2009-11-22

Laskorainek 9-1 menderatu zuen Astraburuko talde bizkaitarra gol festa bikain batekin

Pasa den astean Iturriondo taldeari irabazita, konfidantza osoz agertu zen Laskorain Ikastolako taldea larunbat arratsaldean usabalera. Aurrean berriz, sailkapeneko azkeneko postuetan katiaturik dagoen Astraburuko talde bizkaitarra izan zuen.

Ikastolakoek sailkapeneko zuloan dauden taldeekin izan dituzten partidekin gogoeta eginda, beharrezko seriotasunarekin hartu zuten larunbatekoa. Taldeko Panomarixek eramandako opiltxo majikoak barneratu ostean gudarako prest genituen gure galiarrak.

Erromatarrak berriz, guda hasi baino ordu laurden lehenago bertaratu ziren eta beroketa ariketarik egiteko apenas izan zuten astirik. Epaileek txistua jo orduko, arrapalada bizian abiatu ziren gure mutilak eta aurrean harrapatutako dena deuseztatu zuten.

Honela, aurkariak konturatu zirenerako ikastolakoak 6-0 aurreratu ziren markagailuan. Beñat, Gil birritan, Joniko, Ekhi eta Lander izan genituen goleatzaile. Laskorainek egindako lan ona kontutan hartu behar bada ere erabakiorragoa izan zen aurkariak defentsan erakutsitako ahultasuna.

Lehenengo zatia amaitzeko, norgehiagokaren erakusgarri suertatu zen jokaldi batean, aurkariak ateko sake bat presionatzera etorri eta ikastolako 3 jokalarik bizkaitarren atezainaren aurrean amaitu zuten. Bizkaitarren beste lau jokalariek kantxa erditik ikusi ahal izan zuten ileapaindegitik pasatu berritan sekulako txispa lortu duen Gillerren aurtengo estraineko gola.

Asperraldirako ezin hobea izan zen bigarren zati batean, aurkariak ohorearen gola egin zuen eta Laskoraingo bi geziek, Giller eta Jonikok, euren arratsaldeko bigarren gola sareratu zuten partidua 9-1eko markagailu esanguratsu batekin itxiz.

Norgehiagokak izan zituen alde positibo guztien artean, Tolosako larunbat gauetako errege dugun, Mikel Alonso handiaren merezitako debuta izan genuen azpimarragarriena. Mila berbaldi tekniko-taktiko jaso ondoren, partida batean suerta litezkeen egoera guztien jakitun genuen mutila eta norgehiagoka borobila osatu zuen.

Beste hiru puntu poltsikoratuta, babarrunaren festan murgildu ziren usabalera gerturatutako zale eta Laskoraingo kideak. Oraingoan Murgi kantxako ordezkariak, Javi taldeko ordezkariak, Jorge, Javi eta Imanol prestatzaileak, Endika, Beñat, Gil, Lander, Txiki, Urko, Barriola, Mikel, Giller, Joniko eta Ekhi jokalariek osatu zuten deialdia.

Filialek ere euren partidak irabazita, asteburua borobila izan da Laskorainentzat. Aitorren mutilek 3 puntura zuten liderra erraz menderatu zuten 9-3 eta Andoniren taldea sailkapeneko bigarren postura igo da garaipen berri honekin.


Unai

2009-11-16

Laskorainek 2-3 hartu zuen mendean Iturriondo taldea eta bigarren postuan kokatu da

Pasa den astean lidergoa galdu eta laugarren postura jausi ondoren, Iturriondo bigarren sailkatu berriaren aurka indarrak neurtzeko unea egokitzen zitzaion larunbatean Laskorain areto futbol taldeari.

Norgehiagoka neketsua zen printzipioz tolosarrentzat aurresaten zena, izan ere, Bilboko Txurdinaga polikiroldegiaren etxetiarrak eskeintzen duen maila altua dela eta, aintzat hartzeko trabak agertzeaz gain, Javi eta Jorgeren mutilak azken bi partiduetan punturik lortu ez izanaren “handicap”-arekin igo bait ziren autobusera. Hori gutxi balitz eta pulamentuzko entrenamendurik burutu gabeko aste bati, Elola, Murgi, Alonso eta Joniko jokalarien bajak gehitzen badizkiegu, Larunbateko puntuek balio bikoitza dutela baieztatu daiteke inungo ezbairik gabe.

Konzentrazioz beterik eta neurketak zuen garrantziaren jakitun kantxaratu ziren beraz horitxoak aparteko seriotasuna erakutsi zutelarik defentsan hasiera-hasieratik. Bilbotarrek osatzen duten eraso alaiari era guztietako oztopoak erakutsi eta gero 0-2-ko emaitzarekin ipini ziren aurretik ikastolakoak, golegilea Gil TDI-a izan genuen birritan. Aspaldi honetan haserrealdian iraun eta gero, azkenik areto futbolarekin bakeak egiteko erabakia hartu duela dirudi, lehen zatiko protagonista nagusia bera izan genuelarik. Endika, Bikutzeko “Darek” atezainak ere merezi du aipamenik, esku bikainak ateratzeaz gain, penalti bat ere gelditu bait zuen tarte horretan arerioaren etsipenerako.

Bigarren zatian etxekoek gehiago estutzeko ahalegina egin zuten, baina aldea murriztea lortuagatik, Landerrek beste sareratze bat egin eta 1-3-koa igo zuen markagailura. 14 minuturen faltan bizkaitarrek atezain jokalariaren taktika ipini zuten jokoan, aldea berriro murriztea erdietsi zutelarik, baina 2-3-ko emaitzari bikain eutsi zioten tolosarrek amaierararte.

Yustos “Sparrow kapitainari” eskerrak eman nahi zaizkio kronika honetan, konpromezuz beteriko keinu batean Bilbora bidaiatu bait zuen nekez bete ahal izan zen deialdi bat osatzeko.

Larunbatean Bilbon, Javi delegatua, Alonso eta Javi entrenatzaileak, Imanol prestatzaile fisikoa, Endika, Telleria, Barriola, Gil, Lander, Zabala, Yustos, Belloso, Ekhi eta Urko jokalariak izan ziren garaipen haundiaren protagonistak.



Amatri

2009-11-08

Laskorainek ezin izan zuen izarrez osatutako Gipuzsala proiektuaren aurrean eta lidertza galdu du

Partidu berezia izan zan larunbat arratsean usabalen jokatutakoa. Urte luzez ikastolako taldearen kapitaina izandako Saldiasen itzulerak, sailkapeneko lehen bi postuetan kokaturiko taldeen arteko norgehiagokarekin bat egin baitzuen eta jendetza bildu zen harmailetan.

Partidu hasierako ekitaldien jakitun, beroketa amaitu aurretik usabalgo harmailetan aurrez ikusi gabeko jendetza bildu zen. Honela urte luzez ikastola, euskara eta kirolaren alde lan eginez itzelezko konpromezua erakutsi duten lau taldekide ohiek merezitako omenaldi xume eta hunkigarria jaso zuten.

Horretarako ikastolaren izenean Joxe Martin Aizpurua eta Kike Amonarrizen eskutik garaikurra jaso zuten, Iker Telletxea, Andoni Saldias, Unai Domenche eta Gorka Amatriainek zalegoaren txalo artean.



Momentu ziragarri hauen ostean, bi taldeak norgehiagokari ekiteko prest prest eta kirioak dantzan zeudenean ordea epaileak aldagelan sartu eta ordu laurden luze batez bi taldeak elkarri begira eduki zituzten euren beroketak zapuztuz eta ikusleen asperraldirako.

Halako batean epaileak agertu eta haserako txistua jo zutenean kanpotarrek hartu zuten jokuaren aginte makila baloia irizpide bikainarekin mugituz. Hala ere, lehenengo gola joku estatikoan ez baino, estrategiazko jokaldi batean iritsi zen, ikastolakoen hesian irekitako zirrikitu bat probestuz 0-1 aurreratu baitziren aurkariak.

Minutuak aurrera joan ahala ikastolakoek ere izan zuten aurkariaren atea zulatzeko abagunerik eta horietako batean Salamankako bidaitik indarberrituta etorri den Ekhi pistoleroak neurketa berdindu zuen jaurtiketa bortitz batekin. Pozak ez zuen asko iraun ordea eta bihotz horitxoan ziztada eragin zigun eta zion golarekin Saldias Laskoraindarrak aurretik ipini zuen Gipuzsala atsedenaldira 1-2ko emaitzarekin iritsiz.

Bigarren zatiak ere gidoi berbera izan zuen haserako minutuetan, aurkariak baloiaren jabe eta ikastolakoak euren aukera noiz etorriko zain. Baina oraingoan jokuan erakutsitako nagusitasunak oparia izan zuen eta 3. gola egin zuten kanpotarrek.

Azken minutuetan ordea, areto futbolean ohikoa izaten den moduan atzetik doan taldeak azken ahalegina egiten du eta kasu honetan ere ikastolakoek ederki estutu zuten aurkaria. Berriz ere Ekhik sartutako golarekin 2-3 urreratu ziren ikastolakoak eta ondoren atezain jokalaria kantxaratuz izan zuten partida berdintzeko aukera bat edo beste etxekoek baina markagailua bere horretan mantendu zen.

Kontuak kontu, esku hutsik geratu zen ikastolako taldea eta ezin izan zuten usabalen bizitutako festa borobildu Javi delegatuak, Jorge, Javi eta Imanol prestatzaileek, Endika, Beñat, Lander, Joseba, Unai, Ekhi, Joniko, Iñigo, Mikel eta Ezki jokalariek.

Filialeko taldeek ordea berri pozgarriak eman dizkigute, bai Aitorrek eta baita Andonik zuzendutako taldeek euren partidak garaipenarekin sinatu baitituzte.


Unai

2009-11-02

Laskorainek 1 eta 0 galdu zuen Urretxun baina lider jarraitzen du

Bost jardunalditan beste hainbat garaipen erdietsi ondoren seigarrenean iritsi da Laskorainentzat denboraldiko estraineko porrota. Pasa den igande goizean izan zen, 1 eta 0 Urretxuko Aldirin, orain arte garaipenik ezagutzen ez zuen talde baten aurrean. Zenbaitetan zeinen apetatsua den futbolaren logika.

Horitxoek nolahala ez diote buruari buelta gehiegi eman behar, seigarren jardunaldian seigarrengo aldiz talde itxura egokia erakutsi baitzuten. Neurketa ez zen inolaz ere samurra suertatu, sailkapeneko estutasunek bultzatuta etxekoek oso partida serioa burutu zuten eta. Hala eta guztiz ere ikastolakoek baleko maila eman zuten, orokorrean nagusitasunez menperatu zutelarik aurkaria.

Egia da abiadura piskat falta izan zitzaiela eta egia da ate aurrean azken pasea ematerakoan zehaztasunik ez zela eduki; baina lurzoru sintetiko motela duten polikiroldegietan arruntak izan ohi dira sintoma edo zantzu hauek lurzoru oso desberdinera ohituta dagoen talde batean.

Horrelaxe da. Endika atezainak bikain konpondu zuen hasiera korapilotsu baten ostean, laskoraindarrak nagusitu ziren jokoan lehen zatiaren amaieran eta bigarrenaren hasieran partida malda behera izan zutelarik. Minutuak baina markagailua ireki gabe igaro ziren eta honek urretxuarren itxaropenak hauspotu zituen.

Azken minutuetara erasora iraulitako eta zertxobait inpaziente ipinitako Laskorain batekin iritsi ginen eta momenturik erabakiorrenean urretxuarrak kontraerasora irteten hasi ziren. Horitxoek falta bidez moztu zituzten lehendabiziko kontrak, baina bost falta pilatu eta gero ezin izan zuten partidako gol bakarra ekarri zuen Urretxuarren kontraerasoa gelditu. 1 eta 0 eta punturik gabe etxera seigarrenean.

Porrota porrot Laskorainek denboraldi hasiera paregabea osatu du, 15 punturekin Nazional B-ko liderra da eta ilusio eta konfidantza berdinarekin jarraitu behar du lanean. Aste honetan gainera Usabalera txapelketako faborito nagusia dator, Elgoibarko Concepto bere galaktikoekin. Espero dezagun gipuzkoar areto futboleko Florentino, Valdano etabar Usabaldik Urretxuko Aldiritik irten zirena baino goibelago irtetea.

Javi delegatuak, Jorge, Javi eta Imanol prestatzaileek eta Endika, Zabala, Telleria, Barriola, Lander, Gil, Joniko, Txiki, Alonso, Urko eta Beñat jokalariek pairatu zuten Urretxun denboraldiko lehen porrota.

Bigarren probintzialean filialak 4 eta 0 jipoitu zuen Denak Taberna Tolosaldeako derbian.


Eski