2009-12-21

Laskorainek 3-3 berdindu zuen Transportes Lakunzaren aurka jokaturiko derbian eta lider darrai

Urtero garai honetan ematen den gabonetako etenaldiaren aurretik, Villabonako Transportes Lakunza bizilagunaren aurka jokatzea egokitu zitzaion Laskorain areto futbol taldeari joan den larunbatean Usabalgo polikiroldegian. Jakina da horrelako neurketek jokalari eta zalegoaren eragingarri moduan funtzionatzen dutela eta oraingoak ez zuen salbuespenerako biderik hartu.

Zirrarez beteriko lehia aparta bizi izan zen nahiz kantxa barruan zein harmailetan, bi alderdietako taldekide eta jarraitzaileek barruan zuten guztia eman zutelarik azken garaipenerako zidorra aurkitzeko asmotan, ondorio legez adostasunean amaituriko 3-3-ko emaitzak itxi zuen bide batez 2009 urtearen azken partidua. Puntu banaketa dena den, ez zen ez bata eta ez bestearen nahia hasetzeko lain izan, biek izan bait zuten garaipena esku eskura neurketa bere osotasunean aztertu ezkero.

1-0 aurreratu ziren horitxoak Gil TDI-ak estraineko minutuetan eginiko gol bati esker, jarraiean gol aukera oparo ikuskatu ahal izan ziren Endika atezainaren ingurunean batipat, baina azken honen lanak golik jaso gabe aldagelaratu zituen ikastolakoak abantaila xume baino garrantzitsu batekin.

Bigarren zatia hasi bezain pronto ipini zuen 2-0-koa Gilek berriro, kaleraturiko jokalari kanpotar bat zela medio hiruren aurka jokatu beharreko 2 minututako tarteari etekin bikaina atereaz. Lakunzakoek dena den ez zuten amorerik eman eta berehala lortu zuten aldearen murrizketa 2-1-ekoa igoaz markagailura. Telleriak berriro aurreratu zituen Alonsoren mutilak 3-1-ekoa sareratuaz, baina Villabonakoak, ahalbide eta aukera guztietan sinistuaz 3-3-ko adostasuneraino ailegatu ziren. Istilu eta iskanbila ugariren ondorioz, azken 30 segunduetan 2 jokalari gutxiagoren aurka aritu ziren tolosarrak baina kanpotarren atezaina bere lursaila ondo zaintzeaz arduratu zen denbora tarte horretan.

Lander, Ekhi, eta Belloso jokalarien bajak zirela eta, Illunbe filialeko jokalariak debuta egin zuen Nazional B mailan, itxura txukuna eta kalitate izpi ugari utziaz lehen taldearekin egindako bere lehenengo minutuetan. Ziur ez direla azkenekoak izango.

Larunbatean Usabalen Javi delegatua, Imanol prestatzaile fisikoa, Alonso eta Javi entrenatzaileak, Endika, Barriola, Telleria, Murgi, Gil, Alonso, Illunbe, Joniko, Zabala eta Urko jokalariak izan ziren lidergoari eutsi ziotenak.
Amatriain

2009-12-14

Asteburuan poto egin arren lider darrai Laskorainek

Berriro ere nazional B mailan bueltan dugun lagun zahar bat bisitatu zuen Laskorainek pasa den asteburuan. Gipuzkoako areto futbolean aski ezaguna den Intxaurrondoko Inter taldea hain zuzen ere.

Sailkapenari erreparatuta, hiru puntu berri eskuratzeko aukera polita zuen ikastolako taldeak baina beti esaten den moduan partiduak jokatu egin behar dira. Honela, beharrezko intentsitaterik jarri ezean zail izaten da aurkariak mendean hartzea.

Larunbat arratsaldeko giro triste eta Mons kiroldegiko iluntasunak kutsatuta taldea behar baino bizitasun gutxiagorekin kantxaratu zen. Modu horretan, partidaren kontrola ezin eskuraturik ibili ziren ikastolakoak haserako minutuetan.

Hala ere, partiduak itxura txarra hartzeko bidea zeramanean Landerrek lapurtutako baloi bati jarraipen ederra eman zioten Joniko eta Barriolak eta arratsaldeko lehen gola sareratu zuen azken honek.

Gol honek ordea, ez zuen partidaren norabidea aldatu eta ikastolakoak kantxan desoroso jarraitu zuten.Horrela, bi taldeak joku korapilatsuan murgilduta zeudenean, errebotez betetako saiakera batean banakoa erdietsi zuen Intxaurrondoko taldeak.

Atsedenaldiaren ostean ordea partida erabat aldatu zen, ez ordea markagailua. Jorge eta Javiren mutilak erabat entxufaturik kantxaratu ziren eta lehen 3 minutuetan 3 aldiz bidali zuten baloia zutoinera. Hasera honek jarraipena izan zuen bigarren zati osoan baina batzuetan aurkariaren atezainak, ikastolakoen akatsak bestetan eta zutoinak beste hainbestetan baloia sareratzea galarazi zuten. Bigarren zati honetan, aurkariak ez zuen jaurtiketa bakar bat ere egin ikastolakoen atera eta horitxoek aldiz, neurri, doinu eta errima guztietako jokaldiak egin arren ez zuten asmatu Intxaurrondoko atezain garaiaren atea zulatzen.

Norgehiagokak beste hiru ordu iraunda ere partidua banakoarekin amaituko zenaren sentsazioarekin eta aurkariak defentsan egindako lana aitortuz, puntu bakarrarekin konformatu behar izan zuten gure mutilak azkenean.

Astean zehar gogor entrenatu eta datorren astean, Billabonako bizilagunen aurka irabazita, zapore mikatz hau kentzeko asmotan bueltatu ziren Javi delegatua, Jorge,Javi eta Imanol prestatzaileak, Endika, Beñat, Lander, Gil, Barriola, Giller, Elola, Joniko, Mikel, Josu eta Urko jokalariak.

Unai

2009-12-07

Laskorain lider ipini da sailkapenean Ceramicas Nogalesi 5 eta 4 irabazi ondoren

Aurtengo udan, denboraldi berrirako zituzten baja garrantzitsuegatik laskoraindarrak arduraturik zebiltzanean alegia, inork aurreratu balu flashforward bat pairatu zuela eta 11. jardunaldian Laskorain txapelketako lider moduan ikusi zuela, erotzat eta areto futboleko ezjakintzat joko genuen. Baina pasa den ostiralean, 11. jardunaldiaren buruan hain zuzen, Usabalen Ceramicas Nogalesi 5 eta 4 irabazi eta gero, Laskorain txapelketako lider bihurtu da batzuen harridurarako eta besteen ardurarako.

Errua jokalari eta prestatzaile multzo gazte eta ausart batena da. Ilusioz, konpromezuz eta kalitatez borborka aurrerapausu bikaina eman duten jokalariena - naturaltasun osoz bigarren mailako rol batetik rol protagonistara igaroaz- eta G-3 bezela famatu bihurtu diren Jorge, Javi eta Imanol prestatzaileena –zuzendaritzan ere talde lana posible eta onuragarri dela frogatuaz-. Bejondeizuela guztiei.

Aurreko guztiaren adibide, ostiral gauean oso partida polita ikusi ahal izan zuten Usabalera bilduriko zaletuek. Nogalesek aurredenboraldiko lagun artekoan baino maila altuagoa eman zuen eta lan asko egitera behartu zituen etxekoak, bi azterketa, bi une kritiko gurutzatuaraziz gainera.

Partida haseran horitxoen bi gol aukera garbiren segidan zarauztarrek 0 eta 2 aurreratzea lortu zuten eta hortxe bizi izan zuten laskoraindarrek lehendabiziko azterketa. Partida maldan gora, heldutasunez jokatu beharra zegoen, bihotza bero baina burua hotz, eta honelaxe aritu ziren horitxoak Barriola kapitainak, Otxoa pistoleroak eta Barack “Yes We Can” Telleriak markagailura 3 eta 2-koa igoarazi zuten arte. Telleriaren hirugarrenarekin elektrizidadea toperaino igo zen nola kantxan nola harmailetan.

Zailenak egina zirudien eta are eta gehiago atsedenaldiaren bueltan ikastolakoak 5 eta 2-koa ipini zutenean, partidako protagonista nagusi bihurtu ziren Otxoak eta Telleriak beste gol bana sareratzean. Baina asko gelditzen zen oraindik eta bigarren momentu kritikoa zeharkatu beharra zegoen.

Zeramikagileek bi jokaldi soltetan, estratejian, bi gol sartu zituzten eta azken bost minutuetara 5 eta 4 hestuarekin iritsi zen neurketa. Berriro ere heldutasun proba gogorra zen horitxoentzat, hiru puntuek gehiago balio baitzuten beraientzat bisitarientzat baino, baina berriro ere ederki gainditu zuten. Tentsio handikoa izan ziren azken minutuak baina gertuago egon zen laskoraindarren seigarrena bosnakoa baino.

Ez dakigu noiz arte iraungo duen Laskorainen arratxa bedeinkatuak, oraindik gasolinarik gelditzen den ala ez, baina zaletuoi orain arte gozatu duguna behintzat, hori ez digu inortxok ere kenduko. Lider maillotarekin irten ziren Usabaldik, Jorge, Javi eta Imanol prestatzaileak eta Urko, Telleria, Lander, Barriola, Gil –haserako bostekoa-, Giller, Elola, Otxoa, Alonso eta Endika jokalariak. Baja izan ziren Murgi, Zubillaga eta Txiki.

Eski

2009-12-01

Laskorainek 3 puntuak urratu ditu Oriora egindako txangoan

Asteburuko ospakizun ezberdinak direla medio, astearte buru zuri batean neurtu dituzte indarrak ikastolako taldeak eta, arraunarengatik ezagunagoa den arren, futbolean ere ederki dakiten oriotarren taldeak.

Imanol prestatzailearen faltan, ikastolakoen beroketak ez du aurrekoetako intentsitaterik izan eta hori ederki antzeman da lehen zati osoan. Hasiera hasieratik Jorgeren mutilak Gilen golaren bidez aurreratu badira ere, oriotarrena izan baita jokuaren erritmoa eraman duen taldea.

Ikastolakoak defentsan nahiko txukun aritu diren arren, atakean egindako hutsek oriotarrei kontraeraso ederrak egiteko parada eman die. Modu horretan iritsi da banako berdinketa. Endikaren gelditu bikainek ikastolako taldea partidan mantendu dute eta Beñatek, hala erabaki duenean, jokaldi bikaina osatu eta gol dotore batekin aurretik ipini du taldea. 1-2 eta atsedenaldira.

Lehen zatia oriotarrena izan bada, bigarrengoan horitxoek puntu bat igo dute defentsako intentsitatea eta bi baloi lapurketen ondotik egindako bi kontraerasotan aldea areagotzea lortu du gure taldeak. Orioko kiroldegiarekin felling berezia duen Barriolak egin ditu bi golak.

Minutuek aurrera egin dute eta Endikaren beste zenbait geldiketa tarteko, markagailua bere horretan mantendu da. Oriotarrek azken ahalegina egin dute atezain jokalari taktika erabiliz. Hala ere oriotarrek aldea murrizteko baino aukera gehiago izan ditu gaurkoan urdinez jokatu duen ikastolako taldeak. Landerrek egindako bi jaurtiketa ederrek zutoinarekin topo egin ez balute, partidarekin zerikurisik izango etzuen azken emaitza batekin bukatuko zen partidua.

Imanol prestatzailearen 25. urtebetetze egunean garaipen ederra eskeini die Jorge eta Javi entrenatzaileek, Endika, Beñat, Lander, Gil, Barriola, Giller, Ekhi, Joniko, Elola, Mikel eta Urko jokalariek.

Unai