2013-01-28

Laskorainek 5 eta 3 irabazi zion Zarautzi eta zortzigarren da sailkapenean

Azken jardunaldiko Gasteizko porrot zalapartatsua berehalakoan ahazteko xede irmoarekin kantxaratu ziren Usabalera larunbatean horitxoak. Zarautz bisitari, arpegi biziki ezagunak topatu zituzten parez pare; eta Urnietan sortu eta Astigarragan ezagutzera eman zen Nogales famatu haren oinordekoaren aurka milagarren derbia jokatu zuten nor baino nor.

Esan bezala Aitorren mutilek amorratzen ekin zioten partidari eta ziklogenesi leherkor jarrera honen eraginez goitik behera gailendu zituzten zarauztarrak lehen hogei minutuetan zehar. Josu Iturraldek, Joniko Otxoak eta atezain kanpotarrak bere atean sartutako golek guztiz zilegizkoa bihurtzen zuten aldageletara bidean markagailuak aditzera ematen zuen 3 eta 0ko argia.

Aldageletatik bueltan ordea otzanago agertu ziren ikastolakoak, akaso kanpotarrak erneago, eta indarrak zeharo orekatu ziren. Horitxoek laugarrena egin bazuten ere, Eñaut Vazquez gazteak hain zuzen, ondoren zarauztarren bi gol iritsi ziren eta instante batez partida berriro hasten zela iruditu zitzaigun.

Eskerrak, taldeak gehien behar zuenean,Txiki agertu eta bosgarren erabakiorra sareratu zuen berehala. Ez da lehendabiziko aldia gainera. Azken minutuetako kostakoen hirugarrena eta atezain jokalaria anekdota hutsean geldituko ziren zorionez.

Garaipen garrantzitsu honekin 2013 urte berrian jokaturiko hiru partidetan laskoraindarrek 4 puntu gehitu dizkiote sailkapenari eta zortzigarren erdi-erdiko postuan kokatu dira oso berdindua ageri den txapelketan. Datorren jardunaldian aste honetan Billabonan hiru puntuak eskuratu dituen Gora tadeari egingo diote bisita Gernikara.

Oso gustura igaro zuten larunbat ilunabarra Javi delegatuak, Aitor eta Javi entrenatzaileek eta Endika, Aratz, Telleria, Balerdi, Etxebe, Txiki, Josu, Manso, Joniko, Eñaut eta Zumeta jokalariek. Aipatu Santxoren filialak 3-1 galdu zuela Zaldibin eta Mallorgaren jubenilak 5-6 irabazi zuela Hirukide Barrantolen kantxan.

2013-01-23

Laskorainek 6-0 galdu zuen Aurrera de Vitoriaren aurka

Urteko irteera zailenetako bati aurre egin zion Laskorainek joan den larunbatean Gasteizko Olaranbe polikiroldegian Aurrera de Vitoria bigarren sailkatuaren aurka jokatu beharreko neurketa trabatuan. Bigarren itzuliari hasiera emateko arerio historikoa eta itzelezko denboraldia betetzen ari dena egokitzen zitzaien ikastolakoei. Aitorren mutilek bestalde baja garrantzitsuak jasan dituzte azken asteetan baina beste behingoz agortezina dirudien harrobiaren eskutik bermatu zen entrenatzailearen deialdia. Murgi, Joniko, Gil eta Bellosok ezin izan zuten gainontzeko taldekideen alboan jardun.

Kantxa gainean ikusitako gasteiztarren nagusitasuna ukaezina izan arren, elektronikoak amaieran erakutsitako emaitza zabalak zigor gogorregia suposatzen du tolosarrentzat izan ere minutu ugarietan zehar itxura ona emateaz gain abagune paregabeak garatzea ere lortu bait zuten horitxoek. Neurketaren hasieran buruz-buruko aukera bik eta zutoinkada batek sareetarako biderik asmatu ez izanak etxekoen ondorengo erantzuna baimendu eta segidan jasotako hiru golekin 3-0-eko emaitza pisutsuaren aurka ekin behar izan zuten Aitorren mutilek.
Bigarren zatiko filmearen gidoia beste horrenbeste suertatu zen, tolosarrek hasiera ona eskeiniaz, zorterik gabe ate aurrean eta gutxien espero zenean 4-0-eko mingarri eta erabakiorra ailegatu zen. Atezain jokalariaren taktika ipiniaz markagailua apaintzeko ahaleginek kontrako eragina ekarri eta 6-0-ekoarekin amaitu zen Gasteizko atalburu goibela.
Arerioak erakutsitako maila ere bikaina izan zela esan behar da, ez alferrik Hirugarren mailako lidergoa eskuratzea lortu zuen joan den larunbatean batutako garaipenarekin.
Datorren astean Zarautz K.E.-ren bisita jasoko du Laskorainek Usabalen aurpegi ezagunak izango dituen norgehiagoka batean. Bigarren itzuli osoa gelditzen da oraindik aurretik eta zaletuei eskeintzeko moduko neurketa magiko ugari izango dira ondorengo hilabeteetan.
Larunbatean, Javi delegatua, Aitor entrenatzailea, Endika, Etxebe, Balerdi, Telleria, Ekhi, Manso, Josu, Zumeta, Vazquez eta Saralegi izan ziren Gasteizen. Filialari dagokionez, Santxoren taldeak 2-7 irabazi zuen Azpeitiko taldearen etxean. Maiorgaren jubenilek bestalde 3-3 berdindu zuten Egintzaren aurka.

2013-01-14

Laskorainek puntu baliotsua lortu zuen Lasarteko Buruntzaren aurka

Eguberrietako turroien ondotik berriz ere txapelketari ekiteko zita zuen Laskorainek pasa den larunbat arratsean. Aurkari, etxeko partidetan ia punturik galtzen ez duen Lasarteko Buruntza taldea izan zuten horitxoek eta 40 minutu parekaturen ostean, 2na gol eginda, puntu banaketarik amaitu zen norgehiagoka.

Laskorainek Lasarten aurkeztu zuen taldea (Txema Vallesen argazkia)

Partida zail honi aurre egiteko baja garrantzitsuak izan zituen taldeak, taldeko zutabe garrantzitsu diren Murgik eta Gilek orkatila bihurrituta eta sorbalda irtenda baitzituzten hurrenez hurren. Deialdia osatzeko, harrobiko jokalariak izan arren lehenengo taldean gero eta pisu gehiago hartzen ari diren Josu, Zumeta eta Eñaut pistoleroak bereganatu behar izan zituen Aitor prestatzaileak.
Epaileak lehen txistua jotakoan talde horitxoa izan zen baloiaren jabetza bereganatu zuena eta etxeko taldea berriz kontraerasora min egiteko pronto agertu zen defentsa sendoa burutuz. Ikastolakoak baloia hara eta hona ederki mugitu arren ate aurrean ez zuten asmatu eta bai etxekoek pasa txar bat lapurtu ostean Endikaren atea zulatzen, 1-0 atsedenaldira.
Bigarren zatian jokoa zertxobait nahastu zen eta baloiak ez zuen jabetza argirik izan, 3 zutoinkada jo arren Laskorainek ezin markagailua estreinatu partidaren azken hondarrean sartu arte. Joko nahasi horretan larunbat gauetan bezain gustura sentitzen den Zumetak egin behar izan zuen banakoa atzera geratzen ez den Etxeberekin bat biko bikaina egin ostean.
Berdinketaren ondoren Laskorain 3 puntuen bila joan zen goi goian presio bikaina eginez eta 90 segundoren faltan Etxebek ate barrura bidali zuen area inguruan lapurtutako baloi bat. Zailena eginda zegoenean ordea etxekoek atezain jokalaria kantxaratu zuten eta jokaldi ero baten ondoren markagailuak amaieran erakutsiko zuen 2nakoa erdietsi.
Puntu bakarrarekin konforme ez eta Laskorainek erabili zuen atezain jokalaria azken segundoetan,bi taldeek izan zuten sinetsi ezinezko aukera bana baina golik ez.
Geldialdiaren ondoren ez galtzeari garrantzia eman eta puntu soil horri datorren astean etxeko partida irabazita jarraipena emateko asmoarekin itzuli ziren etxera Javi delegatua, Aitor entrenatzailea, Endika, Iker, Beñat, Mikel, Ekhi, Etxebe, Josu, Zumeta, Eñaut eta Joniko jokalariak.