2009-09-27

Laskorain eraberrituak 6 eta 1 irabazi zuen La Bellotaren aurrean txapelketari hasiera bikaina emanaz

6 eta 1-eko garaipen zabal eta itxaropentsuarekin ekin zion Laskorainek bere 17 urtetako bilakaeran ireki duen aro berriari. Aro berria diogu, horitxoentzat 2009/2010-ko ikasturtea ez bait da Nazional B mailan jokatzen duten beste denboraldi soil bat izango, hamargarrena erreskan, horretaz gain kirol talde eraberritu baten estrainekoa ere izango bait da.
Honelaxe da. Telebista teknologian gertaturikoarekin parekatuaz, uda honetan Laskorainera itzalaldi analogikoa iritsi dela esan daiteke, Saldias, Telletxea, Amatriain eta Domentxe jokalari paregabe eta ahaztezinek taldea utzi baidute; baina aro analogikoaren amaierari aro digitalaren sorrerarekin erantzun dio ikastolako taldeak jokalari multzo gazte bezain prestatu eta adoretsu bat osatuaz. Erabarritu ala hil.

Larunbatean partida martxan ipini aurretik izan genuen aurrekoaren lehenengo aztarna. Kapitainaren besokoarekin Unai Barriola kantxaratu zen Laskorainen historiako laugarren kapitaina bihurtuaz eta Xabier Bengoetxea, David Prados eta Andoni Saldiasen lekukoa hartuaz. Zerrenda hau ikusita, zorte handikoa izan dela eta oraindik dela besoko horitxoa esan behar.

Etxekoentzat beraz oso berezia suertatu zen neurketan maila estreinatzen zuen Legazpiko La Bellota izan zuten horitxoek arerio eta nahikotasunez nagusitu zirela azpimarratu behar da. Legazpiarrek 2 eta 1 markagailuan gerturatutakoan ikusi ziren minuturik orekatuenak baina bigarren zatiaren 8. minutuan Telleriak sareratutako etxekoen hirugarrenak partida behin betirako desorekatu zuen, erabat esanguratsua delarik azken 6 eta 1-ekoa. Beste bost golak Gil TDI, Murgi mirakusa eta Jon Zlatan Elolaren artean banatu zituzten, azken bi hauek bina sinatu zituztelarik.

Golegileez gain, protagonista nagusiak nola ez laskoraindar debutariak izan ziren, G3 bezela bataiatu den staff teknikoatik hasita. Azken bi urteetan aritu den Alonso entrenatzaileak aurtengoan Javi Mujika entrenatzailearekin eta Imanol Moyano prestatzaile fisikoarekin batera egingo du lan eta Imanolen eragina asko antzeman omen da aurre denboraldiko entrenamentuetan. Egia esan horitxoak Button eta Barrichelloren Brown bolidoak bezela agertu ziren Usabalen.

Beste debutariak jokalari berriak izan ziren: Urko Alonso atezaina eta Mikel Alonso, Iñigo Belloso eta goraxeago aipaturiko Jon Elola jokalariak. Laskorainen estraineko deialdi digitala Javi delegatuak, Endika atezainak eta Telleria, Murgi, Gil, Camio –haserako bostekoa-, Barriola, Zubillaga eta Zabala jokalariek osatu zuten. Aurrera LSKRN.



Eski

2009-09-24

Aurredenboraldia III

Andoaingo txapelketa jokatuaz eman zion amaiera aurredenboraldiari ikastolako talde nagusiak pasa den asteburuan.
Final aurrekoan Donostiako Inter taldea izan zuten aurkari eta partidu bikain baten ostean 1-6 nagusitu ziren mutilak. Finalean Andoaindarrak izan zituzten aurkari, bigarren aldiz aurredenboraldi honetan. Oraingoan ordea, ikastolakoek ezin izan zuten markagailuan aurre hartu eta Andoaindarrak atzean serio mantendu ostean 2nako berdinketarekin amaitu zen partidua. Penaltietan Saldias kapitain handiaren falta nabaritu zuten gure mutilek eta Andoaindarrak nagusitu ziren.
Ezin izan du beraz Laskorainek 3.n aldiz erreskan txapela eskuratu eta aurtengoan 2.n postuarekin konformatu behar.
Dena den, aurredenboraldi itxaropentsua burutu du taldeak eta ea liga hasiera honetan emaitza onak lortzen dituen.

Iritsi da beraz puntuak poltsikoratzen hasteko garaia.

Zorte on mutilak!

2009-09-15

Aurredenboraldia II

Denboraldiko lehendabiziko partidua gero eta gertuago dago eta honekin batera aurredenboraldia azken txanpan sartu da. Lan fisikoa zertxobait gutxiagotu eta baloiarekin egindako lana protagonismo handiagoa hartzen ari da.
Konpetizioari puntua hartzeko helburuarekin lagunartekoak geroz eta gehiago dira, azkeneko biak, bata larunbatean Billabonako Lakunza taldearen aurka jokatutakoa eta bestea atzo iluntzean Zarautzen aurkakoa. Emaitza onak lortu ditu taldeak bi partidu hauetan, norgehiagoka parekatuak izan badira ere, ikastolakoak trebeago ibili dira ate aurrean eta 4-1 eta 5-0 emaitzaz irabazi dituzte bi partidak hurrenez hurren.
Atezainak bikain ari dira euren atea zaintzen eta erasoan ere Lander eta Ekhi nabarmendu badira ere ia denek izan dute aurkarien atea zulatzeko aukera.
Aste gogorra izango dute datorrena ikastolakoek, asteburuan Andoainen jokatuko den txapelketaren aurretik, biharkoa izango baitute atseden egun bakarra.
Hurrengo zita beraz, urtero Euskaldunak antolatzen duen txapelketan izango dute gure mutilek.

2009-09-09

Analogikotik digitalera

Aldaketa nabarmenak izango ditu aurtengoan ikastolako talde nagusiak. Urte luzez taldearen zutabe izan diren lau lagunek taldeari agur esan baitiote.
Andoni Saldias kapitainan handiak, Iker Telletxea areto futboleko maisuak, Gorka Amatriain taldeko birikak eta Unai Domenche atezain apartak amaiera eman diote euren ikastolako jokalari etapari.
Zaila izango da hain hutsune garrantzitsuak betetzea baina taldeko gazteenak gogo biziz daude euren alboan ikasitako guztia kantxan erakusteko eta egia aitortzekotan, parada ezin hobea dute.
Jokalari falta honi aurre egiteko jende berria sartu da taldean. Filialetik igo diren Jon Elola(26) eta Urko Alonso(25) atezainarekin batera, Iñigo Belloso(21) eta Mikel Alonso(23) gazteak ere sartu dira taldean.
Teknologiekin gertatzen den bezalaxe, Laskoraini iritsi zaio eraberritzeko garaia eta aldaketa guzti hauekin analogikotik digitalera pasatu da taldea.
Gora LSKRN!

2009-09-07

Aurredenboraldia

Uda partean egindako etxeko lanen ostean, lan fisikoari garrantzia handia emanez hasi du aurredenboraldia ikastolako taldeak. Imanol prestatzaile berriaren eskutik, denboraldi hasierarako puntu puntuan iritsiko dira gure mutilak.
Hala ere, areto futbolean baloiarekin jokatzen da eta lagunarteko norgehiagokek ere garrantzi handia izaten dute aurredenboraldian. Arlo horretan, larunbatean jokatu zuen Laskorainek aurredenboraldiko lehenengo neurketa, Usabalen, Andoaingo Euskalduna taldearen aurka.
Partiduak bi zati oso ezberdin izan zituen, lehenengoa oso parekatua suertatu zen eta bi taldeek gol aukera gutxi sortu ostean Andoaindarrak 0-1 nagusi joan ziren aldageletara. Bigarren zatian ordea, ikastolakoek erritmoa biziagotu zuten eta ate aurrean ere ederki asmatu ostean 7-3 amaitu zen norgeiagoka.
Aurredenboraldiko garaipenek ez dute punturik ematen baina konfidantza hartu eta lan fisiko gogorrari ilusioz ekiteko errezeta bikaina dira. Bide onetik hasi da beraz gure talde gazte eta eraberritua.