jokalariak. Neurketa maldan behera ipini zen oraindik 20 minutu luze geratzen baziren ere. Ordurarteko golegileak Barriola(3) Saldias eta Lander izan ziren.

Bigarren erdian tentsio jeitsiera batek etxekoen zenbait gol baimendu arren, soberako errentak 3-8-ko azken emaitzarekin amaitu zuen neurketa. Saldiasek beste behin, Murgik eta Gilek sinatu zituzten tolosarren sareratzeak.

Aipamen berezia egin nahi zaio filialeko Led jokalariari, haserako bostekoan ateratzeaz gain, txukunak baino zerbait gehiago izandako minutu ugari jokatu bait zituen bere “debut”-ean, merezitakoak eta bere kabuz irabazitakoak gainera.

Garaipena kantxa gainean argia izan bazen, are eta argiagoa gertatu zen bueltan autobusean Amatriain eta Landerrek musean irabazitako txapelketatxoa, karta gehiegi ikusi barik baina nagusitasun osoz bereganatua gainontzeko taldekideak aise menderatuaz.

Igandean Bilbon, Javi delegatua, Alonso entrenatzailea, Endika, Led, Amatriain, Saldias, Barriola, Murgi, Lander, Gil, eta Telleria izan ziren. Telletxea ere aulkitxoan eseri zen jokatzeko egoeran aurkitu ez arren.

Filialak bina berdindu zuen Idiazabalen ostiral iluntzean jokatutako partidan. Puntua txarra ez den arren, erretxinduta itzuli ziren tolosarrak garaipena epaileak eskutik kendu izanaren usteagatik.
Amatri

2009-02-09

Norgehiagoka eder baten ondoren hiruna berdindu zuten Laskorainek eta Euskaldunak

Hiruna berdindu zuten Laskorainek eta Euskaldunak joan den larunbateko derbian. Amaierako puntu banaketan baino gehiago albistea Euskaldunako aulkitxoan izan genuen: bertan, bi denboraldiz horitxoen entrenatzaile izandako Jacinto Diaz errepikaezina eseri baitzen, zazpi urte eta gero Tolosara bueltan.

Derbia interesgarria suertatu zen, maila politakoa. Horitxoek, beste behingoz, beraien jokoa beraien sailkapeneko postuaren oso goitik dagoela frogatu zuten eta kinka larrian jaitsiera saihesteko borrokan dabiltzan Euskaldunakoek ere uste baino joko trinkoagoa eskeini zuten.

Aurtengoan ia astero gertatu den moduan, ikastolakoena izan zen baloiaren jabetza eta jokoaren ekimena; baina beste hainbatetan kontatu dugun moduan joko nagusitasun hau ezin izan zuten markagailuan islatu eta atzetik ipini ziren ate aurrean ez asmatzeagatik eta defentsan egindako hutsengatik. 0-1 atsedenaldian eta 0-2 aldageletatik bueltan: asteroko amesgaiztoa.

Azken minutuetan ordea, ezkortasuna eta etsipena antzematen hasi zirenean, horitxoek golaren giltza berreskuratu zuten eta jadanik lesiotik bueltan den Landerrek, Saldias kapitain eta pitxitxiak eta Murgi mirakusak buelta eman zioten markagailuari, horitxoen jokoak merezi bezela behingoagatik. Baina zoriontasuna ez zen borobila suertatuko, azken minutuan atezain jokalariaren bitartez Euskaldunakoek hirunakoa sartuko baitzuten.

Usabaldik irtetean Jacintok balio handia ematen zion berdinketari, beraien egoeran puntuak urrearen balioa bait du. Laskoraindar guztiok puntu hau denboraldi amaieran erabakiorra bihur dadila opa diogu noski hainbeste momentu gozo bizi arazi zizkigun areto futbol maisu ahaztezinari.

Amaitu aurretik larunbateko albisterik okerrena ere gogoratu nahiko genuke, Telletxearen lesioa alegia. Bizkarreko mina tarteko, laskoraindar rockero zaharrak ezin izan zuen bigarren zatian parte hartu eta hori noski albiste oso txarra da taldearentzat. Ea sendatze azkarra izaten duen aita bihurtu bidean den Ikerrek.

Puntu bakarrarekin bukatu zutenak Javi delegatua, Alonso entrenatzailea eta Endika, Telleria, Telletxea, Saldias, Barriola, Gil, Lander, Otxoa, Murgi, Zubillaga eta Amatriain jokalariak izan ziren. Filialak aldiz erraz hartu zuen mendean Euromar Kafetegia talde zarauztarra.
Eski

2009-02-02

Laskorainek 7-1 galdu zuen Ancla Dosanpor taldearen aurka

Irteera zail eta gogor bati egin behar izan zion aurre Laskorainek joan den asteburuan Sestaora eginiko bisitan, zaila diogu, izan ere Nazional B mailako bigarren sailkatua den Ancla Dosanpor taldea topatu bait zuen parean, jokalari beterano eta adituez jositako talde bat alegia.

Ez zuten neurketa guztiz txarra jokatu Alonsoren mutilek, defentsa sendo batean oinarrituriko lehen zati txukun bat egin eta gero itxaropenerako tarte garbi bat azaldu zutelarik. 1-0 markagailuan atzetik ipini arren, Barriolak 1-1-eko merezitako berdinketa ezarri zuen. Ordurako horitxoek zutoinkada bat eta makina bat hutsegite sinatuak zituzten atezain bizkaitarraren aurrean. Horrela amaitu zen lehen zatia betiko zirrara eta susmo txarrekin.

Tolosarrek dena den, aurtengo denboraldian gainetik kendu ezineko bi gurutzeak utzi zituzten agerian beste behingoz Sestaoko “La Benedicta” polikiroldegian. Lehenik eta behin, ate aurrean erakutsitako gaitasun eza, aurtengoan ortzadarrari golen bat sartzeko ere arazo iskanbilatsuak erakusten ari bait dira ikastolakoak.

Bestetik, ezin aipatzeke utzi lehiaketarako une garrantzitsuetan taldeak erabat galdu duen sena. Bigarren zatia hasi eta espekulazio minutu pare bat nahikoa izan ziren norgehiagoka oparitzeko 3-1 aurreratu bait ziren sestaotarrak, era berean eta arriskatzeko minutuetan gol guztiak etxekoen aldera erori ziren 7-1-eko azken emaitzaz amaitu zelarik norgehiagoka.

Kasualitateak eta zorte txarrak eragin gutxi izan ohi du futbolaren munduan, eta aurtengo denboraldian Laskorainek kili-kolo topatu dituen partiduen gehiengoa galduta bukatu izanaren arrazoia, zorte txarra eta kasualitatearekin zerikusirik ez dutela baieztatu daiteke erratzeko inungo beldurrik gabe.

Taldeak Lander berreskuratu du behintzat lesioen gerizpean pasatako hilabete batzuren ondoren eta Zabala ere laster izanen da taldeari laguntzeko prest. Jokalari guztiak premiazkoak gertatuko dira datorren astean maldan gora datorren Andoaingo Euskaldunaren eskutik garaipenaren bidea aurkitu ahal izateko.

Larunbatean Sestaon, Javi delegatua, Alonso entrenatzailea, Endika, Amatriain, Barriola, Telletxea, Gil, Ekhi, Telleria, Lander, Joniko eta Domentxe jokalariak izan ziren.

Filialari dagokionez, 6-6 berdindu zuten Pasaian galdu gabeko arratxa bikain bati jarraipena emanez.
Amatriain