2009-10-26

Laskorainek 5-1 menderatu zuen Euskalduna taldea eta lehen postuan jarraitzen du

Nota onarekin ebatzi zuten horitxoek joan den larunbatean Ibarrako Belabieta polikiroldegian jokaturiko erronka arriskutsua, izan ere parez-pare garaitu beharreko taldea Andoaingo Euskalduna arrokatsua bait genuen. Tolosarren ezagun zaharra eta andoaindarren egungo entrenatzailea den Jacinto Díaz maixuak, jokalari indartsu eta langilez jositako taldea eraiki du eta laskoraindarren bostgarren garaipena ekiditeko asmo betean kantxaratu ziren kanpotarrak joko zuzen eta defentsa sendo batean oinarriturik.

Ondo baino hobeto hasi zen norgehiagoka, 2-0 aurreratu bait ziren etxekoak Telleria eta Ekhik buruturiko sareraketa banari esker, Euskaldunakoek dena den ez zuten inungo momentutan bururik makurtu eta Endikaren atea modu nabarmenean estutu ondoren, 2-1-ekoa erdietsi zuten lehen zatia amaitzeko 3 segundu falta zirenean. Kolpe gogorra ikastolakoentzat, erabat garbi ikusitako egoera azkenean lausotu egin bait zen aldageletarako bidean.

Aro digital honetako Laskorainek dena den, modu guztietako baliabideak trebatu ditu hilabete hauetan zehar eta lehenengo zatian erdipurdikoa zena, balekoa bihurtu zen bigarren erdirako. XXI. mendean erabat murgilduak egonik, areto futbol moderno batek behartzen duen zehaztasun eta automatizazio maila erabat menperatu dituzte horitxoek, era berean eta berrasieran, kantxa barruan aplikatutako hizkuntza binario batean komunikatzen hasiko ziren Alonso eta Javiren mutilak, segidan andoaindarren lerroak nabarmenki gainditu eta 5-1-eko emaitza potoloarekin amaituaz. Golegileak Lander, Zabala eta Barriola izan genituen.

Tolosarren bostgarren garaipena da erreskan eta orain arte bidean puntu bakar bat ere laga barik lidergoan darrai taldeak. Gazteen egokitzapen prozesua errealitate bat da dagoeneko eta bolada bikain honi ahalik eta luzapen haundiena ematea da oraingoz epe motzerako planteatu den helburu nagusia. Datorren astean Urretxura mugituko da Laskorain beste garaipen zail eta berri baten bila.

Larunbatean Ibarran, Javi entrenatzailea, Javi delegatua, Imanol prestatzaile fisikoa, Endika, Barriola, Telleria, Lander, Gil, Alonso, Belloso, Ekhi, Zabala eta Urko jokalariak izan ziren garaipenaren errudunak.
Bigarren taldeak 3-4 irabazi zuen Lezon Yustos (3) eta Igartua “rockero” zaharrek eginiko golei esker, hirugarren taldeak aldiz 7-7 berdindu zuen bere norgehiagoka.


Amatri

2009-10-18

Laskorainek 2-3 garaitu zuen Clinica Dental Aldaz eta lider jarraitzen du

Txapelketa hasiera honetan ibilbide ezberdina izan duten bi talde izan genituen aurrez aurre pasa den asteburuan Lasarten. Alde batetik, jokoan ipini diren puntu guztiak poltsikoratuta zituen Laskorain eta bestetik, sailkapeneko azken postuetan eta punturik gabe zegoen Clinica Dental Aldaz taldea.

Liga hasieran ordea arriskutsua izaten da sailkapenari begiratuta norgehiagoka baten iragarpenetan hastea. Larunbatekoa izan genuen adibide garbia, sailkapenak erakusten duenetik hurrun, partidu oso orekatu bat ikusi baitzuten Lasarteko polikiroldegira bertaratu zirenek.

Etxekoek planteamendu argia kantxaratu zuten. Atzean, oso atzean, sendo mantendu eta kontraerasora bizi irten aukera txikienarekin batera. Epaileek txistua jo eta segundu gutxitan etxekoek lortutako golak, oraindik eta atzerago eraman zuen Lasartearren defentsa lerroa.

Ikastolakoak berriz, kantxa argitzen zuten eguzki izpiek lausotuta, ez zuten liga hasiera honetan erakutsi duten txispa hori plazaratu. Denboraldian aurreneko aldiz markagailuan atzetik eta aurkaria euren porteriko langatik zintzilik, maldan gora ipini zitzaion partidua Laskoraini.

Partiduak 40 minutu irauten dituela jakinda, patxadaz hartu eta baloia hara eta hona mugitzen hasi ziren J bikoitzaren mutilak. Sortu ere, sortu zituzten makina bat gol aukera baina aurkarien atezainaren lan onak eta ikastolakoen hutsegiteek, markagailua bere horretan mantendu zuten atsedenaldirarte.

Bigarren zatiak ere gidoi berdina izan zuen lehen minutuetan, Laskorainek izan zuen baloiaren jabetza eta Aldaz taldea gogor bere lubakian sartuta. Partida ikustera bertaratu zirenek aurkariaren ateari Beotibar pilotalekuko frontisaren antza hartzen ari zirenean ordea, kontraeraso bizkor bati esker etxekoek bigarren gola erdietsi zuten. Malda gero eta gogorragoa ikastolakoentzat.

Une horretan, bere anbulantziako argi guztiak piztu eta ikastolakoen erreskatera agertu zen Joniko, berak aurkitu baitzuen zulaezina ziruiden frontisean zirrikitua 7 minuturen faltan, itxaropenerako argi izpi bat piztuz. Denborak aurrera egin zuen ordea eta atezain jokalaria kantxaratu zuen Laskorainek. Modu horretan iritsi ziren bi taldeak azken minutu zirraragarrira.

Aurreko astekoa errepikatuz, Beñat Telleriak beste harritzar bat bidali zion Barriolari eta honek egindako jaurtiketa sare barrura joan zen langan jo eta gero 50 segunduren faltan. Partida guztian lokartuta egon zen txispa hori berpiztu zion gol honek Laskoraini eta Gil TDIak presio bikaina burutu ostean Jonikori emandako pasea atea barrura bidali zuen azken honek. 7 minuturen faltan shock egoera zena, eromena bihurtu zen 7 segunduren faltan.

Markagailuan 39 minutuan atzetik, 53 segundutan berdinduta eta 7 segundutan soilik aurretik izanda 3 punturekin bueltatu ziren Javi delegatua, Jorge, Javi eta Imanol prestatzaileak, Endika, Beñat, Unai, Joseba, Lander, -haserako bostekoa- Iñigo, Giller, Mikel, Ekhi, Iñigo, Joniko eta Urko jokalariak.


Unai

2009-10-12

Lider ipini da Laskorain Santurtziri 3 eta 1 irabazita

Txinpartak atera zizkion Laskorainek Pilarika asteburu luzeari. Igandean, anjelusaren orduan jokaturiko partidan, azkeneko bi denboraldietan Nazional A mailan parte hartu duen Santurtzi taldea menderatu zuen eta txapelketako lidergoa eskuratu hiru jardunalditan hirugarren garaipena erdietsi ostean.

Neurketak ez zuen hutsik egin. Santurtziarrak, maila bat gorago pilatu duten eskarmentua lagun, Usabalera hiru punturen bila kantxaratu ziren lotsagabe eta batere etenik gabe berrogei minututan zehar oso goran egin zuten presioa, baloiaren jabetzaren bila batetik eta horitxoen hutsegitearen zain bestetik.

Ikastolakoek aldiz sasoi betean ekin diote txapelketari eta presioa presio ederki asmatu zuten baloiari eusten, batetik bestera dotore mugituaz jokalarien mugimendu etengabeei eskerrak. Galerarik gabe apenas, presioa dezentetan lortu zuten gainditzea, baina egia da ordea santurtziarren ate aurrera behar bezelako indarrik, puntxik edo argitasunik gabe iritsi zirela; baina bizkaitarren lanari ere bere meritua eman behar zaio.

Kontuak kontu, eta aurtengoan orain arte beti gertatu den bezelaxe, horitxoak izan ziren partida hasieran markagailua estreinatu zutenak, txapelketa hasiera harrigarria burutzen ari den Lander Camioren golarekin. Honek noski ez zuen partidaren gidoia ezer aldatuko baina hamar minutu beranduago santurtziarrek lortutako banakoak ere ez, aipatu bezela beraien presioak berean iraungo baitzuen aurrerantzean ere.

Atsedenerako bi minuturen faltan, astean zehar boloetan futbolean baino gehiago aritu omen den Telleriak bigarren zutoinera bidalitako harritzarra, pasea ezin deitu, Barriola kapitainak bularrarekin, harmarri horitxoarekin zioen berak, gol bihurtuko zuen tolosarrak berriro ere aurretik ipiniaz.

Ondoren 2 eta 1-ekoak bigarren zati ia guztian iraun zuen, nahiz eta gol aukerak bi ateetan izan. Aipatu Endikaren baja zela eta titular izan genuen Urko Alonso atezainak geldiketa oso garrantzitsuak egin zituela, laskoraindar protagonista nagusietako bat bihurtuaz.

Azken minutuan, santurtziarrak atezain jokalariaren jokaldia egiten hasi zirenean, etorri zen etxekoentzat lasaitasunaren gola, Landerrek sinatu zuelarik hirugarren hau ere. Lau golekin laskoraindar pitxitxia dugu Lander.

Oso gustura ospatu zuten garaipena eta lidergoa Txinparta elkarte jatorrean, Javi delegatuak, Jorge, Javi eta Imanol prestatzaileek, eta Urko, Telleria, Barriola, Murgi, Lander –haserako bostekoa-, Alonso, Iñigo, Ekhi, Gil, Otxoa, Zabala eta Aratz jokalariek.


Eski

2009-10-04

Laskorainek nagusitasunez menderatu zuen Portugaleteko Jarrilleros taldea

Bat formulan Brown GP talde gazte eta eraberrituak eragin zuen iskanbilaren parekoa izaten ari da ikastolako mutilen txapelketa hasiera hau. Izan ere, pasa den larunbatean ligako oilar handienetako bati gandorra ederki zimurtu zioten Jorgeren mutilek, azkeneko 0-7ko emaitzak argi erakusten duenez.

Ikastolakoek ordea ez dute difusore polemiko eta bestelakoren beharrik, Imanol prestatzailearen eskutik lortutako maila fisiko bikainari, talde gazte honen gogo eta ilusioa gehituta errezeta bikaina lortu du Javi eta Jorgek osatutako bikoteak.

Urteko lehenengo bidaia, Xabi Nakajima gidariarekin egin zuten Laskorain Kirol Elkarteko plaka berriekin apaindutako autobus dotorean. Neurketa zaila, Nazional A mailan urte askoan aritutako jokalari gogor eta beteranoez osatutako taldea baita portugaletearra, aurreko denboraldian jasotako bi porrotak lekuko.

Partiduaren zailtasunaz jabetuta, beroketa hasi zen une beretik guztiz kontzentratuta aritu zen talde osoa. Horrela, epaileek haserako txistua jo zuten momentutik ikastolakoen erritmoa aurkariarena baino askoz bizkorragoa izan zen. Beteranoen aldera pasa den Barriolak urrutitik egindako jaurtiketa batekin eta kalitatea soberan duen Telleriak faltaz, bi goletako errentarekin jarri zuten taldea. Hasiera bikain honen ostean, J bikoitza bezela bataiatutako bikotearen esanetara dauden mutilen intentsitea ez zen zipitzik ere jeitsi ordea eta defentsan berreskuratutako baloi bati irteera bizkorra eman eta gero berriz ere gola egin zuen Barriolak, atsedenaldira 0-3 iritsiz.

Atsedenaldiaren ostean Laskorainek baloia hara eta hona mugitu zuen denborak aurrera egin eta partidua lokartzeko. Lan hori ederki bete zuen taldeak baina 10 minuturen falta atezain jokalari taktika ipini zuen Jarrillerosek. Endikak egindako lan bikainaren lasaitasunarekin ikastolakoak serio mantendu ziren defentsan eta Landerrek horretarako sen berezia duela erakutsiz bi baloi lapurtu eta bost goletako errentarekin jarri zuen taldea. Azken minutuetan, aurkariaren ezintasunaren lekuko izan ziren zenbait sarrera itsusi tarteko, beste bi jokaldi bikain lotu zituen taldeak eta 0-7ko emaitza ikusgarri batekin amaitu zen norgehiagoka.

Partidu amaieran, min hartu berri duen Jon Zlatan Elola gogoan, egindako balentria ezin sinistuta, harridura aurpegiarekin eta irrifarra ahoan aldagelaratu ziren Javi delegatua, Jorge, Javi eta Imanol prestatzaileak, Endika, Telleria, Barriola, Murgi, Lander -haserako bostekoa- Gil, Iñigo, Mikel, Zabala, Ekhi eta Urko jokalariak.



Unai