2010-01-25

Laskorainek nagusitasunez irabazi zuen Legazpin eta sendo darrai sailkapenaren buruan

Urola Garaiera egin zuen txangoa Laskorainek pasa den larunbat arratsean, euskal ekonomian hainbesteko pisua izan duen burdina eta altzairuaren forja-lanaren kabi nagusietako bat den Legazpira hain zuzen. “Metalurjiak ekonomian bakarrik ez, artean ere itzelezko garrantzia izan du gurean” esan ziguten Bikuña polikiroldegiko harreran, “Txillidak bere altzairuzko hainbat eskultura Patricio Echeverria enpresa legazpiarreko forjan erditu baitzituen”.

Duintasunez beteriko forja-lan gogor, sufritu baina era berean artistikoaren adibide ordainezinarekin ekin zion beraz Laskorainek Centro Extremeño La Bellotaren aurkako neurketari larunbatean. Horitxoek bazekiten kantxa horretan txapelketako beste oilartxoek ezin irabazi berdinketarekin konformatu behar izan zutela eta bazekiten ondorioz joko kalitateari lana eta ahalegina erruz gehitu beharko zietela. “Forjalariak bagina bezela!” oihukatu zuten bere barnean.

Esan eta egin, ikastolakoek oso partida sendoa burutu zuten, erasoan eta defentsan, nola aptitudez nola aktitudez eta nagusitasunez makurrarazi zuten La Bellota bai taktikoki, bai teknikoki eta bai fisikoki. 2 eta 7 izan zen azken emaitza, nahiz eta epaileek azken segunduan legazpiarrek eskuarekin sarturiko gola legezkotzat eman eta aktan 3 eta 7 idatzi. Bellotako aurrelariaren jokaldiak Martinez de Irujoren sotamano bortitz bat gogorarazi zigun guztioi, baina epaileek ez omen zuten eskukada ez ikusi ez entzun.

Tolosarren garaipen argiak badu beste meritu bat gainera, estraineko gola legazpiarrek sareratu baitzuten jokaldi bakan eta solte batean partida hasi eta berehala. Jarraipenean, aurreratu bezela, kokildu gabe ikastolakoak nagusi izan ziren, baloiaren jabe ederki mugitu zutelarik eraso posizionalean eta presinaren bidez etxekoak beraien kantxan giltzaperatu zituzten berrogei minututan zehar.

Golak ordea ez ziren berehala iritsi, baina bi zutoinkada eta gol aukera frankoren ostean azkenean bai hasi ziren erortzen, azken asteetan 26 eta 23 urte bete dituzten Barriola kapitaina eta Barack Telleria izan zirelarik golegile. Kapitainak lau sinatu zituen, 2010 jaioberrian punteria zorroztuta duela frogatuaz eta Telleriak bi, biak baloia pikatuaz, lehenengoa atezainari bizkarrez ipinita eta hanka kanpokaldearekin. Zoragarria. Zazpigarrena bere atean sartu zuten legazpiarrek ezinaren ezinez.

Amaitu aurretik, golegileez gain protagonista izan genuen beste laskoraindar peto bat goraipatu nahiko genuke. Urte luzez lehen taldean aritu eta gero, iaztik filialean ari den Yustos “Sparrow kapitaina” alegia. Taldeak zituen bajak estaltzeko ibartarrak Legazpiko deialdian hartu zuen parte, bere arima eta bihotz horitxoaren adibide bat gehiago oparituaz. Minutu dezente jokatu zituen gainera, mailari eusten diola erakutsiaz, baina hunkigarriena Laskorainekiko erakutsitako konpromezu eta inplikazioa da. Egungo Laskorainen joko eta lidergo dizdiragarria, jokalari belaunaldi askoren forja-lanaren fruitua dela esatera ausartuko ginateke eta Yustos belaunaldi horietako baten eredu handienetakoa dela.

Pozik egin zuten Urola Garaiatik Tolosaldeara itzulera bidaia Javi delegatuak, Jorge, Javi eta Imanol prestatzaileek eta Endika, Telleria, Barriola, Murgi, Lander –haserako bostekoa-, Gil, Mikel Alonso, Iñigo Belloso Txiki eta Yustos jokalariek. Baja izan ziren Zabala, Otxoa, Zubillaga, Elola eta Urko.

Eski

2010-01-18

Puntu banaketarekin amaitu zen Laskorainek eta Allerruk Lezon jokatutako derbia

Lehen itzulia amaitzeko azkeneko zita Lezoko Bekoerrota kiroldegian izan zuten ikastolako mutilek. Azken urteotan nazional mailako derbi garrantzitsuenetakoa bihurtu denaz gozatzeko beste aukera berri bat izan zuten Lezora gerturatutako zaleek 3 eta 3koarekin amaitu zen norgehiagokan.

Ligako kantxarik gogorrenetako batean, partida oso zaila zuen Laskorainek. Allerru taldea ez baita alperrik fisikoki ligako talderik indartsuena. Aurreko denboraldian jasotako bi porrotak lekuko, gauzak oso ondo egin ezean esku hutsik bueltatuko zirela jakinda bidaiatu zuten Jorgeren mutilek Oarsoaldera.

Dena den, partidu hasieran Lezotarrak atzean sartu eta jokuaren pisua eramateko erantzukizuna Laskoraini eman zioten. Lan horretan ikastolakoak ederki moldatu ziren eta joku maila ederra erakutsiz baloia hara eta hona mugitu zuten lehen gola egiteko aukera onak sortuz.

Lehen zati honetan ordea, aurkarien atezainak protagonismo berezia izan zuen eta gelditu apartak egin zituen. Horrelakoetan gertatzen den moduan, Lezotarrek egindako lehen jaurtiketan gol ederra sartu zuten. Dena den, J bikoitzaren mutilek lan oso ona egiten jarraitu zuten eta atsedenaldiaren aurretik banakoa ezarri zuen markagailuan Beñat beltxargak, Jonikori egindako penalti argi bat sareratuz.

Bigarren zatiari ere, jokuan nagusi ekin zion Laskorainek, baloia kriterio handiz ibilarazi eta mugimendu onak eginez. Hala ere, aurkariaren defentsa indartsua zulatu ezinik ibili ziren, nekeak ere bere eragina egin baitzuen minutu asko pilatzen ari ziren ikastolako jokalarien artean.

Emozioa pil pilean zegoenean Allerruk aurre hartu zuen markagailuan kantxa aldez alde zeharkatu zuen pase bat bolea ikaragarri batekin errematatu ostean. Gol honek groggy utzi zituen laskoraindarrak eta hurrengo jokaldian egindako baloi galera baten osteko kontraerasoan 3 eta 1 aurreratu ziren Lezotarrak. Gol honekin itxura eskasa zuen partiduak, markagailuan atzetik eta aurkariak defentsan sendo.

Hala, partida nolabait nahastu beharra zegoen eta joku horretan inor baino hobeto moldatzen den Elola kantxaratu zuen J bikoitzak. Ordurarte minuturik jokatu gabe zegoen Elola zurrunbiloak, aurkariaren defentsa erdian jarri eta denak nahastu zituen. Area barruan harrapatutako bi baloietan, beste horrenbeste gol egin eta partidua 3nako berdinketarekin jarri zuen aitaren batean.

Partiduaren tentsioak gora egin zuen azken minutuetan baina bi taldeei galtzeko beldurra sartu zitzaien eta nork bere atea ondo zaintzea erabaki. Hala ere, partidako emozio puntu gorena azken segunduan iritsi zen Lezotarrek izan zuten doble penalti baten ondorioz. Endikak ordea, beste behingoz ligako atezainik onenetakoa dela erakutsiz, gelditu bikaina egin zuen eta guztiz bidegabekoa izango zen Laskorainen porrota ekidin.

Puntu ona eskuratuta eta joku maila hobea erakutsita itzuli ziren Javi delegatua, Jorge, Javi eta Imanol prestatzaileak, Endika, Beñat, Barriola, Murgi, Lander, Joniko, Gil, Elola, Mikel, Iñigo eta Urko jokalariak Lezora egindako bisitatik.

Unai

2010-01-10

Bikain hasi du Laskorainek urte berria Elorriokori 9 eta 5 irabazita

Eguberrietako etenaldiaren jan eta edanak ongi liserituta, garaipen batekin ekin zion Laskorainek 2010 urte berriari pasa den larunbatean Usabalen. Ikastolakoek sailkapeneko seigarren postuan kokaturik zetorren Elorrioko talde bizkaitarra 9 eta 5 aise menderatu zuten eta nola ez hiru puntu gehiagorekin lider darraite beste jardunaldi batez.

Joko maila altuegirik izan ez bazuen ere neurketa ikusgarria suertatu zen, erdipurdiko gidoia duten akziozko filme komertzial eta entretenigarri horien modukoa eta Usabalera bilduriko zalegoak ederki pasa zuen arratsaldea “made in Hollywood” bezela sailka dezakegun partidarekin.

Ikusgarria diogu jokaldi gorabeheratsuak, gol aukerak eta golak zaparradan ez baina mara mara bai erori zirelako berrogei minututan zehar, asteburuko elurrari zegokion bezelaxe beharbada.

Etxekoak erabat nagusitu ziren lehen zatian adibidez, lau gol erori ziren; Murgiren, Mikel Alonsoren eta Barriolaren eskutik birritan, laurak horitxoen alde erori zirelarik eta atsedenaldia baina lehentxeago gainera epaileek atezain bizkaitarra expulsatu zuten areaz kanpo eskuarekin bosgarrena ekiditzeagatik.

Aldageletatik bueltan beraz horitxoek bi minutu izan zituzten superioridadean beste gol bat egiteko eta horrelaxe gertatu zen, Barriolak ez baitzuen barkatu bere hirugarrena sareratuaz. 5 eta 0 markagailuan, norgehiagokaren gidoiak erabakita zirudien jada, filmaren amaierak ez zuen misteriorik eta gelditzen ziren hogei minutuak espektakuluz betetzea besterik ez zen gelditzen.

Honela, arratsaldeko gol bikainenari, presio irteeretako pizarran prestaturiko jokaldian Telleriak sarturiko horitxoen seigarrenari hain zuzen (6-0), bizkatarren bi golek jarraitu zioten (6-2). Beranduxeago, Otxoa “Billy the Kid” pistoleroak sareratutako zazpigarrenari (7-2) elorriokoen hiru golek (7-5), baina Otxoa bera berriro ere golegile izango zen (8-5), gatilloa edo kolpekaria kliskatzeko duen abiadura itzelaren beste froga bat eskeiniaz. Bederatzigarrena (9-5) Gil TDI erregaitzak sartuko zuen azken segunduetan.

Aipatu amaitu aurretik, gure eritzi apalerako, partiduko “sheriffa” Barriola kapitain horitxoa izan zela larunbatean. Hat-tricka osatzeaz gain, atzekaldean aurkariari aurreratuaz baloi erabakior asko moztu zituen eta taldearen eraso eta kontraerasoa, biak, ederki antolatu zituen pase zuzen eta zehatzak emanaz. Partida borobila osatu zuen kapitainak, errege roskoia baina borobilagoa.

Liderraren maillotari eutsita, pozik zoratzen joan ziren afaltzera Jorge, Javi eta Imanol prestatzaileak eta Endika, Telleria, Barriola, Murgi, Lander –haserako bostekoa-, Gil, Alonso, Txiki, Otxoa, Elola eta Ezki jokalariak. Baja izan genituen Zabala, Ekhi eta Urko.

Eski