2009-03-30

Laskorainek 5-5 berdindu zuen Kenci hirugarren sailkatuaren etxean

Aurtengo denboraldiaren azken txanpak lagatzen duen norgehiagokarik ederrenari egin zion aurre Laskorainek joan den larunbatean sailkapeneko hirugarren postuan kokaturik dagoen Elgoibarko Kenci boteretsuaren etxean.

Igoera lortzeko ahaleginetan den arerio indartsu baten aurrean urraturiko puntuak taldearen berreskapena ekarri du berriro ere, aurtengoan edozein aurkari motaren aurka lehiatu eta irabazteko gaitasuna badagoela egiaztatu bait da beste behingoz.

Bere bikotearen partetik izandako ezkontza bat dela eta, Alonso entrenatzaileak ez zuen bere mutilen alboan jarduteko aukerarik izan, beraz, taldeko buruzagiak senargaien panpintxoa eskutan zuela eta “Mila pinpilipauxen bals”-a dantzatu nahiean zirauen bitartean, tolosaldeako areto futbolaren Paul Newman den Egizabal entrenatzaileak bete zuen aulkitxoaren hutsunea bere ohiko dotoretasun eta bermatasunez.

Zonakako defentsa baten planteamenduarekin kantxaratu ziren horitxoak lehen zatian eta 0-1 galtzen hasi izanagatik, buelta ematen asmatu eta Lander, Saldias eta Murgiren golei esker 1-3 aurreratu ziren tolosarrak, emaitza honekin bukatu zirelarik lehen 20 minutuak.

Markagailuan nagusi azaldu arren, behar baino gehiago sufritu zuten ikastolakoek eta bigarren erdian banakako defentsa batera egokitu zen taldea. Hasiera nagitsu batek Elgoibarkoen berpizpena baimendu eta 4-3 aurreratu zituen etxekoak 15minutu luze gelditzen zirenean oraindik jokatzeke. Ernatzeko unea ailegatu eta Amatriain eta Gilek 4-5-ekoa ipini zuten laskoraindarren partzialik onenean, 5-5-eko berdinketa norgehiagoka amaitzeko 4 minuturen faltan erori zelarik. Gol aukerak bi ateetan gertatu ziren baina markagailua adostasunean lotu zen.

Endika “bizkar zilardun” atezainak burututako neurketa azpimarratu nahi da batez ere, gelditu bikainak egiteaz gain, marruma artean defendatu bait zuen area txikia bere eremuak miatzera ausartzen ziren arrotzak uxatuaz behin eta berriz.

Larunbatean Elgoibarren, Egizabal entrenatzailea, Javi delegatua, Endika, Telleria, Telletxea, Saldias, Lander, Ekhi, Amatriain, Murgi, Gil, Barriola eta Domentxe izan ziren.

Filialak 1-2 irabazi zuen Azkoitian Maiorga atezainak “Benny Hill”-en jokaldi bat oroitarazi zigun arren. Pradosen neskek ere 0-3 menderatu zuten La Salle taldea, ikastolarentzat astebukaera on bat sinatuaz areto futbolaren arloari dagokionez.
Amatri

2009-03-24

Laskorainek 3 eta 4 galdu zuen azkeneko segunduan Jarrillerosen aurka

Liderraren eta Nogalesen aurkako neurketetan bi garaipen erreskan erdietsi eta gero, Laskorainek erlaxatuta jaso zuen Portugaleteko Jarrillerosen bisita. Egia erran, San Joseko zubia eta udaberriaren lehen printzek ekarritako eguraldi ederra ez ziren lehiaketarako gonbiterik onena eta horitxoen lasaitasuna areagotu besterik ez zuten egin.

Aurrekoa nahikoa ez balitz bezala, Jarrillerosekoak bizpahiru bajarekin agertu ziren Usabalera eta partidaren lehen hemeretzi minutuak Scorpionsen “Send me an angel” balada bezain lasai eta armoniatsuak suertatu ziren. Jokoan jaun eta jabe horitxoek bi jokaldi bikainetan bi gol sartu zituzten -bata Amatriain arrokak Ekhiren jokaldia probestuz eta bestea sasoi bikainean den Murgik Landerren pase zorraragarriari amaiera emanaz- eta honela lasaitasuna lasaikerian bihurtu zen.

Zer esan nahi duen honek? Bada garaipena errazegia antzeman zela, defentsako lana zertxobait urritu zela eta juxtu atsedenaldiaren aurretik eta ondoren bizkaitarrek bi gol sartu zituztela. Errebotez eta zorte handiarekin sartutako estrainekoa izan zen hain zuzen partidoaren melodia aldatu zuena, etxekoen garaipena zalantzan egon zitekeenaz ohartarazi baitzituen bi taldeak.

Binakoarekin partida desberdina jokatu zen, askoz orekatuagoa eta ikastolakoek izan bazuten ere baloia eta joko ekimena, Jarrillerosekoek ez zioten borrokari muzin egin eta baloi luzeen bitartez ederki ustiatu zituzten beraien aukerak. Baina horitxoak gehixeago ziren eta 3-2koa egin zuten, armailen harridurarako Amatriain izan zelarik berriro ere golegile. Uste baino gehiago sufrituta baina azkenean garaipenak ziurra zirudien.

Areto futbolean ordea azken segunduraino ezin daiteke ezer esan eta are eta gutxiago atezain jokalariaren taktika erabili daitekeenetik. Bizkaitarrek jokaldi hau erabili zuten azken hiru minutuetan eta amaierarako 18 segundu faltan hirunakoa ipini zuten kanpoko jaurtiketa ikusgarri baten bitartez. Ondoren, berdinketak uzten zuen zapore txarra saihestu nahiean, etxekoek aterako zuten atezain jokalaria, badakizue, zirt edo zart, arre edo so, baina jokaldia gaizki irtengo zitzaien, baloi galera bat tarteko bizkaitarrek laugarrena sartu baitzuten markagailuko bozinarekin batera.

Burumakur irten ziren Usabaldik Javi delegatua, Alonso entrenatzailea eta Endika, Telleria, Telletxea, Lander, Murgi –haserako bostekoa-, Zabala, Amatriain, Zubillaga, Gil eta Domentxe jokalariak. Amaitzeko, asteburuko albiste ona filialak ekarri zuela azpimarratu behar da, bigarren sailkatuari 5-1 irabazi baitzion eta igoera play-offetik gertuago kokatu bait da.
Eski

2009-03-16

Laskorainek 5-10 menderatu zuen Gipuzsala-Nogales Astigarrako derbian

Joan den astean Nazional B mailako liderra merezimendu osoz gainditu ondoren, zaila eta aldi berean erakargarria bezela batailatu genezake larunbatean Laskorainek Astigarragako udal polikiroldegian jokatu beharreko derbia. Parez pare, bi talde eta areto futbola ulertzeko bi modu ezberdin bezain errespetagarri, igoera proiektuaren ametsa eta irrika batetik, harrobia eta eguneroko lanaren eredua bestetik, beste behingoz, Gipuzsala eta Laskorain hurrenez-hurren.

Sobera jakina da horrelakoetan 3 puntuetaz gain zerbait gehiago ere badagoela jokoan eta partiduak ez zion harmailetako zalegoari hutsik egin, markagailuak erakusten duen gol zaparrada galanta delarik aipaturikoaren frogarik argiena.

Konzentrazioz beterik kantxaratu zituen Alonso entrenatzaileak bere mutilak eta lehen zati borobil batek 0-5 aurreratu zituen horitxoak. Murgi, Saldias eta Telletxea (3) izan ziren ordurarteko golegileak. Defentsa sendo eta eraso adimentsu batek maldan behera ipini zuen erronka.

Bigarren erdia hasi bezain pronto Telletxeak 0-6-koa egin zuen eta etxekoek atezain jokalaria ateratzeko erabakia hartu arren, ikastolakoek puntuak ondo lotu eta 5-10-eko emaitza zabalarekin amaieratu zuten norgehiagoka. Gainontzeko golak, Telletxea, Gil, eta Ekhi (2)-ren eskutik etorri ziren. Ekhi-CR6 ezizenarekin ezagutzen hasia den azken honek, bere zapatila orlegi dizdiratsuei estreinu bikaina eman zien. Telletxearen aipamena ere ezin alde batera utzi, 5 gol ez bait dira egunero sartzen.

Taldeak Iñaki Egizabal bere idazkari tekniko “matti” eta “kutti”-ari eskeini nahi dio garaipena, iraganeko “kale-bandolero” garaiak gaindituak dituen honetan eta etxerako moduko gizon jarraibidezko batean bilakaturik, izaten duen denbora libre apurra klubaren onurarako erabiltzen bait du beti.

Larunbatean Astigarragan, Alonso entrenatzailea, Endika, Telleria, Murgi, Telletxea, Lander, Barriola, Saldias, Amatriain, Joniko, Ekhi, Gil eta Domentxe izan ziren neurketa bikain honen protagonistak.

Filialari dagokionez 2-8 irabazi zuten Legorretako Bilkoinen aurka igoera fasean sartzeko borrokan aurrerapauso garrantzitsu bat emanaz. Pradosen neskek ere beste horrenbeste egin eta 12-0 gainditu zuten Eskolapioen taldea, ikastolarentzat areto futbol arloan astebukaera fina borobilduaz.
Amatri

2009-03-09

Laskorainek 8 eta 5 irabazi zion Sasikoa liderrari partida ikusgarri batean

Laskorainen kronika irakurlea behin eta berriz errepikaturiko leloarekin topatu da aurten: ikastolako taldeak bere joko merezimenduei dagokien baina emaitza eskasagoak pilatu dituela alegia eta sailkapeneko postuak ez duela inolaz ere taldearen joko maila behar bezala islatzen. Seguruenik astero astero gauza berbera irakurri duenak kronikalariaren objetibitatea ere zalantzan ipini izango du uneren batean, baina larunbateko neurketak zalantza guztiak argitzen eta deuseztatzen ditu.

Jardunaldi honetan hain zuzen txapelketako liderraren bisita jaso zuten horitxoek Usabalen, eskarmentu eta kalitate ikaragarrizko jokalariz osaturiko Sasikoa durangarraren bisita, eta sekulako partida borobildu zuten lider ahaltsua 8 eta 5 lehen minututik azkeneraino nagusitasunez menperatuaz. Erdipurdiko talde batek ez du ez honetarako gaitasunik.

Aidanez gakoetariko bat Alonso entrenatzailearen txarla teknikoan egon zen; maisutasunez aukeratutako adibidez horniturik diskurtsoak jarrera ezin hobearekin eta oso ideia garbiekin kantxaratu arazi baitzituen horitxoak, oso entxufatuta, orain esaten den moduan. Baloia gogor presionatzen zuen etxekoen defentsa zonalak min handia egin zien durangarrei eta honetaz gain horitxoek baloia ere ederki eta abiadura handiarekin jokatu zuten, nola eraso posizionalean nola kontraerasoan.

Larunbatean gainera, denboraldian orain arte gertatutakoaren kontra, kantxa gaineko nagusitasuna markagailura eramaten ere bikain asmatu zuten, Alonsorenak denbora guztian izan zirelarik aurretik hestutasun handiegirik pasa barik. Golegileak izan ziren noski protagonista eta guztion gainetik Murgi mirakusa. Murgik txapela kentzeko moduko partida osatu zuen taldearen lehenengo hiru golak sinatu zituelarik. Jaione bere neskalagunak ere, “zer demontre bazkaldu du gaur?” galdetzen zuen harmailetan.

Beste bost golak Telletxearen, Barriolaren eta Zubillagaren artean banatu zituzten. Lesiotik bueltan Telletxea rockero zaharrak hat-tricka osatu zuen Murgik bezela eta arratsaldeko golik ikusgarriena, ikastolakoen seigarrena, Ekhi Zubillagak sartu zuen, jaurtiketa bortitz batekin zutoina eta langa arteko armiarma sareak garbituaz.

Jokalari guztiek maila ikusgarria erakutsi bazuten ere, Amatriain arroka despistatu xamarra antzeman genuen, noraezean bezela arratsalde guztian. Partida amaieran mihiluzeek ziotenez Gorkak aurreko gaueko abesti baten eraginpean zirauen, erdi liluratuta erdi sorginduta. Berak noski ebidentzi guztiak ukatu zituen.

Egindako lanagatik harro eta pozik, baina aste honetako Astigarragako derbian burua, irten ziren Usabaldik Javi delegatua, Alonso entrenatzailea eta Amatriain, Barriola, Domentxe, Endika, Giller, Lander, Murgi, Otxoa, Saldias, Telleria, Telletxea eta Zubillaga jokalariak.

Filiala bere hortan darrai "play-off"-a jokatzeko eskubidea ematen duten postuetara gerturatzeko helburuan eta asteburu honetan Allerruri 5-1 gailendu zitzaion.
Eski

2009-03-02

Laskorainek 4-2 galdu zuen Urretxun jokaturiko derbia

Azken bi partiduetan garaile irtenda, 30 punturekin eta ez atzera ez aurrerako postuetan katiaturik zegoela irten zen Laskorain joan den astean beti ere zaila den Urretxuko polikiroldegiko kantxara.

Etxekoek asko zuten jokoan eta berehala nabarmendu zuten garaipenaren irrika harmailetako zalegoaren aurrean, horitxoek ez bezela, erabat entxufaturik eta seriotasun osoz aurre egin bait zioten norgehiagokari epaileak txilibitua estraineko aldiz jo bezain pronto. Modu horretan eta bortzgarren minutuan 1-0 aurre hartu zuen Goerri taldeak kontraerasoko jokaldi batean. Tolosarrek oraindik, hamaika abagune garbi oparitzeko prestazioarekin jardun zuten lehen zati osoan zehar baina Endika atezainak istiluzko emaitza bat ekidin zuen 20. minutuaren amaieran.

Ordurarteko itxura kezkagarria izaten ari zen, eta bigarren erdian ikastolakoen konzentrazioak beste maila bat hartu zuen. Amatriainek berehela egingo zuen 1-1-eko gola estrategiazko korner bat sareetara bultzatzearen ondorioz. Etxekoen ondorengo erantzunari Saldiasek eman zion berea 2-2-ko emaitza igoaz elektronikora.

Jarraieko golaukerak bi ateetan gertatu ziren baina etxekoak izango ziren beste behingoz asmatuko zutenak eta 4-2-ko markagailuarekin amaitu zen filmea. Aitzakiarik merezi ez duen porrota sailkapeneko azken postuetan egonagatik, ikastolakoek baino maila hobea erakutsi zuen aurkari serio eta borrokalari baten aurrean.

Datorren astean Sasikoa liderraren bisita jasoko dute horitxoek Usabalgo polikiroldegian, bere lerroetan Nazional B mailako jokalari onenak dituen taldea eta txapelketa irabazteko aukeratu nagusia inungo ezbairik gabe. Joan den larunbateko neurketaren irudiaren zirrikiturik txikiena erakusteak halabeharrezko porrot argi bat zihurtatuko luke.

Larunbatean Urretxun, Javi delegatua, Alonso entrenatzailea, Endika, Amatriain, Telleria, Saldias, Barriola, Lander, Gil, Murgi, Ekhi, Zabala, Joniko eta Domentxe izan ziren. Filialari dagokionez, 4-4 berdindu zuen Tecnun taldearen aurka, azken segunduan lortutako gol bati esker.
Amatri