2014-12-29

Derbi garrantzitsua irabazi zuen Laskorainek Egintzaren aurka (3-5)

Egintza taldearen aurka indarrak neurtzea egokitu zitzaion Laskoraini Billabonako Olaederra kiroldegian jokatutako partidan. Azken jardunaldietako bolada onari jarraipena emateko intentzioarekin kantxaratu zen Aitorren taldea, gabonak goiko postuetan pasatzeko asmoz.

Partida erritmo biziarekin hasi zen, bi taldeak aukerak sortuz, baina etxeko taldeak lortu zuen markagailuan aurreratzea falta jaurtiketa baten ondoren Aratzek utzitako aldaratzea sareetara botaz. Nahiz eta gola jaso, kanpoko taldeak bere partidarekin jarraitu zuen eta modu honetan etorri ziren Eñauten bi gol markagailuan 1-2koa jarriaz. Partidak irekia jarraitzen zuen eta kontraeraso baten ondorioz binako emaitza jartzea lortu zuen etxeko taldeak.
Berriz ere talde horitxoari erreakzionatzea tokatzen zitzaion eta 2-3koa lortu zuen Xabatek taldean egindako jokaldi eder baten ondorioz. Atsedenaldira iristeko segundo gutxi falta zirela, Iruñako printzea izatetik Asturiaseko printzea izatera pasatu den Eñautek 2-4koa egin zuen arratsaldeko bere hirugarren gola lortuz.
Atsedenalditik bueltan partidak bide beretik jarraitu zuen. Bigarren zatiko zortzigarren minutuan Beñatek bakarkako jokaldi ikusgarri baten ondoren 2-5koa lortu zuen. Denbora amaitzen ari zen eta etxeko taldeak atezain jokalaria ateratzea erabaki bazuen ere, penalti bidez etorriko zen etxekoen hirugarren gola jokaldi trabatu bat eta gero. Nahiz eta etxeko taldeak aukera batzuk izan atezain jokalariarekin 3-5eko emaitzarekin amaitu zen partida.
Aipatzekoa, kuotak ederki kontrolatzen dituen Mattinen debuta lehenengo taldearekin.
Partidan Aitor entrenatzailea eta Javi delegatua, Aratz, Beñat, Etxebe, Arkaitz eta Zumeta –hasierako bostekoa- Iker, Xabat, Eñaut, Manso, Mattin eta Katta ordezkoak izan ziren.
Bestalde, oinarrizko taldeei dagokienez asteburuko emaitzak:
Lurraldeko 2. Maila: Laskorain 3 – 2 Denak Taberna
Nazional ohorezko mailako jubenila: Laskorain 4 – 8 Berrio Santutxu
Lurraldeko jubenila: Atsedenaldia
Lurraldeko kadetea: Laskorain 5 – 1 Mollarri

2014-12-17

Laskorainen hirugarren garaipena jarraiean Lagun Onak taldearen aurka (8-4)

Sailkapeneko beheko postuetan zegoen Lagun Onak talderaren aurka jokatzea egokitu zitzaion Laskoraini oraingoan.  Bigarren postuan zegoen jardunaldi hasieran talde horitxoa eta lehen postuetan mantentzeko horrelako partiduetan hutsik ez egitearen ideiarekin kantxaratu ziren. Bigarren zatian eginiko lan onaren ondorioz 8-4ko emaitzarekin gailendu ziren tolosarrak.

Ezin hobeto hasi zen partidua etxeko taldearentzat, lehen minutuetan, Eñautekin egindako jokaldi batean Etxebek arratsaldeko lehen gola egitea lortu baitzuen. Erraz irabaziko ote zuten sentsazioa zabaldu bazen ere Usabalera urbildu zirenen artean, konturatzerako bizkaitarrek markagailua irauli zuten horitxoen bi akats nabarmen aprobetxatuaz.
Markagailuan atzetik ikustean Laskorainek intentsitatea igo zuen eta, honetaz baliatuz, golak zilipurdiak egiten baina trebeagoa den Jonikok, berdinketaren gola sartu zuen aurkariaren akats baten ondoren jaurtiketa batekin baloia sareratuta.
Atsedenaldira iritsi aurretik hiru gol gehiago ikusi ziren, horietatik lehenengoa galdakaoztarrentzat izan zen, denbora gutxira Mansok partidua hiruna berdindu zuen berriz ere urrutitik egindako jaurtiketa batekin, eta amaitzeko gutxi falta zenean beste akats bat baliatuaz kanpotarrek beraien laugarrena egin zuten lehen zati amaieran 3-4ko emaitza utziaz.
Atsedenaldia ongi etorri zitzaien horitxoei eta bigarren zatia hasi eta berehala baloiaren jabe egin ziren. Aukerak maiz sortzen ziren eta horietako batean, Jonikok bere bigarren gola egin zuen Beñaten pase on bat sareratuta. Laskorainek lanean jarraitu zuen garaipena emango zion golaren bila, eta kosta egin zen arren, Zumetak hegalean egindako jokaldi bikain baten ostean Etxebek aurretik jarri zuen Aitorren taldea bigarren zutoinean baloia bultzatuta.
Denbora gutxira, area inguruan eginiko falta batean Arkaitzek, bere lagun den Jazz-ek inspiratuta, sekulako jaurtiketa bat eginda 6-4koa igo zuen markagailura ateko armiarma sareak garbituaz. Azken bi golak arratsaldeko protagonista bilakatu zen Jonikok egin zituen, bere denboraldiko partidarik hoberena "poker" batekin borobilduaz. Zazpigarren gola aldaratze bat orpoarekin maisutasun handiarekin errematatuaz iritsi zen eta zortzigarrena Iker atezainak emandako pase bikain bat jaurtiketa batekin amaituta.
Beraz, 8-4ko emaitza 2014ko Usabalgo azken partiduan. Aipatu Gil kapitainak min hartu zuela partidoa hasi eta berehala. Lesio hau denbora gutxirako izango denaren esperantzarekin erretiratu ziren Aitor eta Javi entrenatzaileak, Javi delegatua, Iker, Gil, Etxebe, Xabat eta Eñaut -hasierako bostekoa-, Beñat, Manso, Arkaitz, Lakun, Joniko eta Zumeta ordezkoak.
Oinarriko taldeei dagokienez, hauexek beraien emaitzak:
Lurraldeko 2. Maila: Laskorain 3-2 Power Rangers 1896
Nazional Ohorezko Mailako Jubenila: Eskoriatza 7-2 Laskorain
Lurraldeko Jubenila: Laskorain 14–4 Larramendi Ikastetxea
Lurraldeko Kadetea: Goierri “B” 2-3 Laskorain

2014-12-02

Laskorainen garaipen berri bat Santurtziko San Jorgeren aurka (3-5)

Aurreko jardunaldian Tolosala taldeari irabazi eta gero Santurtzi bidaiatzera egokitu zitzaion Laskoraini. Garaipena lortzea garrantzitsua zen sailkapeneko lehenengo postuetan jarraitzeko, eta taldeak ez zuen hutsik egin, partidu zail baten ondoren hiru puntuak etxera ekarrita.

Aipatu beharra dago ere, jubeniletako atezaina den Laiotzek lehenengo taldearekin debuta egin zuela.
Partidua  oso ondo hasi zuten horitxoek, baloia ondo mugituz aukera argiak izan zituzten, baina Santurtzikoak izan ziren lehenak gola sartzen, kontraeraso baten ostean horitxoen atea zulatu ostean. Laskorainek ez zuen burua jeitsi eta segituan sartu zuen berdinketaren gola Mansoren eskutik, honek area barnean Gilen pase bikain bat jaso ondoren .
Talde horitxoa partiduaren jabe egin zen eta baloia ondo mugitzen  jarraitu zuen. Horrela Jonikok Laskorainen bigarren gola lortu zuen bigarren zutoinean, Beñatek kanpo erdi ingurutik egin zion pase bikain baten ondoren.
Bigarren zatia oso ezberdin hasi zen, San Jorgekoek intentsitatea igo eta partiduaren jabe egin ziren. Denbora aurrera zihoan eta markagailuak bere horretan jarraitzen zuen. Zortzi minuturen faltan ordea, binakoa egin zuten etxekoek. Horitxoei erreakzionatzeko denborarik eman gabe etxekoak markagailuan aurretik jarri ziren minutu bat beranduago.
Aitor entrenatzaileak segituan atezain jokalaria ateratzeko erabakia hartu zuen. Honela, taldeak baloia bikain mugitutako  jokaldi batean, Zumetak berdinketaren gola egin zuen.  Atezain jokalariarekin jolasteak bere emaitzak eman zituela ikusita, jarraitzeko erabakia hartu zuen Ancelottik, eta beste jokaldi on batetan, Beñatek emandako beste pase zoragarri  batekin Zumeta jaunak bere bigarren eta taldearen laugarren gola egitea lortu zuen horitxoak aurretik jarriaz.
Bi minutu falta ziren eta oraingoan santurtziarrak izan ziren atezain jokalaria atera zutenak, baina defentsa on baten ondoren, Gilek baloia lapurtu eta bere zelaitik sartu zuen gola. Nahiz eta etxekoek atezain jokalariarekin jarraitu, 3-5eko emaitzarekin bukatu zen partida. Hiru puntuak lortuta, Javi delegatuak ekarri zuen merienda ederra jan eta itzuliko autobusa hartu zuten horitxoek.
Larunbat arratsaldean Santurtzin, Javi delegatua , Aitor entrenatzailea, Laiotz, Balerdi, Gil, Manso, Etxebe, Lakun, Mendi, Joniko, Zumeta eta Vazquez izan ziren protagonistak.
Bestalde, oinarriko taldeei dagokienez, hauek izan dira emaitzak:
Lurraldeko 2. Maila: Laskorain (Atsedena)
Nazional Ohorezko Mailako Jubenila: Laskorain 4-2 Goierri
Lurraldeko Jubenila: Mondrate 9-3 Laskorain
Lurraldeko Kadetea: Laskorain 15-2 Aloña Mendi

2014-11-25

Laskorainen garaipena Tolosako derbian (5-2)

Azken jardunaldiko porrota berehalakoan ahazteko intentzioarekin kantxaratu ziren ikastolakoak larunbat arratsaldean Usabalen jokatutako derbian. Parean, aski ezaguna den Eskolapioetako Tolosala taldea zuten eta derbi bat irabazteak duen garrantzia psikologikoaz oharturik ekin zioten norgehiagokari.

Partidu hauek duten tentsio puntuak ez zuen bi taldeen aspektu positiboenak kantxaratzen utzi eta errespetu handiz jokatu ziren 40 minutuak. Lehen minutuetan Tolosalakoak izan ziren baloiaren jabetza izan zutenak, baina ikastolako taldearen defentsa ordenatuak, Aratzek defendatutako porterira hurbiltzeko saiakera guztiak saihesten zituen.
Minutuak aurrera zihoazten heinean, etxeko taldeak baloiaren jabetza nahi zuela ikusarazi zion Eskolapioetako taldeari eta pixkanaka aukerak sortzen hasi zen. Horrelako batean, Zumetak, garai bateko Real Madrideko Raúl imitatuaz eta area barruan ukitzen duen baloi oro sareratzea lortzen duen jokalaria dela demostratuaz, 1-0koa ipini zuen markagailuan. Emaitza honekin aldagelaratu ziren 2 taldeak.

Nazional 3. Mailako Laskorain K.E. 2014-2015 (Arg.: Aitor Garcia)
Bigarren zatia hasi bezain laster eta aurten aurrera pauso bat eman nahi duen Manso jokalariak, amaiera bikaina eman zion Joniko eta berak eginiko jokaldi bikain bati, 2-0koa ipiniaz. Bazirudien gol honek min egingo ziola kanpoko taldeari. Tolosalakoek, aldiz,  intentsitate puntua igo eta partiduaren bila joateko gogoa demostratuaz etxeko taldearen minutu kaxkarrenak azaleratzeko gai izan ziren. Horrela, presioan lapurtutako baloi bati esker, aldea murriztea lortu zutelarik.
Partidu berri bat hasten zen etxeko taldearentzat, gola gutxi ez balitz, azken 12 minutuak 5 faltarekin defenditu behar izan zituzten, baina partiduak 40 minutu irauten dituela eta lanean jarraitu behar zela argi zeukaten jokalariek.
Horrela, Zumetak bandan eginiko bakarkako jokaldi bati amaiera bikaina emanez lehendabizi, eta aurten golarekin “feeling” berezia duen Etxebek ondoren, bere bolada onari jarraipena emanaz, aldea handitzea lortu zuten, 4-1ko markagailua jarriaz.
Lana geratzen zen aurretik oraindik, 8 minutu luze geratzen baitziren. Tolosalako taldeak presioan jarraitzen zuen eta presio gogor honi esker, Laskorainek area ertzean eginiko falta bati etekina ateratzea lortu zuten 4-2koa ipiniaz.
Kanpoko taldea atezain jokalariarekin saiatu zen azken minutuetan baina ez zuten lortu sareratzerik, Aitorren taldeak orden handiz defenditutako minutuei esker. Defentsan lapurtutako baloi bati esker, Zumetak bere hirugarren gola lortu zuen 5-2ko azken emaitza utziaz.
Larunbatean Usabalen, Aratz, Gil, Etxebe, Mendi, Joniko –haserako bostekoa-, Balerdi, Lakun, Xabat, Manso, Murgi, Zumeta eta Josu jokalariak , Javi delegatua, Aitor eta Javi entrenatzaileak izan ziren. Lerro hauetatik animoak Josuri, beroketan txorkatila bihurritu eta taldearekin ezin izango da aritu bi astez.
Oinarriko taldeei dagokienez, ohitura bihurtzen ari den bezela, kadeteek soilik atera zuten heuren partidua aurrera. Emaitza guztiak:
Lurraldeko 2. Maila: Laskorain 2-3 Ataun Troskaeta
Nazional Ohorezko Mailako Jubenila: Cerverano 9-1 Laskorain
Lurraldeko Jubenila: Laskorain 2–3 Inter Intxaurrondo (11 minutu faltan bertan behera, argi faltagatik)
Lurraldeko Kadetea: Erain 4-6 Laskorain

2014-11-17

Laskorainen denboraldiko lehen porrota Elorriko Buskantza taldearen aurka (4-2)

Elorriora bidaiatu zuten igandean Laskoraineko jokalariek ligako 6. jardunaldiari aurre egiteko prest. Urteko bidai zailenetariko bat zela argi zuten Aitor Garcia “Ancelotti”-ren gazteek, nahiz eta dinamika desberdina zekarren talde baten aurka aritu. Izan ere, tolosarrek ez zuten porrota ezagutzen lehen 5 jardunaldietan eta Elorrioko taldeak, berriz, 8 puntu eskuratu zituen 15etik.
Gauzak ez ziren oso ondo hasi Laskorainentzat, izan ere lehen gola 4. minutuan iritsi baitzen etxeko taldearentzat, kontraeraso azkar bat bikain bukatuaz. Hala ere, talde horitxoa ez zen behera etorri eta markagailuari buelta ematea lortu zuen 5 minututan. Lehenbizi, Josebak bandan eginiko jokaldi eder bati amaiera eman zion Etxebek eta ondoren Joseba bera izan zen jokaldia amaitu zuena bere beste jokaldi baten ondoren. Zoritxarrez, Elorrioko taldeak berdinketa lortu zuen atsedenaldirako 4 minutu gelditzen zirenenan eta horrela erretiratu ziren protagonistak.
Bigarrengo zatiari gogotsu ekin zioten etxekoek eta markagailuan aurrea hartzea lortu zuten, kanpotarren intentsitate maila baxuaz baliatuz. Ondorengo minutuetan Aitorren jokalariak saiatu ziren arren, ez zituzten aukera garbiak sortu eta atezain jokalaria ateratzeko apostua egin zuen entrenatzaileak. Jokaldi nahasi baten ondoren, etxekoek baloia lapurtu zuten eta laskoraindarren atera jaurtitzean, baloiak Etxeberen eskua ukitu zuen, hauen 6. falta probokatuz. Etxekoek ez zuten aukera paregabe hori alde egiten utzi eta 4-2 azken markagailua utzi zuten.
Hala ere, talde horitxoak ez du burua jetsi behar, izan ere hurrengo astean Usabalen derbia jokatuko dute Tolosalaren aurka arratsaldeko 16:00tan. Igandean Elorrion Aratz, Joseba, Etxebe, Manso, Andoni- hasierako bostekoa- Murgi, Joniko, Iker, Josu eta Vazkez jokalariak, Javi delegatua, Javi entrenatzailea eta Aitor Garcia egon ziren.
Badirudi, azpiko taldeetatik, oraingoan ere garaipena erdietsi zuen kadete mailakoa dela goiko postuetan murgiltzeko aukera duen talde bakarra:
Lurraldeko 2. Maila: Egintza 4-3 Laskorain
Nazional Ohorezko Mailako Jubenila: Laskorain 3-6 Xota FS
Lurraldeko Jubenila: Hirukide Tolosala 11-2 Laskorain
Lurraldeko Kadetea: Laskorain 5-1 Internacional Intxaurrondo

2014-11-12

Buruan mantentzeko puntua (4-4)

Pasa den larunbat arratsean, Laskorain KE eta Bilbo FSren arteko norgehiagoka ikusi ahal izan genuen Usabal Kiroldegian. Aurtengo 3. Mailako bi talde boteretsuenetarikoen arteko lehia izango zela argi zuten bertara gerturatu ziren zaleek, eta Bikutz tabernan larunbat gaueko parrandetako gidoi bat balitz bezela, ez zuten iruzur egin.

Gauzak ez ziren oso ondo hasi etxeko taldearentzat, norgehiagoka hasi eta bi minutu pasa ostean Bilboko taldeak bere lehenengo gola egin zuen Aratzen atean areaz kanpoko jaurtiketa batekin, epaileen erabaki txar baten ondorioz.
Baina etxeko taldeak ez zuen amore eman eta Zumetak, jokaldi polit bat egin ondoren partidua berdintzea lortu zuen.
Kanpoko taldeak berriro ere aurre hartu zuen markagailuan baina Joniko eta Xabaten arteko jokaldi baten ostean Bilboko jokalari batek baloia ikutu eta sareratzea lortu zuten.
Bi taldeek aukera ugari izan zituzten beraien errenta handitzeko eta jokaldi eder bat eta gero, aitatxo Etxebe izan zen laskoraindarrentzat 3. gola lortu zuena, baina berriro ere Bilbok partidua berdindu zuen, bazirudien ez zutela amore emango hain errez. Horrela amaitu zen lehen zatia.
Bigarren zatia hasi eta 5 minutu pasa ondoren, Gil kapitainak bere arratsaldeko lehen gola sareratzea lortu zuen, oraingoan ere Bilboko jokalari baten laguntzarekin, 4 eta 3koa lortuaz.
Baina lehen aipatu gidoian, bazirudien tolosarren garaipena ez zela idatzi eta bilbotarren jokaldi polit baten ondoren, amaierako 4 eta 4ko markailua ezarri zuten Usabal kiroldegian ikusi ahal izan genuen lehian.
Puntu garratzintsua, talde garrantzitsu baten aurka.
Tolosan larunbat arratsaldean, Javi delegatua, Javi eta Aitor prestatzaileak, Aratz, Gil, Murgi, Joniko eta Etxebe-haserako bostekoa-, Xabat, Zumeta, Mendi, Josu, Lakun eta Iker izan genituen.
Bestalde, garaipenik gabeko asteburua “borobildu” dute Laskorain K.E. osatzen duten gainontzeko taldeek. Hauek dira emaitzak:
Lurraldeko 2. Maila: Laskorain 2-2 Makax
Nazional Ohorezko Mailako Jubenila: Castro Urdiales 7-5 Laskorain
Lurraldeko Jubenila: Laskorain 1–31 Egintza
Lurraldeko Kadetea: Sukia 4-2 Laskorain

2014-10-29

Laugarren garaipena lau partidutan Laskorainentzat (5-6)

Irteera zaila zen larunbatekoa Aitorren taldearentzat, izan ere oraindik partidarik galdu gabe aurkitzen zen Goierri taldea, eta atsedena izan ostean, Urretxuko kantxa zailean jokatzen baitzen norgehiagoka. Baina hala eta guztiz ere partida serio baten ondorioz garaipena Tolosara eramatea lortu zuen 5-6 ko azken emaitzarekin.

Argi zuten jokalariek partida horretan 3 puntu baino gehiago jokatzen zirela eta horregatik oso kontzentratuta atera zen hasieratik Laskorain. Defentsa sendo batetik abiatuaz lehen aukerak sortzen hasi ziren eta horietako kontraeraso batetan Mansoren jokaldi on bat baliatu zuen Vazquezek bigarren zutoinean. Baina minutu gutxi batzuk beranduago berdinketa egitea lortu zuen Goierrik.

Berdinketak ez zuen Laskorain taldearen jokatzeko modua aldatu, eta presio on baten ondorioz aurkariaren atetik gertu bereganatu zuen baloia Zumetak eta jarraian bere jaurtiketa zorrotz bat eta gero 1-2koa ezarri zuten markagailuan. Atsedenaldira ordea 2-2 iritsi ziren goierritarrek bigarrena sartu bai zuten minutu gutxi faltan.

Atsedenalditik oso gogotsu atera ziren Laskorainekoak eta 2-4 aurretik jartzea lortu zuten Vazquezen eta Murgiren golei esker, azken honek Etxeberen jaurtiketa aprobetxatuaz. Bazirudien partida ixteko aukera ezin hobea zutela, baina begiak itxi eta irekitzerako berdinketa egitea lortu zuten urretxuarrek.

Azken partidako mamuak etorri zitzaizkien burura, baina bi kontraeraso baliatuaz Lakunek bi gol sartu zituen bata bestearen jarraian Zumetaren bi asistentzia jaso eta gero. Etxeko taldeak atezain jokalariarekin 5-6eko gola sartzea lortu zuen azken bi minutuetan horitxoek behar baino gehiago sufritu araziz, nahiz eta Goierri jokalari bat gutxiagorekin aritu azken uneetan kaleratze baten ondorioz. Azkenean Aratz atezainak 1vs1 jokaldi batean lortutako gelditu garrantzitsu batek eman zizkien 3 puntuak horitxoei.

Atsedenaren aurretik etxeko lanak ondo eginda utzi zituzten Javi delegatuak, Aitor eta Javi entrenatzaileak eta Aratz, Vazquez, Manso, Gil eta Balerdi – hasierako bostekoa-, Lakun, Zumeta, Murgi, Etxebe eta Josu jokalariek.

Asteburuko elkarteko beste taldeen emaitzak erreparatuz, filialak eta kadeteak garaipenak erdietsi dituzte, eta lurraldeko jubenilak aldiz, porrota:

Lurraldeko 2. Maila: Iurre Taberna 2-3 Laskorain

Nazional Ohorezko Mailako Jubenila: Atsedena

Lurraldeko Jubenila: Laskorain 1-4 Hirukide Eskolapioak

Lurraldeko Kadetea: Laskorain 12-0 Goierri “A”

2014-10-21

Hirugarren garaipena jarraian Laskorainek Meatzari Petronor taldearen aurka

Lehen bi partiduetan garaipena lortu eta gero, aurten kategoriaz igo diren Meatzari taldearen aurka jokatzea egokitu zitzaion Laskoraini. Lider zihoan Goierri taldeak jardunaldi honetan atsedenaldia zutela jakinda kantxaratu ziren horitxoak, 6-5eko emaitzarekin, 3 puntuak lortuaz.

Partidua hasi eta berehala egin zen etxeko taldea baloiaren jabe; bizkaitarrek kantxa erdiko defentsa bat planteatu zuten, baina horitxoek baloia azkar mugitzen zuten jokaldietan abaguneak sortzen zituzten. Honela, hauetako jokaldi batetan Zumetak egindako jaurtiketa batekin arratsaldeko lehen gola iritsi zen. Gol hau sartu eta berehala, berriro ere baloia ongi mugitutako jokaldi batetan Josuk 2-0ko markagailua ezarri zuen jaurtiketa batekin atezaina bikain gainditu ostean.

Bizkaitarrek ez zuten amore eman eta estrategia jokaldi batetan, beraien lehen gola egitea lortu zuten buruz egindako erremate bat baliatuaz. Gol honek etxekoen erasoak areagotzea ekarri zuen, eta honen ondorioz, beste bi gol egitea lortu zuten horitxoek. Hirugarren gola momentu onean dagoen "Bart Simpson" Mansoren eskutik etorri zen, bigarren zutoinean baloia sareratuaz jokaldia ongi jarraitu ostean. Laugarrenean Zumeta izan zen protagonista arratsaldeko bere bigarren gola eginaz. Honela, 4-1eko emaitzarekin iritsi ziren atsedenaldira.

Bigarren zatia hasi bezain laster, zesio batetik etorritako falta batetan talde horitxoaren bosgarren gola sartu zuen Etxebek. Ohikoa duten jokaldi batean Arkaitzek eginiko lan bikaina aprobetxatuaz. Ondo bideratua zuen partidua Laskorainek, baina intentsitatea jaitsi zuten eta hau baliatuz bizkaitarrek beste gol bat egitea lortu zuten.  Lehen zatian bezala, jasotako golari azkar erantzun zion talde horitxoak beste gol bat eginaz, oraingo honetan "dedobolo" Lakun izan zen golegile, area kanpotik egindako jaurtiketa batekin.

Partidua azken txanpan sartu zen eta 3 puntuak etxean geratuko zirela zirudien, baina beste behin lehengo urtean ohiko zen intentsitate beherakada izan zuen etxeko taldeak. Horren adierazgarri izan ziren azken bost minutuak, Meatzari taldeak 3 gol bata bestearen atzetik egitea lortu zuen 6-5ko emaitza ezarriaz.  Tentsio momentuak bizi izan ziren Usabal kiroldegian, baina denborak ez zuen gehiagorako eman eta horrelaxe amaitu zen partidua.

Hiru punturekin baina gauzak hobetu behar direnaren sentsazioarekin atera ziren larunbatean Aitor eta Javi entrenatzaileak eta Iker, Murgi, Etxebe, Xabat, Manso, Lakun, Josu, Mendi, Zumeta eta Vazquez jokalariak.

Bestalde, kadeteek nagusien ildo beretik ekin diote txapelketari estreinekoan garaipena lortuaz, baina filialak eta jubenilek ezin izan dute asteburua borobildu. Hauek dira emaitzak:

Lurraldeko 2. Maila: Laskorain 3-5 Anoeta
Nazional Ohorezko Mailako Jubenila: Lauburu 8-2 Laskorain
Lurraldeko Jubenila: Laskorain 1–11 Anoeta
Lurraldeko Kadetea: Lauburu Samaniego Orixe 0-4 Laskorain

2014-10-14

Laskorainen bigarren garaipena bi partidutan

Joan den asteburuan Laskorain taldeak kanpoan (Ermuan) jokatu zuen bere denboraldiko bigarren partida. Aurkaria igo berria den Saltzaileak Alkideba izan zen. Hasiera batean partida zaila izango zela uste zuten Laskoraingo partaideek, izan ere, liga honetan aurkariak etxean jokatzen zuen lehen partida bait zen. Nuerketa 15 minutuko atzerapenarekin hasi zen baina egoera horrek ez zuen eraginik izan jokalarien kontzentrazioan.

Tolosarren hasiera oso ona izan zen nahiz eta 13. minutuan lortu lehen gola Mansoren bitartez. Jokaldiko lehen jaurtiketa Beñatek egin zuen eta atezainaren geldituaren ostean hor zegoen Manso baloia sarera bultzatzeko. Partidaren kontrola zuen Laskorainek, baina etxeko taldearen jokaldi batean berdinketaren gola iritsi zen. Jokaldia bigarren zutoinera pase batekin hasi zen. Koldo atezainak bi geldiketa egin ondoren atean sartzea lortu zuten. Jarraiean, lehen zatia amaitu aurretik, Etxebek horitxoentzat bigarren gola lortu zuen jokaldi on baten poderioz. Hortaz, atsedenaldira 1-2 irabazten joan ziren tolosarrak.
Bigarren zatia gogotsu hasi zuten mutilek, partida irabazteko gogoarekin. Aipatu, Xabatek bere lehen minutuak jokatu zituela lehen taldearekin. Minutuak pasa ahala, egoera nahiko kontrolatua zegoen eta are gehiago Zumetak hirugarren gola sartuta. Jokaldi luze bat izan zen eta amaiera bikaina eman zion taldeak. Etxeko taldeak aurrera egin zuen eta beraien bigarren gola eskuratu zuten. Dena den, pozak ez zuen asko iraun, izan ere, Etxebek bere bigarren gola lortu zuen eta taldearen laugarrena.
Partidaren amaieran, 5 minutu faltan alegia,  Saltzaileak taldeak atezain jokalaria atera zuen. Dena den, Laskorainek oso ongi defenditu zituen gola lortzeko saiakerak. Partidako azken hasperenean etxeko taldeak bere azken gola lortu zuen, hirugarrena hain zuzen ere. Aipatzekoak dira Koldo atezain gazteak eginiko geldiketak partidaren azken momentuetan. Pare bat hanka miragarri atera zituen aurkarien jaurtiketak geldituaz. Azkenean, 3-4 bisitarien alde eta hiru puntuak Tolosara.
Laskorainek  gogor hasi du liga eta bigarren postuan dago 2. jardunaldia amaitu ostean. Lehen postuan Goierri taldea dago. Hurrengo astean, Meatzari Petronor taldea hartuko du etxean taldeak eta partida irabaztea espero dute sailkapenaren zati gorenean jarraitzeko.
Ermua-ra bidaiatu  zuten taldekideak: Javi delegatua, Javi eta Aitor prestatzaileak, Koldo, Gil, Murgi, Lakun, Joniko – hasierako bostekoa-, Etxebe, Zumeta, Beñat, Manso eta Xabat jokalariak.
Klubeko gainontzeko partidetako emaitzetan ezin goraipatu gabe utzi Nazional Ohorezko Mailako jubenilek lortutako garaipena. Zorionak mutilak!
Lurraldeko 2. Maila: Gure Txokoa 3-3 Laskorain
Nazional Ohorezko Mailako Jubenila: Laskorain 4-2 Auzoak de Zierbena
Lurraldeko Jubenila: Laskorain 1-4 Samaniego Orixe A

2014-10-08

Laskorainen garaipen bikaina lehenego jardunaldian

Pasa den larunbatean Usabal kiroldegian eman zion hasiera Laskorain taldeak denboraldiari.

Hilabete bateko aurredenboraldia egin ostean, indar eta ilusioz beteriko jokalariek, gogotsu ekin zioten aurten beraien aurrean topatuko dituzten erronka berrien lehenengo kapituluari.
Aipatu beharra dago ere, aurten Laskoraineko lehenengo taldeak, Xabat Turrillas jokalaria fitxatu berri duela. Animo eta zorte on.
Laskorainek, Lasarteko Ostadar FS Carpinteria Antonio (aurreko urtetako Clinica Dental Aldaz – Buruntza) jaso zuen Usabalen. Ezagunak aitzaki, haseratik bi taldeek errespetu handiaz jokatu zituzten beraien kartak, baina 6. minutuan Laskorainen lehenengo sareraketa etorri zen Gil kapitainaren eskuz falta baten ostean arbitroek kanpoko taldearen atezaina kaleratu ondoren.
Minutuak pasa ahala, kanpotarrek ez zuten minik egiten Aratzen atean eta horrek etxekoei konfidantza eman zien.
Horren ondorioz, Lakunek eta kanpoko taldeak beraien atean sartu zuten gola laskoraindarrentzat, nahiz eta denak jakin Zumeta jokalariaren sareratzea izan zela, baina lehenengo zatia bukatu baina segundu bat lehenago Jonikok laugarrena egin zuen markagailuan.
Bigarren zatia hasi eta berehala Lasarteko taldearen lehena etorri zen, baina etxeko taldearen nagusitasuna berriz ere ikusi ahal izan genuen eta Etxebe, Jonikok, berriz, eta Vazkezek, gol bana sareratuta, 7-1ekoa ipini zuten.
Azkenik lasartearrak bigarren sareratzea lortu zuten ia denbora agorturik zegoela.
Usabaleko kiroldegian lehe hiru puntuak poltsikoratu zituzten Javi delagatuak, Javi eta Aitor prestatzaileek, Aratz, Murgi, Gil, Zumeta eta Etxebe-haserako bostekoa-, Joniko, Arkaitz, Lakun, Iker, Josu eta Vazkez jokalariek.
Klubeko gainontzeko taldeen emaitzetan aipatu jubenil biek jasan dituzten porrot gogorrak eta filialak lortutako garaipena.
Lurradeko 2. Maila: Laskorain 6-5 Baobab
Nazional Ohorezko Mailako Jubenila: Ribera de Navarra 11-1 Laskorain
Lurraldeko Jubenila: Samaniego Orixe B 10-1 Laskorain

2014-05-21

Garaipena lortu zuen Laskorainek azkeneko jardunaldian (7-5)

Pasa den larunbatean Usabal kiroldegiaren beherako kantxan, txapelketako azken jardunaldia jokatu zuen Laskorainek Basauriko Soloarte taldearen aurka. Tolosarrek, beraien jarraitzaileei merezi zuten agurra eman nahi izan zieten, azkeneko 3 puntuak etxean utziaz.

Partida bikain hasi zen etxeko taldearentzat, kontraeraso polit baten ostean Lakuntza mendizaleak arratsaldeko lehena egin zuen eta ondoren buruz buruko jokaldi polit bat eta gero Jonikok bigarrena lortu zuen laskoraindarrentzat.

Arazorik gabe jolasten ari ziren Aitorren mutilak eta horrela Josuk, jokaldi bikain bat egin eta gero hirugarrena egin zuen. Bizkaitarrak gerturatu egin ziren markagailuan 3 eta 2koa lortu arte baina, Endika atezainak hasitako kontraeraso eder batetik etorri zen etxekoen laugarren gola, Mansok ate aurrean bakarrik bultzatu baitzuen Jonikok eginiko pase bat.

Orduan Laskorain taldearen aurtengo goleatzaile nagusiaren txanda iritsi zen, area ertzean baloi bat jaso ondoren, atezaina lurrean utziz 5 eta 2koa lortu zuen Andoni Zumeta pitxitxiak, lehenengo zatia bukatu baino lehen.

Bizkaitarrek atezain-jokalaria atera zuten hasieratik bigarren zatian, baina ez zirudien gauzak ondo aterako zitzaienik eta orduan iritsi ziren tolosarren beste bi golak, lehena Mendik, eta bigarrena Etxeberen bitartez, biak oraingoan ere kontraerasoaz.

Lehia bukatutzat eman zuten Aitor Garciaren mutilek, baina hori izan zen arratsaldeko akatsik nagusiena, bizkaitarrek, tentsio jeitsiera hori probestuaz, hiru gol egin zituzten. Azkenik 7 eta 5eko emaitzarekin bukatu zen partidua.

Aitor eta Javi delegatuak, Endika, Lakun, Etxebe, Balerdi eta Joniko -haserako bostekoa-, Gil, Murgi, Josu, Manso, Mendi, Zumeta eta Aratz, izan ziren Usabalen larunbatean.


Denboraldi bikaina egin du aurtengoan ere Laskorainek, azkenik hirugarren postua eskuratuaz.

Zorionak Mutilak!!

2014-05-13

Berdinketa Laskorain taldeak Gasteizko Aurrera liderraren aurka (5-5)

Lehen postuan doan eta txapeldun izateko bidean dagoen Aurrera taldeari aurre egitea egokitu zitzaion Laskoraini etxetik kanpoko denboraldiko azken partiduan. Helburu bezela hirugarren postua lortzea izanik, baliogarri izan daiteken 5-5eko berdinketa batekin itzuli ziren tolosarrak.

Gogotsu kantxaratu ziren bi taldeak, ez zuen inorrek baloiaren jabe izatea lortzen, baina gasteiztarrei, partidu hasieran egindako kantxa erdiko presioak, berehala eman zizkien arratsaldeko lehen aukerak kontraerasoan. Hauetako batetatik falta bat lortu eta baloia ongi mugitu ostean 1-0ko gola egitea lortu zuten.

Horitxoek lanean jarraitu zuten, eta zortea aldeko edukita hiru gol jarraiean egitea lortu zuten bertako polikiroldegian urduritasuna ezarriaz. Berdinketaren gola bere atean sartu zuen Aurrerako jokalari batek bigarren zutoinera zijoan jaurtiketa bat mozteko asmotan. 1-2koan Lakun izan zen golegile ate aurrean geratu zen alderatze bat probestuaz eta 1-3koa berriz ere bere atean sartu zuen Aurrerako taldekide batek.

Lehen zatiko azken txanpan etxeko taldea izan zen partiduaren jaun eta jabe, aukerak bata bestearen atzetik sortu zituen, Laskorainen zonakako defentsari min handia eginaz, eta honela, atsedenaldira iritsi aurretik aldea murriztea lortu zuten urrunetik egindako jaurtiketa on batekin.

Bigarren zatia, lehena amaitu zen modu berean hasi zen, Aurrerak garaipena behar zuen eta indartsu atera ziren euren helburua lortzeko asmotan. Horitxoak ez ziren gai izan etxekoen erasoaldiak geldiarazteko eta bost minutu pasatzerako 4-3ko emaitza zegoen markagailuan. Hirunakoa bakarkako jokaldi on baten ostean etorri zen eta 4-3koa kontraeraso bat gauzatuaz.

Laskorain taldea partiduan atzetik ikustean erasoko jokaldietan arriskua sortzen hasi zen. Hauetako batetan, Etxebek baloia eskuin hegalean hartu eta aurkaria atzean utzi ostean area ertzeko jaurtiketa batekin berdinketa ezarri zuen berriz ere 10 minutu faltan.


Urtean zehar Gasteizen entrenatzen duen Zumetak, Aurreraren detaile polita jaso zuen.
Gol honekin partidua ireki zen, aukerak orokorrean etxeko taldearentzat ziren, baina Aurrera taldeak garaipena behar zuela baliatuaz tolosarrek ere izan zituzten heuren aukerak. Partidua amaitzeko minutu bat falta zela, Laskorain taldeak kontraerasoan atera behar zuela zirudien jokaldi batetan baloia galdu eta gasteiztarren kapitainak galera honi etekina atereaz txapeldun egiten zien gola egitea lortu zuen jaurtiketa batekin.


Ikastolakoak atezain jokalariarekin saiatu ziren, eta partidua horrela amaituko zela bazirudien ere, 20 segundu faltan baloia ondo mugitutako jokaldi batetan Zumetak (eskuineko argazkian) horitxoen bostgarren gola egin zuen 5-5eko azken emaitza utziaz.
 
Berdinketa honekin Laskorain taldeak hirugarren postua berreskuratu zuen denboraldia amaitzeko jardunaldi bat geratzen delarik. Azken partidu hau Usabal kiroldegian izango da Basauriko Soloarte taldearen aurka. 

Sentsazio gazi-gozo batekin bueltatu ziren larunbatean, Aitor eta Javi prestatzaileak, Endika, Beñat, Murgi, Etxebe eta Zumeta -haserako bostekoa-, Iker, Gil, Lakun, Arkaitz, Manso eta Josu jokalariak.

2014-04-30

Laskorainek berdinketarekin konformatu behar izan zuen Goierriren aurka (4-4)

Bi asteko geldialdiari amaiera emanez elkartu ziren larunbat arratsaldean Laskorain eta Goierriko jokalariak Usabalen.  Kanpotarrak, lehen 8 postuetan sartzeko borrokari eusteko asmoz kantxaratu ziren eta etxeko taldea, berriz, azkeneko jardunaldian  alde egiten utzi zuten hirugarrengo postua berreskuratzeko gogoarekin.

Norgehiagokari erritmo bizia eman zioten bi taldeek hasieratik, atzean gogor defenditurik eta kontraeraso azkarrak burutuz. Hala ere, kanpoko taldea izan zen markagailuan aurre hartu zuena partidua hasi eta 6 minutuetara.  Alderatze baten ostean Goierriko pivot-a Iker atezain gaztearen aurka geratu zen eta baloiak zutoina ikutu ondoren, defentsara bizkor zetorren Lakunek bere atean sartu zuen baloia.
Hala ere, Lakun ez zen behera etorri eta lanean jarraitu zuen markagailua berdintzea lortu zuen arte ezkerkada bikain bati esker. Aitor Garciaren mutilek, berdinketa lortu ostean intentsitatea igotzea lortu zuten eta atsedenaldirako 4 minutu geratzen zirenenan, estrategiako jokaldi bati esker, Andonik bi eta batekoa ipintzea lortu zuen.

Atsedenaldiak ez zion mesederik egin etxeko taldeari eta berehala ikusi zen atzetik markagailuan. Lehenbizi, kontraeraso batean lortu zuen berdinketa Goierrik eta 3 minutu beranduago, alderatze batean bi eta hirukoa ipini zuen.  Kanpoko taldeak markagailuan abantaila lortu bezain laster, etxeko taldeak aurrera pausu bat egin zuen eta baloiaren mantentzeari ekin zion ondorengo minutuetan, aukerak sortuz bata bestearen atzetik. Gainera, aipatzekoa da atezain kanpotarra lesionaturik utzi behar izan zuela Usabaleko kantxa eta horrek etxeko taldeari mesede handia egin zion.

Honela, Gil kapitain horitxoak berdinketa ipintzea lortu zuen jokaldi nahasi baten ostean. Hiru minutu eskas geratzen zirenean, Aitor  La Fugak” hutsartea eskatu zuen eta partiduaren bila joan zen atezain-jokalaria ateraz. Aurten ohikoa den bezala, kanpoko taldeak etxeko taldearen huts bat aprobetxatzea lortu zuen eta berriro ere aurre hartu zuen markagailuan.Hala ere, laskoraindarrak lanean segi zuten eta 28 segundu falta zirenean Andonik launakoa egitea lortu zuen, arratsaldean ikusitakoari justizia eginez.
Usabalen egon ziren Aitor eta Javi prestatzaileak – Iker, Gil, Etxebe, Manso eta Andoni- hasierako bostekoa- Joniko, Murgi, Lakun, Josu, eta Endika.

2014-03-25

Garaipena Laskorainek Santurtziko San Jorge taldearen aurka

Azken bi asteetako bolada txarrari amaiera eman zion ikastolako taldeak Santurtziko San Jorgeri partidua irabazi ostean. Bizkaitarrek sailkapeneko azken postuak uzteko asmotan egin zuten bidaia eta, nahiz eta Laskorainek partidu onik ez egin, hiru puntuak etxean geratu ziren.

Presioan oinarritutako defentsa batekin hasi zuten neurketa horitxoek, bizkaitarren baloi irteera oztopatu eta hauen ate inguruan lapurtutako baloiekin min egiteko asmotan. Intentsitate faltagatik behar bada, lehen bost minutuetan ikastolakoek ez zuten behar adina baloi lapurtu, baina erasoko jokaldi batetan, "Mister Potato" Katta jokalari gazteak bigarren zutoinera egindako jaurtiketa bat, bikain aprobetxatu zuen Zumetak arratsaldeko lehen gola egiteko.

Gol honek ez zituen partiduaren nondik norakoak aldatu, santurtziarrek garaipenaren bidean lanean jarraitu zuten eta Laskorainek gaizki defendatutako eta beraiek ongi egindako jokaldi batetan berdinketaren gola lortu zuten. Atsedenaldira emaitza honekin iritsiko zela bazirudien ere, azken minutuetan bisitarien ate inguruan egindako presio on baten ostean Zumetak baloia lapurtu eta Etxeberi ate aurrean bakarrik utzita, honek aurretik jarri zuen berriro ere etxeko taldea.

Bigarren zatian, aldea areagotzeko, intentsitatea handitzeko asmotan kantxaratu ziren horitxoak. San Jorge taldearentzat garrantzitsuak ziren hiru puntuak eta hauek lortzeko asmotan erasoan jarraitu zuten. Honela, Endikaren ate inguruan baloia ongi mugitutako jokaldi batetan jaurtiketa bat egin eta Zumetaren oinetan jo ondoren ate barrura joan zen baloia 2-2koa igoaz markagailura. Gol honek konfiantza eman zien bizkaitarrei eta erasoan baloia gehiago arriskatzen hasi ziren. Hau aprobetxatuaz, Gilek lapurtutako baloi bat kontraeraso batean bilakatu zen, eta baloia Etxeberi  eman ostean, honek aurkari bat atzean utzi eta Josu "Quagmire" ate aurrean bakarrik utzita Laskorainen hirugarren gola etorri zen.

Bost minutu falta zirenean partidua amaitzeko santurtziarrek atezain jokalariarekin saiatu ziren baina horitxoak izan ziren arratsaldeko azken bi golak egin zituztenak. 4-2koa Zumetak egin zuen, Murgik bikain eramandako kontraeraso bat maisutazunez definituaz. 5-2koa Etxeberen eskutik etorri zen kantxa erditik egindako jaurtiketa bati esker, atezainik ez zegoela aprobetxatuaz. Emaitza honekin amaitu zen partidua Usabalen, arratsaldeko hoberena emaitza izan zelarik horitxoentzat eta bertara gerturatutako Tolosalako ikuskatzaileentzat.

Hirugarren postua defendatzeko aurrera pausoa emanda gustora atera ziren Aitor eta Javi prestatzaileak, Aratz, Gil, Etxebe, Lakun eta Zumeta -haserako bostekoa-, Endika, Josu, Katta, Murgi eta Manso jokalariak.

2014-03-18

Laskorainek 4-2 galdu zuen Lasarten Buruntza Aldaz taldearen aurka

Azken bederatzi jardunaldiko bolada onari bukaera eman zion Laskorainek larunbatean Lasarten jokatutako partiduan eta ezin izan zituen 3 puntuak Tolosara ekarri. Etxetik kanpo erakusten ari zen emaitza mailari ezin izan zion jarraipenik eman eta Usabaldik urrun Azarotik galdu gabezegoen taldeak amore eman behar izan zuen pasa berri den jardunaldian.

Partidu gogorra planteatu zuten bi entrenatzaileek lehen segundutik eta bi taldeen kantxa guztiko presioak hasieratik isladatzen zuen 3 puntuak poltsikoratzeko asko izerditu beharko zutela. Horrela, presioan Zumetak lapurtutako baloi bati esker eta Gil kapitainari baloia pasa ondoren, azken honek sarea zulatzea lortu zuen arratsaldeko lehen gola gauzatuaz.
Ez zuen asko iraun poztasunak ikastolako taldean, izan ere etxekoen hurrengo eraso arriskitsuan Aratz atezaina gailentzea lortu  bait zuten berdinketa ipiniaz. Tolosarren bigarren gola, lehen golaren era berean iritsi zen Zumetaren bitartez. Atsedenaldira iritsi aurretik etxeko taldeak berdinketaren gola lortu zuen.

Bigarren zatian partiduaren bila irten zen Aitorren taldea baina, etxeko atezainaren lan onak batzuetan, eta kanpotarren punteria faltak besteetan, ez zuten asmatu baloia sareratzen. Kontraerasoan irtendako jokaldi bat ederki aprobetxatu zuen ordea etxeko taldeak, laskoraindarrek area ertzean egin behar izandako falta baten ondorioz lortu bait zuten aurretik jartzea lasartearrak.
Arratsaldeko tentsio handieneko minutuak bizitzen ari ziren Lasarteko kiroldegian eta ondorioz bi taldeak 5 falta pilatu zituzten minutu asko gelditzen zirelarik jokatzeko. Tolosarrek izan zuten 10 metrotatik gola egiteko lehen aukera baina Lakunek ez zuen asmatu eta ondoren aukera etxekoek izan zuten, Endikak lehen jaurtiketa desbideratzea lortu zuen baina aldaratzea jokalari berdinari iritsi zitzaion eta bigarrengoan ez zuen hutsegin markagailua 4-2 ipiniaz.

Partidua maldan gora jarri zitzaien tolosarrei eta 7 minutu faltan atezain-jokalaria kantxaratzea erabaki zuen partiduaren dinamika aldatzeko asmoz baina minutuak aurrera zihoazen eta markagailua ez zen gehiago mugituko etxeko taldearen defensa onaren eta ikastolakoen ideia faltaren ondorioz.
Larunbatean burumakur egin zuten Tolosara buelta Javi delegatuak, Aitor entrenatzaileak eta Aratz, Balerdi, Gil, Lakun, Josu –haserako bostekoa- Murgi, Etxebe, Manso, Mendi, Zumeta eta Endika taldekideek. Harrobiari dagokionez, Santxoren taldeak garaipen garrantzitsua lortu zuen Usabalen (6-3).

2014-03-11

Berdinketarekin konformatu behar izan zuen Laskorainek (5-5)

Iñauterietako ajeak alde batera utzita Donostiako Inter taldearen aurka jokatzea egokitu zitzaion Laskoraini. Behar bezala prestatu gabeko partidu baten aurrean aurkitu baziren ere, horitxoak gogotsu burrukatu eta berdinketa lortu zuten.

Beroketan lehen izerdiak botata lanerako prest kantxaratu zen etxeko taldea, ohiko zonakako defentsan zirrikituak ongi ixtea lortu zuen partiduko lehen minutuetan eta maiz lapurtutako baloiekin kontraeraso onak burutu zituzten ikastolakoek. Hauetako batetan Zumeta gazteak arratsaldeko lehenengoa egitea lortu zuen, azkar eramandako kontraeraso bat eskuinkada bikain batekin amaituaz.
 
Hortik gutxira, donostiarren beste baloi galera bat aprobetxatuaz, Gil kapitainak atezainaren aurrean baloia maisutasunez loratuaz 2-0ko markagailua ezarri zuen. Inter taldeak erasoan jarraitzen zuen baina Endika atezainaren lan onak ezerezean uzten zituen hauen saiakerak. Emaitza honekin ailegatu ziren atsedenaldira bi talde gipuzkoarrak.

Bigarren zatiko lehen minutuak garrantzitsuak izango zirela argi edukita  kantxaratu ziren horitxoak. Lehenengo zatian egindako lan bikainari jarraipena eman zien tolosarrak haserako minutuetan. Honela, Etxebek kantxa erdian baloia lapurtu eta Joniko txaranga zuzendariarekin pareta egin ostean baloia sareratzea lortu zuen 3-0 emaitza ezarriaz. Dena aldeko zuten laskoraindarrek, baina oraindik asko geratzen zen jokatzeko. Inter taldeak ez zuen amore eman, eskarmentuz betetako talde honek bere aukeretan sinesten jarraitu zuen eta etxekoen beherakada aprobetxatuaz markagailuari buelta ematea lortu zuen bata bestearen atzetik 4 gol eginaz.
 
Kolpe gogorra jaso zuten ikastolakoek, baina burua altxa eta erasoko bi jokaldietan bi gol egitea lortu zuten, markagailuan berriro aurretik jarriaz. Zumeta izan zen berdinketaren gola sartu zuena eta Joniko gol bateko abantaila eman ziona taldeari. 2 minutu faltan donostiarrek atezain jokalaria atera zuten, eta Laskorain erasoaldiak ongi defendatzen ari bazen ere 7 segundu faltan Interrek berdinketaren gola egitea lortu zuen, 5-5eko azken emaitza utziaz.

Porrotaren zaporeko berdinketarekin konformatu behar izan ziren Usabal kiroldegian Aitor eta Javi prestatzaileak, Endika, Beñat, Gil, Etxebe eta Zumeta -haserako bostekoa-, Aratz, Josu, Lakun, Manso eta Joniko jokalariak.

2014-02-11

Garaipen berri bat Laskorainek Elorrioko Buskantzaren aurka (4-2)

Partidu erakargarri baten aurrean aurkitu zen Laskorain taldea Usabal polikiroldegian, hirugarren postuan egonda bostgarrenean zijoan Elorrioko taldearen aurka jokatzea tokatzen baitzitzaion. Horitxoek partidua hasieratik menderatu zuten eta 4-2ko emaitzarekin bostgarren garaipena jarraian lortu zuten.

Partiduko haserako minutuak oso parekatsuak izan ziren, Elorrioko taldeak kantxa erdian banakako defentsa planteatu zuen, kontraerasoan jokalari azkarrekin min egiteko asmotan. Baloia ongi mugitutako jokaldi batetan kanpotarrek partiduko lehen abagune garbiaz gozatu ahal izan zuten, baina ez ziren sareratzeko gai izan. Baloiaren jabetza horitxoena zen eta erasoko jokaldietako batetan, Zumetak egindako mugimendu on bat Gil kapitainak bikain ikusi eta pase on bat eman ostean 1-0ekoa igo zuen markagailura pibot gazteak.

Denbora gutxira, horitxoen aldeko falta batetan, ohikoa duten jokaldi estrategiko bat erabilita Murgik arratsaldeko bigarren gola egitea lortu zuen. Atsedenaldia iritsi aurretik, Etxebek kantxa erdian aurkariari baloia lapurtu eta atezainaren aurrean maisutazunez definituaz horitxoen hirugarren gola egin zuen.

Lehen zatian lortutako abantailari etekin ateratzeko asmotan kantxaratu ziren horitxoak. Partiduak ildo beretik jarraitu zuen, baloiaren jabetza berriro ere ikastolako taldearentzat izan zen, baina abagune argirik sortu gabe. Minutuak aurrera joan ahala talde bizkaitarra gehiago arriskatzen hasi zen markagailuari buelta emateko asmotan, etxekoen ate ingurura arriskua eramanaz. Hauetako jokaldi batetan, Elorriokok egindako jaurtiketa bat Aratzek geratu eta azkar atera ostean Etxebe taldekidea aurkariaren ate aurrean bakarrik utzi zuen pase zehatz batekin, honek ezkerkada batekin 4-0ekoa sareratu zuelarik.
 
Azken minutuetan, Laskorainen bostgarrena etor litekeen jokaldi batetatik kanpotarrek kontraeraso azkar bat egin eta 4-1koa sareratu zuten. Partidua amaitzeko segundu bat falta zela, talde bizkaitarrak 10 metrotako jaurtiketa bati etekina aterata euren arratsaldeko bigarren gola egin zuten 4-2ko azken emaitza utziaz.

Emaitzarekin gustora geratu ziren larunbatean Aitor eta Javi prestatzaileak, Aratz, Gil, Murgi, Lakun eta Zumeta -haserako bostekoa-, Endika, Etxebe, Joniko, Manso eta Josu jokalariak.
 

2014-02-04

Laskorainen garaipen bikaina Tolosako derbyan (2-7)

"Welcome to the jail". Esaldi esanguratsu honekin jaso zituzten laskoraindarrak Eskolapioetako kiroldegian Tolosalako ultrek, pankarta erraldoi bat erakutsiaz.

Hiru puntu baino gehiago zeuden jokoan larunbat arratsaldean jokaturiko partiduan, batzuek ohorea zela esaten zuten, beste bazuek ordea errebantxa bat bezela ikusten zuten, lehengo urtean kiroldegi berean bizitako partidua zela eta.

Osagai guzti horiekin hasi ziren jolasten bi taldeak.

Etxeko taldea izan zen lehena markagailua estreinatzen, eta horrekin batera defentsa gogor batekin beraien kartak erraz erakutsi zituzten, kontraerasora itxaron eta ahalik eta min gehien eginez, baina Lakunza laskoraindarraren erantzun bikaina berehala etorri zen 1-1ekoa ipiniaz bolea polit baten bitartez.

Horrela bukatu zen lehen zatia.

Atsedenaldiaren ondoren bi taldeak errespetu hadiz kantxaratu ziren, baina jokaldi polemiko baten ondoren Zumetak bere arratsaldeko lehena egin zuen penaltia sareratuaz. Partidua berotzen hasia zen ordurako baina Lakunzaren baloi lapurketa baten ondoren, Jonikok kanpo erdian jaso eta hirugarren gola lortu zuen horitxoentzat. Txapela kentzeko modukoa.

Tolosala taldekoek beraien erantzuna eman zuten 2-3koa ipiniaz baina orduan beraien taldekide bat kanporatua izan zen bigarren txartel horia ikusi eta gero.
Kantxan jokalari bat gutxiagorekin, horitxoek ederki aprobetxatu zituzten beraien aukerak eta Zumetak bere arratsaldeko bigarrena egin zuen.

Partidua erabat hautsi egin zen eta horrela, lehenik eta behin, Gilek, Endika atezainaren pase polit baten ondoren, berriro ere Zumetak, hat-tricka lortuz, eta azkenik Josuk, egin zituzten gol bana Laskorainentzat (2-7).

Larunbat arratsaldean Tolosako Eskolapioetako Kiroldegian, Aitor entrenatzailea, Javi delegatua, Aratz, Gil, Josu, Etxebe eta Zumeta-haserako bostekoa- Murgi, Joniko, Manso, Lakun eta Endika.

                                                    
Azkenik, lerro hauen bitartez, gure doluminik beroenak eskeini nahi dizkiogu Urtziren familia, lagun eta Tolosa CF taldeari pairatu galeragatik.