2011-02-28

Laskorainek 5-2 irabazi zuen Zuzenbide taldearen aurka

Zirrara onak bereganaturik eta poltsikoratutako hiru puntu gehiagorekin emango dio hasiera Laskorainek 2011 urteko Ihauterietako festari, izan ere eta emaitzaren isladapenak erakusten duena baino gehiago sufrituagatik, nagusitasunez hartu bait zuen mendean Gernikako Zuzenbide Naturgas taldea joan den larunbatean Usabalgo polikiroldegian.

Aurkaria sailkapeneko postu erosoetan kokaturiko talde arriskutsua genuen, jokalari gazte zein beteranoez osatutako lerroak konbinatzen dituena bere sisteman, modu horretan pozoinez beteriko jokua egiteko gai delarik parean dagoenak bere arreta apur bat jeitsi ezkero. Erreskan jasotako hirugarren porrota larregi litzateke denboraldi bikaina egiten ari diren Javiren mutilentzat eta norgehiagokari behar duen garrantzia emanda azkenean neurketa aurrera atera ahal izan zen.

Hasierako minutuak etxekoenak izan ziren, Barriolak eta Gilek egindako sareratzeek 2-0-ekoa igo zuten markagailura baina maldan behera ipinitako partida berehala orekatu daiteke areto futbolean eta ondorengo minutu exkaxek kanpotarren berpiztea baimendu zuten aldageletara 2-2-ko berdinketarekin erretiratu zirelarik bi taldeak.

Bigarren zatian ordea tolosarren aginteak emeki-emeki ekarri zuen bere nabarmentzea eta Gilek aurreratuko zituen beste behingoz etxekoak Jonikok emandako baloia erosotasunez bultzatuaz. Kanpotarrek azken saiakera kamutsak egin ahala ikastolakoen kontraerasoak biderkatzen joan ziren eta hondarreko minutuetan Telleria eta Gilek 5-2-ko azken emaitza itxi zuten, azken honek arratsaldeko bere "hat-trick" partikularra sinatu zuelarik.

Meritu haundiko denboraldia ari dira betetzen horitxoak, arrazoi ezberdinengatik taldearekin egon ahal ezin duten Elola, Belloso, Illunbe eta Murgiren falta beste behingoz gainditua izan bait da. Filialeko Iosu eta Beñatek betetako deialdiari esker eta gainontzekoek egindako lan bikaina dela eta, beste partidu bat batu ahal izan zaio estatistiken laukitegiari.

Datorren larunbatean Bilbora bidaiatuko du taldeak. Zaldunitari hasiera modu onean emateko intentzioarekin izango dira seguru Javi delegatua, Javi entrenatzailea, Endika, Barriola, Gil, Telleria, Saldias, Iosu, Beñat, Joniko, Ekhi eta Aratz.

Filialari dagokionez, Aitorren taldeak 5-4 galdu zuen Zaldibian.
Gorka

2011-02-21

Laskorain punturik gabe itzuli zen Basauritik Soloarteren aurka galdu ostean

Bolada bikainean den eta ligako jokurik erakargarriena egiten duen Soloarte talde indartsuaren aurka neurtu zituen indarrak Laskorainek pasa den jardunaldian. Taldeko baja ugariak estaliz, bigarren astez jarraian lan bikaina egin duen Josuk eta lehenengo aldiz deialdian sartu den Beñatek Balerdik osatu zuten deialdia. Anekdota bitxia azken hau, Laskorain Kirol Elkarteko mutilen taldea sortu zen urte berean jaio baitzen Beñat gaztea.

Partidaren lehenengo zatia etxekoena izan zen nabarmen. Gol aukera gehiegi izan ez bazituzten ere, baloiaren jabetzan nagusi izan ziren eta Endikaren ate ingurura iritsitakoan zorrotz asmatu zuten. Atsedenaldira 3-0 argi batekin iritsi zen norgehiagoka, soinean 10 zenbakia zeraman etxeko jokalariak egin zituen hirurak, zein baino zein ederragoak.

Partiduak oso tankera iluna zuen arren, Laskorainek ez zuen inongo momentutan etsi eta bigarren zatiak beste itxura bat izan zuen. Defentsa lerroa aurreratu eta kantxa osoko presio gogorra eginez Laskorainek bere minuturik onenak eman zituen.

Presio horrek eragindako baloi lapurreten ondorioz aukera onak izan zituzten ikastolako mutilek, baina aukerarik garbienean kale egin zuten, Atezainaren aurrean bi jokalari bakarrik egon arren, horitxoek ez zuten asmatu eta kontraerasoan etxekoen laugarrena iritsi zen, 3-1ekoa izan zitekeenetik 4-0kora pasatuz.

Dena den, talde horitxoak presioa landuz jarraitu zuen eta 4-2 gerturatu zen aurkari batek bere atean egindako gol ulergaitz eta Saldiasen beste gol batik esker. Ikastolakoen minuturik onenak izan ziren, bigarren zatiaren erdia baino gehiago falta zen oraindik eta partidaren dinamika ero honetan gusturago ziren jokalari horitxoak.

Minutuek aurrera egin zuten ordea eta aukera onak sortu arren aurkarien atezainak lan ederra eginez etxekoen abantaila bere horretan mantentzea lortu zuen. Etsi-etsian Laskorainek atezain jokalaria erabili zuen 2 minuturen faltan baina aurkariak zuku gehiago atera zion ikastolakoek baino. Barriola beteranoak egindako golari bi golekin erantzun baitzion etxeko taldeak 6-3ko azken emaitzarekin partida itxiz.

Lehen itzuli borobila osatu eta gero kaskar samar hasi du Laskorainek bigarren itzulia. Azken 12 puntuetatik 4 soilik poltsikoratu eta gero erreakzionatu beharrean dira gure mutilak. Horretarako Gernikako Zuzenbide talde gogorraren aurka aritu beharko dute datorren larunbatean Usabalen, partida zail bezain erakargarria.

Itzulerako bidaiak, animoak altxatzeko balio izan zuen. Iturralde gaztea goiz osoan sukaldean sartuta mantendu zuten tortila patata gozoak eta Uribe ikastolakoen jarraitzaile sutsuak lortutako ogi karraskariekin egindako ogitarteko ederrak, partidako tristura nahikoa arindu baitzuten.

Azkenik aipatu, Aitorrek gidatzen duen bigarren taldeak ere 1-4 galdu zuela Anoetaren aurka eta Ikerrek daraman hirugarren taldeak berriz 2-4 irabazi Denak Tabernaren aurkako derbya.

Unai

2011-02-14

Laskorainek lehendabiziko aldiz galdu zuen Usabalen baina bigarren darrai sailkapenean

Oraindik ere aurkari guztiak aho zabalik uzten dituen Usabal dotorean, Laskorainek zazpi garaipen eta berdinketa bat zeramatzan aurtengo denboraldian. Txapelketako areriorik arriskutsuenen bisita jasota jadanik, arratxa bikain honek beste astebetez jarraituko zuenaren itxaropenarekin bildu ziren joan den larunbatean jokalari eta zale horitxoak, baina oraingoan ezustekoa izan genuen albiste.

Etxekoen baja garrantzitsuak probestuaz –Javi entrenatzaileaz gain, baja izan baitziren Murgi, Telleria, Illunbe eta Elola-, Legazpiko La Bellotakoek urrearen balioa duten hiru puntu poltsikoratu zituzten, jaitsiera saihesteko lehiatzen ari diren borroka partikularrean oso premiazkoak. 1-3 izan zen azken emaitza.

Partidak ez zuen istori handiegirik izan, etxekoen etsipenerako joko dinamikak ez baitzuen inolako aldaketarik izan berrogei minututan zehar. Bi taldeak sendo agertu ziren defentsa zonalean, atezainek ederki ebatzi zituztelarik sorturiko gol aukera bakanak –bikain berriro ere Endika-, eta baloiaren jabetza ikastolakoena izan bazen ere, joko posizionalean ez zuten beste jardunaldietako etorririk izan.

Atsedenalditik bueltan Barriolak eginiko 1-0-koak ere ez zuen zoritxarrez dinamika mutaziorik sortarazi eta ligako talderik goleatzaileenak ez zuen beste golik sartuko. Legazpiarrek aldiz, alboko sake batean buruz banakoa egin zuten, jokaldi bitxia eta jada azken minutuan beste bi gol; laskoraindarrek atezain jokalaria atera baitzuten berdinketa garaipen ala porrot bategatik trukatzeko asmotan. Puntu bakarra ez zen nahikoa eta hiru puntuetarako beste biderik ez zen antzematen.

Azpimarratu bukatu aitzinetik, gorago aipaturiko bajen hutsunea estaliaz larunbatean Iturralde gazteak egin zuela debuta nazional mailan. Harrobi horitxoaren ekoizpen, filialeko golegile nagusi, mutil honek etorkizunean ibilbide oparoa izango duela agertarazi zuen, maila berriko erritmoari ederki eutsiaz eta mugimentuetan dinamismo handia duela frogatuaz. Bejondeizula Josu.

Laskoraindarren bekoki ilunak zertxobait argitu ziren dutxatik irteterakoan, Concepto liderrak 6-1 galdu eta Bilbo hirugarren sailkatuak hiruna berdindu zutela jakitean. San Blas ondorengo egun eguzkitsu arraro hauek ezinbestean ez ohiko jardunaldia ekarri digute. Usabalen Javi delegatua, Alonso entrenatzailea eta Endika, Gil, Barriola, Saldias, Iturralde –bosteko titularra-, Otxoa, Zubillaga, Txiki eta Urko jokalariak izan ziren.

Asteburu beltza izan da ezpairik gabe horitxoentzat, Aitorrek zuzentzen duen taldeak 6-5 galdu baitzuen Hernanin eta Ikerrenak 1-2 Usabalen Pinturas Etxadiren aurka.
Eski

2011-02-07

Laskorainek 4-1 menderatu zuen Ceramicas Nogales taldea

Astebeko geldialdiaren ondoren, garaipen berri batekin berrekin dio Laskorainek txapelketari Zarautzeko Cerámicas Nogales aspaldiko ezagunaren aurka eta beste jardunaldi batez bigarren postuari eutsiko dio sailkapenean.

Ordutegiekin izandako zenbait gora-behera direla eta, 30 minutuko atzerapenarekin eman zitzaion hasiera norgehiagokari joan den larunbatean baina kontuak-kontu eta azkenean epaile bakarrarekin jokatu behar izan bazen ere, istilu eta aitzakiarik gabeko garaipen berri bat poltsikoratu du taldeak bere estatistiken taularako.

Lehen zatia nabarmenki horitxoek ezarritako legearen arabera jokatu zen, ixilunean baina larregi sufritu barik aurreratu ziren etxekoak Joniko eta Bellosoren bitartez 2-0-eko abantaila motza eskuratuaz. Beste aparteko gertaldirik gabe erretiratu ziren aldageletara bi taldeak baina erabateko lasaitasunaren helburua urrun zegoen oraindik.

Bi goletako errenta huskeria izan ohi da beti areto futbolean eta teoria zahar honen edukiaren jakitun, bigarren erdian kanpotarrek beste martxa bat sartzeko erabakia hartu zuten, horitxoen minuturik zailenak 2-1-eko golarekin iritsi ziren baina Aratz atezainak egindako geldituek kezka larriagoak ekiditea lortu zuten. Jonikok berriro areagotu zuen aldea 3-1-eko gol lasaigarriarekin eta 7 segunduren faltan Saldiasek itxiera eman zion azken emaitzari.

Akatsa litzateke Aratz atezainak egindako lan bikaina goraipatu gabe uztea, Endikaren baja garrantzitsua betetzeaz gain, bere taldearen salbatzaile bezela agertu eta neurketaren une erabakiorrenetan maila erraldoia erakutsi bait zuen. Hasi berri duen hegaldiari etorkizun itxaropentsua iragartzen zaio eta “Mikolapiz” izozkiak alde batera utziaz heldutasunez lanean jarraitzen badu, laskorainen proiektuaren zutabe garrantzitsu batean bilakatuko da.

Datorren astean berriro etxean jokatuko dute ikastolakoek La Bellota taldearen aurka, sailkapeneko postu arriskutsuetan murgildutako taldea izaki, beste oztopo zail bat izango da ezbairik gabe tolosarren bidean.

Larunbatean Usabalen Javi delegatua, Javi entrenatzailea, Aratz, Barriola, Telleria, Gil, Saldias, Belloso, Joniko, Ekhi eta Elola izan ziren garaipenaren protagonistak.

Harrobiari dagokionez, biek 2-5-eko emaitza lortu bazuten ere, Aitorrek zuzenduriko filialak etxean galdu zuen eta Ikerrenak, berriz, Zarautzen irabazi.
Gorka