2012-12-28

Laskorainek 3-2 irabazi zion Sestaori urteko azken partidan

Euskal areto futboleko historiko bat den Sestaoren bisita jaso zuen Laskorainek joan den larunbatean. Sailkapenak adierazten duena baino maila altuagoko arerioa aurrean, horitxoek gogotik egin behar izan zuten lan, baina oso gustora esango diote agur 2012 urteari 3-2 gailendu baitzituzten Nerbioi ezkerraldekoak.

Ikastolako taldeak honela bi aste aurrerago Urretxuren aurka pairaturiko porrot mingarriaren ostean bi garaipen eskuratu ditu erreskan eta sailkapenaren erdikaldean kokatu da berriro, ez hotz eta ez bero, 2013 urte berriaren hastapenean arratxari eusten saiatu beharko duelarik danok espero eta desio degun aurrerapausoa eman ahal izateko.

Larunbatean hasierako minutuak izan ziren erabakigarriak. Horitxoak oso indartsu kantxaratu ziren, amorraturik eta zurrunbilo bat bihurtu ziren sestaotarrentzat 3-0 aurre hartuaz markagailuan. Telleriak egin zuena lehena faltako estratejian, Txikik bigarrrena Zumetarekin batera osaturiko jokaldi ikusgarrian eta Jonikok hirugarrena hain gustoko dituen bere kontra bizkor horietako batean.

Aldageletara zuzendu aurretik ordea, bisitariek beraien estreinekoa sartu zuten eta oraindik bizirik zirautela ohartu ziren. Berragerpenean gainera ez zuten denbora gehiegi behar izan 3-2koa ipintzeko eta aurreratu bezela hortik aurrera tolosarrek galtzak bete lan izan zuten abantaila amaieraraino sostengatzeko. Baina aukerak aukera –egia esan argienak etxekoentzat izan ziren kontraerasoan- markagailua ez zen gehiago mugitu.

Azkeneko sei puntuak poltsikoratuta zoratzen jango dute aurtengoan turroia Javi delegatuak, Aitor eta Javi entrenatzaileek eta Endika, Iker, Telleria, Alonso, Gil, Etxebe, Txiki, Ekhi, Zumeta eta Joniko jokalariek.

2012-12-20

Laskorainek 2-5 irabazi zuen Inter taldearen aurka

Azken asteetako emaitzen ondorioz eta zehazki Goierriren aurka jasandako porrotaren atzetik, behar-beharrezkoa zuen Laskorainek animoak jaso eta sailkapenean bere kokapena finkatzeko balioko zuen garaipen baten lorpena. Egoera honen lehen epailea Donostiako Inter Eder Kafetegia, ordurarteko zazpigarren sailkatua izango zen. Tolosarren aspaldiko ezaguna da Mons polikiroldegian jokatzen duen taldea eta azken urteetan zenbait gorabehera jasan arren denboraldi txukuna betetzen ari da aurtengoan Aitorren mutilei inoiz baino zailagoa suertatzen ari zailen Hirugarren maila honetan. 

Lehen zati txiroa bete zuten horitxoek, lerroak atzean kokaturik eta kontraerasoaren bila egiteko asmotan, Joniko izan genuen 0-1-ekoarekin asmatzen lehena baina sentsazioak emaitza partzialaren oso bestelakoak izaki berehala biratu zuten markagailua etxekoek eta 2-1-eko kezkagarri batekin amaitu ziren lehen 20 minutuak.

Arima itzali baten itxura erakutsi zuten tolosarrek eta zaletu ezjakinenaren  irakurketarik sinpleenak ere zerbait aldatu beharra zegoela susmatzen zuen. Gauzak horrela, atsedenaldian Aitor entrenatzaileak Panoramix druidaren edabe magikoa prestatu eta jokalari bakoitzari tragoxka bana banatuaz taldearen itxura erabat birmoldatu zuen. Presio bortitza, jarrera bikaina eta erasoan erakutsitako adimena arma moduan erabiliaz Interren gainetik zapalgailu baten moduan pasa ziren ikastolakoak Zumeta eta Telleriaren hasierako golekin, eta amaieran Jonikok eta Etxebek borobilduriko sareratzeek partidua itxi zuten.

Erabateko garrantzia zuen Laskorainentzat espero baino gehiago berandutzen ari zen garaipen baten eskurapenak eta joan den larunbatekoa aurten ematen ari den ibilbide traketsean inflexio puntu bat izango delakoan dira jokalariak. Ondorengo jardunaldietan ikastolakoen erreakzioa sendotu beharra dago eta urrutiegira joan beharrik gabe, datorren astean Sestao bizkaitarrak bisitatuko du Usabalgo polikiroldegia, aukera paregabea beraz gabonetako geldialdiaren aurretik bultzakada positibo bat eragingo lukeen garaipen batekin 2012 urte naturala amaitzeko.

Larunbatean Donostian Javi delegatua, Javi “coach manager”-a, Aitor entrenatzailea, Endika, Gil, Telleria, Joniko, Etxebe, Belloso, Zumeta, Alonso eta Iturralde jokalariak izan ziren garaipenaren protagonistak. Harrobiari dagokionez, Santxoren mutilek 6-4 galdu zuten eta Maiorgak zuzendutako gazteek aldiz 4-2 garaitu zuten Zarautz K.E. taldea.

2012-12-11

Laskorainek 4-5 galdu zuen Goierriren aurka

6 astetan porrotik jaso gabe egon eta gero, pasa den larunbat goizean zakuan punturik pilatu gabe errenditu behar izan zuen Laskorainek. Ikastolako mutilek, duela urte asko ez, gipuzkoako areto futboleko derbi ohikoenetakoa zena errepikatu zuten Goierriren aurka eta azken segundoetan jasotako gol baten ondorioz 4-5 galdu zuten.
 
Azken egunetako jai egunek eraginda ezohiko ordutegian jokatu zen norgehiagoka. Harmailetan pilatutako zaleek bazkalosteko kafearen ondorenean ez baina, gosea pizteko balio izaten duen marianito eta azeitunak dastatu ondoren izan zuten usabalgo festa, eguerdiko 12etan.
 
Ordutegi aldaketarengatik edo, lehenengo zati aldrebesa bizitu zen kantxa gainean. Inoren nagusitasunik gabeko joko onetan goierritarrak izan ziren lehendabizi aurreratu zirenak baina atsedenaldia iristerako markagailua 2na orekatu zen.
 
Bigarren zatian ere Urretxuko taldea izan zen lehenengo kolpea emango zuena 2-3koa markagailura igoz. Talde horitxoa ordea ez da erraz amore ematen duen horietakoa eta lehen 20 minutuetan gertatu bezela maldan gora ipinitako partidari kemenez oldartu zitzaion. Gil rockero zaharrak sinatutako hat-trick bikainari Jonikok gehitu zion taldeko 4. gola minutu bakarraren faltan taldea aurreratuz.
 
Zailena eginda zegoenean ordea zorigaiztoko azken minutua iritsi zen. Urretxuarrek zirt edo zart atezain jokalaria atera zuten eta lehenengo saiakeran partida orekatzea lortu zuten. Berdinketarekin konformatzeko asmorik ez eta etxekoak izan ziren oraingoan atezain jokalaria kantxaratu zutenak. Emaitza ordea erabat alderantzizkoa suertatu zen, kanpoakoak izan baitziren berriro ere gola egiten asmatu zutenak ikastolakoen baloi galera bat probestuz.
 
Eskura eskura izan eta ihes egindako hiru puntuak datorren astean berreskuratzeko asmotan erretiratu ziren aldageletara Javi delegatua, Aitor entrenatzailea, Endika, Beñat, Etxebe, Gil, Zumeta, Vazquez, Ekhi, Joniko, Alonso eta Aratz jokalariak.

2012-12-08

Laskorainek 1-1 puntu bikaina lortu zuen Tecuni Bilbori eginiko bisitan


Armiarmenak baina ugariago bilakatu diren Wifi sareen segurtasuna dela eta ez dela, aurreko astean zehar danon ahotan ibili zen Bilboko Deustura bidaiatu zuen Laskorainek joan den larunbatean. Sailkapeneko bigarrenari egin zion bisita, dela ez hainbeste urte lehenengo mailan lehiatzeraino iritsi zen Tecuni Bilbo ahaltsuari eta ikastolakoek puntu bat arrantzatu zuten banako bati eskerrak.

Berdinketa berri honekin horitxoek sei jardunaldi daramatzate jada porrotik jaso gabe, nahiz eta sailkapenean dizdira handiegirik ezin atera, seitik bost berdinketak izan baitira eta garaipenak hiru puntu balio dituenetik berdinketaren puntu bakarra sari urri eta txiroa suertatzen baita.

Bizkaiko hiriburuan nolahala laskoraindarrek berdinketa begiak itxita sinatuko zuten partida aitzinetik. Arerioaren mailari filialeko jokalariz josiriko deialdiarekin egiten zioten aurre eta askoren aburuz erronkak salbaezina zirudien. Defentsa landu batean oinarrituaz ordea partida bikaina osatu zuten tolosarrek, denbora guztian bilbotarrak kontrolpean mantentzea erdietsi zutelarik.

Lehen zatia hutsnakoarekin finitu zen eta bigarrenean jokaldi eztabaidagarri batean etxekoek ireki zuten markagailua. Kolpea kolpe horitxoek serio jarraitu zuten berean eta aurten estrainekoz –bazen garaia- areto futbolean oso mugitua bihurtu ohi den partidaren hondarrean puntu bat berreskuratu zuten Zumeta “haur prodijioaren” golaren ondorio.

Gogoratu eta goraipatu filialetik igo berri den Zumetak bi jardunalditan hiru gol sartu dituela, Usabal aldean momentuko sentsazioa bihurtuaz. Baina berarekin batera Bilbon filialeko jokalari gehiago izan zen, Eñaut eta Manso ere bertan baitziren eta hiruen maila bikainak merezi du aipamena.

Puntu bat zakuan eta Javi delegatuak prestaturiko patata tortila eta gazta tarta ahoan, oso gustura egin zuten etxerako itzulia aipatu Javik, Aitor entrenatzaileak eta Endika, Aratz, Alonso, Gil, Ekhi, Txiki, Manso, Eñaut eta Zumeta.

2012-11-30

J11. Atarikoa. Tecuni Bilbo - Laskorain Ikastola

Irteera gogorrenetariko bati ekin beharko dio Laskorainek asteburu honetan, Deustoko Kiroldegian Tecuni Bilbo talde indartsua izango bai du parez pare. Aurreko asteburuan lortutako garaipenari esker, bigarren postura igo dira bilbotarrak eta etxetik kanpo lortutakoari jarraipena eman nahi diote.

Tolosarrak aldiz, Bilbori etxean puntuak lortzea gehiago kostatzen ari zaiola jakinda (etxean jasan dituzte orain arteko bi porrotak), behingoz gora begira jarri diezaieken garaipenaren bila doaz.

Azken orduko bajarik egon ezean, Aitorrek jokalari guztiak izango ditu deialdirako prest. Etxebek bigarren (eta azken) partiduko zigorra beteko du.

Taldearekin bidaiatu nahi duenarentzat, jakin dezala, autobusa 15:00tan irtengo dela Usabaldik.

Oinarriko taldeen ordutegiak:

Probintzial 1. Maila: Bide Bide Laskorain - Aretxabaleta, Usabal, ostirala 20:30ean.
Probintzial 2. Maila: Laskorain - Irudek Jamai Barrantol (atzeratua).
Jubenila: Goierri - Laskorain, Aldiri (Urretxu), larunbata 12:30ean.
Kadetea: Laskorain - Arizmendi Eskoriatza, Usabal, larunbata 09:30ean.
Infantila: Tehe English School Inter - Laskorain, Mons (Donostia), larunbata 10:30ean.

2012-11-28

Laskorainek 4-4 berdindu du Hirukide Tolosalaren aurka

Beste behingoz eta eskualdeko areto futbolak bizi duen osasun onaren seinale, txantxarako lekurik lagatzen ez duen Hirugarren mailak aurten eskainiko dituen derbi anitzen arteko beste aurrez-aurreko talka bat baimendu zuen joan den larunbatean Usabalgo kiroldegian Laskorain K.E. eta Tolosala Hirukide taldeen eskutik.

Hirukidekoak sekulako denboraldia betetzen ari dira eta sailkapeneko bigarren postuan zirelarik eman zioten hasiera neurketari, Aitorren mutilen bidean kolore eta forma guztietako zailtasunak aurkituko zirenaren ziurtasuna bermaturik zegoen eta kontzentrazioz beterik ekin ezean, porrota jasotzeko aukerak erabatekoak izango ziren.

Lehen minutuen jabetza Tolosalakoena izan zen ezbairik gabe, baina Endikaren geldituek markagailua berean mantendu zuten eta filialeko Zumetak birritan asmatu ostean 2-0 aurreratu ziren etxekoak estreinako sentsazioei itzulipurdia emanaz. Aurkariak aldea murriztu arren Alonsoren sareratzeak 3-1ekoa ipini zuen elektronikoan, baina atsedenaldiaren aurretik berriro estutu zen markagailua, aldageletarako bidean 3-2ko zirraragarri batek aukera guztiak airean mantentzen zituelarik oraindik ere.

Bigarren zatian Hirukidekoek beste martxa bat sartu eta bi golekin balantza 3-4koraino kontrako alderantz desorekatu ondoren, azken asteetako mamuak suspertzeko osagarri guztiak azaldu ziren berriro. Dena den, Bellosok ezarriko zuen 4-4koa etxekoek ondo eramandako kontraeraso bati bukaera emanaz. Hurrengo minutuek abagune ugari eskaini zituzten, eta horitxoek atezain jokalariarekin ere saiakeraren bat edo beste egin arren, emaitzak zurrun iraun zuen amaiera arte.

Etxebe eta Jonikoren baja garrantzitsuak jasanagatik ere, maila ona ematen jakin zuen Laskorainek bere zaletuen aurrean, beste behingoz bigarren taldean isiltasunez eginiko lan paregabea bere fruituak loratzen ari da eta horren erakusgarria da bai Zumeta eta bai Vazquezek azalduriko maila.

Datorren astean Bilbora bidaiatu beharko dute ikastolakoek Bilbo C.F.S.-ren aurka jokatzeko, denboraldi bikaina betetzen ari dira bizkaitarrak eta saihestu beharreko oztopo korapilatsua izango da ezbairik gabe.

Larunbatean, Usabalen, Laskorain taldearen aldetik, Javi delegatua, Javi coach manager-a, Aitor entrenatzailea, Endika, Gil, Murgi, Ekhi, Vazquez, Zumeta, Belloso, Telleria, Alonso eta Saralegi izan ziren. Laskoraingo bigarren taldeari dagokionez, Santxoren taldeak 4-3 galdu zuten Zurt tabernaren aurka.

Oinarriko taldeen emaitzak:

Probintzial 1. Maila: Zurt Taberna 4 - 3 Bide Bide Laskorain
Probintzial 2. Maila: Zarautz 2 - 0 Laskorain
Jubenila: Laskorain 2 - 3 Noto
Kadetea: Anoetako Ikastola 5 - 3 Laskorain
Infantila: Laskorain 9 - 0 Zarautz "B"

2012-11-23

J10. Atarikoa. Laskorain Ikastola - Tolosala Hirukide

Urteetan ikastetxeetako patioetan jokatu izan den norgehiagoka inoiz lehiatu den maila gorenean izango dugu ikusgai bihar Usabalen Laskorain Ikastolak eta Tolosala Hirukidek arratsaldeko lauretan aurrez aurre jarriko dituen partidan.

Aitzinean Eskolapioak zirenak, iaz eskuratu zuten igoera gutxi ez balute, sailkapeneko bigarren postuan kokatu dira egunduko sasoi hasiera eginaz eta multzoko errebelazioa direla azpimarratuz.

Aurten jasan duen porrot bakarra Ibarra liderraren aurka izan da eta etxetik kanpo beste gainontzeko partidak irabazi ditu, beraz kontutan hartu beharreko arerioa da, ahaztu gabe noski, derbi batek berezkoak dituen beste osagaiak ere badituela.

Horitxoen aldetik, baja ziurra da Asier Etxeberria. Aurreko asteburuan txartel gorria ikusi ondoren, bi partiduko zigorra jaso du eta Aitorrek ezin izango du berarekin kontatu.

Oinarriko taldeen ordutegiak:

Nazional 3. Maila: Laskorain - Tolosala, Usabal, larunbata 16:00tan.
Probintzial 1. Maila: Zurt Taberna - Laskorain, Zubiaurre (Azpeitia), larunbata 17:15ean.
Probintzial 2. Maila: Zarautz - Laskorain, Antoniano (Zarautz), larunbata 19:30ean.
Jubenila: Laskorain - Noto, Usabal, larunbata 10:30ean.
Kadetea: Anoetako Ikastola - Laskorain, Abraham Olano (Anoeta), larunbata 11:00tan.
Infantila: Laskorain - Zarautz "B", Usabal, larunbata 09:30ean.

2012-11-19

Laskorainek 4-4 berdindu zuen Santurtziren aurka

Sailkapenaren erdian, azken postuei behin betiko agur esan eta gorantz begira jartzeko irrikan diren bi talde izan genituen nor baino nor Santurtziko udal kiroldegian.  Egungo 3. mailak ordezkatu duen Nazional B mailan behin baino gehiagotan aurrez aurre izan diren Santurtzi eta Laskorainek, beste orrialde bat idatzi zuten elkarren aurkako norgehiagoken historialean.

Pasa den astean Billabonako Egintza garaituta, beste hiru puntu eskuratzeko ilusioz bidaiatu zuen ikastolako taldeak baina 40 minuturen ostean berdinketan amaitu zen norgehiagoka. Lehen zati eder baten ostean 3 puntuak Tolosarako bidea hartuta zutela zirudienean, bigarren zatian egindako lan eskasak puntu bakarrean utzi zuen ikastolako mutilen arratsaldeko etekina.
Lehen zatian Aitorren mutilak nagusi izan baziren ere lehen minutuetan erabat lokartuta kantxaratu ziren. Epaileak txistua jotakoan ez baino etxekoek lehen gola egindakoan hasi zuten norgehiagoka horitxoek. Hortik aurrea, jokoan erabat nagusitu ziren eta pixkanaka markagailuari buelta eman zioten Etxebe, Telleria eta Gilen golekin.
Lehen zatiaren azken hondarrean jokoaren dinamika apurtu nahian etxekoek atezain jokalaria kantxaratu zuten baina Gilek aldea areagotzeko probestu zuen, baloi bat lapurtu eta markagailura  1-4koa  igo baitzuen atsedenaldiaren aurretik.
Lan zailena eginda zegoenean ordea partida erabat okertu zen eta bigarren zatian bizkaitarrak izan ziren jokoaren gidari.  Laskoraini baloiaren jabetza kendu eta emaitza orekatu arte etxekoan alde izan ziren markagailuaren aldaketa denak. Horrela 40 minutuak agortutakoan 4na goleko berdinketak puntu banaketa adostu zuen bi taldeen artean.
Berdinketekin puntu gutxi pilatzen bada ere, Laskorainek galdu gabe jarraitzen du eta datorren astean etxean jokatuko duen derbi garrantzitsurako ilusioz beteta itzuli ziren Santurtzitik Javi delegatua, Aitor entrenatzailea, Endika, Telleria, Murgi, Gil, Ekhi, Etxebe, Txiki, Alonso, Eñaut, Manso eta Aratz jokalariak.
Oinarriko taldeen emaitzak:

Probintzial 1. Maila: Bide Bide Laskorain 5 - 2 Gure Txokoa
Probintzial 2. Maila: Laskorain 2 - 5 Denak Taberna
Jubenilak: Atsedena
Kadeteak: Laskorain 6 - 3 Beasaingo
Infantilak: Goierri "B" 0 - 13 Laskorain

2012-11-16

J09. Atarikoa. Santurtzi - Laskorain Ikastola

Bigarren irteera Santurtzira eta oraingoan izen bereko taldearen aurka jokatzeko larunbatean Udal Kiroldegian 18:15ean hasiko den neurketan. Pasa den astean partidua hasi aurretik arerioak puntu bat gutxiago bazuen, biharkoak Laskorainek baino bat gehiago du eta, hortaz, beste norgehiagoka orekatu bat espero da.

Astean zehar Laskorain Ikastolako Areto Nagusian Jone Urteaga zuzendariak emandako hitzaldiak bere eragina izango duenaren segurantzarekin irtengo dira kantxara horitxoak eta, bide batez, sailkapenean postu batzuk irabazteko balio diezaieken 3 puntuak eskuratu.

Autobusa Usabal Kiroldegitik 15:15ean irtengo da.

Oinarriko taldeen ordutegiak:

Nazional 3. Maila: Santurtzi - Laskorain, Udal Kiroldegia (Santurtzi), larunbata 18:15ean.
Probintzial 1. Maila: Bide Bide Laskorain - Gure Txokoa, Usabal, larunbata 18:00tan.
Probintzial 2. Maila: Laskorain - Denak Taberna, Usabal, larunbata 16:00tan.
Jubenilak: Atsedena.
Kadeteak: Laskorain - Beasaingo, Usabal, larunbata 10:00tan.
Infantilak: Goierri - Laskorain, Usabal, larunbata 11:00tan.

2012-11-12

Laskorainek 2-5 irabazi zuen Billabonan Egintzaren aurkako derbia

Aitzineko bi jardunaldietan bi berdinketa mingarri pairatu ostean, Laskorainek denboraldiko hirugarren garaipena erdietsi zuen pasa den larunbatean. Tolosatik oso gertu izan zen, Billabonako Olaederran, horitxoek 2-5 hartu baitzuten mendean Egintza-Transportes Lakunza talde bizilaguna.

Derbia ez zen batere samurra suertatu Aitorren mutilentzat. Lehen zatian, nahiz eta jokoaren ekimenaz jabetu eta nahiz eta baloia billabonatarren atetik gertuago ibili minuturik gehienetan, etxekoak izan ziren 10 metrotatik markagailua ireki zutenak eta atsedenaldiko 1-0koa ez zen horitxoentzat azken asteetako mamuak uxatzeko emaitzik aproposena.

Berragerpenean jokoak ez zuen aldaketarik jasan eta laskoraindarren nagusitasuna are eta nabarmenagoa bihurtu zen. Ondorioz, orain bai, horitxoek markagailuari itzulipurdia ematea lortu zuten, 1-3raino, golegile Gil, Telleria eta Murgi tridentea izan genuelarik zein baino zein gol ederragoarekin.

Zailenak egina zirudienean ordea, etxekoen kemena tarteko jokoa erabat orekatu zen, jokaldi bikain batean gainera 2-3-koa iritsi zelarik. Hiru puntuak dantzan genituen berriro eta ez zegoen batere argi nora eroriko ziren. Azpimarratu, une erabakior horietan, Aitorrek ausart Eñaut eta Manso filialeko jokalariak ipini zituela bostekoan eta bi gazteek erantzun paregabea eman ziotela entrenatzaileari.

Eñaut Vazquez izan zen hain zuzen partida erabaki zuena horitxoen laugarrena sartuaz. Presinean baloia lapurtu eta jaurtiketa bortitz batekin gola sartu, bakar bakarrik egin zuen dena. Ondoren, partidaren hondarrean jada, Gil kapitainak sinatu zuen azken 2-5-koa etxekoen atezain jokalariaz baliatuaz.

Pozik ziren berriro garaipen bat dastatuaz Javi delegatua, Aitor entrenatzailea eta Endika, Telleria, Gil (k), Murgi, Eñaut –haserako bostekoa-, Txiki, Alonso, Etxebe, Manso eta Aratz jokalariak. Baja izan genituen Joniko, Ekhi eta Lander.
 
Oinarriko taldeen emaitzak:
 
Probintzial 1. Maila: Allerru Jaizkibel 6 - 5 Bide Bide Laskorain
Probintzial 2. Maila: Laskorain 5 - 6 Samaniego Orixe
Jubenilak: Cafeteria King Kong 3 - 4 Laskorain
Kadeteak: Samaniego Orixe 5 - 3 Laskorain
Infantilak: Laskorain 7 - 4 Zarautz "A"

Iker Santxoren mutilak esku hutsik itzuli ziren Lezora egindako bisitan 6-5 galdu ostean. Etxez kanpo jokatu dituzten aurrekoetan bezela, partidu kaxkarra eta akatsez jositakoa burutu zuten eta ate aurrean gol aukerak egiteko erreztasunak ez zien oraingoan garaipena lortzeko balio izan.

Nahiz eta jokoan akatsak pilatu, markagailuan berdintasuna izan zen nagusi eta horren adierazgarri bi taldetako inork ez zuena gol bat baino gehiagoko alderik lortu. Lehen zatiak gol festa ikusteko parada eman zien Bekoerrota kiroldegira gerturatutako zaleei; 1-0, 1-1, 2-1, 2-2, 2-3, 3-3 eta 3-4ko eboluzioa izan zuen elektronikoak, eta bigarrenean Allerruk, bi gol jarraian egin eta horitxoek berdinketa sinatu ondoren, azken 6-5ekoarekin itxi zuen sareratzeen kontua.

Amaieran, Iker, "lehen zatiko arerioaren nagusitasunaren aurrean partidua galdutzat ez eman eta besoak jetsi ez izanarekin" gelditzen zela adierazi zuen, eta noski, "etxetik kanpoko dinamika aldatu behar denaren proposamenarekin".

Lezon porrota jasan baina bigarren postuari eutsi ziotenak, Iker entrenatzailea, Malvadi, Illunbe, Joshua, Maikel (1), Zumeta (2), Martija, Txato (2), Beñat, J.M. eta Otto.
 

2012-11-09

J08. Atarikoa. Egintza - Laskorain Ikastola

Sasoiko bigarren derbia jokatuko du Laskorainek bihar Billabonako Olaederra Kiroldegian taulan puntu batera duen Egintza taldearen aurka.

Talde biek duda-mudako hasiera izan dute, eta sailkapenean berdintasuna ikus daitekeen arren (8 puntu batak, 7 besteak), tolosarrek billabonatarrek baino ia gol erdiak jaso dituzte (21 horitxoek, 41 Egintzak) eta kopuru berdina (22) sareratu.

Hortaz, atea ongi babesten oinarritu beharko luke Laskorainek bere garaipenaren bidea.

Asteburuko ordutegiak:

Nazional 3. Maila: Egintza - Laskorain, Olaederra (Billabona), larunbata 18:00tan.
Probintzial 1. Maila: Allerru Jaizkibel - Bide Bide Laskorain, Bekoerrota (Lezo), larunbata 17:00tan.
Probintzial 2. Maila: Laskorain - Samaniego Orixe, Usabal, ostirala 20:30ean.
Jubenilak: Cafeteria King Kong - Laskorain, Olaizaga (Elgoibar), igandea 11:00tan.
Kadeteak: Samaniego Orixe - Laskorain, Uzturpe Frontoia (Tolosa), larunbata 10:00tan.
Infantilak: Laskorain - Zarautz "A", Usabal, larunbata 10:00tan.

2012-11-05

Laskorainek hirunako bigarren berdinketa jarraian lortu zuen Soloarteren aurka

Baldintza zorrotzeko frogari aurre egin zion Laskorainek joan den Larunbatean Usabalgo polikiroldegian, azken urteetan zehar 2.B mailan aritutako Soloarte talde boteretsuaren aurka lehiatu behar izanak ez du beste izendapenik merezi eta tolosarrek gaur egun duten puntu premiak presio gehigarri bat ezartzen zuen taldearengan.

Arerioak bildutako ezaugarriak ez ziren jolaserako aproposenak eta errealitatearen ezagupen osoarekin, lehiaketarako prest kantxaratu ziren Aitorren mutilak beste edozein modutako xedapen batek porrot sahiestezin bat ekarriko zuela jakinik.
Ez zen batere ondo hasi partida etxekoentzat 0-1 aurreratu bait ziren bizkaitarrak, baina estraineko sensatzio txarrei buelta ematen jakin eta Murgik eginiko bi golen bitartez 2-1-koa ezarri zen markagailuan lehengo zatia amaitu baino lehen. Bitarte horretan atezain bizkaitarra kanporatua izan zen eta bi minutuetan zehar gizon bat gehiagorekin jokatu arren ezin izan zen abantaila areagotu.
Bigarren zatian 3-1-koa erori zen berriro etxekoen aldetik filialeko jokalari den Zumeta gazteak bere debutean eginiko golari esker eta neurketa itxura onez margotzen hasia zen ordurako. Jakina da hala ere areto futbolean azken unerarte besorik jeitsi behar ez dena eta bilbotarrek 3 minuturen faltan izua sartu zuten ikastolakoen gorputzean 3-2-ko raino aldea murriztuaz.
Jokaldi ero batean eta azken segunduan kontraeraso baten errotik etorritako falta bat adierazi zuten epaileek area ertzean eta berdinketa etorri zen norgehiagokaren azken hasperenean zuzeneko jaurtiketa batean.
Kolpe gogorra ezbairik gabe Aitorren mutilek jasotakoa, hiru puntuek azken unean modu horretan ihes egin arren aurrera begiratu beharra dago eta urrutiegira joan gabe datorren astean Billabonako Egintza taldearen aurka beste aukera berri bat izango dute horitxoek beharrezkoa egiten den garaipen berri bat eskuratzeko.
Larunbatean Usabalen, Javi delegatua, Aitor entrenatzailea, Endika, Telleria, Murgi, Belloso, Etxebe, Ekhi, Vazquez, Zumeta, Alonso eta Aratz izan ziren.  Filialari dagokionez, Santxoren mutilek 4-2 irabazi zuten Horbel Tabernaren aurka eta bigarren postuan dira liderraren puntu kopuru berdinarekin.
Oinarriko taldeen emaitzak:

Probintzial 1.Maila: Bide Bide Laskorain 4 - 2 Horbel Taberna
Probintzial 2.Maila: Gamon KE 4 - 2 Laskorain
Jubenilak: Ez da jardunaldirik egon.
Kadeteak: Ez da jardunaldirik egon.
Infantilak: Ez da jardunaldirik egon.

Iker Santxoren mutilen partiduaren kronika ere iritsi zaigu. Iazko txapelduna izan zen Horbel Taberna talde hernaniarra gailendu zuen 4-2ko emaitzarekin lehen 20 minutu ikusgarri batzuen ondoren (3-0).

Atsedenaldira bidean ordea, aldea murriztea lortu zuten kanpotarrek 3-1koarekin, eta bigarren zati hasieran horitxoak gehiago izan baziren ere, 15 minutu faltan gol bakar batera jarri zen aurkaria bi eraso azkarren bitartez.

Baina partida guztian zehar bezela, baloi jabetza eta norgehiagokaren nondik norakoak kontrolpean izan zituen Laskorainek gauzak bere tokian jarri zituen 4-2ko azken emaitza izango zen sareratzearekin. Hernaniarrek kolore guztitako aukerak izan zituzten golaren aurretik eta ondoren, baina Aratz atezainak bata bestearen atzetik saiestu zituen, talde osoarekin batera, filialak duen maila altua agerian jarriaz.

Denboraldi hasiera honetan, 4 garaipen eta porrot bakarrarekin ko-lidertzan daude Santxo eta Fru-Karanka entrenatzaileak gidatzen dituzten Aratz, Malvadi, Beñat (1), Illunbe, Maikel (1), Joshua (1), Otto, Txato, Zumeta (1), Urko, Martija eta Vazquez (1) jokalari gazteak.

Segi horrela mutilak!

2012-10-30

Laskorainek 3-3 berdindu zuen Mallabiaren aurka

Ikastolako taldeak puntu bakarrarekin konformatu behar izan zuen pasa den igande arratsean Mallabian jokatutako norgehiagokan. Laskorainek  inoiz bisitatu gabeko Zaldibarko udal kiroldegian partida eroa lehiatu zuten bi taldeek eta 40 minutu aldrebesen ondoren 3na goleko berdinketa sinatu zuten.

Etxeko taldeak oso indartsu hasi zuen norgehiagoka, buruz buruko defentsa itogarriarekin horitxoak ustekabean harrapatu nahian. Aitorrek gidatutako mutilak ez ziren kikildu ordea eta pase luzeak eginez aurkariaren defentsa  gainditzea lortu zuten, jarraian izandako aukeretan erabat kamuts ibili arren.
Aurkariaren erritmo zoro eta bizia kontrolatu eta baloiaren jabe egiten saiatu arren horitxoak etxekoen jokoarekin kutsatu eta horrela joan ziren lehen 20 minutuak.  Gol aukera argienak Laskorainen aldekoak izan arren etxekoak izan ziren Endikaren atea zulatzen asmatu zuten bakarrak, atsedenaldira 1-0 ailegatuz.
Bigarren zatian aurkariak fisikoki behera egin arren , partidak kontrolik gabe jarraitu zuen eta etxekoek falta baten ondotik egindako 2. golak maldan gora ipini zuen arratsaldeko zeregina. Momentu horretan baina, Laskoraini mesede egin zion partidaren dinamikak, gol aukerak ugariak baitziren eta Gilek egindako lehenengoari, Ekhiren bigarrenak eta Telleriaren hirugarrenak jarraitu zioten markagailuari itzulipurdi polita emanez 5 minuturen faltan.
Pozak gutxi iraun zuen ordea bisitaren aulkian, area barneko nahastera gogor ateratako alboko sake batek ate barrurako bidea hartu baitzuen inor konturatzeko.  Atezain jokalariarekin egindako azken ahaleginak ez zuen fruiturik eman eta 3nako berdinketarekin zirenean jo zuen azken txistua epaileak.
Huts egindako hamaika aukerak gogoan zituztela itzuli ziren etxera elastiko horitxoa defendatzera joandako Javi delegatua, Aitor entrenatzailea, Endika, Telleria, Joniko, Etxebe, Gil, Murgi, Lander, Alonso, Eñaut, Txiki eta Aratz jokalariak.
Oinarriko taldeen emaitzak:
Probintzial 1.Maila: Ventanas ISU Leihiak 5 - 2 Bide Bide Laskorain (DV-ko kronika: http://www.diariovasco.com/v/20121026/comarca/ventanas-recupero-ayer-parte-20121026.html)
Probintzial 2. Maila: Laskorain 5 - 3 Gure Txokoa
Jubenilak: Laskorain 3 - 0 Inter Intxaurrondo
Kadeteak: Goierri 1 - 3 Laskorain
Infantilak: Goierri "A" 0 - 18 Laskorain

2012-10-26

J06. Atarikoa. Mallabia - Laskorain Ikastola

Ezer gutxi dakigu talde bizkaitarrari buruz izan ere duela bi urte Laskorainek egin bezela maila igoera lortu bai zuen eta bigarren sasoi honetan izango dute bi taldeek elkar lehiatzeko estreineko aukera.

Bere partidak Zaldibarko Udal Kiroldegian jokatzen ditu eta, iazko datuak erreferentzia bezela hartuta, esan dezakegu gol askokoak izan ohi direla. Sailkapenean erdi parean kokatu zen 2011/2012 sasoian eta etxean oinarritzen du bere puntu pilaketa nagusia. Aurten garaipen bakarra du (3 puntukin azkenaurrenarekin berdintuta dago) eta, lehen aipatu bezela, gol asko egin eta jaso ditu. Hain zuzen ere, gol gehien jaso duena da (31), aldiz horitxoek baina 7 gol gehiago lortu ditu (23).

Partidua tolosarrentzat ez ohizko orduan jokatuko da igandean Zaldibarko Udal Kiroldegian 17:00tatik aurrera.

Nahi duenarentzat, autobusa 14:15ean irtengo da Usabaldik.

Oinarriko taldeen ordutegiak:

Probintzial 1.Maila: Ventanas ISU Leihoak 5 - 2 Bide Bide Laskorain (ostegunean jokatua).
Probintzial 2.Maila: Laskorain 5 - 3 Gure Txokoa (asteazkenean jokatua).
Jubenilak: Laskorain - Inter Intxaurrondo, Usabal, larunbata 10:30ean.
Kadeteak: Goierri - Laskorain, Aldiri (Urretxu), larunbata 09:30ean.
Infantilak: Goierri A - Laskorain, Ispilla (Zumarraga), larunbata 09:15ean.

2012-10-22

Laskorainek 1-3 galdu zuen Ibarraren aurkako derbia

Eskualdeko areto futbolaren zaletuek parerik gabeko festaz gozatu ahal izan zuten joan den larunbatean Usabalgo polikiroldegian, izan ere denbora luzean zehar klub sendo moduan azalduz lanean aritu diren Laskorain eta Ibarra erreferenteek aurrez-aurre neurtu bait zituzten beren indarrak leporaino beteriko harmailetako zalegoaren aurrean.

Neurketaren atarian Laskorainen sustrai eta enborraren parte diren Barriola jokalari ohia eta Alonso eta Javientrenatzaile ohiak omendu zituen ikastolak esker onez, nolako zuretik jasotzen bait da halako ezpala gehienetan eta horitxoen egungo osasun onaren errudun zuzenak ditugu aipatutako izenak. Alonso gainera, aulkitxoan izan genuen zuzendari lanetan Aitorren baja beteaz azken orduko premiak zirela eta.
Lehen zatia ez zen batere ondo hasi etxekoentzat, berehala egin zuen Ibarrak bere lehen gola eta 8. minuturako elektronikoak 0-2-ko kezkagarri batekin isladatzen zuen talde bizilagunaren ordurarteko nagusitasuna. Erdipurdiko lehen zatia apaintzea erabaki zuen Gilek 10 segunduren faltan marraztutako kontraeraso bati bukaera emanaz eta atsedenaldian 1-2-koarekin erretiratu ziren jokalariak aldageletara. Oraindik ere dena erabakitzeke.

Bigarren erdian horitxoen itxura nabarmenki hobetu eta berdinketaren gola miazkatu zen sarritan, hala ere, ate aurrean asmatu ez izanak aurkariaren kontra egin beharreko ahalegin nekezari, kronometroaren zama gehitu zion eta bi minuturen faltan oraindik partiduaren ugazaba jakiteke izaki, atezain jokalariaren taktika ipini zuten martxan tolosarrek. Horrela etorri zen 1-3-ko erabakigarria minutu exkax gelditzen zenean amaierarako.
Oraingoan punturik batu ez arren, lider sendo baten parean emandako itxurarekin gustora izan behar lukete laskoraindarrek bederen eta datorren astean Mallabiaren kontra izango den norgehiagokan pentsatu beharra dago sailkapeneko gorako postuak gehiegi urrundu ez daitezen.

Larunbatean, giro jatorrean eta hamarkadetan zehar eginiko lan mardularen erakusgarri, tolosaldeako areto futbolaren festa bizi ahal izan zen bi talde bikain hauen eskutik, eta elastika horia defendatu zutenak Javi delegatua, Alonso “coach manager”-a,Endika, Gil, Lander, Murgi, Telleria, Belloso, Joniko, Ekhi, Eñaut, Mikel Alonso, Etxebe eta Aratz izan ziren.
Oinarriko taldeen emaitzak:

Probintzial 1.Maila: Bide Bide Laskorain 6 - 2 Euskalduna
Probintzial 2.Maila: Egintza 3 - 4 Laskorain
Jubenilak: Summa Aldapeta MCM 0 - 5 Laskorain
Kadeteak: Laskorain 0 - 1 Egintza
Infantilak: Laskorain 6 - 7 Debabarrena

2012-10-18

J05. Atarikoa. Laskorain Ikastola - Ibarra F.S.

Laskorainek Ibarra bizilagunaren aurka jokatuko du larunbat honetan arratsaldeko 18:00tan Usabalgo kiroldegian eskualdeko areto futbolak zalegoari oparituko dion derbi zirraragarri batean. Ibarra Hirugarren Mailako behin behineko sailkatua da eta erronka benetan zaila agertzen zaie Aitorren mutilei.

Dena den, azken bi asteetan erreskan lorturiko bi garaipenek taldea indarberritu dute eta klubaren bizitza laboral errespetagarrian zehar idatzi diren urrezko orrialde ugariei beste atsekipen berri bat noiz egingo zain dira ikastolakoak.

Zaletuei deialdi zabal bat egiten zaie lerro hauen bitartez taldea sustengatu dezaten giro jatorrean lehiatuko den neurketa bikain bat espero den honetan.

Partidua hasi aurretik, merezitako omenaldia egingo zaie Javi Mujika eta Jorge Alonso entrenatzaile ohiei eta Unai Barriola jokalari ohiari.

Bestalde, oinarriko taldeek honako ordutegiak izango dituzte:
Probintzial 1.Maila: Bide Bide Laskorain - Euskalduna, Usabal (2), larunbata 16:00tan.
Probintzial 2.Maila: Egintza - Laskorain, Olaederra (Billabona), ostirala 20:30ean.
Jubenilak: Summa Aldapeta MCM - Laskorain, Marianistas (Donostia), igandea 12:00tan.
Kadeteak: Laskorain - Egintza, Usabal, larunbata 09:30ean.
Infantilak: Laskorain - Debabarrena, Usabal, larunbata 10:30ean.

2012-10-15

Laskorainek 1-6 irabazi zion Santurtziko San Jorgeri

Lehendabiziko bi jardunaldietan bi porrotetako uzta pozoitsua bilduta, bwin eta euskaljokoan sortuak ziren jada Aitor Garcia entrenatzaile horitxoak eguberritako turroia dastatuko ez zuenaren apostuak; baina apostulari arduragabe horiek mozkinik gabe eta galera larriekin gelditzeko bidean dira, erreskatea erregutuaz amaitzeko bidean, Aitorrek gidatutako mutilek hirugarren eta laugarren jardunaldietan bi garaipen lortu baidituzte erreskan. Bigarrena hispanitate egunean lortu zuten Santurtzin San Jorge taldea 1-6 nagusitasunez menperatuaz.

Neurketa oso parekatua suertatu zen minutu luzez. Bi taldeak ausart zelairatu ziren, joko ekimenaren bila eta kantxa erdian intentsitatearekin defendituaz -banaka etxekoak, zonan bisitariak-, eta indarrak parekatuta izan ziren ia lehen zati guztuan. Atsedenaren aurretik baina, bi jokaldi solteetan horitxoek bi gol sartu zituzten, psikolojiko horietakoak, golegile sasoi bete-betean diren Eñaut eta Etxebe izan genituelarik. Eñautek Landerren "behiaren buztana" bat baliatu zuen eta Etxebek area kanpoko jaurtiketa bat.

Markagailua ondo bideratuta, berragerpenean segituan erabaki zuten partida laskoraindarrek. Telleriak eta berriro Etxebek gol bana sinatu zuten lehen minutu horietan eta 0-4koa zama handiegia bihurtu zen Nerbioi ezkerraldekoentzat. Azken 10 minutuetan atezain jokalaria kantxaratu zuten erreakzioa jomuga, baina ez zuen esperotako onurarik ekarri; bere abiadura ustiatzeko espazioak maite dituen Jonikok bi gol sartu baitzituen etxekoen gol bakarra gailenduaz. 1-6 azkenean.

Azpimarratu Santurtzin Laskorainek hiru baja garrantzitsu izan zituela -ez ziren bertan izan Gil kapitaina, Zubillaga eta Alonso-, eta honek harrobiko jokalari gazteei protagonismorako parada estimagarria eskaini ziela, Aratz atezainak lehen zatia jokatu zuelarik, golik jaso gabe, eta aipatu Eñautek eta baita Beñat Balerdi zierreak ere, minutu askotaz gozatu zutelarik. Hirurek maila ederra eman zuten.

Hiru puntuak eta turroi zati bat zakuan, oso gustora egin zuten Tolosarako itzulera bidaia Aduriz fitipaldiren autobusean, Javi delegatuak, Aitor entrenatzaileak eta Aratz, Telleria, Balerdi, Murgi -Gil ez zegoelako kapitaina-, Lander, Txiki, Etxebe, Joniko, Eñaut eta Endika jokalariek.

2012-10-08

Laskorainek 4-1 gainditu zuen Gernikako Gora F.S. taldea

Ligako lehen bi jardunaldien ostean sailkapenean punturik ez izateak sor lezakeen bertigoak alde batera utzi eta zaleen aurrean lehen garaipena eskuratzeko sinesmen osoarekin agertu ziren larunbat arratsaldean ikastolako jokalariak Usabalera. Etxekoen egoera berean zegoen Gernikako Gora taldea zuten aurkari eta partida oso txukun bat jokatu ostean 4-1 nagusitu zen Laskorain.

Partidako lehen minututik nagusi izan zen ikastolako taldea, Aitorrek zuzendutako mutilen zonakako defentsak baloi ugari lapurtzeko aukera eman zien etxekoei eta presio lerroa aurreratutakoan ere, aurkariak ezin baloia jokatuta atera eta taldekiderik bilatzen ez zuten pase luzeetara jo behar izan zuen.
Defentsan egindako lan onaren ondorio izan ziren lehen zatian lortutako hiru golak, lehenengoa Etxebek sareratu zuen, berak lapurtutako baloi bat jaurtiketa eraginkor batekin borobildu ostean. Beste bi sareratzeak Jonikok gauzatu zituen, kantxa erdian bereganatutako bi baloi zein baino zein jokaldi politagorekin errematatuz.
Atsedenaldian Bikutz tabernak eskainitako saskiaren zozketa ondorenean ere partidak bere horretan jarraitu zuen. Gernikarren intentsitateak behera egin zuenean aukera garbiak eta ugari izan zituen Laskorainek aldea areagotzeko, atezainaren lan ona eta jokalari horitxoen kontzentrazio faltak ordea markagailua bere horretan mantendu zuten.
Etxekoentzako arrisku bakarra bigarren zatian pilatutako falta ugarien ondotik iritsi zen, inozoki egindako hanka-sartzeen ondorioz 10 metrotako bi jaurtiketa izan baitzituzten aurkariek. Dena den, Endika seguru aritu zen bi jaurtiketetan eta denboraldi hasera honetako zirrara bilakatu den Eñautek 4. gola egindakoan partida erabakita geratu zen.
Norgehiagokaren azken hondarrean aurkariak egindako golak 4-1 emaitzarekin itxi zuen, 3 puntuak eskuratzeaz gain, pasa den denboralditik zetorren dinamika txarra eten eta konfiantza berreskuratzeko balio behar duen partida hau.
Gustura irten ziren larunbatean Usabalera gerturatutako zale guztiak, lehen taldearen garaipenaz gain harrobiko beste bi taldeek ere aurrera atea baitzituzten euren partidak. Bitik bina garaipenekin sailkapenaren puntan dira harrobiko bi taldeak.

2012-10-01

Laskorainek 5-2 galdu zuen Zarautzen denboraldiko bigarren jardunaldian

Garrantzitsua bezain zaila zen norgehiagoka bati aurre egitea egokitzen zitzaion Laskoraini joan den larunbatean Zarautzen 2012-2013 denboraldiko bigarren jardunaldiaren atarian leku izandako derbi zirraragarri batean. Aurrera de Vitoria-ren aurka kale egin izanak Aitorren mutilek jasan beharreko presioa biderkatzen zuen, era berean eta pasa diren asteetan aipatu legez Laskorainen helburu nagusia 3. mailako talde indartsuenetarikoa bezela azaltzea bait da aurtengoan.

Lehen zati txukuna bete zuten horitxoek, 1-0 galtzen hasi arren Joniko eta Vazquez gazteek markagailua irauli eta seriotasunez osaturiko 20 minutuetan zehar 1-2-ko abantailarekin amaitzea lortu zen. Erabakiorra ez, baina itxaropenez beteriko emaitzari jarraipena eman behar zitzaion oraindik ondo oztopatutako bigarren zati batean.
Gauzak guztiz okertu ziren tolosarren kalterako, sortu ziren bai markagailuaren aldea areagotzeko abaguneak baina kostakoak izango ziren asmatzaile eta 2-2-ko berdinketa mingarriak arratsaldea kolore ilunez margotzen hasia zuen ordurako.  Laskoraindar batek txartel gorria ikusi eta jokalari bat gutxiagorekin zarauztarrek 3-2-koa egingo zuten jarraiean. Atezain jokalariarekin 4 minuturen faltan egindako azken ahaleginak ez zuen fruiturik eman eta bi gol gehiago jaso ondoren, azkena txirrinaren mugan, 5-2-ko emaitzarekin jeitsi zen ohiala.

Ezustekoa da bi jardunaldiren ondoren punturik lortu ez izana oraindik eta lehen bait lehen berpiztu behar lukete Aitorren mutilek sailkapenaren ohorezko postuen borrokarengandik gehiegi urrundu nahi ez izatekotan.
Datu positibo gisa, Vazquez gazteak gorako taldearekin eginiko lehen gola aipatu behar, minutu bikainak betetzen ari den gazte honek harrobiaren lan aparta isladatzen du beste behingoz eta segurua da ez dela bere azken sareratzea izango.

Datorren astean Gora C.D.-ren bisita jasoko dute ikastolakoek Usabalen. Dinamika negatibo honi amaiera emateko ordua delakoan daude taldekide guztiak eta aste lanpetsu honen jarraiean lehen garaipena zenbatzeko irrikitan.
Larunbatean Zarautzen Javi delegatua, Aitor entrenatzailea, Endika, Telleria, Lander, Belloso, Joniko, Vazquez, Gil, Alonso, Etxebe, Ekhi eta Aratz izan ziren. 

2012-09-24

Laskorainek 3-5 galdu zuen Aurrera Vitoriaren aurka bere debutean

Larunbatean eman zion Laskorainek bere historiako 20. denboraldiari hasiera. Iaz 2.B-ko txapelketan jokatu ondoren –mailari eusteko bi puntu eskasen faltan amaitu zuten-, horitxoak 3. mailan dira berriro, beraien habitat naturalean, 20 urteko bilakaeran 12. aldiz arituko baitira bertan.

Nahiz eta iazkoarekin ezin alderatu, aurtengo txapelketa ere erakargarritasunez betea dator. Laskoraindarrek maila altuko arerioekin lehiatuko dute, iaz ezik beraiek baino maila altuagoetan aritutakoak zenbait, baina erakargarritasunik handiena Tolosaldeako lau taldek jokatuko dutela da. Ikusiko dugu “game of thrones” partikular honetan zein egiten den burdinezko tronoarekin.

Gauzak larunbatean ez ziren batere ondo hasi. Azken epaia denborak emango duen arren, hasiera batean txapelketako oilartxo bat den Aurreraren bisita jaso zuten ikastolakoek eta partida merezimendu guztiz galdu zuten 3-5.

Ez dakigu aurredenboraldiko nekea izan zen, Usabalgo sargori itogarria ala baja ziren jokalarien hutsunea, baina horitxoek partida makala osatu zuten. Jokoz eta intentsidadez baxu, erasoan ez zuten minik egin eta defentsan gailenduak izan ziren behin eta berriz, lehen zatia izan zelarik larriena. Atsedenaldiko 0-2koa gasteiztarrentzat baino tolosarrentzat zen hobea.

Berragerpenean gauzak zertxobait parekatu ziren baina baloia eskuaz ikutzeagatik Murgiren expulsioa suposatuko zuen penaltian, bisitariek hirugarrena sartu zuten. Ondoren horitxoek atezain jokalaria atera zuten, bikain burutu gainera, eta markagailua apaintzea behintzat lortu zuten.

Datu positiboekin amaitzeko, ederki aritu zen Eñaut Vazquez gaztearen debuta azpimarratu behar da eta hiru golegileak gogoratu: Ekhik, Etxebek eta Txikik egin zuten gol bana, danak atezain jokalari jokaldian. Bide batez, ziur gaude aurten hiru jokalari hauen protagonismoa inoiz baino handiagoa izango dela.

Burua jada bigarren jardunaldian zutela irten ziren Usabaldik Javi delegatua, Aitor Garcia entrenatzailea eta Endika, Telleria, Gil (k), Etxebe, Ekhi –haserako bostekoa-, Txiki, Murgi, Vazquez, Beñat Balerdi eta Aratz jokalariak. Zarautzen Lander, Joniko eta Alonso berreskuratzea espero da.

2012-09-20

J01. Atarikoa. Laskorain Ikastola - Aurrera de Vitoria C.D.

Iritsi da jokalariak hainbeste desio zuten momentua, 2012/13ko txapelketa ofiziala hasten den unea hain zuzen ere. Hilabete luze baten ondoren, hiru puntuengatik lehiatuko duten estreineko partidarako prest ditugu jada Aitorren mutilak.

Hasiera hontan hankak pisutsuak eta "txispa" falta nabari ohi den arren, zalegoari lehenengo poza emateko irrikitan daude horitxoak eta horretarakoa arerio zaila izango dute parean, Gasteizko Aurrera, iaz Maila hontan hirugarren sailkatutakoa eta denboraldiko ezhusteko atsegina izan zena.

Ezhustekoa diogu, hain zuzen ere, Sasikoa azkeneko sailkatua izan ezik (bosnako bi berdinketa) multzoko arerio guztiak menderatu bai zituen partida batean behintzat. Hau da, Lauburu Ibarra eta Sestao boteretsuei irabazteko gai izan zen Hirugarren Mailan bere lehen azalpena zuen talde arabarrak.

Iaz, partiduko ia bost gol egiteko gai izan zen (149 gol 30 partidutan eta bigarren talde erasokorrena) eta, puntu gehienak etxean baliatu bazituen ere, etxetik kanpo sei garaipen lortu zituen. Beraz, kontutan hartu beharrekoak dira gasteiztarrak.

Bestalde, tolosarrak, Hirugarren Mailara bueltan, goiko postuetan ibili behar dutenaren "beharrarekin" ekingo diote Usabalgo estreinekoari. Horretarako Jon Otxoa, Mikel Alonso eta Lander Camioren bajak izango dituzte, larunbatean arratsaldeko seietan hasiko den partidan.

2012-09-18

Laskorain berriro Hirugarren Mailan

Joan den 2B mailako urte gogorrean jeitsiera postuetan amaitu eta gero, aurtengo denboraldian betiko Nazional B izandako Hirugarren maila berrian jokatuko du Laskorainek bere toki naturalera behin itzulita.

Azken bi urteetan egindako Javiren lan bikainari, joan den denboraldian delegatu lanetan izandako Aitor García entrenatzaile berriak emango dio jarraipena, erronka polita izango du aurretik kalitatez beteriko argazki bat bait du bere eskuetan.
Loitzun eta Xabi Díezen bajak gertatu dira udaran eta lehen taldera zuzenean etorritako jokalaririk egon ez arren, harrobiak emango dio beste behingoz Laskoraini bere fruitua. Bigarren taldeko 5 jokalarik bete dute aurredenboraldia gainontzekoekin eta sailkapeneko postu gorenetan borrokatzeko potentziala dagoenaren sinesmen osoa dago klubean.
Ligaren hasiera datorren larunbatean, Irailak 22, izango du Laskorainek Aurrera Vitoria C.D. –ren aurka Usabalen. 

2012-05-07

Laskorain 2.B Mailatik Hirugarren Mailara jeitsiko da Zaragozan galdu ondoren

2011-2012 denboraldiko azken jardunaldiaren neurketa Zaragozan jokatzea egokitu zitzaion Laskoraini talde batek izan dezakeen egoerarik zailenean gainera, hil ala biziko gatazka, sailkapeneko liderraren aurka, jeitsiera zein txapeldunaren postuak jokoan eta etxetik kanpo jendez betetako harmaila batzuen aurrean. Garaipena lortzearen jomuga nekezak soilik libratu zitzakeen horitxoak erreketaren postuetatik eta datu guzti hauen jakitun izanik igo ziren autobusera Javiren mutilak.

Neurketak ez zuen aparteko misteriorik izan, Ebrosala lider boteretsuak erraz menderatu zituen horitxoak 9-0-eko emaitza zabal bat eskuratuaz lehen minututik azkenengoraino nagusitasun osoz eskuperatutako norgehiagokan. Tom Cruise berberak sinatuko lukeen “Misión imposible” filma bat egiteko aukera legoke tolosarrek buruz buru topaturiko erronkaren parean eta azkenean zaragozakoen logika ekonomikoa gailendu zen  azken sailkapenak erakutsitako bi taldeen arteko aldeari muzinik egin gabe.
Lehen zatia 3-0 amaitu zen hasiera batean atzean sendo aritzeko asmotan kantxaratutako ikastolakoen estrategia deslotzea erdietsi zutelarik aragoarrek, bigarren erdiaren gidoiak ez zuen aldaketa nabarmenik jasan eta gainontzeko golak banan-bana erori ziren denbora aurrera joan ahala. Azken 10 minutuetan Javiren mutilek atezain jokalariaren taktikarekin azken ahalegina saiatu arren 9-0-eko azken emaitzak Ebrosala aragoarra 2.B mailako txapeldun haundia bezela izendatu zuen eta Laskorain berriz 3. mailako talde berria izango da.
Denboraldiari amaiera emateko modu alaiena ez den arren, ezin aipatzeke utzi urte osoan zehar  horitxoek erakutsitako borroka izpiritua, horren adibide gardena bait da azken jardunaldirarte bururik makurtu gabe oilarrez beteriko maila batean aritu izanaren errealitatea.

Kronika honetan eskerrak eman nahi zaizkie denboraldi osoan zehar taldea sostengatu duten zaletu ugariei, Usabalgo harmailetan bizitako giroa nekez ahaztuko bait da eta datorren urtean Laskorain areto futbolaren toki naturala den hirugarren mailan betidanikoen pareko arratsalde magikoak eskeintzen saiatuko da kluba beste urtebetez.
Larunbatean Zaragozan Javi delegatua, Javi entrenatzailea, Aratz, Gil, Murgi, Joniko, Ekhi, Balerdi, Loitzun, Belloso, Etxebe eta Saralegi izan ziren.

2012-05-02

Laskorainek 3-2 irabazi zion Burgosi eta bizirik iristen da azken jardunaldira

Zirraraz beteriko garaipena erdietsi zuen Laskorainek denboraldi honetan etxean lehiatzen zuen atzeneko neurketan. Gipuzkoa Encounter 6ren eraginez ikastolakoek Ibarrako Belabietan jaso zuten Burgosen bisita eta majo izerdituta izan bazen ere 3-2 menperatu zituzten gaztelarrak.

Partidak berebiziko garrantzia zuen tolosarrentzat, garaipena ez zen beste edozein emaitzak sailkapenean azkenaurreko postuan gelditzea suposatzen baitzuen eta garaipenak aldiz, Castroren emaitzaren baimenarekin hori bai, postu bat aurreratzeko itxaropenari eustea.

Horitxoek beraz kementsu ekin zioten norgehiagokari eta jaun eta jabe izan genituen lehen zati guztian zehar. Beraiena izan zen baloia eta ekimena, beraienak gol aukera argienak eta beraiena gol bakarra. Gil errekaitzak sartu zuen, Landerrek bandan eginiko “behiaren buztana” baliatuaz.

Aldageletatik bueltan ordea burgostarrek jarrera proaktiboagoa azaldu zuten jokoa parekatuaz. Honela bigarren erdiaren ezaugarririk nagusiena markagailuan izaniko emozioa bilakatu zen. Adi partidaren hondarrean jazotakoaren kontakizunari.

Banakoarekin markagailaun, azken minutuan sartzerakoan, Otxoak laskoraindarrak bigarrengoz aurreratu zituen kontraeraso bizkorrean. Baina bisitariek ez zuten amore eman nahi eta atezain jokalariarekin 35 segunduren faltan berdinketa ipini zuten berriro horitxoen etsipenerako.

Beste behin garaipenak atzeko atetik egingo zuela ihes zirudien, baina 35 segundu horietan denboraldian estrainekoz zorteak elastiko horia jantzi zuen.

Gaztelarrek 2-3ko argia erratu zuten eta hurrengo jokaldian 4 segunduren faltan horitxoek area ertzean falta bat lortu. Telleriak arima guztiarekin hautsi zuen baloia, barrera eta atezaina doi doi zeharkatuaz eta defentsa bat gol marratik baloia urruntzera zihoanean Gil TDIk errematatu zuen gola amets horitxoa bizirik utziaz.

Orain, are eta zailagoa gelditzen da, txapela jokoan duen Ebrosala lider zaragozarraren kantxan irabaztea eta Castrok bere partida ez irabaztea. Kirol ikuspegitik mirari bat dirudi, baina Jon Lizasok erakutsi zizkigun matematikak gogoratuaz 2/9ko aukerak daude, %22koak. Belabietako partidan amaierarako 4 segundu falta zirenean portzentai hau %0 zen.

Larunbat euritsuan eguzkia irten zen Javi delegaduarentzat, Jorge eta Aitor prestatzaileentzat eta saralegi (ikusgarria atezain jubenilaren partida), Telleria, Gil, Lander, Otxoa, Murgi, Alonso, Txiki, Etxeberria eta Aratz jokalarientzat.

2012-04-23

Laskorain esku hutsik bueltatu zen Aragoitik


Denboraldia amaitzeko azken txanpa geratzen den honetan, Alcañizera joan behar izan zuen ikastolako taldeak, herriaren izen bereko taldearen aurka indarrak neurtzera. Errege kopako sailkapena ematen duen 3. postuaren borrokan ari den Alcañizi aurre egiteko Endika atezaina eta Landerren bajak izan zituen Laskorainek.

Neurketak hasiera polita izan zuen ikastolakoentzat, lehen minuturako aurreratu baitzen taldea. Jonikok aurkarien erasoa moztu, ziztu bizian kantxa zeharkatu eta atezainaren hanka artetik baloia sareratuz gol ederra sartu zuen.

Markagailuan aurrea hartu eta defentsako lan bikaina eginez eroso aritu zen Laskorain lehen zati osoan, are eta gehiago, Jonikok bere bigarrena egindakoan.

Atsedenaldiak ordea, erabat lokartu zituen horitxoak eta bigarren zatian etxekoak izan ziren nagusi. Urruneko jaurtiketa eder baten ondotik aldeak murriztea lortu zuen Alcañizek eta segidan iritsiko ziren markagailuari erabateko itzulipurdia emango zioten beste hirurak.

Atsedenaldian maldan behera ikusten zen norgehiagoka oso aldapatsu bilakatu zen istant batean eta atezain jokalaria erabiltzea beste erremediorik ez zuen izan taldeak. Denboraldi aparta egiten ari den Etxeberriak horitxoen gol bat egitea lortu bazuen ere aurkariak ez zuen barkatu eta aldea areagotuz joan zen azken 7-3ko emaitza sinatu arte.

Egoera oso zaila den arren, matematikak aurkakoa esaten ez duten bitartean Gipuzkoako talderik onenak dauden ligari eusten saiatuko dira ikastolakoak. Horretarako ezinbestekoa da aste honetan Burgosen aurka Ibarran jokatuko den norgehiagokan hiru puntuak lortzea.

Datorren partida garrantzitsu hori buruan bueltatu ziren inoizko kilometro pilarik handiena eginda Javi delegatua, Aitor eta Javi entrenatzaileak, Aratz, Gil, Murgi, Joniko, Loitzun, Telleria, Belloso, Ekhi, Etxebe eta Saralegi jokalariak.

2012-04-16

Laskorainek 7-7 berdindu zuen Agrupacion Deportiva Sala 10 taldearen aurka

2011-2012 denboraldi honi amaiera emateko hilabete exkax gelditzen den unean, garai gogorrak bizitzen ari den Laskorainek, Agrupación Deportiva Sala 10 talde aragoarraren bisita jaso zuen joan den larunbat arratsalde euritsuan Usabalgo polikiroldegian.

Hasera batean agertokiak eskeinitako baldintzek itxura aproposa erakusten zuten garaipen garrantzitsu bat lortzeko itxaropenean, maila ertaineko arerioa, sailkapeneko erosotasunaren babespean nahastua eta benetako beharra zuen Laskorain baten kantxara jausitakoa Zaragozatik egindako bidai luze baten ondoren. Zorteak dena den ez du aurtengoan ikastolakoen etxean oparirik utzi oraindik eta irabazita zegoen neurketak azken segunduetan ihes egin zuen beste behingoz.

Telleriak egindako 1-0-ekoari berehala eman zioten buelta kanpotarrek baina Murgik eta Ekhik gol banarekin 3-2-koa ipini zuten markagailuan lehen zati parekatu eta fin batean. Aldageletatik bueltan 4-2-koa igo zen horitxoen aldean jokaldi nahastu bat aragoarrek bere atean sartu ondoren. Sala 10-ekoak arratsalde pasa etorri ez zirenez atezain jokalariaren taktikarekin berdinketaren bi golak egin zituzten 4-4-koa ipiniaz. Etxekoen erantzuna berehala etorriko zen Gilek birritan eta Landerrek 7-4-ko ia erabakigarri bat igoaz elektronikora. 6 minutu luze oraindik aurretik eta zaragozakoek berriro atezain jokalariaren taktikaren bitartez bi gol egin eta azken minutu trabatu baten ostean 2 segunduren faltan 7-7-koaren sareratzea iritsi zen. Irabazita zirudien beste neurketa batek azken unean ihes egin du berriro eta tolosarrak amildegiaren ertzean utzi ditu joan den larunbateko berdinketak.

Partiduko protagonista nagusia Aratz atezaina izan genuen ezbairik gabe, Endikaren lesioa dela eta neurketa osoa jokatu zuen lehen aldiz aurtengoan, ez alferrik, izugarrizko maila eman bait zuen 40 minutuetan zehar harmailetako zaletuen txaloak eraginez behin eta berriz.

Datorren astean Alcañiz taldea bisitatuko dute laskoraindarrek mailari eusteko borrokari ekiteko asmoz eta gelditzen diren aukerak mantentzeko esperantzan.

Larunbatean Usabalen Javi delegatua, Alonso “coach manager”-a, Aratz, Gil, Murgi, Lander, Loitzun, Telleria, Belloso, Ekhi, Etxebe eta Saralegi izan ziren.

2012-04-02

Laskorainek 6-2 galdu zuen Conceptoren aurkako derbia


Areto fuboleko 2.B mailan lehiatzen duten bi talde gipuzkoarren arteko bigarren derbia jokatu zuten Laskorainek eta Conceptok Elgoibarko Olaizagan. Bizilagunen arteko dema hauen ezaugarririk funtsezkoena parekotasuna izan ohi den arren - arratsalde batez sailkapenak eta aurrekontuak ezertxo ere balio ez balu bezala-, larunbatean lojikak ez zion ustekabekoari abagunerik eskeini eta elgoibartarrak 6-2 nagusitu ziren.

Arratsaldea partida hasi aitzinetik okertu zen ikastolakoentzat: izan ere, Endika atezain titular bikainari beroketan sorbalda irten zitzaion eta epaileek partidaren hasiera adierazi zutenean Mendaroko hospitalera bidean zen. Iker Saralegi jubenilak ordezkatu zuen, bere debutean meritu handiko partida osatuaz, baina Endikaren hutsunea kolpe gogorra bihurtu zen horitxoentzat.

Kantxa barneko kontakizunari ekinaz, lehen zatian laskoraindarrek Conceptokoen jokoari ederki eutsi ziotela esan behar da, etxekoen estrainekoari Mikel Alonsok berdinketarekin erantzun ziolarik, nahiz eta ondoren atsedenaldiaren aurretik berriro aurreratu elgoibartarrak. 

Parekotasuna aldageletatik bueltan desegin zen erabat eta partidak ez zuen amestutako emoziorik izan. Esan momentu hartan 5-2koa suposatzen zuen gol laskoraindarra Joniko Otxoa pistoleroak sinatu zuela, baina beranduegi zen erreakziorako.

Horitxoen derbi bilduma zabal eta oparoaren azken atalburua beraz narras xamarra gelditu da, porrotagatik baino gehiago Endika handiaren lesioagatik. Atezain titularrari animoak eman eta Saralegiren debut itxaropentsuarekin gelditzea tokatzen da.

Txapelketaren amaierarako lau jardunaldi besterik falta ez direnean, laskoraindarrak azken aurrenak dira sailkapenean eta oso nekeza ipini bazaie ere, badituzte aukerak oraindik postu bat aurreratzeko. Amildegiak gertuen dirudienean, gauak sakonen eta beltzen dirudienean, oraintxe atxiki behar zaio tinko fedeari, gerlari arima agertu eta jo ta su borrokatu erreakzioa jomuga. Lau neurketa, hamabi puntu, amets bat. Endikagatik.

Elgoibarren elastiko horitxoa Javi delegatuak, Javi eta “Monty” Aitor prestatzaileek eta Saralegi, Telleria, Alonso, Etxeberria, Gil, Murgi, Ekhi, Lander, Loitzun, Txiki, Otxoa eta Endika jokalariek defendatu zuten.

2012-03-25

Laskorain 4 - 4 Kirol Sport


Neurketa zaila zuen pasa den asteburuan Laskorainek sailkapeneko goi goian dabilen Kirol Sport talde nafarraren aurka. Esperientzia zabaleko entrenatzailearen gidaritzapean denboraldia pasa ahala maila hobetzen joan den taldea bolada bikainean iritsi zen Tolosara.

Ikastolakoek alderantzizko egoera dute sailkapenean eta hiru puntuei etxean eusteak garrantzi izugarria zuen. Xabi Diez eta Asier Etxeberria duo dinamikoaren baja zuen Laskorainek aste honetan.

Norgehiagoka maldan gora hasi zen etxekoentzat, hutsegite eta zorte txarrak bat egindako bi jokalditan 0-2 aurreratu baitziren nafarrak 5. minuturako. Dena den, gutxi iraungo zuen kanpotarren pozak, taldekide guztien animua berpiztu zuen berdinketa lortu baitzuen Laskorainek Telleriak gidatutako bi estrategia jokalditan Ekhi eta Loitzunen bidez.

Haserako minutu zoro hauen ondotik barealdia iritsi eta atsedenaldira bitartean ez zen markagailua mugitu. Atsedenaldian Javi zigortuaren partez Aitor “Tito” Garciaren aginduak barneratu eta bigarren zatiari bikain ekin zion taldeak. Horrela, defentsa lanean lapurtutako baloi baten ondoren egindako kontraerasoan horitxoak aurretik ipini zituen Jonikok.

Markagailuari buelta eman ostean ordea, nafarrak jokoan nagusitzen hasi eta pixkanaka Endikaren atera gerturatzen hasi ziren. Geldikako jokaldi batean lehendabizi eta kontraeraso batean ondoren lortutako golekin berriz ere aurretik ipini zen Kirol Sport.

Minutu gutxi batzuk geratu arren, hainbeste gora behera izandako norgehiagokak emozioz betetako amaiera merezi zuen eta horrelaxe izan zen. Bi minuturen faltan Loitzunek bere arratsaldeko bigarren gola egin zuen partidua berdinduz eta Gilek 6 segundoren faltan egindako jaurtiketa itzelak zutoinarekin topo egin ez balu hiru puntuak etxean geratuko ziren.

Azkenean, talde bakoitzaren fruitua 4 goletakoa izan zen eta puntu bakarrarekin konformatu behar izan zuten Javi delegatuak, Aitor entrenatzaileak, Endika, Telleria, Gil, Murgi, Lander, Joniko, Ekhi, Belloso, eta Alonso jokalariek. 

2012-03-19

Laskorainek 5-0 galdu zuen Zierbenaren aurka

Joan den astean atsedenaldi jardunaldi batez gozatu ondoren, larunbatean berriro ipini zen martxan areto futbolaren 2B maila eta aspaldian gertatzen ari den legez beste kolpe gogor batekin talkatu zuen tolosako Laskorain ligako azken txapelduna dugun Zierbena boteretsuaren etxera bisita egin ondoren. 5-0-eko emaitza zabalegia izan arren, arerio on baten aurrean makurtu behar izan zuten Javiren mutilek eta datozen jardunaldiei buruz-buru ekitea egokitzen da orain gelditzen diren asteetan.

Aipatu bezela elektronikoak isladatzen duen azken emaitza gogorregi bezela azaltzen da bi taldeek eginiko merituei erreparatu ezkero, izan ere horitxoak lehiakor agertu bait ziren neurketa osoan zehar eta bizkaitarrak estu hartzea ere lortu zuten minutu luzeetan zehar. Lehen zatia oso parekatua izan arren, 1-0-ekoa etxekoen aldera jausi zen tolosarrek defentsan eginiko lan bikaina lehen aldiz gaindituaz.

Bigarren erdian Javiren mutilek berean jarraitu eta eskuzabaltasunez lanean aritu eta gero une batzuetan Zierbenaren ikusmena lausotzea ere lortu zuten, dena den Murphy-ren legeak ez zuen bere txanda pasatzen utzi eta jokaldi eztabaidagarri batean 2-0-ekoa sartu zuten bizkaitarrek. Segidan etorri zen hirugarrena eta gero atezain jokalariaren taktikak fruiturik ematerik ez eta 5-0-eko azken emaitzarekin jo zuen amaierako txirrinak. Argi dago zorteak ere ez duela ikastolakoen etxean oparirik utzi  oraindik aurtengo denboraldian.

Datorren astean Kirol Sport hirugarren sailkatua jasoko du Laskorainek Usabalen  zaila bezain zirraragarria izango den neurketa batean, taldea bizitzen ari den une gogorrak direla eta, zaletuen babesa behar-beharrezkoa izango da hemendik amaierararte gelditzen diren jardunaldi urrietan. Mailari eusteko aukerak guztiz solidoak dira oraindik eta taldeak ez du bere azken hitza esateko asmorik erakutsi.    
Larunbatean Zierbenan Javi delegatua, Alonso “coach-manager”-a, Javi entrenatzailea, Endika atezaina, Telleria, Gil, Lander, Ekhi, Alonso, Belloso, Etxebe, Murgi, Loitzun eta Aratz izan ziren beste behingoz Laskorainen izen ona defendatu zutenak.

2012-03-05

Laskorainek ez zuen aukerarik izan Pinseque liderraren aurka eta 4-8 galdu zuen

Ebrosalarekin batera sailkapenaren buru den Pinsequeren bisita jaso zuen Laskorainek joan den larunbatean. Erronkaren zailtasunaren jakitun, horitxoek bi argudio errepikatzen zituzten itxaropena suspertu nahirik: “Ebrosalak berdinketarekin konformatu behar izan zuen Usabalen” eta “lehen itzulian Pinsequen garaile irten ginen”. Argudio eta itxaropen hauek ordea ez zuten oraingoan gehiegi iraun eta 4-8 erori ziren ikastolakoak.

Lehiaketaren fase aurreratu honetan argi dago jada txapelketa Aragoiko bi talde hauen artean erabakiko dela eta Tolosan ikusitakoaren arabera Zaragoza hiriburura baino hogei minutatara kokatzen den Pinsequera joan daiteke txapela, Ebrosalakoekin alderatuta askoz itxura sendoagoa eta ahaltsuagoa eman baitzuten pinsequetarrek.

Teknika eta fisiko bikaineko jokalariz hornituak baloiarekin bikain agertu ziren nola joko posizionalean nola estratejian, baina are eta bikainagoa izan zen baloirik gabe emaniko erakustaldia. Defentsa oso aurrean, ia kantxa guztian presionatu zituzten horitxoak maisutasunez, baloiaren jabetza eta joko ekimena argi eta garbi monopolizatuaz.

Tolosarrentzat beraz sufrimentu handiko arratsaldea bihurtu zen –sekula ez da gustoko platerra hain nabarmen gainditua izatea-, baina ezin zaie ezertxo ere leporatu eta tokatzen zitzaiena bete zutela aitortu behar da: amore ez eman, lanean eskuzabal jarraitu eta azken uneraino saiatu, modu batera ez bada bestera.

Neurketaren kontakizuna labur egin daiteke: kolore bakarreko lehen zatia, azken segunduan jasotako gol baten ondorioz 0-3 aldageletara, Villanuevak zozketatutako ardo sortak ere gozatu ez zuen atsedenaldi mikatza eta gol askoko bigarren zatia horitxoek atezain jokalari atera ostean. Azpimarratu hori bai golegile laskoraindarrak Gil eta Murgi, Murgi eta Gil izan zirela, bina golekin bakoitza.

Laskoraindarrak azken aurren jarraitzen dute sailkapenean eta postu bat aurreratu beharra daukate nola edo hala. Zazpi jardunaldi gelditzen dira horretarako, zazpi jardunaldi buru-belarri zain eta muin egiteko lan azkeneraino.

Usabalen sufritzaile izan ziren Javi delegatua, Javi, Aitor eta Jorge prestatzaile troika eta Endika, Telleria, Murgi, Loitzun, Lander –haserako bostekoa-, Gil, Joniko, Etxebe, Ekhi, Txiki eta Aratz jokalariak.

2012-02-27

Laskorainek 2-1 galdu zuen Labastida-Atenearen etxean.


Urteak joan eta urteak etorri, ligako partidarik zailenetakoa izaten da Tolosaldeako kirol talde guztientzat inauterien ondorengo norgehiagoka, eta estatistika horiei arrazoia emanaz esku hutsik bueltatu zen ikastolako taldea Arabara egindako txangotik.

Tolosarron egunerokoan parentesia izaten den aste zoroaren ondoren entrenatzeko ia betarik gabe egin behar izan zuten Gasteizerako bidaia Javik gidatutako mutilek. Labastida-Atenea, sailkapeneko postu erosoetan kokatuta egonik, aurkariaren erlaxazio ttiki hori aprobetxatzeko asmotan joan zen puntu premia larrian dagoen talde horitxoa.

Dena den, Titanic, Vasconia secret eta txaranga doinuak laster asko ahaztu zitzaizkien horitxoei 40. segundorako aurreratu baitzen talde Arabarra. Jokaldi zoro baten aldaratzean, Endikaren atea zulatu baitzuen aurkariak areaz kanpoko jaurtiketa batekin.

Markagailuan atzetik izanagatik ordea, Laskorainek ez zuen bururik galdu. Defentsan lanean serio ihardun zuen eta erasoan Murgiren aldrebeskeriak baliatuz Labastida-Atenearen atea estutu zuten. Honela, Iñigok berak aurkari bati izkin egin ostean burututako jaurtiketak Gasteiztarren atea zulatu zuen atsedenaldira banako berdinketarekin iritsiz.

Bigarren zatiaren hasieran ikastolakoak gogotsu ekin zioten lanari eta aukera politak izan zituzten baina aurkarien atezainak bata bestearen atzetik ezereztatu zituen. Bi atezainak protagonista izan ziren 40 minutuetan, euren geldiketekin partidako onenak izan baitziren.

Minutuen aurrera egin ahala ordea, ikastolakoei nekeak erasan zien eta erasoan izandako baloi galera baten ostean etxekoan aurreratu ziren kontraerasoa bikain errematatuz. Gasteiztarren bigarren gola zama handiegia izan zen Laskorainentzat eta atezain jokalaria erabili arren ezin izan zuen punturik eskuratu.

Azkenaldian defentsan izandako hobekuntzak erasoan ere bere fruituak emango dituen itxaropenez bueltatu ziren Gasteiztik Javi delegatua, Aitor eta Javi entrenatzaileak, Endika, Beñat, Gil, Murgi, Joniko, Ekhi, Asier, Xabi, Txiki, Lander eta Aratz jokalariak.