2013-12-16

Laskorainen garaipen bikaina Urretxun (2-5)

Igande goizeko lehenengo eguzki izpiekin batera esnatu ziren Aitorren mutilak helburu nagusi batekin, hiru puntuak Tolosara ekartzea, eta honek larunbat gaueko dantzaldiak albo batera uzteak esan nahi badu, bi aldiz pentsatu gabe egingo zutela erakutsi zuten gure mutilek.

Urretxuko polikiroldegiko aldageletan, entrenatzaile horitxoak argi utzi zuen, beraien aurrean talde gogor bat izango zutela, baita kalitate handiko jokalariak ere.
Baina tolosarrak ez zirela horren aurrean kikilduko argi zegoen.

Haserako minutuetatik bi taldeek errespetu handiz jolasten ari ziren bere arerioaren aurka, baloia alde batera eta bestera mugituaz, baina Laskorainen ateko sake baten ondoren, Gil kapitainak ederki sareratu zuen arratsaldeko lehen gola taldeko jokaldi polit baten ostean. Horrela bukatu zen lehen zatia Urretxun.

Bigarren zatian Gilek berriro ere sareratze bikaina lortu zuen area barnean eta, jokaldi horren ostean, etxeko taldeko atezaina kaleratua izan zen, bere taldea jokalari bat gutxiagorekin utziaz. Horitxoek ez zituzten minutu baliotsu horiek ondo aprobetxatu baina beranduxeago Zumeta loti ederrak 0-3koa ipini zuen markagailuan. Urretxuarrak ondoren beraien arratsaldeko lehen gola lortu zuten kontraeraso batetan.


Partidua erotzen hasia zen eta berriro ere Zumetaren sareratzeari, urretxuarrek beraien erantzuna eman zioten. Azkenik, eta lasaitasunaren gola, Etxebe monje tibetarrak egin zuen laskoraindarren lasaitasunarentzat.

Ezin dugu bukatu Endika atezainak egindako izugarrizko partidua aipatu gabe, ziurrenik bere geldiketengatik ez balitz partidua guztiz ezberdina bilakatuko zen.

Urretxun igandean, Aitor entrenatzailea, Javi delegatua-Endika, Frodo, Gil, Lakun, Zumeta-haserako bostekoa-Etxebe, Joniko, Murgi, Josu, Manso eta Aratz.
Arkaitz baja izan zen.

2013-12-09

Berdinketa Laskorain eta Sasikoa taldeen arteko partidan (2-2)

Durangoko Sasikoa taldearen aurka jokatzea egokitu zitzaion larunbat arratsaldean Laskorain taldeari. Bizkaitarrak lider postua defendatzeko asmoarekin bidaiatu zuten, berdinketa baliotsu batekin itzuli zirelarik.

Goiko postuetan jarraitzeko hiru puntuak beharrezkoak zirela eta, partidaren bila joateko asmoarekin kantxaratu ziren horitxoak. Hasieratik intentsitatea eman nahi izan zien partiduari, baina bizkaitarrek egindako defentsa onak ezerezean utzi zituen etxeko taldearen ahaleginak, baloia Laskorainek zuen baina liderra zen aukera garbienak sortzen zituena.

Honela, arriskurik ez zegoela ematen zuen alboko sake batetan 0-1ekoa sartzea lortu zuen Sasikoa taldeak. Maldan gora jarri zitzaion beste behin partidua talde horitxoari eta ez zen gai izan erreakzionatzeko bigarren zatira arte.

Atsedenaldia ongi etorri zitzaien Aitorren mutilei, aldageletan egindako zuzenketek bere fruitua eman zuten, eta bigarren zati hasieratik arriskua sortzea lortu zuen liderraren ate inguruan. Partidua joan etorri batean bilakatu zen eta hauetako jokaldi batetan, Joniko ate aurrean geratzera zihoala falta bat jaso eta kanpotarren jokalari bat kaleratzea lortu zuen. Honela, bi minutuz jokalari bat gehiagorekin jokatzeko aukera izan zuen Laskorainek. Aukera ugari huts egin zituen egoera honetan, baina bi minutuak bukatzear zeudela Murgi arkakuso atomikoak berdinketaren gola egin zuen hamar metrotako jaurtiketa batekin.

Gol honen ondoren ikusi ziren Laskorainen momenturik hoberenak, eta estrategiako jokaldi batetan, Lakun kartel pegatzaile profesionalak, urrunetik egindako jaurtiketa bortitz batekin eskuadrako armiarma sareak kendu zituen 2-1ekoa ezarriz. Bi minutu falta ziren eta durangotarrek atezain jokalariarekin saiatu ziren, Laskorainek ongi defendatu zuen, baina etxekoentzat aldekoa zen alboko sake batetan baloia galdu eta ezin hobeto egindako kontraeraso batetan bigarren gola sartzea lortu zuen talde bisitariak, amaierako 2-2ko emaitza utziaz.

Lanean jarraitzeko gogoarekin atera ziren Usabal kiroldegitik Aitor eta Javi prestatzaileak, Endika, Gil, Murgi, Lakun eta Zumeta titularrak, Iker, Alonso, Etxebe, Mendi, Manso, Josu eta Joniko jokalariak.

2013-11-26

Garaipen garrantzitsua Laskorainek (2-5)

Azken bi asteetako porrot mingarriak alde batera utzi eta jokoan zeuden 3 puntuak lortzeko intentzioarekin egin zuen Aitorren taldeak bidaia Santurtzira sailkapeneko posizio erosoan aurkitzen den San Jorge taldea bisitatuz.

Laskoraini interesatzen ez zitzaion joan etorriko jokaldiekin hasi zen partidua, etxeko taldea intentsitate handiarekin atera zen eta horitxoen lehen minutuetako kontzentrazio faltaz baliatuz, hegaletik hasitako jokaldi batetan baloia ondo mugituaz markagailuan aurreratzea lortu zuen. Aitorren mutilek ez zuten partiduan sartzea lortzen, aukera batzuk sortzen zituen baina bizkaitarrak ziren partiduaren jabe. Andoni Zumetak, jasotako kolpe baten ondorioz kantxa utzi behar izan zuen tolosarren urduritasuna areagotuz, baina kolpea ezerezean geratu zela ikustean berdinketaren golaren bila jarraitu zuen taldeak.
Jokoak modu berean jarraitu zuen minutu luzeetan zehar, eta honela, San Jorge-ren beste jokaldi on baten ostean, jokalari bat Aratz “Iruñako David Guetta”-ren aurrean bakarrik geratu eta ixkin eginez markagailuan 2-0koa jarri zuen. Bazirudien emaitza honekin joango zirela laskoraindarrak aldageletara baina 3 segundu falta zirela Etxebek aldaratze batean 2 eta 1koa egin zuen, etxeko taldean urduritasuna sortuaz.
Atsedenaldian izandako hizketaldiak bere fruituak eman zituen eta bigarren zatiaren hasiera erabat ezberdina izan zen, horitxoek euren kasta atera zuten eta lehen 5 minutuetan markagailuari buelta ematea lortu zuten 2 eta 3koa ezarriz. Laskoraindarren 2.gola Lakun berlindarrak egin zuen 2 arerio ederki saihestuz eta ateazain aurrean ondo baino hobeto bukatuaz. Hirugarren gola Andonik gauzatu zuen, Manso eta Etxeberen kontraeraso bikain baten ondoren bigarren postean baloia bultzatuaz.

Laskorain taldea partidua kontrolatzen hasi zen, eta etxeko taldea erasoan ari zen jokaldi batetan, arratsaldeko protagonista bihurtu zen Etxebe “Catanha-k” baloia lapurtu eta 2-4 koa sareratu zuen ateazainaren aurrean maisuki bukatuaz. San Jorgek, zirt edo zart egitekotan atezain jokalaria kantxaratu eta arriskua sortzea lortu zuen, baina 2 minutu falta zirela jokalari batek bigarren zutoinera zijoan baloi bat eskuz jo eta bigarren txartel horia ikusiaz bere taldea jokalari bat gutxiagorekin utzi zuen. Jokalari bat gehiagorekin horitxoak arratsaldeko beraien bostgarren gola egin zuten Gil kapitainaren bitartez, markagailuan 2-5eko azken emaitza utziaz. Garaipen honen ostean sailkapeneko 5. postuan kokatzen dira Laskoraindarrak liderratik 2 puntura.

Larunbatean Santurtzin, Aratz, Alonso, Gil, Murgi, Zumeta –haserako bostekoa- Endika, Balerdi, Etxebe, Lakun, Manso eta Josu jokalariak, Aitor entrenatzailea eta Javi delegatua egon ziren.

2013-11-19

Bigarren porrota jarraian Laskorain taldearentzat (4-5)

Lehengo asteko porrota ahazteko asmoz kantxaratu ziren horitxoak Usabal kiroldegira larunbat arratsaldean. Bertan, Lasarteko Aldaz talde gogorra gainditzea suertatzen zitzaion etxeko taldeari eta ez zuen  lider jartzeko aukera paregabea pasatzen utzi nahi.

Hori dela eta, gogotsu ekin zioten norgehiagokari Aitor Garcia “paparazzi”-ren mutilek eta berehala eman zuen fruitua astean zehar landutako estrategiak, izan ere ongi diseinatutako jokaldi baten ostean iritsi zen partiduko lehen gola. Etxebek bikain ateratako falta bati amaiera paregabea eman zion Andonik, baloia sare barrura bidaliz.
Ohikoa den bezala, denboraldi txukuna egiten ari den talde lasartearra ez zen kikildu eta kontraeraso batean markagailuan berdinketa ipintzea lortu zuen. Hala ere, atsedenaldirako minutu pare bat geratzen zirenean Zumetak hain gustuko duen bigarren zutoinean arratsaldeko bigarren gola sartu zuen eta honela joan ziren protagonistak aldageletara.

Bigarren zatia hasi bezain laster, Murgi eta Gil kapitainaren jokaldi ezinhobe bati bukaera dotorea eman zion azken honek eta bi golera handitu zen aldea etxeko taldearentzat; baina aurtengo denboraldian tolosarrek partiduak erabakita uzteko erakusten ari diren ezintasuna agerian utziz, partidua amaierara arte ez zela erabakiko argi zuten Usabalera gerturatu ziren tifosi horitxoak. Horrela izan zen, izan ere 12 minutu faltan kanpoko taldeak bigarren gola sartu zuen kontraeraso azkar batean.
Hala ere, laskoraindarrak ez ziren atzean geratu eta Etxebe “Hermano mayor”-ek burututako jokaldi apart baten ostean, larunbat gauetan bezain generoso egon zen,  Andoniri hat-trick-a oparituaz.

Baina ondoren, arratsaldeko minutu tragikoenak iritsi eta zaleen uste okerrenak suertatu ziren. Lehenbizi,talde bisitariaren hirugarren gola iritsi zen jokaldi nahasi batean eta  segidan atezain-jokalariarekin berdinketako gola lortuko zuten bi minuturen faltan. Hau ikusita, entrenatzaile horitxoak atezain-jokalaria ateratzea erabaki zuen eta lehenengo erasoaldian galdutako baloi baten ostean 4 eta 5-ekoa iritsi zen. Honela, bigarren porrota jarraian iritsi zen etxekoentzat eta denboraldi hasierako dinamika onari amaiera eman zitzaion.
Larunbatean, Endika, Aratz, Alonso, Gil, Murgi, Etxebe, Josu “Miri”, Lakun, Arkaitz, Joniko eta Andoni jokalariak, Aitor entrenatzailea eta Javi delegatua egon ziren Usabalen. Hemendik, eta elkartearen izenean, azken honi zoriondu nahi zaio, atzo bere urtebetetzea izan baitzen.

2013-11-11

Esku hutsik itzuli zen Laskorain Mons kiroldegitik (4-3)

Etxetik kanpo jokatu beharreko urteko kantxarik zailenetako batean jokatzea egokitu zitzaion talde horitxoari eta ezin izan zuen punturik eskuratu. Inter Intxaurrondok partidu txukuna egin ostean merezimenduzko garaipena lortu zuen.

Oso parekatsua hasi zen norgehiagoka, bi taldeek izan zuten baloiaren jabetza, erasoaldi oank sortuaz. Hauetako bat aprobetxatuz, Laskorainek arratsaldeko lehen gola sareratu zuen. Atzetik hasitako jokaldi batean, baloia Jonikoren oinetara iritsi, aurkako aldean Lakun bakarrik zegoela ikusi eta pase ona eman ostean, honek urrutiko jaurtiketa gogor batekin etxeko taldearen atea zulatu zuen.

Talde horitxoa partiduaren jabe egingo zela zirudien, baina Inter ez zen kikildu eta alboko sake batean hasi zen jokaldian, eta urrutiko beste jaurtiketa batekin, banakoa jarri zuen markagailuan.

Gol honek etxeko taldea animoz bete zuen eta honela baloia azkar mugitutako jokaldi batean lehenengo eta kontraerasoko beste batean bi gol eginaz, 3-1 aurretik jartzea lortu zuen. Beraz, maldan gora jarri zitzaion partidua Laskoraini, baina atsedenaldiaren aurretik, aurkariaren ate inguruan presio on bat eginda, Arkaitz "break dancer"-ak baloia bikain lapurtu eta Zumeta "loving you"-ri pasea eman ondoren, atezainaren aurrean bakarrik utzi zuen. Honek, atezaina gainditu eta 3-2koa igo zuen.

Atsedenaldia eta gero tolosarrek partiduaren bila joateko asmoarekin atera eta aurkariaren kantxa aldean eginiko presioarekin horitxoen minuturik hoberenak ikusi ziren. Baina defentsan aldentzea lortu ez zuen baloi bat aprobetxatuz, Interrek bere laugarren gola lortu zuen.

Denbora aurrera zihoan eta markagailuak bere horretan jarraitzen zuen. Laskorainek arrisku handirik sortzen ez zuela ikusirik, larunbat gauean aluminiozko takoekin atera zen Aitor entrenatzaileak, atezain jokalaria ateratzeko erabakia hartu zuen bost minutu faltan. Honela, taldeak bikain mugitutako jokaldi batean, aldea murriztea lortu zuen berriro Zumetaren eskutik.

Nahiz eta erasoan jarraitu, etxeko taldeak lan ona egin zuen defentsan eta ez zuen arrisku handirik pairatu azken segundurarte. Partidua amaitzen ari zela, hamar metroko jaurtiketa abagunea izan zuten tolosarrek, baina ez zuten asmatu eta 4-3ko azken emaitzarekin amaitu zen partidua.

Larunbat arratsaldean Donostian, Javi delegatua, Aitor entrenatzailea, Endika, Alonso, Murgi, GIl -haserako bostekoa-, Aratz, Beñat, etxebe, Manso, Lakun, arkaitz eta Joniko izan ziren protagonistak.

Beste garaipen garrantzitsu bat laskoraindarrentzat (6-2)

Aste honetan zubia zegoenez, ostiralean izan zen Laskorain eta Uxoa FS taldeen arteko partidua. Tolosarren helburu nagusia, beraien lidergoa defendatzeaz gain, hiru puntuak etxean geratzea zen. Baina horretarako talde gogorra zuten aurrean, iazko sasoian Euskal Ligatik igotako boteretsuenetako bat, Uxoa arabarra.

Arratsaldeko lehen gola Etxebek sartu zuen area barnean jasotako errebote baten ostean. Joko polita erakusten ari ziren etxekoak eta horren erakusgarri garbia izan ziren Gilek sartutako ondorengo bi golak.

Kanpotarrak, ordea, ez ziren kikildu eta, atsedenaldira iritsi baina lehen, beraien lehen gola egin zuten.

Bigarren zatia ederki hasi zen berriro ere horitxoentzat, Mansoren bitartez laugarren gola egin baitzuten. Arabarren erantzuna, berriz, azkarra izan zen eta konturatzerako 4-2koa igo zuten markagailuan.

Orduan bizi izan ziren arratsaldeko momenturik zailenak tolosarrentzat, baina Manso, berriro ere, eta Lakun "Maritxu"-ren bi golen bitartez, azken emaitza izango zen 6-2koa eta lasaitasuna ezarri zituzten Usabalgo kiroldegian.

Ostiral goizez, Aitor eta Javi entrenatzaileak, Javi delegatua, Aratz, Etxebe, Gil, Beñat eta Joniko -haserako bostekoa-, Lakun, Josu, Manso, Zumeta, Endi eta Michael "Mendi" Jacksonek sendotu zuten lidertza.

2013-10-28

Puntu baliotsu eta garrantzitsua lortu zuen Laskorainek Bilbora egindako bidaian

Ez ohiko jardunaldi baten aurrean aurkitu zen Laskorain taldea joan den larunbatean, Manchesterreko bidaia, lesioak eta beste konpromezu batzuk zirela eta, Endika eta Aratz atezainak eta Gil, Josu, Arkaitz, Joniko eta Zumeta baja izan baitziren. Aitorrek atezain batekin eta sei jokalarirekin bakarrik egin behar izan zion aurre partiduari, eta bere Ancelotti osabak  Bartzelonaren aurka bezala, defentsan oinarritutako partidu bat planteatu zuen.

Hasieratik Bilbo taldearena izan zen baloiaren jabetza, kalitatez beteriko jende gazteaz osatuta dagoen taldeak etengabe egiten zituen erasoaldiak, baina Laskoraindarrak ez ziren kokildu eta defentsa sendo batekin eta kontraerasoekin arriskua eraman zuten aurkariaren ate ingurura, atsedenaldira golik gabeko berdinketarekin iritisi zirelarik.

Bigarren zatia ildo beretik hasi zen, Bilbok baloia bikain mugituaz eta aukerak sortzen, baina Laskorain izan zen aurkariaren atea zulatzea lortu zuen lehen taldea. Lakunek bere arerioa atzean bikain utzi ostean, baloia Etxeberi eman zion, eta honek bigarren zutoinera bere ohizko abiadura bortitzarekin Alonso iritsiko zela ikustean, pasea eman eta honek kalitatez definituaz 0-1-ekoa igo zuen markagailura.

Bilbok erasoan jarraitu zuen eta nekeak eraginda, Laskorainek baloia mugitzerakoan egindako bi hutsen ostean markagailuari buelta ematea lortu zuen. Partidua maldan gora jarri zitzaien horitxoei, 3 minutu bakarrik falta baitziren, baina beste behin, aurten erakusten ari den kasta hori atera zuten eta atezain jokalariakien egindako jokaldi batean BalerdiMedel”-ek orpoarekin egindako jaurtiketa batekin arratsaldeko azken gola lortu zuen 2-2ko emaitza utziaz.

Aipatu behar taldeko bi Ikerrek egindako lan bikaina, Saralegi atezaina alde batetik, meritu eta garrantzi handiko geldiketak egin baitzituen, eta Manso beste aldetik, partidu oso on batekin, momentu batzuetan Robinho brasildarra bailitzan magiaz beteriko jokaldiak oparitu baitzizkien “La Casilla” kiroldegira urbildutako zalegoei.

Larunbat arratsaldean Bilbon, Javi eta Aitorren batutapean, Iker (tronboia), Beñat (bonboa), Etxebe (tronpeta), Murgi (saxofoia) eta Manso (klarinetea) –haserako bostekoa-, Alonso (txapak) eta Lakuntza (bombardinoa). Harrobiari dagokionez, Santxoren taldeak 3-3 berdindu zuen Euskal ligan egiten ari den hasiera txukunari  jarraipena emanez.

2013-10-21

Laskorainek bere 4. garaipena lortu zuen jarraiean (6-3)

Elorrion garaipena lortu eta 3 puntuak poltsikoratu eta gero, Aitorren mutilak gogotsu jaso zuten zarauztar taldea Tolosako Usabal kiroldegian pasa den larunbatean.
Badirudi laskoraindarrek ligako lehen partidua jolastu eta sekulako kolpea jaso eta gero, edozeinek esango luke "Fenix hegaztia" delakoaren moduan bere errautsetatik berriro jaiotako talde batean bihurtu dela.


Etxeberen bitartez etorri zen arratsaldeko lehen gola tolosarrentzat baina kostakoak ez ziren kikildu eta 1-1koa jarri zuten markagailuan urrutiko jaurtiketa baten ondoren.
Orduan etorri zen ziurrenik larunbatean ikusi genuen golik ikusgarriena, jokaldi polit baten ostean, Gil kapitainak Iker "Muniain"-en pase bat jaso eta zarauztarren ateko armiarma sare guztiak kendu zituen sekulako jaurtiketa bat eginez 10 metrotatik.
Atsadenaldia iritsi baino lehenago Zumetak egin zuen hirugarren gola Laskorainentzat.


Prestatzaile teknikoen hitzaldien ondoren hasi zen bigarren zatia Usabal kiroldegian, eta falta baten medioz zarauztarrek beraien bigarren gola egin zuten, baina Iker "Muniain"-en bitartez horitxoek beraien laugarren gola lortu zuten talde osoaren jokaldi polit bat ederki bukatuaz. Etxekoen momentu onenak bizitzen ari ziren Tolosan, eta orduan etorri zen talde guztiak ederki egindako jokaldi batean Zumetaren gola, bere arratsaldeko bigarrena.

Zarauztarrak berriro ere gerturatu egin ziren markagailuan atezain-jokalaria atera eta gero baina horrek ez zituen etxekoak kikildu eta Beñat "Pantxito"-ren bitartez etorri zen arratsaldeko azken gola. 6-3 markagailuan, beste hiru puntu, eta sekulako poza taldekideengan sailkapeneko lidergoa eskuratu bait dute momentuz.

Larunbatean Usabalen, Aitor eta Javi prestatzaile teknikoak, Javi delegatua, Aratz, Zumeta, Beñat, Etxebe eta Josu -haserako bostekoa - Gil, Iker Manso, Murgi, Lakun, eta Iker "gladiadorea". Joniko eta Mendi baja izan ziren.

Filiala, porrot mingarriarekin itzuli zen Galdakaora eginiko bidaitik. Santxoren mutilek 8-1 galdu zuten bertako Lagun Onak taldearen aurka.

2013-10-16

Laskorainek garaipen garrantzitsua lortu zuen Elorrion (2-4)

Aurreko jardunaldian Tolosala taldeari partidu zaila irabazi eta gero Elorriora bidaiatzea egokitu zitzaion Laskoraini. Hiru puntuak lortzea garrantzitsua zen sailkapeneko lehen postuetan kokatzeko, eta taldeak ez zuen huts egin.

Partidua oso parekatsu hasi zen, Elorrioko Buskantza hasieratik intentsitate handia eman zion, eta Laskorain taldeak ohikoa duen zonakako defentsan gogor lan egin behar izan zuen. Honela, Elorrioko erasoan zegoen jokaldi batetan, Gil kapitainaren presio on baten ostean Andoni Zumetak baloia lapurtu eta atezainaren aurrean bikain definituz 0-1-eko emaitza jarri zuen markagailuan.

Ildo beretik jarraitu zuen partiduak, etxeko taldeak erasoko jokaldi onak egiten, eta Laskorain taldea atzean sendo, baina hauetako batean, hiru minutu falta zirela lehen zatia amaitzeko, urrutitik egindako jaurtiketa baten aldaratzean 1-1-ekoa sartu zuen Elorriok.

Golpe gogorra izango zela bazirudien ere, alboko sake batetan, Beñat Balerdik Zumetaren mugimendua bikain ikusi eta pase on baten ostean Zumetak aurretik jarri zuen berriz ere taldea. Atsedenaldira emaitza honekin iritsiko zirela ematen zuen, baina sekula asetzen ez den Andonik, etxeko taldearen atezainak egindako pase bat moztu eta 1-3-koa sartu zuen atezainari iskin egin eta lurrean utzi ostean.

Bigarren zatian gogor hasi zen berriz ere Elorrio, erasoko jokaldi onak eginez paretetaz baliatuaz, baina partidu bikaina egin zuen Aratz atezainarekin topatu ziren behin eta berriz. Bost minutu falta zirela, etxeko taldeak atezain-jokalaria atera zuen, baina Laskorainek bikain defendatu zuen eta berriro ere Gilek baloia lapurtu eta Zumetari pasa ostean, honek arratxaldeko bere laugarren gola sartu zuen zelai erditik egindako jaurtiketa batekin. Ikusgarria mutil honek golak sartzeko duen erraztasuna.

Azken segunduetan Elorriok 2-4-ekoa sartu zuen markagailuan azken emaitza hau utziaz. Lan bikaina Aitorren mutilek egindakoa, etxetik kanpo bigarren garaipena lortu baitute segidan sailkapeneko lehen postuetan kokatuaz.

Igandean Elorrion, Javi delegatua, Aitor eta Javi entrenatzaileak, Aratz, Gil, Josu, Etxebe, Joniko –haserako bostekoa-, Beñat, Manso, Murgi, Lakun, Zumeta eta Koldo ikasle fina izan ziren protagonistak.

2013-10-09

Laskorainek 7-3 irabazi zuen Tolosala-Hirukide taldearen aurka

Aurreko jardunaldian Zaldibarren lortutako garaipen garrantzitsu baten ondoren, Tolosala boteretsua jaso zuen Usabal kiroldegian Laskorain taldeak. Partidua gogor planteatu zuten bi taldeek hasieratik, baina Aitor "Ancelotti" misterrak eta Javi "Zidane" laguntzaileak argi zuten partidu honetan hainbestetan emaitza ona eman duen "Laskoraindar Kasta" hori atera beharra zegoela. Hortxe azaldu zen Gil "Pikolin" kapitaina, arratsaldeko bi lehenengo golak eginez.

Tolosalak bere jokua egiten saiatu zen eta bere taldean protagonista nagusiena bilakatu zen Jon Aranburuk 2-1 ekoa egin zuen. Laskoraindarrak ez ziren gailendu, eta Arkaitz  "elektrizista katxarero"-aren bitartez, arratsaldeko golik politenetarikoa ikusi genuen etxeko taldearentzat.

Epaileek ere nabarmendu nahi zutelakoan ziruditen, eta konturatzerako, Etxebe "koordinadorea"-ri bigarren txartel horia atera zioten, oraindik inorrek sinistu ezin duen jokaldi batetan, taldea jokalari bat gutxiagorekin utziaz.

Tolosalak bi minutu izan zituen markagailuan gol bat egiteko jokalari bat gehiagorekin, baina "Laskoraindar kasta" ateratzeko unea zen,  eta arratsaldeko protagonista  nagusienak, Beñat "juanito-pantxito"-k defentsa guztia bizkarrera botatzen duenean, oso zaila izaten da edozein zirrikitu aurkitzen.

Atsedenaldiaren bueltan etxeko taldearen momentu onenak bizitzen ari ziren Usabalen, eta horrela Jonikok, berari horrenbeste atsegin zaizkion kontra batetan, 4-1-ekoa egin zuen.

Tolosalak gogotsu ekin zion bere jokoari eta Jon "Maravillas" Aranbururen bitartez 4-3-ra gerturatu ziren markagailuan. Baina berriro ere epaileak azaldu ziren, eta Tolosalako Guillermo "Toulalan" jokalariari bigarren txartel horia atera zioten, bere taldea jokalari bat gutxiagorekin utziaz. Laskorainek bere bi minutuak ondo aprobetxatu zituen eta Gil "Pikolin"-ek bere arratsaldeko hirugarrena egin zuen 5-3-koa ipiniaz.

Etxeko taldea, partiduaren jaun eta jabe bilakatu zen eta horrela beste bi gol gehiago sartu zituen Murgi "Txintxe" eta Zumeta "Latin Lover"-en bitartez, hiru puntuak etxean lotuaz.

Larunbatean Usabalen, Javi delegatua, Aitor eta Javi etrenatzaileak, Aratz, Gil, Murgi, Beñat, Etxebe-hasierako bostekoa-, Alonso,Zumeta, Joniko, Lakun, Mendi eta Iker "Gladiadorea" aritu ziren. Harrobiari dagokionez, Santxoren filialak 5-3 galdu zuen Bakion.

2013-09-30

Laskorainek 1-4 irabazi zuen Mallabiaren aurka

Ordutegiaren aldrebeskeriak direla eta, igandean arratsaldeko bostetan jokatzea egokitu zitzaion Laskoraini aurtengo ligako bigarren jardunaldian, etxetik kanpo eta lurralde bizkaitarrean gainera. Joan den astean Usabalen gol sorta oparoa jaso eta gero, ontzia zuzendu eta lehen garaipena eskuratzeko asmotan igo ziren autobusera Aitorren mutilak aurreko jardunaldian ere porrotean eroritako Mallabiaren aurka indarrak neurtu beharrean.

Belaunaldi aldaketa berria jasaten ari da taldea eta jokalari gazte ugariren egonkortasuna zihurtatzeko ardura garrantzitsua izango du Aitor entrenatzaileak urte osoan zehar. Horrelako buruz-burukoak beti izan ohi dira interesgarriak bakoitzak gaurtik aurrera eta etorkizunera begira eman dezakeen etekinaren azterketa gisa eta jokalariek ez zuten huts egiteko asmorik agertu. Seriotasuna, lana eta adimena ipar izar moduan izanik, aurkariaren gainetik pasa ziren zapalgailu bat bailiran beharrezko bezain garbia izandako garaipen zabal bat eskuratuaz.

Markagailuan aurreratu ziren tolosarrak estrategiako falta batean Murgiren bitartez eta etxekoen berdinketari Alonsok emango zion arrapostua1-2-koarekin amaitu zelarik lehen zatia, itxura onarekin eta atzean sendotasun aparta erakutsiaz, lan bikaina betetzen ari ziren horitxoak Javiren aginduetara zonakako defensa zurrunean.
Bigarren erdian Alonsok aldea areagotu zuen eta azken minutuetan bizkaitarrek atezain jokalariarekin egindako saiakera antzuan Zumetak 1-4-ko azken emaitza itxiko zuen 30 segunduren faltan.
Joan den astean jasotako kolpe gogorrari ezin hobeto erantzuten jakin dute ikastolakoek eta aurtengo lehen 3 puntuak poltsikoan dira dagoeneko piztu liratekeen zalantza guztiak kolpetik uxatu dituen lan bikainari esker.
Datorren jardunaldian Tolosalaren aurka jokatuko du taldeak eskualdeko areto futbolaren festa izango denaren neurketa berri batean, Usabalgo harmailak beste behingoz beteko direnaren esperoan, igandean irekitako bideari jarraipena ematea izango da epe motzerako helburua.
Igandean Zaldibarren Javi delegatua, Javi entrenatzailea, Aratz, Murgi, Gil, Joniko, Alonso, Zumeta, Etxebe, Mendizabal, Balerdi, Manso eta Iker izan ziren garaipenaren protagonista nagusiak. Aratz eta Iker atezainek zati bana jokatu zuten lan txukuna beteaz biek ere.

2013-09-23

Porrot batekin hasi zuen Laskorainek denboraldi berria

Zapatuko arratsalde eguzkitsuan ekin zion Laskorainek 2013-2014 denboraldi berriari. Usabalen jokatu zuten horitxoek aurreneko partida, Billabonako Egintzaren bisita hartu zutelarik, eta gauzak ez ziren batere ondo irten ikastolako mutilentzat. Hiru puntuek bizilagunen zorroan amaitu zuten eta 5-10ko azken emaitza biziki da esanguratsua eta mingarria.

Gauza jakina da konplexua gertatu ohi dela txapelketaren estreinaldia. Expektatiba berrituek erantzunkizuna eta ilusioa ekarri ohi dute, aurrendenboraldiko saio astunen nekeak kezka eta jokalarien arteko rol banaketa berriak urduritasuna eta zalantzak. Osagai guzti hauek nahasten dira debuteko koktel beti ere mikatzean. Imajina norberaren kantxan derbi batekin hasitakoan.

Horitxoek gainera partida atariko astea aldrebesa izan zuten, Murgi eta Etxebe ikuituta ezin entrenatu, baina baikortasunari eutsi nahi zioten. Neurketako lehen erdian, nola jokoa nola markagailua orekatuak izan genituen: bisitarien 0-1ekoari Murgik banakoarekin erantzun zion baina azken hondarrean, ia aldagela bidean, errebotez aurreratu ziren berriro Egintzakoak.

Berragerpenean bigarrengoz berdindu zuten partida Aitorren mutilek, Jonikok penaltiz, baina jokaldi honen ostean etorri zen hondamendia. Zorigaiztoko lau minututan billabonatarrak 2-6 ipini ziren, atezain jokalaria atera beste erremediorik ez zelarik gelditu. Honelaxe erori ziren gainerako gol guztiak, 5-10eraino, etxekoenak Jonikok beste bat eta Zumetak bi sinatu zituztelarik.

Porrota porrot, txapelketa jaio besterik ez da egin eta 27 jardunaldi daude aitzinean parez pare. Arreta osoa bertan ipini beharko dute tolosarrek, asteburu honetako jardunalditik hasita. Bizkaiara bidaiatuko dute, Mallabia nekazal herri ttipira eta samurra izango ez bada ere, puntuak poltsikeratzeak izan behar du jomuga.

Usabalen oso mikatza egin zitzaien txapelketa debuteko koktela Javi delegatuari, Aitor entrenatzaileari eta Aratz, Alonso, Gil, Josu, Zumeta –haserako bostekoa-, Lakun, Murgi, Joniko, Manso, Balerdi, Etxebe eta Endika jokalariei. Azken honek sorbaldan min hartuta erretiratu behar izan zuen, baina zorionez ez du garrantziko ezer.

2013-09-19

Denboraldi berrirako prest da Laskorain K. E.

Hilabete pasatxoko entrenamendu gogorren ostean, larunbat arratsaldean Usabal kiroldegian jokatuko duen norgehiagokarekin ekingo dio denboraldi berriari Laskorainek. Azken urteotan ohikoa den derby bat errepikatuko dute ikastolako taldeak eta Billabonako Egintzak arratsaldeko 4tan.

Aurretik baina, lehiaketaren erritmoa hartzen joateko izan du aukerarik beste urtebetez Aitorren gidaritzapean jarraituko duen taldeak. Aurre-denboraldiko lehen partidan Tolosako Orixeren aurka garaipen argia lortu zuen, 10-0. Prestaketako zitarik zailenean ordea, 2-7 galdu zuen mailaz igo eta fitxaketa bikainak egin dituen Laubururen aurka. Azkenik, maila berean arituko den Zarautzen kontra konfiantza gorenean ipini duen 3-9ko emaitza bikaina lortu zuen talde horitxoak.

Jokalarien artean izan da aldaketarik, Laskoraini urte bikainak eman dizkien Beñat Telleria, Ekhi Zubillaga, Iñigo Belloso eta Lander Camiok taldea utzi dute. Baja hauei europako neskatilak ezagutzera joan den Eñaut Vazquez ikaslea ere gehitu behar zaie. Harrobiko jokalarien etorrera etengabea dugu baina ikastolan eta Aratz, Iker, Beñat Balerdi, Josu, Manso eta Zumeta lehen taldeko jokalari izatera pasatuko dira. Gaztetxo talde honetaz gain Iñigo Lakunza “Lakun” (Plomix) eta Arkaitz Mendizabal “Mendi” (Tolosa CF) jokalariak fitxatzea lortu du taldeak.

Modu honetan, Aitor prestatzailearen esanetara ondorengo mutil kuadrila izango dugu aurtengoan: Endika, Aratz eta Iker; Gil, Beñat Balerdi, Mikel Alonso, Etxebe, Murgi, Josu, Manso, Arkaitz Mendizabal, Iñigo Lakunza, Zumeta eta Joniko.

Larunbatean hasiko den ligako aldaketei dagokionez, Ibarrako bizilagunak eta Santurtziko taldea izan dira igoera lortu eta maila bat gorago arituko direnak. Sestao eta Gernikako Gora izan ziren aldiz, maila eutsi ez ziotenak. 4 talde gutxiago eta horien partez Euskal Ligatik Sasikoa, Elorrioko eta Uxoa igo dira, 3 talde. Beraz, multzoa 15 taldeekin gelditu eta atsedenaldia egongo da bi jardunalditan.

2013-05-21

Infantil mutilak Gipuzkoako txapeldun

Pasa den larunbata goizean, Ibarrako Belabieta kiroldegian, jokatu ziren areto futbol oinarriko mailetako Finalak. Bertan, Laskorain Iksatolako infantil mutilak txapelketa ikusgarri bati ginga jartzearren Eskoriatzeko Arizmendi izan zuten aurkari eta modu ikusgarri batean gailendu zitzaion azken 7-1eko emaitzarekin.

Liga erregularra guztian 2 partida galdu eta bakarra berdinduta, gainontzekoetan egundoko nagusitasuna erakutsi dute horitxoek, 18 jardunaldietan 158 gol (bataz besteko ia 9) eginda eta, hori gutxi balitz, txapelketarako play off-ean, final erdietako bi partidatan The English School-i 20-3ko emaitza orokorra endosatu zion (2-10 Donostian eta 10-1 Usabalen).


Txapeldunen argazkian (Argazkia: Maiorga), ezkerretik eskuinera: Joseba Sagastume, Iñigo Zabala, Sidney Goenaga, Ariane Bujanda (entrenatzailea) eta Beñat Ezenarro (goran). Xanet Egiguren, Mikel Iturrioz, Asier Ayerza eta Jonathan Fernandez (beheran).

Zorionak!!!

2013-05-20

Laskorainek seigarren postuan amaitu du txapelketa azken jardunaldian Buruntzari 7-3 irabazita

Joan den asteburuan amaitu zen 2012/2013 denboraldiko 3. mailako areto futbol txapelketa. Laskorainek Buruntza-Aldaz talde lasartearraren bisita hartu zuen eta ez zuen kinka edo estutasun larriegirik pairatu txapelketako atzeneko hiru puntuak poltsikoratzeko. Horitxoek 7 eta 3 nagusitasunez gainditu zituzten bisitariak.

Garaipen honekin Aitorrek zuzendutako taldeak seigarren postu itxurosoan bukatu du sailkapenean, denboraldi guztian zehar okupatu duen posturik hoberenean hain zuzen, eta hau taldeak izan duen bilakaera egokiaren adierazgarri da ezbairik gabe.

Hastapenean pilatutako arazoei -2.B mailatik jaitsi izanaren kolpea, estraineko emaitza zalantzagarriak, baja garrantzitsuak etabar- ezin hobeto egin die aurre ikastolakoek, gogotik lan eginaz entrenamentuz entrenamentu astea joan astea etorri, eta laskoraindar guztioi amaieran gelditu zaigun aho zapore gustagarria da honen sari.

Aurtengo urteak bestalde jokalari belaunaldi berri bati ongi etorria emateko balio izan du, egoerak baldintzatuta -Lander eta Murgiren baja luzeak, Gil eta Txikiren baja motzagoak- jokalari multzo berri bat txertatu baita nazional mailako plantillan. Harrobiko Aratz, Saralegi, Vazquez, Iturralde, Zumeta, Manso eta Balerdi jokalari gazteek minutu asko izan dituzte kantxa gainean, bikain baliatu dituztelarik.

Honen errudun nagusi, gazteak bezainbeste ala gehiago, jada eskarmentu handia duten beste taldekideen portaera izan da. Iaz 2.B mailan arituak ikusgarria izan da Endika, Telleria, Zubillaga, Alonso, Otxoa eta Etxeberen konpromezu eta adibidea hain erakargarri ez zitzaien 3. mailan. Txalogarria.

Azken partidan ere beterano eta gazteagoen nahasketa  bikaina suertatu zen. Lehen erdian lasartearrak 0-2 eta 2-3 aurreratu arren, horitxoek partidari argi eta garbi eman zieten itzulipurdia Lionel Zumeta izan zelarik protagonista nagusi. Atsedenaldiaren aitzinetik hiru gol sartu zituen, hirunakoa ipiniaz, eta bigarren zatian Otxoa, Gil eta Zubillaga beteranoekin batera gol bat gehiago sinatu zuen behin betiko 7-3 ekarriaz.

Aurtengo lanaren etekin, oparoa behar luke Laskorainen etorkizun hurbilak, eta meritua Javi delegatuarena, Aitor eta Javi prestatzaileena eta Endika, Aratz, Saralegi, Telleria, Alonso, Gil, Lander, Murgi, Txiki, Otxoa, Etxebe, Zubillaga, Vazquez, Iturralde, Manso, Balerdi eta Zumeta jokalariena da.

2013-04-30

Laskorainek 4-5 galdu zuen Inter Ederren aurka

Joan den asteburuan Urretxun garaipen bikaina lortu eta gero, etxean jokatu beharreko beste derbi berri bat egokitzen zitzaion Laskoraini Donostiako Inter Eder Kafetegiaren aurka. Bi taldeak aspaldidaniko ezagunak dira, eta donostiarrek azken urteetan zenbait gorabehera jasan arren, badirudi berriro ere Hirugarren mailan zurruntzeko asmotan direna eta aurtengoan denboraldi txukuna burutzen ari dira sailkapeneko postu erosoetan kokaturik bukatuko duelarik urtea segurtasun osoz.
 
Lehen zati benetan kaxkarra burutu zuten horitxoek bere horretan egon zelarik partidaren gakoa, hankak lurrari itsatsia eta erosotasuna aurkitu ezinik 0-4 aurreratu ziren donostiarrak merezimendu osoz eta neurketa maldan gora jartzeaz gain markagailu iskanbilatsu bat jasotzeko arriskuarekin erretiratu ziren aldageletara Aitorren mutilak.

Bigarren zatia ez zen modu hobean hasi eta kanpotarrek 0-5-eko gola egin bezain pronto Aitor entrenatzaileak fitxak mugitzeko erabakia hartu zuen. Minutu luzeak jokatzeke oraindik eta atezain jokalariaren taktika ipini zuten martxan ikastolakoek. Banan-bana eta emeki-emeki golak erortzen hasi ziren Interrekoen sarean, Telleria, Joniko, Etxebe eta Gilek markagailuaren aldea 4-5-ekoraino murriztu zuten eta berdinketa lortzeko puntuan ere izan genituen tolosarrak baina behar adina zorterik ez eta txirrinak norgehiagokaren amaiera adierazi zien jokalari eta Usabalgo polikiroldegira gerturatutako zaletu guztiei.

Hasieran oparitutako minutu exkax larregiren ondorioz, 0-5-eko partzial astunari buelta ematea ia ezinezkoa da eta bestelako ondoriorik atera nahi izatea bide okerretik eginiko azterketa litzateke. Datorren astean jai izango du taldeak, duela hilabete batzuk bajan emandako Sestaoren aurka jokatzea egokitzen bait zitzaion Laskoraini eta beraz datorren larunbateko 3 puntuak zihurtatuak daude horitxoentzat jokatzeko beharrik gabe.

Larunbatean Usabalen Javi delegatua, Aitor entrenatzailea, Endika, Gil, Etxebe, Josu, Vazquez, Joniko, Telleria, Zumeta, Ekhi eta Aratz izan ziren. Filialari dagokionez Santxoren mutliek 6-5 galdu zuten Legorretako Bilkoinen aurka.  Maiorgaren gazteek behintzat 5-5 berdinketa lortu zuten Billabonan Egintzaren aurka.

2013-04-23

Laskorainek garaipen bikaina lortu zuen Goierriren aurka

Gipuzkoako areto futbolaren klasikoetako bat lehiatu zuten pasa den larunbat arratsean Laskorainek eta Goierrik Urretxuko Aldiri kiroldegian. Sailkapeneko lehen postuetatik urrun samar, denboraldia ahalik eta txukunen amaitzea helburu dute bi taldeek eta inongo presiorik gabe jokatuz ikuskizun polita eskaini zuten.

Ikuskizun horretan zerikusi handia izan zuen etxekoen planteamendu ausartak, norgehiagokak iraun zuen 40 minutuetan kantxa osoko presioa landu baitzuen Goierrik. Laskorainek aldiz, ohikoa duen kantxa erdiko zonakako defentsa erabili zuen.

Defentsa lerroa atzerago izan arren etekin handiagoa atera zion ikastolako taldeak eta lehenengo zatian kontraerasoak bata bestearen atzetik gauzatu zituen. Horrela, kontraeraso bizkorrak probestuz taldea birritan aurreratu zen Etxebe eta Gilen golei esker baina goierritarrek berehala parekatu zuten markagailua bi kasuetan.

Atsedenaldiaren ostean 2nako berdinketatik 2-4kora alde egin zuen Laskorainek Josu eta Etxeberen bi sareratzeei esker. Etxekoen 4-0 eraso sistemak ordea min handia egin zion Laskoraini ondorengo minutuetan eta markagailua berriz ere orekatuta geratu zen 4-4.

Partidako protagonista bilakatu zen Etxebek, bere hirugarren gola egindakoan hautsi zen norgehiagoka. Segidan urretxuarrek atezain jokalaria kantxaratu baitzuten eta Laskorainek partida erabakitzeko aukerak bata bestearen atzetik izan zituen.  Mikel Alonsok 30 metrotik gol ikusgarria lortuta taldea 4-6 aurreratu bazen ere gainontzeko aukera garbietan kamuts ibili ziren horitxoak.

Partidaren hondarrean Goierrik gola eginda markagailua 5-6 estutu zuenean momentu larriak pasa zituen Laskorainek. Dena den, azken minutu ziragarrian Endikaren atea ondo babestu zuen taldeak eta markagailua bere horretan mantendu zuen, 5-6.

3 puntu berrirekin pauso bat aurrera egin du taldeak eta sailkapeneko 6. postuan kokatu da. Denboraldia amaitzeko azken txanpan azken ahalegina egiteko gogotsu itzuli ziren Javi eta Aitor prestatzaileak, Endika, Balerdi, Alonso, Gil, Ekhi, Etxebe, Josu, Vazquez, Zumeta eta Joniko jokalariak.

2013-04-15

Laskorainek 0 eta 4 galdu zuen Usabalen Bilboren aurka

Hemendik txapelketa amaiera bitarteko partidarik gogorrena jokatu zuen Laskorainek aste santutako atsedenaldi osteko jardunaldian. Usabalen bisitari areto futbol bizkaitarreko historiarik arrakastatsuenaren jabe den Bilbo izan zen, sailkapeneko podiumean kokatuta -hirugarren- oraindik txapelaren lehian dagoen taldea, eta horitxoek ezin izan zuten erronkarekin 0-4 galdu zutelarik.

Azken emaitza zorrotz honek besterik dioen arren, neurketa oso orekatua suertatu zen denborarik gehienean. Bigarren zatian markagailua mugitu zen arte bi taldeak parez pare izan genituen: baloi jabetza eta joko ekimena kanpotarrena akaso baina gol aukerak etxekoenak, defentsa sendo bati eta kontraerasoari eskerrak. Horitxoek baina Montorok defizita kalkulatzeko erakusten duen prezisio bera erakutsi zuten azken pase erabakiorra ematerakoan, prezisio eskasa, kamutsa zeharo.

Aipatu bezela partida hutsnakoarekin iritsi zen atsedenaldira eta berragerpeneko lehen minutuetan gauzak ez ziren ia ezer aldatu. Zertxobait beharbada bai, baina hori horitxoak nagusitzen hasi zirela izan zen, gol aukeretaz gain jokoan ere bai, baina zenbaitetan harrigarriak dira kirolaren apetak. Hobe jokatzen ari zirenean eta aldeko korner batean bilbotarren gola iritsi zen balantze defentsiborik ez egiteagatik eta tamalez hementxe egon zen arratsaldeko gakoa.

Jarraipenean horitxoek berdinketaren bila errakzionatu zuten arren, amaierarako bost minuturen faltan, Endika atezainak irrist egin eta lurrera jausi zen zoritxarreko jokaldian 0-2koa iritsi zen. Segidan kantxaratutako etxekoen atezain jokalariak ez zuen ezertarako ere balio izan, azken segunduetan gainera beste bi gol gehiago jaso zituztelarik.

Porrot hau lehenbailehen ahaztu ahal izateko datorren asteburuan Urretxura bidaiatuko dute ikastolakoek. Beste partida erakargarri bezain garrantzitsua izango da sailkapenean beste postu bat irabazi nahi badute. Momentuz eta lau jardunaldiren faltan zazpigarren dira horitxoak.

Usabalen ez zuten batere gustora amaitu Aitor eta Javi entrenatzaileek eta Aratz, Telleria, Gil, Etxebe, Zubillaga, Manso, Otxoa, Iturralde, Alonso eta Endika jokalariek.

2013-03-25

Laskorainek 1-5 menderatu zuen Tolosala taldea

Azken larunbatean Santurtziren aurka etxean galdu eta gero, urtero legez Aste Santuan bi astetako geldialdia egin aurretik eskualdeko derbi interesgarri bat jokatu behar zuen Laskorainek denboraldi bikaina burutzen ari den Tolosalaren aurka. Hirukideko taldea urte aparta egiten ari da eta ohorezko postuek eskeinitako kotoi artean igaro ditu bere egunak lehen jardunalditik gaur arte, inork uka ezin dezakeen merezimendu osoz gainera. Eskolapioetako kantxa ospetsua gotorleku suntsiezin bat bihurtu dela kontutan izanik, ikastolakoek pairatu beharreko erronka ez zen ez ahuntzaren gaur erdiko eztula izango eta errealitate horrengan oinarrituta izan ziren bideratuak Aitor entrenatzailearen hizketaldi eta lan tresneria osoa.

Ikastolakoek dema adimentsua prestatu zuten, taktikoki oso landua, zonakako defensa atzeratu batean oinarrituaz eta kontraerasoen bilaketa garbian. Haserako minutak dena den ez ziren batere errezak izango, Tolosalak gol aukera garden ugari egitea lortu bait zituen baina Endika atezainaren lan apartak markagailua hutsean mantentzeaz gain estrategiako jokaldi batean Gilek 0-1-ekoa eginaz aurreratu  ziren horitxoak.
Bigarren zatian ere gauzak ezin hobeto hasi ziren Zumeta eta Gilek beste behin 0-3-raino zabaldu bait zuten elektronikoa. Hirukidekoek aldea murriztea lortu bai 10 metrotatik, baina Jonikoren erantzunak 1-4-ko berri batekin atsekabetu zituen Tolosalako kideen itxaropen guztiak. Hondarreko segunduetan Telleria Beltxargak bere zelaitik arratsaldeko golik ederrena eginaz 1-5-eko azken emaitza itxi zuen.

Garaipen garbia Aitorren mutilek lortutakoa, hiru puntu garrantzitsu eta orain bi astetako atsedenaldia izango dute denboraldi amaierari ahalik eta bukaera onena ematen saiatu aurretik. Hurrengo arerioa Bilbo CFS laugarren sailkatua izango da, beste norgehiagoka benetan zaila ezbairik gabe, denboraldi bikaina egiten ari diren bizkaitarrak sailkapeneko laugarren postuan bait dira gaur egun. Laskorainen ontzia ere bideratu dela dirudi eta momentuz seigarren postuan dira Javi delegatua, Aitor entrenatzailea, Endika, Telleria, Gil, Joniko, Zumeta, Iturralde, Etxebe, Ekhi, Alonso eta Koldo jokalariak. Harrobiari dagokionez, Santxoren mutilek 4-4 berdindu zuten Aretxabaletan.

2013-03-18

Laskorainek 3-5 galdu zuen Santurtziren aurka

Norgehiagoka zaila zuen ikastolako taldeak pasa den jardunaldian, sailkapeneko 4. postuan kokaturik, denboraldi bikaina egiten ari Santurtziren aurka neurtu baitzituen indarrak. Urte luzeetan Nazional B mailan aritutako esperientziadun jokalariei harrobiko gazteak gehituta talde orekatu bezain arriskutsua osatu dute Nerbioi ezkerraldekoek.

Larunbat arratsaldean jokatutako partidarako Txikiren baja izan zuen Aitor prestatzaileak. Bere lekua, Josu Iturralde gazteak hartu zuen, taldea egiten ari den belaunaldi aldaketaren lekuko garbia. Saralegi jubenilak ere protagonismo berezia izan zuen, lehenengo zatian bera izan baitzen horitxoen atea zaintzearen arduraduna. Lan bikaina egindakoa gainera, bizkaitarren sareratze ahalegin guztiak ekidin baitzituen.
Laskorain ere ez zen aurkariaren ate aurrean batere fin ibili ordea eta lehen 20 minutuak lehiatu ostean markagailuan bere horretan mantendu zen, 0-0.
Gol zaparrada bigarren zatian heldu zen, partidaren intentsitateak eraginda nekeak eragin zituen baloi galerak ederki probestu baitzituzten kanpotarrek. Urruntzen asmatu gabeko baloi bat sareetara zuzenduz aurreratu ziren santurtziarrak eta Gil kapitainak bolea dotore batekin markagailua orekatu bazuen ere beste bi jokaldi inozotan 1-3koraino joan ziren kanpotarrak.
Defentsa lerroa aurreratuz ikastolakoek zirt edo zart egin zuten eta Zumetaren asteroko golarekin markagailua estutu bazuten ere ustekabeko arerioa izan zuten horitxoek. Ezer ez zuten bi jokalditan txartel bana aterata Gil kapitaina kaleratu eta taldea 5 faltekin utzi zuen epaile agurgarriak. 3 jokalarirekin ahalegin eskerga egin zuen taldeak markagailuari eusten baina txistulariaren laguntzarekin berriz ere 4. gola lortu zuten kanpotarrek.
Azken 2 minutuetan amorrazioz jokatu zuten etxekoek atezain jokalariarekin, baloia ederki mugituz eta Telleriak 3-4koa ere egin zuen jokaldi polit batean. Ahaleginak ahalegin, etxekoek ez zuten gol gehiago egiteko zorterik izan eta santurtziarrek azken segundoan egindako golak markagailua itxi zuen, 3-5.
Aste honetako porrota lehen-bailen ahaztu eta datorren astean izango den tolosarren arteko derbyari begira erretiratu ziren Javi eta Aitor prestatzaileak, Saralegi, Alonso, Gil, Vazquez, Iturralde, Telleria, Zumeta, Joniko, Etxebe, Ekhi eta Endika jokalariak.
Harrobiari dagokionez aldiz albiste paregabeak izan ditugu, Santxo Panzaren denboraldi hasierako astoak, lasterketetako zaldien abiadura hartu eta sailkapenean gora eta gora jarraitzen baitu. Aste honetan Zurt tabernaren aurka 4-3 nagusituta sailkapeneko 3. posturaino igo dira etorkizuneko Laskorain osatzen ari diren mutilak.

2013-03-14

Laskorainek 6-2 irabazi zion Billabonako Egintzari

Egintzako billabonatarren bisita hartu zuen Laskorainek joan den asteburuan. Usabalera bildutako zaletuek derbi haundi bat ikusteko itxaropena bazekarten ere derbia dizdirarik gabekoa eta jokoz erabat antzua suertatu zen. Hori bai, horitxoei gutxienez garaipenaren hiru puntuen aho zapore eztia gelditu zitzaien amaieran, 6-2 irten ziren eta garaile.

“Bizilagunen arteko demak, erantzunkizunagatik edo porrotaren beldurragatik, urduritasun eta tentsio handien eragile bihurtzen dira maiz” zioen norbaitek Usabalgo harmailetan neurketa hasi eta minutu batzutara. Kantxa gainean gertatzen ari zena zuen noski adibiderik aproposena. Baloi jabetza eta joko ekimena inorrena ez, bi taldeak jokoa ezin josirik ziruditen eta hutsak eta baloi galerak ziren partidaren ezaugarri nagusi.

Zorionez, golak ikusteko parada behintzat izan zuten gerturatutakoek, 8 goletako sorta ederra alegia. Hauxe izan zen hain zuzen, ate aurrean azaldutako punteria, partida erabakiko zuena eta gol hauen kontakizuna egitea da partidaren kontakizunik zuzenena.

Lehenengoa bisitariek egin zuten ezustean, baina Aitorren mutilek atsedenaldiaren aurretik eman zioten markagailuari itzulipurdia Zumeta “celebrity” mediatikoak eta Gil TDI kapitainak sartutako golei eskerrak. Merezimendurik gabeko eraginkortasuna.

Aldageletatik bueltan ikastolakoen hirugarrena etorri zen, arratsaldeko onena, Joniko “Billy the kid” pistoleroaren tiro bikain bat, eta partidaren bilakaerarekin konforme ez eta Egintzakoen entrenatzaileak atezain jokalaria kantxaratu zuen amaierarako hamar minuturen faltan. Espero bezela honek gol aukerak biderkatu zituen bi taldeentzat, baina golak etxekoen alde erori ziren 6 eta 1ekoraino, Gilen eta Etxebe “Billy the kid II”ren eskutik (2 gol azken honek). Partidaren hondarren egin zuten bisitariek beraien bigarrena.

Hiru puntu berri hauekin Laskorainek zazpigarren darrai sailkapenean, oraindik ere beste posturen bat eskalatzeko helburuak hortxe jarraitzen duelarik. Aurten horitxoen taldean egon den belaunaldi aldaketa kontutan hartuta ez legoke batere gaizki, postu hobekuntza Txiki Khedirari eskeintzeko opari ederra litzatekeelarik gainera. Iñigok Erasmusa dela eta larunbatean jokatu zuen denboraldi honetako azken partida zamarra horitxoarekin eta Poloniara doa denbora baterako.

2013-03-04

Laskorainek 6-6 berdindu zuen Soloarteren aurka

Basaurira bidaiatu behar izan zuen Laskorainek joan den larunbatean Soloarte talde historikoaren aurka indarrak neurtzekotan sailkapenean erosotasunez diharduten bi talderen arteko norgehiagoka batean. Helburu finko baten gabezian gelditu den denboraldi honetan, partiduz-partidu ahalik eta puntu gehien batu eta etorkizuneko urteen menpean keinu bat eginaz, jokalariak sendotu eta gazteak hezitzeko froga bikaina den dema batentzako osagarri guztiak betetzen zituen neurketak.

Azken emaitzak ikustarazi dezakeena bezain eroa suertatu zen bi taldeen arteko lehia, gora-behera ugariko 40 minutuetan zehar, hizkuntza matematiko-estatistiko batetan mintzatu ezkero, desbidazio tipiko altuko grafika batean irudikatu genezake Artunduaga kiroldegian gertaturikoa.   

0-4 hasi ziren irabazten tolosarrak lehen 10 minutuetan Jonikok, Zumetak, Gilek eta Alonsok eginiko sareratzeen ondorioz. Etxekoen 1-4-koari Joniko sukaldariak emango zion arrapostua berriro, baina atsedenaldia ailegatzear zegoenean bizkaitarrek aldea murriztu eta 2-5 gelditu zen elektronikoa. 

Bigarren zatia luze bezain neketsua egin zitzaien horitxoei, basauritarrek amore eman beharrean, lortutako bi golekin 4-5-eraino estutu zen emaitza eta Vazquez-ek 4-6-koa egin arren, 4 minuturen faltan atezain jokalariaren taktika martxan ipiniaz berdinketa erdietsi zuten etxekoek. Tamalez, kontraeraso batean garaipena eskura izanagatik, azken metroetako zehaztasun faltak itxi zuen garaipenerako bidea.  

Ondo hasi eta erdipurdi amaitutako dema baten ostean atera daitezkeen ondoriorik baikorrenak, gazteak hartzen ari diren pisua eta protagonismoa dira, Aratz eta Josu intxaurzaleek, Vazquez errusiarrak eta Zumeta golegileak minutu bikainak bete zituzten joan den larunbatean eta etorkizunean laskoraindarren enborra sustengatuko duten sustraiek izen eta deiturak badituztela dirudi.

Datorren astean Egintza C.D., Villabonako taldeak bisitatuko du Usabalgo polikiroldegia, derbi zirraragarria beste behingoz erraztasun urriak lagako dituen talde baten aurka.

Larunbatean Basarurin, Josetxo jarraitzailea, Javi delegatua, Aitor entrenatzailea, Aratz, Alonso, Gil, Vazquez, Joniko, Zumeta, Telleria, Iturralde, Ekhi eta Endika izan ziren. Harrobiari dagokionez, lehen mailako gazteek 10-0 irabazi zuten nagusitasunez Aierruren aurka eta laugarren postuan dira.

2013-02-25

Laskorain nagusi Mallabiaren aurka, 11-4

Gol festa bikainaz gozatu ahal izan zuten termometroak aurtengoan izan duen mailarik baxuenetik aldenduz Usabalgo kiroldegiko epelera inguratu ziren zaletuek. Kanpoan elur malutak erortzen ziren erritmo berean igo ziren golak markagailura barruan eta 40 minutu zoroen ostean ikastolako mutilak gailendu ziren bizkaitarren aurrean 11 eta 4.

Mallabia gol gehien sartu eta jasotzen dituen taldeetako bat izaki, partida zoroa espero zen eta markagailuak erakusten duen moduan halaxe gertatu zen. Tolosako parrandazale belaunaldi berriaren meka bilakatu den Iruña taberna partidako babeslea izateak ere profezia zirudien eta nola ez, Zumeta “saturday night celebrity”-a izan genuen nahasmenaren erdian izarra bere lau golekin.
Norgehiagoka ordea ez zen azken markagailuak pentsarazi lezakeen bezain erreza izan, horitxoak ia partida osoan aurretik joan baziren ere azken minutuetan soilik handitu baitzen aldea. Partidako lehen minutuan soilik izan ziren aurretik bizkaitarrak, kanpotarren golari segundo gutxitan erantzun baitzion etxekoen alde Etxebek egindako golak.

Erritmo biziz jokatutako lehen 20 minutuetan aukera eta hutsegite asko izan ziren arren Zumetak golak egiteko erakutsitako erraztasunak 5-2 aurreratu zituen etxekoak.
Atsedenaldiaren ostean gidoi berbera izan zuen markagailuak, baloia mugimenduan jarri orduko kanpotarrek egindako golari Etxebek erantzun baitzion berriz ere, 6-3. Aurkariak faltaz aldea murriztu bazuen ere Zumeta eta Jonikoren golek markagailua erabakita utzi zuten, 8-4.

Norgehiagokaren ondarrean atezain jokalariarekin Mallabiak egindako saiakerak ez zuen fruiturik eman, Eñaut, Etxebe eta Ekhik aldea areagotu baitzuten etxekoen saskia 11 golekin bete arte.
Denboraldiko gol errekor berriarekin gustura erretiratu ziren aldageletara Javi eta Aitor prestatzaileak, Aratz, Alonso, Etxebe (3), Ekhi (1), Eñaut (1) -haserako bostekoa- Telleria, Gil, Zumeta (4), Txiki, Joniko (2) eta Koldo jokalariak.

2013-02-18

Laskorainek 2 eta 1 galdu zuen Belabietan Ibarraren aurkako derbian

Estreinakoz bere 20 denboralditako bilakaera luze eta emankorrean, Laskorainek partidu ofizial bat jokatu zuen Ibarrako Belabietan bisitari gisa. Patuaren kapritxoz beti ere hain seinalatua den iñauteri biharamuneko jardunaldian egokitu zen, festaren ajea eta ajearen nagikeria nahasten diren asteburu astunean; eta alkarren aurka birritan besterik lehiatu ez duten arren, tolosaldeako areto futboleko derbi guztien ama, ibartarren alde erori zen 2 eta1.

Hainbeste bider irudikaturiko norgehiagokarako horitxoek azken sasoiean izan dituzten baja garrantzitsuetatik bat berreskuratzen zuten –agidanez Joseba Gil kapitainarentzat terapia osasungarri dira txarangaren gibeletik buruturiko kalejirak, salto eta brinkoak- eta ondorioz itxaropentsuago jauzi zuten bizilagun liderraren kantxara.

Haserako minutuetan gainera zeharo ustekabean harrapatu zituzten etxekoak, baloiaren jabetza eta jokoaren ekimena eztabaidatu eta lapurtuaz eta derbia zeinbaitzuk uste baino gogorragoa izango zela forgatuaz. Bi baloi galera hustiatuz ordea more koloredunak izan ziren markagailua ireki zutenak, 2-0, baina kolpea kope ikastolakoek berean jarraitu zuten eta atsedenaren aitzinetik aldea murriztu korner batean. Telleriak Zumetari katapun.

Aldageletatik bueltan jokoak zeharo orekatuta jarraitu zuen, bi taldeak nor baino nor eta puntuak txilaba soinean dantzan alde batetik bestera, baina gezurra badirudi ere tamalez markagailua ez zen gehiago mugituko.

Amaieran, laskoraindar jokalari eta zaletuak gutxien gutxienez berdinketa merezi izan zutenaren irudipen eta aldarrikapenarekin irten ziren, eta jokoa eta aukerak ikusita beharbada horixe izanen zen emaitzarik zuzenena, baina porrotak jada ez zuen erremediorik. Nolahala, bihotz horitxoa zuen oro harro zegoen oso taldeak emandako joko maila bikainarekin.

Bi hamarkadetan zehar, Belabietara jokatzera joan ahal izateko lan egin duten jokalari belaunaldi guztien ordezkariak izan ziren Javi delegatua, Aitor eta Javi entrenatzaileak eta Endika, Saralegi, Telleria, Alonso, Gil, Etxebe, Belloso, Iturralde, Zubillaga, Vazquez, Zumeta eta Otxoa jokalariak. Erronkaren exijentziaren pare egon zen bidalitako enbaxada.

Iker Santxezen taldeak Ventanas Isu Leihoak liderraren aurka amore eman behar izan zuen (4-5) eta Maiorgan jubenilek errez menderatu zuten Summa Aldapeta talde donostiarra. Bi taldeek sailkapenean laugarren postu eroso batean dihardute.

2013-02-14

Laskorainek 1-1 berdindu zuen Santurtziko San Jorgeren aurka

Ibarrako Belabieta polikiroldegian jaso zuen Santurtziko San Jorgeren bisita Laskorainek Zaldunita bezperan ihauterietako astean, urtero ohi izan den moduan Usabalgo zentrua itxita egoten bait da 7 egunetan zehar.

Neurketa trabatua egokitu zitzaien tolosarrei, lehen itzulian jokaturiko partiduan bizkaitarrak erraztasunez menderatu arren, oso bestelakoa suertatu zen joan den larunbatekoa eta garaipena minutu luzeeten zehar eskura izanda ere azkenean puntu bakarrarekin konformatu behar izan zuten Aitorren mutilek.

Lehen zatia errespetu haundiz hartu zuten bi taldeek, 0-0-eko markagailua apurtzeko abagune gardenik gabe, bietakoren baten hutsegitea erortzeko itxaropenean ikastolakoen aldeko izan zen zortea eta Bellosok bizkaitarren hanka sartze larri bat kupidarik gabe sareratu zuen 1-0 jarri zirelarik horitxoak elektronikoan aurretik.Gol ederra bezain garrantzitsua baina aldea laburregia zen oraindik eta gogotik lan egin beharra zegoen garaipenaren jabe izan nahi izatekotan.

Bigarren zatian aldiz joan etorri ugari gertatu ziren eta bizkaitarrek, teknikoki talde kaxkarragoa izaki, norgehiagoka beraien eremura eramanez, azkenean, jokaldi arriskutsu baten ondorioz, baloia area barruan sartzea lortu eta berdinketaren gola egin zuten 12 minuturen faltan.
Laskorain kementsu eta gogotsu aritu zen bukaerararte, baita azken minutuetan atezain jokalariaren bitartez saiatuta ere, baina azkenean markagailuak berean iraun eta puntu banaketarekin konformatu behar izan zuten bi taldeek. Endikaren gelditu erabakiorrek ere amaiera goibelagoa izan zitekeena ekidin zuten azkenik.

Datorren astean berriro Ibarran jokatuko du taldeak baina oraingo honetan kanpotar moduan, izan ere Ibarra liderraren aurka neurtu behar izango bait ditu indarrak urteko partidarik zailenetako batean. Sailkapeneko erdiko postuetan eroso dira Aitorren mutilak baina ahalik eta bukaerarik onena lortzeko asmoak dirau jokalari bakoitzaren buruan.
Larunbatean Ibarran Javi delegatua, Aitor entrenatzailea, Endika, Alonso, Telleria, Joniko, Iturralde, Zumeta, Belloso, Ekhi eta Etxebe izan ziren. Filialari dagokionez, Santxoren gazteek 3-4 irabazi zuten Euskaldunaren aurka eta laugarren postuan eta gora begira da sailkapenean.